Jehovaqa sunqu pʼakisqasta uyarin

REY Salomón qhawasqanmanjinaqa, “tiempo chayamojtin, wakimpaj allin imas tiyan, wakimpajtaj mana” (Ecl. 9:11). Ichá, kawsayninchikta tikrachinanpaqjina, juk jatun chʼampay rikhurinman. Ichapis mana suyachkaptillanchik familianchikmanta pillapis wañupunman, chayqa may jatun llakiy. Wakinkunaqa, ajinapi rikukuspa semanasta chayri killasta mayta phutikunku. Wakinkunataq mana imanakuyta atispa, Jehovamanta mañakuytapis mana atinkuchu.

Jinapi rikukuspaqa, mayta sunquchanawanchikta, kallpachanawanchikta ima, necesitanchik. Chayraykuchá David nirqa: “Tata Diosqa tukuy urmajkunata oqharispa sayachin, jinallatataj kʼumuykachachisqastapis aysarin”, nispa (Sal. 145:14). Bibliaqa, nillantaq: “Tata Diosqa sumajta qhawamushan tukuy kay pachata, kallpachanampaj tukuy sonqowan payllapi atienekunku, chaykunata”, nispa (2 Cró. 16:9). Diosqa nin: “Llampʼu sonqoyojwan, kʼumuykukojwan kashani, kʼumuykukoj sonqoyojkunata, sonqo pʼakisqastapis kusichinaypaj”, nispa (Isa. 57:15). Chaywanpis, ¿imaynatá sunqu pʼakisqasta kallpachan?

‘Tiemponpi parlariy’

Jehovaqa, kamachisninta qutuchakuyniqta kallpachan. Bibliaqa, ‘pisi kallpastapis kallpachananchikta’, niwanchik (1 Tes. 5:14). Cristianosqa, ñakʼariypi kaqkunata, kʼachamanta munakuywan, sunquchasunman. Ichá ñawpaqpi, jina llakiyllapitaq rikukuqkuna chayri juk sumaq amigon, pisi parlaykunallawan mayta sunquchanman. Arí, Jehovaqa, sunqu pʼakisqasta chayjina yanapaykunawan sunquchan.

Juk ancianop kawsayninmanta parlarina. Payqa, Alex sutikun. Casarakusqanmanta, pisi tiemponman warmin juk unquywan wañupurqa. Qutuchaykukunata waturiq hermanotaq sunqucharqa, paypatapis warmin wañupusqa. Chaywanpis watiqmanta casarakusqa. Payqa, wakin kutis may phutisqa, pisi kallpayuq ima, sientekusqanta willarirqa. Willaypi, tatankuykunapi ima, kallpachakusqanta, chaywanpis wasinman chayaspaqa, watiqmanta sapallan rikukusqanta willarillarqataq. Alex jinata nin: “Mana ñuqallachu, chayjina llakiypi kasqayta yachayqa, yanapawarqa”, nispa. Rikunchikjina, llakiypi kaptinchik, pillapis ‘tiemponpi parlariwaptinchikqa’ yanapawanchik, sunquchawanchik ima (Pro. 15:23).

 Achkha viudo hermanosta, viuda hermanasta riqsiq ancianopis, Alexta kallpachananpaq waturillarqataq. Payqa, sunquchananpaq, Jehová sunqunchikta riqsisqanta, imatachus necesitasqanchikta yachasqanta ima, nirqa. Chantá jinata nirqa: “Tiempo pasasqanmanjinaqa, ichapis watiqmanta casarakuyta munanki. Chaytaqa, Jehová mana juchatajinachu qhawan”, nispa. Chaywanpis, mana tukuy viudospunichu watiqmanta casarakuyta atinku. Alexqa, hermanop nisqanpi tʼukurispa nirqa: “Watiqmanta casarakuypi yuyaspaqa, warmiyta chayri Jehovata wasanchachkasqayta yuyaq kani. Chayrayku, Jehová watiqmanta casarakuyta saqillawasqanchikta yuyarichiwasqanqa, mayta sunquchawarqa”, nispa (1 Cor. 7:8, 9, 39).

Davidqa, kawsayninpi achkha ñakʼariykunapi, chʼampaykunapi ima, rikukurqa. Salmospi jinata nirqa: “Tata Diosqa cheqan runasta waqaychan, qhaparikusqankutataj uyarin”, nispa (Sal. 34:15). Jehovaqa, chiqamanta sunqu pʼakisqasta uyarin. Wakin kutipitaq munakuyniyuq, yuyayniyuq hermanosniqta sunquchan. Chayqa juk sumaq yanapa, ¿icharí?

Tantakuykuna mayta yanapawanchik

May llakiyniyuq cristianosqa, mana allinta yuyaspa, wakkunamanta karunchakuyta qallarinkuman. Chaywanpis, Proverbios 18:1 pʼiti nin: “Imatapis payllapaj munaj runaqa imatachus maskʼasqasnin juntʼakunallanta munan; imatapis yuyaychayta munajtinku, mana uyarikuyta munanchu”, nispa. Alexqa, nirqa: “Warmiy wañupuptinqa, mana allin yuyaykuna umaykipi rikhurirqa. Sapa kutitaq tapukuq kani: ¿Imaraykutaq warmiywan mana aswan allintachu tiyakurqani? ¿Imaraykutaq warmiywan, mana aswan kʼacha runachu karqani?, nispa. Chantapis, manaña sapallay kayta munarqanichu. Chay yuyaytaqa, mana saqiyta atirqanichu, imaraykuchus sapa  pʼunchay, sapallay kasqayta yuyaq kani”, nispa.

Sunqu pʼakisqa kachkaptinchikqa, amigosninchik, kallpachanawanchikta necesitanchik. Paykunatataq qutuchakuypi tarisunman. Chantapis tantakuykunapiqa, Diosninchik sunquchanawanchikpaqjina yachachiykunata uyarinchik.

Tantakuykunaqa, kawsayninchikta maychus kaqta qhawanapaq yanapawanchik. Bibliamanta ñawirikusqanpi tʼukuriptinchikqa, ima llakiymantapis qunqapunchik. Imaraykuchus, tantakuykunapiqa, Jehovap kamachiynin jatunchasqa kananpi, sutin llimphuchasqa kananpi ima, yuyanchik. Chantapis, imamantachus llakikusqanchikta, ichá mana tukuychu yachanku. Chaywanpis, Jehová imachus sunqunchikpi kasqanta yachasqan mayta sunquchawanchik. Arí, Payqa, pillapis “sonqo llakisqa kajtin[...], espiritupis mana kallpayoj” kasqanta yachasqanrayku, yanapayta munawanchik (Pro. 15:13). Chayta yachayqa, ñawpaqman rinallanchikpaqpuni kallpachawanchik (Sal. 27:14).

Davidqa, enemigosnin mayta qhatiykachasqankurayku Diosmanta jinata mañakurqa: “Ancha llakisqa kashani, sonqoypitaj iskayrayasqa kashani”, nispa (Sal. 143:4). Davidtajina, chʼampaykunaqa llakichiwasunman saykʼuchiwasunmantaq. Ichá unaytaña chayri kunallanraq unqusqa kachkanki. Chaywanpis, Jehovaqa sinchita sayanaykipaq yanapasunqa (Sal. 41:1-3). Yachanchikjina Jehovaqa, jampinawanchikpaq mana milagrosta ruwanchu. Chaywanpis, llakiykunata atipanapaq kallpachawanchik, yuyaychawanchik ima. Davidqa, may llakisqa kachkaspa Jehovapi atienekurqa. Chayrayku, jinata nirqa: “Ñawpa pʼunchaykunamanta yuyarikuni, tukuy ruwasqasniykipi yuyarikuni”, nispa (Sal. 143:5).

Jehová, kay parlaykunata, Bibliapi qillqachisqanqa, pay llakiyninchikta yachasqanta, mañakusqanchikta uyarisqanta ima, rikuchin. Jehovawan yanapachikuptinchikqa, “sinchʼita, sayachi[wasun]“ (Sal. 55:22).

‘Mana saykʼuspa, mañakullaychikpuni’

Santiago 4:8 nin: “Diosman astawan qayllaykuychej; paypis qayllamusonqachej”, nispa. Kaytaqa, mañakuspa juntʼasunman. Apóstol Pablopis yuyaycharqa: “Mana saykʼuspa, Diosmanta mañakullaychejpuni”, nispa (1 Tes. 5:17). Imachus sunqunchikpi kasqantaqa, mana parlariyta atillanchikchu. Chaywanpis, espíritu santo “mana niy atina palabraswan ayqospa, noqanchejpaj mañapuwanchej” (Rom. 8:26, 27). Arí, Jehovaqa, imachus sunqunchikpi kasqanta yachan.

Monikaqa, Jehovawan sumaqta masichakun, nintaq: “Jehovamanta mañakusqayrayku, Bibliata ñawirisqayrayku, Bibliata sapallaypi ukhunchasqayrayku ima, Payqa sumaq amigoyman tukun. Pay, tukuy imapi yanapachkawasqanta reparani. Imachus llakichiwasqanta mana willayta atiptiypis, Jehová ñawpaqmantaña chayta yachasqanqa, mayta sunquchawan. Diospa munakuynin, kʼacha kaynin imaqa, mana tukukuyniyuq”, nispa.

Chayrayku, hermanosninchik kallpachanawanchikta saqina. Tantakuykunapi, munakuywan yuyaychawasqanchikta kasukuna. Jehovamantataq tukuy sunqu mañakuna. Jehovaqa chayjinasmanta, munakuyninta rikuchiwanchik. Alexqa, kawsayninpi llakiykunata rikukusqanmanta nirqa: “Jehovaqa, payta yupaychanapaq kallpachawanchik, yanapawanchik ima. Chaymanjina ruwanapaq kallpachakuptinchikqa, ‘may sumaq atiynintaʼ japʼisunchik, llakiytapis atipasunchik”, nispa (2 Cor. 4:7).

[18 paginapi recuadro, dibujo/foto]

Sunqu pʼakisqaspaq sunquchaykuna

Achkha salmos, Diospa kamachisnin chʼampaykunapi rikukuspa, may llakisqa kachkasqankuta rikuchiwanchik. Jehová mañakusqankuta uyarisqantapis rikuchillawanchiktaq. Kay urapi kaq salmosta ñawirina.

“Jina phutiypi kashaspa, Tata Diosta wajyakorqani. Diosniymanta yanapata mañakorqani. Paytaj Templonmantapacha uyarimuwarqa, qhaparisqaytaj ninrisninkama chayarqa.” (Sal. 18:6.)

“Tata Diosqa qayllallapi kashan salvanampaj juchallisqankumanta sonqonkuta nanachikojkunata, pikunachus manaña salvasqa kayta suyankuchu, chaykunata.” (Sal. 34:18.)

“[Jehovaqa] sonqo pʼakisqasta thañichin, nanasqasninkutataj jampiykun.” (Sal. 147:3.)

[17 paginapi dibujo/foto]

Sunqu pʼakisqa kaqta ‘tiemponpi parlayqa’ sunquchanman