Diospa espiritunwan yuyaychasqa Rey bendeciwasun
Diospa espiritunwan yuyaychasqa Rey bendeciwasun
“[Pay]pa patampi Tata Diospa Espiritun kanqa.” (ISA. 11:2.)
1. ¿Imatataq kay pachapi kawsaymanta wakin runas ninku?
CHʼASKASTA ukhunchaq runa (Stephen Hawking), 2006 watapi kayta nirqa: “Kay pachaqa politicamanta manchay chʼaqwa, runap kawsayninpis llakiy, Jallpʼa, yaku, aire ima, may chʼichichasqa kachkan, ¿imaynatá runas pachak watatawan kawsanqanku?”, nispa. Juk periodicopi, jinata nirqa: “Wakchayayta mana tukuchiyta atinchikchu, nitaq mana maqanakuyniyuq kawsaytapis apamuyta atinchikchu. Manaqa, astawan chʼampaykunata yapaspa jinanchik. Chaywanpis mana jinallachu qhipakunchik, manaqa tukuy imata ruwanchik. Wakin kamachiqkunaqa ni pi wakcha, nitaq qhapaq kananta maskʼanku. Wakintaq llamkʼaq astawan qullqiyuq kananta ninku, chantá Sociedad de Nacionesniqta chayri armasniqta maqanakuykunata tukuchayta munanku. ‘Maqanakuykunata tukuchinapaq achkha maqanakuykunata ruwasqanchikpis’ qhasilla, chayrayku ni pi chʼampaykunata tukuchinanchikta creenñachu”, nispa.
2. ¿Imaynatá Jehová tumpamantawan Paylla Kamachiq kasqanta rikuchinqa?
2 Jehovap kamachisninqa, kaykunata uyarispa, mana tʼukuchkaqchu qhipakunchik. Bibliapi, runas mana kamachikuyta atisqankuta nisqanrayku (Jer. 10:23). Jehovalla Kamachiqninchik kasqanrayku, Paylla imaynatachus kawsananchikpaq kamachiykunata churayta atin, imapaqchus kawsachkasqanchikta niyta atin, chayta juntʼanapaqtaq yanapawanchik. Tumpamantawanqa, runaspa kamachiyninkuta chinkachispa, Paylla kamachiq kasqanta rikuchinqa. Chiqan kamachiyninta qhisachaqkunatapis chinkachinqa. Arí, runas juchamanta, pantaq runas kaymanta, “kay pachaj diosn[in]” Satanasmanta ima, kacharichisqa kanankupaqqa, chayta ruwananpuni tiyan (2 Cor. 4:3, 4).
3. ¿Imatataq Isaías, Mesiasmanta ñawpaqmantaña nirqa?
3 Jehovaqa, musuq pachapi, Mesiaspa Reinonniqta, munakuywan kamachisqanta rikuchinqa (Dan. 7:13, 14). Profeta Isaías, Mesiasmanta nirqa: “Uj kʼullumanta ijimonqa, chay kʼulloqa Isaí; saphisninmantataj ijimojqa poqonqa. Chaypa patampi Tata Diospa Espíritun kanqa, chay Espiritutaj qonqa yachayta, yuyayta, yuyaychayta, atiyta, tukuy imata rejsiyta, Tata Diosta manchachikuyta ima”, nispa (Isa. 11:1, 2). Isaip ‘kʼullunmanta ijimoqqa’, Cristo. Chaywanpis, ¿imaynasmantataq Cristota espíritu santo runasta kamachinanpaq wakichin? ¿Ima bendicionestaq kamachiyninpi kanqa, imatataq chay bendicionesta japʼinapaq ruwananchik tiyan?
Diosqa, Rey kananpaq wakichin
4-6. Jesús, sumaq yachayniyuq, khuyakuyniyuq Rey, Kuraq Sacerdote, Juez ima, kananpaq, ¿imata riqsisqantaq yanapanqa?
4 Jehová, kamachisnin juntʼa runas kanankuta munan. Chaypaqqa, sumaq yachayniyuq, khuyakuyniyuq Rey, Kuraq Sacerdote, Juez ima, necesitakun. Chayrayku Diosqa, Jesusta akllarqa, espíritu santonwantaq kamachisqanta juntʼananpaq wakichirqa. Kunanqa, imaraykuchus Cristo, Tatanpa kamachisqanta sumaqta juntʼayta atisqanta qhawarina.
5 Diostaqa, ni pi Jesusjina riqsinchu. Payqa ni pijina, may chhika unayta Tatanwan khuska kachkan. Chay chhika tiempopitaq Kʼata Churinqa sumaqta riqsirqa, Paymantataq mayta yachakurqa, chayrayku “mana rikukoj Diospa rijchʼayninmin”, nispa sutichakun (Col. 1:15). Jesusllataq nirqa: “Noqata rikuwajqa Tataytapis rikun”, nispa (Juan 14:9).
6 Jesusqa, Jehovap ruwasqasninta, runasta ima, sumaqta riqsillantaq. Kay Colosenses 1:16, 17 pʼitipi Diospa Churinmanta jinata nin: “Paynejtamin Diosqa tukuy kaj chhikata ruwarqa: Janaj pachapi kaj imasta, kay pachapi kaj imastapis, mana rikukoj imasta, sutʼipi kaj imastapis [...]. Cristoqa karqapuni, manaraj imapis kashajtin, paytaj tukuy imata sayachishan”, nispa. Payqa, [“yanapaq maestrojina”, NM] Jehovata tukuy imata ruwaysirqa. Chayrayku, imaynachus janaqpacha, kay pacha, imaynachus runap ñuqtun ruwasqa kasqanta ima, sumaqta riqsin. Arí, payqa may yachayniyuqpuni (Pro. 8:12, 22, 30, 31).
7, 8. ¿Imaynasmantataq espíritu santo, Jesusta Jallpʼapi ruwayninta juntʼananpaq yanaparqa?
7 Jesusqa, espíritu santoniqta akllasqa karqa. Payllataq nirqa, Jehovap espiritun “noqapi kashan; jawiwaspa ajllawarqa sumaj willanasta wajchasman willanaypaj; kachamuwarqataj willajta presos kacharisqa kanankupaj, ciegos qhawarinankupaj, ñakʼarejkunataj samarichisqa kanankupaj, Señorpa allin watanmantapis willanaypaj” (Luc. 4:18, 19). Jesús bautizakuptinqa, espíritu santo janaqpachapi yachakusqanta yuyarichirqa, Jallpʼapi kachkaspa Diospa kamachisqanta imatachus Mesiasjina ruwanan kasqantapis (Isaías 42:1; Lucas 3:21, 22; Juan 12:50, ñawiriy).
8 Jesusqa cuerponpi, yuyayninpi ima, juntʼa karqa. Chantapis, espíritu santo atiyta qurqa. Chayrayku, mana may riqsisqa runallachu karqa astawanqa, ni pijina sumaq yachachiq karqa. Runaspis, “yachachiyninmanta mayta tʼukorqanku” (Mat. 7:28). Payqa, imaraykuchus runas juchallikusqankuta, pantaq runas kasqankuta, Diosta mana riqsisqankuta ima, yacharqa. Chantapis, runaspa sunqunkupi imachus kasqanta yachayta atirqa, chaymanjinataq parlapayarqa (Mat. 9:4; Juan 1:47).
9. Jesuspa kawsayninpi tʼukurispa, ¿imaraykutaq may sumaq Rey kananmanta mana iskaychakunchikchu?
9 Jesusqa, runajina kawsarqa. Payqa runajina kawsasqanrayku, pantaq runaswan kawsakusqanrayku ima, sumaq Reyman tukun. Pablo nisqanmanjinaqa, “tukuy imapi hermanosnin jina kanampaj churasqa [kanan] karqa. Ajinamanta khuyakuyniyoj kuraj kaj sacerdote churasqa kaspa, Diospaj tukuy ruwana kajta juntʼarqa, wañuyninnejta runaspa juchasninku pampachasqa kanampaj. Payqa kay pachapi ñakʼariypi probasqa karqa; chayraykumin yanapayta atin pruebapi kajkunata” (Heb. 2:17, 18). Arí, “probasqa” kasqanrayku, ñakʼariqkunamanta khuyakuyta atin. Chantapis, Jallpʼapi ruwayninta juntʼachkaspaña wakkunamanta khuyakusqanta rikuchirqa. Unqusqas kaqkuna, mana jampiy atina unquyniyuq kaqkuna, ñakʼariqkuna ima, —machitus chayri waynas— mana manchachikuspa payman qayllaykuq kanku (Mar. 5:22-24, 38-42; 10:14-16). Chiqa kaqta yachakuyta munaq llampʼu sunqu runaspis, payman qayllaykuq kanku. Chaywanpis, jatunchakuq, wapuykachaq “Diosta mana munaku[q]” runasqa, qhisacharqanku, chiqnikurqanku, paymantaq churanakurqanku (Juan 5:40-42; 11:47-53).
10. ¿Imaynamantataq Jesús munakuwasqanchikta rikuchirqa?
10 Jesusqa ñuqanchikrayku kawsayninta qurqa. Cristo ñuqanchikrayku wañusqanqa, may sumaq rey kasqanta rikuchillantaq (Salmo 40:6-10, ñawiriy). Payllataq nirqa: “Mana pipis aswan sinchʼi munakuyniyoj kanchu, kawsaqesninrayku wañojmanta nisqaqa”, nispa (Juan 15:13). Kay pachamanta kamachiqkunaqa, allinnillankuta maskʼaspa runasta ñakʼarichinku, chaywanpis Jesusqa, runasrayku kawsayninta qurqa (Mat. 20:28).
Diosqa, Jesusta wakichin wañuyninniqta bendecinanpaq
11. ¿Imaraykutaq Kacharichiwaqninchik Jesuspi atienekusunman?
11 Jesuslla wañuyninniqta, ima tʼinkaschus kaqtaqa, apamunqa. Jallpʼapi kachkaspa ruwasqanqa, Waranqa Watasta Kamachiyninpi Kacharichiwaqninchikjina, imatachus ruwananta rikuchinqa. Chayta rikunapaqtaq chiqa sunqu kana tiyan. Cristoqa, unqusqa kaqkunata, mana jampiy atina unquyniyuq kaqkunata ima, jampirqa, wañusqasta kawsarichirqa, achkha runasman mikhunata qurqa, wayrata, mama quchata imataq thasnuchirqa (Mat. 8:26; 14:14-21; Luc. 7:14, 15). Chaytaqa, mana atiyniyuq kasqanta rikuchinanpaqchu ruwarqa, manaqa munakuyniyuq, khuyakuyniyuq ima, kasqanrayku. Leprayuq runa thañichinanta niptin, Jesusqa mana iskaychakuspa nirqa: “Arí munani”, nispa (Mar. 1:40, 41). Waranqa Watasta kamachiyninpiqa, tukuy runasman chay khuyakuyninta rikuchinqa.
12. ¿Imaynatá Isaías 11:9 pʼiti juntʼakunqa?
12 Cristoqa, yaqha iskay waranqa watas ñawpaqta Diosmanta yachachiyta qallarirqa, chaytataq akllasqa cristianoswan khuska ruwallanqankupuni. Ajinamanta Isaías 11:9 pʼiti nisqan juntʼakunqa: “Tukuy jallpʼaqa Tata Diosta rejsiywan juntʼa kanqa, imaynatachus mama qochaman yaku juntʼaykun, ajinata”. Diosqa, Adanman Jallpʼata, tukuy animalesta ima, qhawananta kamachirqa, chay kamachiyta juntʼananchikpaqtaq yachachiwasun. Waranqa watas tukukuyninpiqa, Génesis 1:28 pʼitipi, Dios imatachus ruwayta munasqanta nisqan juntʼasqaña kanqa, Jesuspa wañuyninniqta tʼinkastapis japʼisunña.
Diosqa, Jesusta Juez kananpaq wakichin
13. ¿Imaynatá Jesús chiqan kaqtapuni ruwayta munasqanta rikuchirqa?
13 Cristotaqa, “Dios chura[rqa] kawsajkunata, wañusqastapis juzganampaj.” (Hech. 10:42.) Dios, payta akllasqanqa, ¡mayta sunquchawanchik! Imaptinchus Jesusqa, mana saqra kaqtachu manaqa, chiqan kaqtapuni ruwan, chiqa sunqu kaywantaq ñañu wasanta chumpiykukuspajinan (Isa. 11:5). Chantapis, tukuy imata munapayayta, puraq uya kayta, tukuy saqra ruwaykunata ima, chiqnikusqanta rikuchirqa, ñakʼariqkunata kusipayaqkunatataq juchacharqa (Mat. 23:1-8, 25-28; Mar. 3:5). Nitaq runaspa rikchʼaynillantachu qhawaq, “payqa yachallarqa imachus runaj sonqompi kasqanta” (Juan 2:25).
14. ¿Imaynatá Jesús kay tiempopi chiqan kaqtapuni ruwayta munasqanta rikuchichkan, chantá imastá tapukunanchik tiyan?
14 Jesusqa, chiqan kaqtapuni ruwayta munan, chaytaq kay tiempopi runasman willakunanpaq, yachachikunanpaq ima, kamachichkasqanpi rikukun. Kay llamkʼay Diospa munayninmanjina ruwakunanpaqqa, ni pi —runas, kamachiqkuna, supaykuna ima— jarkʼayta atinmanchu. Arí, Armagedonpiqa, Dios chiqan kayninmanjinapuni ruwasqan sutʼi rikukunqa (Isaías 11:4; Mateo 16:27, ñawiriy). Chayrayku, tapurikuna: “Runasman willamuspa, ¿Jesusjinachu ruwani? Unqusqa kaspapis, achkha ruwanasniyuq kaspapis, ¿tukuy atisqaytachu Jehovata yupaychaypi ruwani?”, nispa.
15. ¿Imataq Diosta yupaychaypi tukuy atisqanchikta ruwanapaq yanapawasun?
15 Diosmanta tukuy sunqu willanapaqqa, Jehová chayta kamachisqanta ama qunqanachu. Arí, chay kamachiyta Churinniqta ruwachichkan, juntʼananchikpaqtaq espíritu santonwan yanapawanchik. Diosta, espiritunwan yanapasqan Reyta ima, yanapakusqanchikta ¿may jatunpaqchu qhawanchik? Jehovalla qanchis junu kuraq cristianosta —pikunachus runaspa ñawpaqinpi “mana yachakuyniyoj runaslla ka[nku]”— 236 suyuspi Reinomanta allin willaykunata willanankupaq kallpachayta atin (Hech. 4:13).
Cristoniqta bendicionesta japʼina
16. ¿Imatataq Génesis 22:18 pʼitipi nin?
16 Jehová, Abrahamman nirqa: “Tukuy naciones kay pachapi kajkuna paykunanejta bendecisqa kanqanku, qan imatachá nisusqayta kasuwasqaykirayku”, nispa (Gén. 22:18). Kay rimaykunaqa, Diosta munakuqkuna, Mesías Mirayniqta achkha bendicionesta japʼinankuta rikuchin. Chayrayku, chay bendicionespi yuyaspa, ¡may kusiywan Diosta yupaychachkanku!
17, 18. Deuteronomio 28:2 pʼitipi, ¿imata ruwanantataq Jehová nin, imataq chay ñuqanchikpaq niyta munan?
17 Israel llaqtaqa, Abrahampa mirayninmanta karqa, Diostaq paykunaman nirqa: “Sichus qankuna Señorniykichej Tata Diospa nisqasninta uyarinkichej chayqa, kay tukuy bendiciones qankunaman jamusonqachej”, nispa (Deu. 28:2). Kay tiempopipis Diospa llaqtanman, chayta nikullantaq. Chayrayku, Diospa bendicionesninta japʼinaykipaqqa, “Tata Diospa nisqasninta uyari[llaypuni]”. Ajinallamanta: “Kay tukuy bendiciones qankunaman jamusonqachej”, nisqa rimaykunata juntʼakuqta rikunki. Chaywanpis, ¿imaynatataq cristianos Jehovap “nisqasninta uyari[sunman]”?
18 Jehovata uyarinapaqqa, Palabranpi nisqanta, yachachiykunata mikhunatajina wakichipuwasqanchikta ima, sunqunchikpi japʼikuna (Mat. 24:45). Chantapis Payta, Churinta ima, kasukuna. Jesús nirqa: “Mana tukuy pikunachus: Señor, Señor, nispa niwajkunachu janaj pacha reinoman yaykonqanku. Manachayqa, janaj pachapi kashaj Tataypa munayninta ruwajkunalla yaykonqanku”, nispa (Mat. 7:21). Chantapis, Diosta uyarinapaqqa, qutuchakuypi kamachiykunata churasqanta tukuy sunqu kasukuna, chaypitaq ancianosta “regalostajina” quwanchik (Efe. 4:8, NM).
19. ¿Imatataq Dios bendecinawanchikpaq ruwananchik tiyan?
19 Diospa Llaqtanta Kamachiqkunaqa, Jallpʼantinpi qutuchakuykunata qhawanku, paykunaqa ‘Diosmanta regalosjina’ kanku (Hech. 15:2, 6). Jatun ñakʼariypiqa, imaynatachus Cristop akllasqa hermanosninta qhawasqanchikmanjina, juzgasqas kasun (Mat. 25:34-40). Chayrayku, Dios bendecinawanchikpaqqa, akllasqa cristianosta, chiqa sunquwan yanapananchik tiyan.
20. a) ¿Imatataq ‘Diosmanta regalosjina qusqa’ kaqkuna ruwananku tiyan? b) ¿Imaynatá chay hermanosta jatunpaq qhawasqanchikta rikuchisunman?
20 Chantapis sucursalespi kamachiqkuna, qutuchakuykunata waturiqkuna, qutuchakuypi ancianos ima, ‘Diosmanta regalosjina qusqa’ kanku, espíritu santoniqta sutichasqastaq (Hech. 20:28). Chay hermanosqa, Diospa Llaqtanta yanapanankupaq churasqa kanku, “ajinamanta tukuyninchej creeypi ujchasqa kaspa, Diospa Churinta allinta rejsispataj, wiñay tukusqa runa jina kasunchej, imaynachus Cristo kasqanman jina” (Efe. 4:13). Paykunaqa, ñuqanchikjinallataq pantaq runas kanku. Chaywanpis, munakuywan yanapawasqanchikta tukuy sunqu kasukuspaqa, may bendicionesta japʼinchik (Heb. 13:7, 17).
21. ¿Imaraykutaq Diospa Churinta kasukunanchikpuni tiyan?
21 Jesusqa tumpamantawan, Satanaspa pachanta chinkachinqa. Chayta ruwaptintaq kawsayninchikqa makinpi kanqa, imaptinchus Diosqa Jesusta “may chhika runasta” “kawsaj yaku” juturisman pusananpaq kamachin (Apo. 7:9, 16, 17). Chayrayku, Cristota kusiywan kasukuna, paytaqa Rey kananpaq Jehová espíritu santonwan yuyaychan.
¿Imatataq kay pʼitismanta yachakunchik?
[Tapuykuna]
[17 paginapi dibujo/foto]
Jesusqa, Jairop ususinta kawsarichispa may khuyakuyniyuq kasqanta rikuchirqa
[18 paginapi dibujos/fotos]
Jesucristoqa, runasman ni jaykʼaqjina willakunanpaq yanapachkan