‘Kunanmin chay khuyay tarina tiempoqa’

“Kunanmin chay khuyay tarina pʼunchay [chayri tiempo]; kunanmin chay salvakuna pʼunchay.” (2 COR. 6:2.)

1. ¿Imaynatataq imatachus kawsayninchikpi ñawpaqta ruwananchik kasqanta yachasunman?

SALOMONQA, kayta qillqarqa: “Kay pachapeqa tukuy imapis tiempoyojlla. Kay jallpʼa patapi tukuy ima ruwaypis horayojlla”, nispa (Ecl. 3:1). Chay rimaykunataqa, kawsayninchikpi imatapis ruwanapaq, tarpunapaq, viajanapaq, ranqhanapaq chayri wakkunawan parlanapaq tiempochakunamanta parlachkaspa qillqarqa. Chaywanpis, imayna tiempopi kachkaspapis, ima sumaq ruwaytachus ruwananchik kasqanta yachananchik tiyan. Chayqa, kawsayninchikpi imatachus ñawpaqta ruwananchikta yachanapaq yanapawasun.

2. ¿Imaynatataq Jesús, imayna tiempopichus kasqanta sutʼita yachasqanta yachanchik?

² Jesusqa, Jallpʼapi kachkaspa imayna tiempopichus kachkasqanta, imatachus ruwananta ima, sutʼita yacharqa. Payqa, Mesiasmanta profecías juntʼakunanpaq tiempo chayamusqanta yachasqanrayku, imatachus ñawpaqta ruwananta yacharqa (1 Ped. 1:11; Apo. 19:10). Arí, suyasqa Mesías pay kasqanta rikuchinan karqa, Reinomanta willanan karqa, paywan qhipaman kamachiqkunatataq akllanan karqa. Chantapis, Jallpʼantinpi runasman willanankupaq, yachachinankupaq ima, cristiana qutuchakuyta sumaqta wakichinan karqa (Mar. 1:15).

3. Jesusta imayna tiempopichus kawsakuchkasqanta yachasqan, ¿imata ruwananpaqtaq tanqarqa?

 ³ Cristotaqa, imayna tiempopichus kachkasqanta yachasqan, sunqu kʼajaywan Tatanpa munayninta ruwananpaq tanqarqa. Discipulosninmanpis jinata nirqa: “Cheqamanta cosechanaqa ashkha, oqharejkunatajrí pisilla kanku. Mañakuychej Señormanta aswan ashkha oqharejkunata cosechanman kachamunampaj”, nispa (Luc. 10:2; Mal. 4:5, 6). Ñawpaqtaqa, chunka iskayniyuq discipulosninta, chantá qanchis chunkata akllarqa. Imatachus ruwanankuta sutʼinchaspataq kay sumaq willayta willanankuta kamachirqa: “Diospa janaj pacha reinon qayllamunña”, nispa. Payrí, ¿imatá ruwarqa? “Chunka iskayniyoj apostolesninman yachachiyta tukuytawan, riporqa yachachej, willarajtaj chay cheqanejpi llajtasman” (Mat. 10:5-7; 11:1; Luc. 10:1).

4. ¿Imaynamantá Pablo Jesucristojina ruwarqa?

⁴ Diospa Churinqa, sunqu kʼajaywan willananchikta sumaqta yachachiwanchik. Pablopis, hermanosninman juk waqyariyta ruwachkaspa nirqa: “Noqata qhawarispa imatapis ruwaychej, imaynatachus noqapis Cristota qhawarispa ruwani, ajinata”, nispa (1 Cor. 11:1). ¿Imaynamantá Pablo Jesusjina ruwarqa? Payqa, allin willaykunata willananpaq, mayta kallpachakurqa. Chayrayku, qutuchakuykunaman cartasta qillqachkaspa, kaykunata nirqa: “Ima ruwanallapipis ama qhellas kaychejchu”, “tukuy sonqotaj [Jehova]ta sirviychej”, “wiña[ychik]puni Señorpa ruwaynimpi”, “tukuy ima ruwanaykichejta tukuy sonqo allinta ruwaychej, [Jehová] Diospaj jina”, nispa (Rom. 12:11; 1 Cor. 15:58; Col. 3:23, 24). Pabloqa, Damascoman richkaptin, Señor Jesucristo rikhurisqanta, discípulo Ananiasniqta kamachisqanta ima, ni jaykʼaq qunqakurqachu. Ananías kayta willarqa: “Payta ajllakuni kamachiy kanampaj, noqamantataj willanampaj mana judío kajkunaman, reykunaman, jinallatataj israelitasmampis”, nispa (Hech. 9:15; Rom. 1:1, 5; Gál. 1:16).

‘Kunanmin chay khuyay tarina tiempoqa’

5. ¿Imaraykutaq Pablo sunqu kʼajaywan willarqa?

⁵ Hechos librota ñawirispa, Pablo mana manchachikuspa, sunqu kʼajaywantaq willasqanta reparanchik (Hech. 13:9, 10; 17:16, 17; 18:5). ¿Imarayku jinata ruwarqa? Ima tiempopichus kawsachkasqanta yachasqanrayku. Nirqataq: “Kunanmin chay khuyay tarina pʼunchay [chayri tiempo]; kunanmin chay salvakuna pʼunchay”, nispa (2 Cor. 6:2). Kay rimaykunaqa, israelitas 537 qayna pacha watapi, Babiloniamanta kacharichisqas kaspa, llaqtankuman kutipunankupaq tiempo kasqanmanta qillqakurqa (Isa. 49:8, 9). Chaywanpis, ¿imamantá Pablo parlachkarqa? Chaypaqqa, imatachus ñawpaq pʼitispi nisqanta qhawarina.

6, 7. a) ¿Ima sumaq llamkʼaytataq Pablo, wak akllasqa cristianos ima, japʼirqanku? b) ¿Pikunataq kay tiempopi akllasqa cristianosta yanapachkanku?

⁶ Pabloqa, ñawpaq pʼitispi pay, wak akllasqa cristianos ima, juk sumaq kamachiyta japʼisqankuta nirqa (2 Corintios 5:18-20, ñawiriy). Imatachus Dios ruwanankuta kamachisqanta sutʼincharqa. Arí, runasman “Paywan allinyakuna kasqanta” willananku karqa, “Dioswan allinyakuychej” nispataq mayta mañananku karqa.

⁷ Ñawpa tatasninchik Edén huertapi Diospa contranpi uqharikusqankumantapacha, tukuy runas Jehovamanta karunchakurqanku (Rom. 3:10, 23). Diospa yachachiykunasninmanta  karunchakusqankurayku ñakʼarinanku, wañunanku ima, karqa. Pablo chaymanta nirqa: “Yachanchej jina, kunankama Diospa tukuy ruwasqan nanaywan ayqoshan”, nispa (Rom. 8:22). Chaywanpis Diosqa, runas Paywan allinyakunankupaq, payman kutiripunankupaq ima, mayta waqyariyta qallarirqa. Chaytataq ñawpa siglopi, Pablo, wak akllasqa cristianos ima, willarqanku. “Chay khuyay tarina pʼunchay [chayri tiempoqa]” Jesuspi iñiqkunapaq, “salvakuna pʼunchay” kanan karqa. Kay tiempopiqa, akllasqa cristianos, “waj ovejas” kaqkuna ima, tukuy runasman “khuyay tarina pʼunchay [chayri tiempo]” kachkasqantaraq willachkallankupuni (Juan 10:16).

8. ¿Imaraykutaq runasta, Dioswan allinyakunankupaq waqyarinanchik tiyan?

⁸ ¿Imaraykutaq runasta, Dioswan allinyakunankupaq waqyarinanchik tiyan? Ñawpa tatasninchik Diosta wasanchaspa paymanta karunchakuptinkupis, Jehová runaswan allinyakuyta maskʼasqanrayku (1 Juan 4:10, 19). ¿Imaynatá chayta ruwarqa? Pablo kutichin: “Dios Tata cheqamanta Cristonejta kay pacha runasta pay kikinwan allinyacherqa, runaspa juchasninkuta qonqayman churaspa. Noqaykumantaj kamachiwarqayku chay allinyakuymanta willanaykupaj”, nispa (2 Cor. 5:19; Isa. 55:6).

9. ¿Imaynatataq Pablo, Jehovap khuyakuyninmanta agradecekusqanta rikuchirqa?

⁹ Jehovaqa, Jesusta ñuqanchikrayku wañunanpaq kachamurqa, chay wañusqanpi iñiqkunap juchasninku pampachasqa kananpaq, Paywan allinyakunankupaq ima. Chantapis, pachantinmanta runasman Dioswan allinyakunankupaq tiempo kachkasqantaraq willanankupaq, sutinpi willaqkunata kacharqa (1 Timoteo 2:3-6, ñawiriy). Pabloqa, imachus Diospa munaynin kasqanta, imayna tiempopichus kawsakuchkasqanta ima, yachaytawan, mana saykʼuspa runasman, Dioswan “allinyakuna kasqanta” willarqa. Jehovaqa, chayta ruwanallanchiktapuni munan. Arí, runasta Paywan allinyakunankupaq waqyarichkallanpuni. Pablop nisqanpis juntʼakuchkallanpuni, pay nirqa: “Kunanmin chay khuyay tarina pʼunchay [chayri tiempo]; kunanmin chay salvakuna pʼunchay”, nispa. Arí, Diosqa, ¡may kʼacha sunquyuq, khuyakuyniyuqtaq! (Éxo. 34:6, 7.)

‘Ama qhasipaqchu kachun Diospa qhasilla kʼacha yanapayninta japʼisqanchikqa’

10. Ñawpa akllasqa cristianospaq, kunan tiempopi akllasqa cristianospaq ima, ¿imataq “salvakuna pʼunchay” niyta munan?

¹⁰ “Cristopi kaj” cristianosqa, Diospa khuyakuyninmanta tʼinkasta, ñawpaqta japʼirqanku (2 Cor. 5:17, 18). Paykunapaqqa, “salvakuna pʼunchay” Pentecostés 33 watapi qallarirqa. Chaymantapacha “allinyakuymanta willa[yta]” willanankupaq kamachisqa kanku. Arí, kay tiempopiqa, Jallpʼapi qhipakuq akllasqa cristianos, runasman Dioswan “allinyakuna kasqanta” willachkanku. Paykunaqa, Juan musquypijina, tawa ángeles “kay pachaj tawantin wayrasta jarkʼasha[sqankuta rikusqanta yachanku], ama ima wayra jallpʼa pataman wayramunampaj”. “Chay salvakuna pʼunchay” chayri ‘khuyay tarina tiempoqa’, niraq tukukuchkanchu (Apo. 7:1-3). Chayrayku, 20 siglop qallariyninmantapacha, Jallpʼapi puchuq akllasqa cristianos, Jallpʼantinpi runasman Dioswan “allinyakuna kasqanta”, sunqu kʼajaywan willachkanku.

11, 12. Akllasqa cristianos iskay chunka siglop qallariyninmantapacha, ¿imaynatá imayna tiempopichus kachkasqankuta yachasqankuta, rikuchirqanku? (Kay 15 paginapi rikhuriq dibujota qhawariy.)

¹¹ Kay Los testigos de Jehová, proclamadores del Reino de Dios, nisqa libropi ninjina, iskay chunka siglop qallariyninpiña, “Russell, compañerosnin ima, cosecha tiempopi kawsachkasqankumanta mana iskayrayarqankuchu. Runas kacharichisqas kanankupaqtaq chiqa kaqta willananku kasqanta yacharqanku”. ¿Imatá chaypaq ruwarqanku? Cosecha tiempopi —‘khuyakuy tarina tiempopi’— kachkasqankuta reparaspa, mana  paykunawan tantakunallankupaqchu runasta waqyarirqanku. Chaytaqa, cristianos nichikuqkunata kamachiqkuna unaymantaña ruwachkarqanku. Akllasqa cristianosqa, Reinomanta tukuyniqpi willanankupaq, yuyaychakurqanku. Arí, runas imastachus rikhurichisqankuniqta (tecnología) willarqanku.

¹² Chay akllasqa cristianosqa, tratadoswan, folletoswan, revistaswan, libroswan ima, sunqu kʼajaywan allin willaykunata willarqanku. Chantapis, umallirichiykunata wak yachachiykunata ima, qillqarqanku, chaytataq achkha periodicospi urqhuchirqanku. Chantá, Bibliamanta yachachiykunata radioniqta suyunkupi, wak suyuspi ima, uyarichirqanku, chantapis cine qhawanallapaq kaptinpis uyarikunanpaqwan peliculatajina rikuchirqanku. ¿Qhasillapaqchu chay ruwasqanku karqa? Mana. Kunan tiempoqa, chay waqyarisqankuman qanchis junu runasña kasukunku, paykunapis “Dioswan allinyakuychej” nispa, wak runasta waqyarichkanku. Chay akllasqa cristianosqa, mana atikunanpaqjina kaptinpis, sunqu kʼajayllawanpuni willarqanku.

13. Diospa munayninta juntʼanapaq, ¿ima yuyaychaytataq kasukunanchik tiyan?

¹³ Pablo nirqa: “Kunanmin chay khuyay tarina pʼunchay [chayri tiempo]”, nispa, chaytaq chiqapuni. Jehová khuyakuyninrayku, Paywan allinyakuymanta willayta uyarinanchikta, kasukunanchikta ima, saqiwasqanchikmanta mayta agradecekunchik. Jinalla qhipakunamantataq Pablop nisqanta ruwanchik, pay nirqa: “Qankunata mañayku ama qhasipajchu kananta Diospa qhasilla kʼacha yanapayninta japʼisqaykichejqa”, nispa (2 Cor. 6:1). Jehovaqa, khuyakuyninrayku, Cristoniqta “runasta pay kikinwan allinyach[iyta]” munan (2 Cor. 5:19).

14. ¿Imatataq achkha suyusmanta runas ruwachkanku?

¹⁴ Satanasqa, achkha runaspa yuyayninkuta laqhayachichkallampuni. Chantapis runasqa, Diosmanta karunchasqa kachkanku, nitaq Dios imatachus khuyakuyninrayku ruwayta munasqanta yachankuchu (2 Cor. 4:3, 4; 1 Juan 5:19). Chaywanpis, runas Diospa contranpi uqharikusqanrayku, kay pachapi saqra ruwaykuna, ñakʼariykuna ima, kasqanta yachaspa, achkha runasqa Diosmanta yachakuyta munanku. Wakin suyuspi allin willaykunata mana uyariyta munaptinkupis, wakin runasqa, kasukunku, Dioswan allinyakunankupaqtaq kawsayninkuta tikrachichkanku. Arí, runasman “Dioswan allinyakuychej”, nispa willanapaq, kunan astawan kallpachakunanchik tiyan.

15. Runas uyariyta munasqallankuta willananchikmantaqa, ¿imatataq yachanankuta munanchik?

¹⁵ Runasqa, Diosman qayllaykuptinku chʼampaykunasninkupi yanapananta yuyanku, chayraykutaq iglesiasman rinku. Pastorestaq iglesiankuman rinankupaq, runasta kusichinankupaq ima, munasqankumanjina ruwanku. Ñuqanchikqa, mana chayllatachu ruwanchik (2 Tim. 4:3, 4). Astawanqa, vecinosninchikman Jehová munakuwasqanchikrayku, Cristoniqta juchasninkuta pampachayta munasqanta willanchik. Ajinamanta manaña Diosmanta karunchasqachu kanankupaq, Paywantaq allinyakunankupaq (Rom. 5:10; 8:32). Chaywanpis ‘khuyakuy tarina tiempoqa’, tukukapuchkanña.

‘Espiritupi kʼajariychik’

16. ¿Imataq Pablota mana manchachikuspa, sunqu kʼajaywan willananpaq yanaparqa?

¹⁶ ¿Imaynatataq chiqa religionta sunqu kʼajayllawanpuni riqsichisunman? Wakinkunaqa,  manchali kasqankurayku, wakkunawan parlayta, masichakuyta ima, mana atillankuchu. Chaywanpis, sunqu kʼajaytaqa, mana uyallamantachu, nitaq imayna runachus kasqanchikpichu rikuchikun. ¿Imaynatá cristianos sunqu kʼajayta rikuchisunman? Pablo nirqa: “Espiritupi kʼajariychik”, nispa (Rom. 12:11, NM). Arí, Pablotaqa, espíritu santo, mana manchachikuspa willanapaq kallpacharqa. Chayrayku, Jesús waqyarisqanmantapacha, Romapi wisqʼasqa, ñakʼarichisqa ima, kanankama, —30 watasta— sunqu kʼajayllawanpuni willarqa. Payqa, Jehovamantapuni yanapata mañakurqa, Jehovataq espíritu santonwan kallpacharqa. Chayrayku nirqa: “Chay may sumaj ateyqa Diosmanta jamu[n], manataj noqaykumantachu”, nispa (2 Cor. 4:7). Paymantaqa, ¡mayta yachakusunman!

17. ¿Imatataq cristianos ‘espiritupi kʼajarinanchikpaq’ necesitanchik?

¹⁷ “Kʼajariychik” rimayqa, griegopi “tʼimpuy” niyta munan (Bover-Cantera). Kaypi tʼukurina. Yaku tʼimpunallanpaqpuniqa, ninapi kanan tiyan, ¿icharí? Cristianos ‘espiritupi kʼajarinanchikpaqpis’, tukuy tiempo espiritup yanapayninta necesitanchik. ¿Imatá chaypaq ruwana tiyan? Jehová tukuy imata quwasqanchikwan kallpachakuna. Wasinchikpi, qutuchakuypi ima, Diosta yupaychaypi ruwanasninchikta juntʼana. Arí, mana saqispa sapallanchikpi, familiajina ima, Bibliata ukhunchana, Diosmanta mañakuna, tantakuykunamantaq rina. Chayqa, “nina” yakuta “tʼimpuchin” ajinata espíritu santo kʼajarichiwasun (Hechos 4:20; 18:25 *, ñawiriy).

18. ¿Imatataq cristianos usqhayllata juntʼananchik tiyan?

¹⁸ Cristianosqa, Diosta tukuy sunqu yupaychananchik tiyan. Chantá mana tiemponchikta usuchispa, nitaq llawchhiyaspa ima, ruwayninchikta juntʼananchik tiyan. ¿Imataq chay ruwayninchik? Diospa munayninta, Jesusjina juntʼay (Heb. 10:7). Jehovaqa, kay tiempopi runas, paywan allinyakunankuta munan. Chayrayku, Jesusjina, Pablojinataq chay sumaq llamkʼayta usqhayllata juntʼananchik tiyan.

[Sutʼinchaynin]

¿Yuyarikunkichu?

• Pablo, wak akllasqa cristianos ima, ¿ima kamachiytataq juntʼananku karqa?

• Jallpʼapi puchuq cristianos, ‘khuyakuy tarina tiempo’ kachkallaptinraq mayta willanankupaq kallpachakusqankuta, ¿imaynatá yachanchik?

• ¿Imaynatataq cristianos ‘espiritupi kʼajarisunman’?

[Tapuykuna]

[12 paginapi dibujo/foto]

Pabloqa, Señor Jesucristo rikhurisqanta ni jaykʼaq qunqakurqachu