Ñawiriqkunapta tapuyninku

Génesis 6:3 pʼitipi nin: “Mana saqesajchu runasqa kay pachapi wiñaypaj kawsanankuta, imaraykuchus paykunaqa aychalla kanku. Chayrayku kawsanqanku pachaj iskay chunkayoj watasllata”, nispa. Jehová, kay rimaykunawan runas 120 watasllata, ¿kawsanankutachu nichkarqa? ¿Noemanchu 120 watasta runasman willananta nichkarqa?

Ni mayqin chiqachu.

Jatun Paramanta ñawpaqtaqa, achkha runas unayta kawsarqanku. Noepis, Jatun Para chayamuchkaptin 600 watasniyuqña karqa, 950 watasniyuqtaq wañupurqa (Gén. 7:6; 9:29). Chantapis, Jatun Paramanta qhipaman paqarikuqkunaqa, mana 120 watasllatachu kawsarqanku. Arfaxadqa, 438 watasta kawsarqa, Salataq 433 watasta (Gén. 11:10-15). Moisespa tiemponpirí, 70 chayri 80 watasllataña kawsaq kanku (Sal. 90:10). Chayrayku, Génesis 6:3 pʼitiqa, runas mana 120 watasta kawsanankutachu, nitaq chay chhika watasmanpuni chayanankutachu nichkan.

Jina kaptin, Dios, ¿Noemanchu 120 watasmanta saqra runasta chinkachinan kasqanta willananta nichkarqa? Mana. Chaywanpis Jehovaqa, wakin kutispi, Noewanpuni parlarqa. Sutʼincharinapaq, chaymanta chunka pʼitis qhipapi, “Diosqa, Noeta nerqa: Noqa tukuchisaj kay runasta. Paykunaj juchallikusqankurayku imaymana jucha kay pachaman juntʼan”, nispa. Watasninmantaq Noé arcata ruwayta tukusqantawan “Diosqa Noeta nerqa: Arcaman yaykuy tukuy familiaykiwan”, nispa (Gén.  6:13; 7:1). Wak kutispipis wak imasta willallarqataq (Gén. 8:15; 9:1, 8, 17).

Chaywanpis, Génesis 6:3 pʼitipi nisqanqa, mana kikinchu. Imaptinchus, mana Noemantachu parlan, nitaq Dios paywan parlachkasqantachu nin. Chayrayku, chay pʼitipiqa, Jehová sapallanpi imatachus ruwananta nichkarqa (Génesis 8:21, kikinchay). Chantapis, niraq runata ruwachkaptinqa, Bibliapi achkha kutista kay rimaykuna rikhurin: “Dios nerqa”, nispa (Gén. 1:6, 9, 14, 20, 24). Arí, Jehovaqa mana runawanchu parlachkarqa, imaptinchus niraq Adanta ruwachkarqachu.

Chayrayku, Génesis 6:3 pʼitipiqa Dios, saqra runasta chinkachinanta nichkarqa. Jehovaqa, Sumaq Juezjina 120 watasmanta chayta ruwananta nichkarqa, Noetaq chayta mana yacharqachu. Chantá, ¿imaraykutaq 120 watasmanta chinkachinanta nirqa? ¿Imaraykutaq chay chhika watasta suyananta nirqa?

Apóstol Pedro imaraykuchus chayta ruwasqanmanta nin: “Diosqa jatun pacienciawan suyasharqa Noé arcata ruwashajtin, chaypacha. Chay arcapitaj pisi runaslla, pusajlla yakunejta salvasqa karqanku”, nispa (1 Ped. 3:20). Rikunchikjina Jehová, 120 watasta suyananta nichkaptinqa, wak imasraq kanan karqa. Iskay chunka watasninmanqa, Noep ñawpa kaq churin paqarikurqa (Gén. 5:32; 7:6). Noeqa, kimsa wawasniyuq karqa, paykunataq casarakurqanku, tukuyninkutaq “pusajlla” karqanku. Chaymantataq arcata ruwarqanku, chay arca jatun kasqanrayku, pisilla kasqankuraykutaq unaypichá tukucharqanku. Dios, 120 watasta suyasqanrayku, chay arcata ruwarqanku, chaypitaq salvakurqanku. Ajinamanta pusaq chiqa sunqu runas, “yakunejta salvasqa karqanku”.

Bibliaqa, Jehová, Noeman Jatun Parata apamunanta, ima watapichus nisqanta mana ninchu. Chaywanpis, Noep wawasnin paqarikusqankumanta, casarakunankukama achkha watasraqchá pasarqa. Jatun Para chayamunankamapis, tawa chunka chayri phichqa chunka wataschá pasarqa. Chayta mana sutʼitachu yachaptinchikpis, Jehovaqa, Noeman juk kuti nirqa: “Noqa tukuchisaj kay runasta”, nispa. Chantapis, juk arcata ruwananta, tukuspataq chayman familianwan yaykunankuta nirqa (Gén. 6:13-18). Watasninmantaq Noeqa, mana chiqan ruwaykunallatachu ruwarqa. Manaqa, “cheqan kajta willaj” karqa. Arí, Dios, chay tiempomanta saqra runasta chinkachinanta willarqa. Noé, ima watapichus Dios chayta ruwananta mana yachaptinpis, juntʼakunantapuni yacharqa. Chaytaq juntʼakurqapuni (2 Ped. 2:5).