Jehová tukuy imata qamkunarayku ruwasqanpi tʼukuriychik

CRISTO kawsarimusqanmanta pisi tiemponman, iskay discipulosnin Jerusalenmanta Emaús ranchoman richkarqanku. Evangelio Lucas nin: “[Paykunapura] siminakuspa parlanankukamataj, kikin Jesús qayllaykuspa, paykunawan khuska risharqa. Paykunaj ñawisninkutaj chharpuyasqa jina kasharqa, payta ama rejsinankupaj. Chantá Jesús taporqa: Imamantapunitaj chay jinata siminakushankichej purej jinari? Imaraykutaj llakisqa kashankichej?”, nispa. Paykunaqa, Yachachiqninku Jesús, Israel llaqtata, romanospa kamachiyninmanta kacharichinanta suyarqanku, chaywanpis paytaqa wañuchirqanku. Chayrayku paykuna ajina llakisqa kachkarqanku (Luc. 24:15-21; Hech. 1:6).

Jesustaq paykunaman “sutʼinchayta qallarerqa, paymanta chay tukuy imatachus Diosmanta Qhelqasqapi nisqanta, Moisesmantapacha qallarispa, tukuy profetaspa qhelqasqankumantawan”. Ajinata yuyarichirqa, paywan willachkaptinku, sumaq ruwaykunata rikusqanku, iñiyninkuta kallpachasqanmanta. Jinata sutʼinchasqanrayku llakiyninkuqa kusiypi tukukurqa. Chantá chay chʼisipacha jinata ninakurqanku: “Manachu sonqonchej kʼajarerqa ñampi parlashawajtinchej, Diospa Palabrantataj sutʼinchashawajtinchej?”, nispa. ¿Imatataq kay iskay discipulosmanta yachakusunman?

Mayta suyasqanchik kunankama mana juntʼakuptin

Kay iskay discipulosqa, imatachus suyasqanku mana juntʼakusqanrayku llakisqa kachkarqanku. Proverbios 13:12 jinata nin: “Imatapis suyasqa mana juntʼakojtenqa, sonqoqa llakisqa qhepakun”, nispa. Pikunachus unaytaña Jehovata mana wasanchaspa yupaychaqkunaqa, kikillantaq sientekusunman. Imaraykuchus kunankamaqa, jatun “ñakʼariy” pasanantaña, musuq pachapitaq kawsachkananchikta yuyarqanchik (Mat. 24:21; Apo. 7:14). Chayrayku, imatachus mayta suyasqanchik mana juntʼakusqanrayku llakisqa kasqanchikqa entiendekun.

Yuyarikunachik, imaynatachus Jesús iskay discipulosninta profecías juntʼakusqanta, wakintaq paykunap rikunankupi juntʼakusqanta tʼukurichisqanrayku, llakiyninku kusiyman tukusqanta. Ñuqanchikpis kikinta ruwasun  chayqa, llakiyninchikta atipayta atisunchik. Juk qutuchakuymanta anciano Michael sutiyuq jinata nirqa: “Ama tʼukuychu imatachus Jehová manaraq ruwasqanpiqa, astawanpis imastachus kunankama ruwasqanpi tʼukuriy”, nispa. ¡Chaymá, sumaq yuyaychayqa!

Jehová imastachus kunankama ruwasqasnin

Jehová imastachus tʼukunapaqjina kunankama ruwasqasninmanta wakinpi tʼukuriy. Jesús nirqa: “[Pichus] noqapi creejqa, paypis noqaj ruwasqayta ruwallanqataj; chaypis astawanraj ruwanqa”, nispa (Juan 14:12). Kay tiempopi Diospa kamachisninqa, mana jaykʼaqjina willachkanchik. Chantapis qanchis junu kuraq, jatun ñakʼariyta kawsachkaq pasanankupaq suyachkanku. ¡Ni jaykʼaqtaq kunanjinaqa, may chhika suyuspi, achkha runas Jehovap munayninta ruwaqkuna karqankuchu! Chiqamantapuni Diospa llaqtanqa, Jesusmanta nisqaqa “astawanraj” ruwachkan.

¿Jehová imastawantaq ñuqanchikrayku ruwarqa? Jehovaqa, achkha runasta kay saqra pachamanta urqhuspa, llaqtanman yaykuqta saqin, mayqintachus paykunapaq wakichin chayman (2 Cor. 12:1-4). Jehová llaqtanniqta imastachus quwasqanchikpi tʼukurina. Chaypaqtaq bibliotekaykipi chayri Tantakunapaq Wasipi kaq bibliotecapi, Índice de las publicaciones Watch Tower, chayri computadorapi Watchtower Library, nisqata qhawariy. Chantapis grabasqa dramata uyariy, Jatun tantakuypi kunallanraq imastachus rikusqaykita, qhawachkawaqpisjina tʼukuriy. Hermanosninchikwanpis chʼuwa sunquwan kawsakusqanchikpi tʼukurillaytaq. Diosninchikqa may kʼacha kasqanrayku, sumaq yachachiykunata achkhata quwanchik, hermanosninchikwanpis munakuypi kawsaqta saqiwanchik. ¡Chiqamantapuni nisunman kunanña jamuq paraisopijina kawsakuchkasqanchikta!

Chayraykuchá salmista Davidpis jinata nirqa: “[Jehová] Diosníy, ashkha tʼukuna imasta noqaykupaj ruwarqanki, maytataj noqaykumanta yuyarikuwayku”, nispa (Sal. 40:5). Jehová may sumaq imasta ñuqanchikrayku ruwasqanpi, imatachus qhipaman ruwananpi ima tʼukurinachik. Chaytaq mayta kallpachawasun, tukuy sunquwan janaqpachapi kaq Tatanchik Jehovap munayninta ruwananchikpaq (Mat. 24:13).

[31 paginapi dibujo/foto]

Jesusqa discipulosninta, Jehová imatachus paykunarayku ruwasqanpi tʼukurinankupaq yanaparqa

[32 paginapi dibujo/foto]

Yuyayniykipi jatun tantakuypi imastachus rikusqaykita, qhawachkawaqpisjina tʼukuriy