Juchaman tanqasqa kayta llawchhiyaytapis atipanapaq atiy

“Espíritu Santo qankunaman jamojtin, atiywan juntʼachisqa kankichej.” (HECH. 1:8.)

1, 2. ¿Ima yanapatataq Jesús discipulosninman qunanta nirqa, chantá imaraykutaq chay yanapayninta necesitankuman karqa?

JESUSQA, discipulosninman tukuy kamachisqanta mana sapallankumanta juntʼayta atinankuta yacharqa. Chay llamkʼay may jatun kasqanrayku, enemigosninku mayta churanakusqankurayku, paykuna pisi kallpayuq kasqankurayku ima, Diospa yanapayninta necesitankuman karqa. Chayrayku Jesusqa, niraq janaqpachaman kutipuchkaspa kayta nirqa: “Espíritu Santo qankunaman jamojtin, atiywan juntʼachisqa kankichej. Rispataj, noqamanta testigos jina willankichej Jerusalenpi, tukuy Judea jallpʼapi, Samariapi, tukuy kay pachaj kʼuchusninkama”, nispa (Hech. 1:8).

² Chay nisqanqa, Pentecostés 33 watapi juntʼakuyta qallarirqa, Jesuspa discipulosnin espíritu santop atiyninwan juntʼachisqa kaptinku, chay atiywantaq tukuy Jerusalenpi willayta atirqanku. Paykunataqa, ni pi chʼinyachiyta atirqachu. Chaymantapacha “kay pacha tukukunankama” chiqa sunqu cristianosqa, Diospa atiyninta necesitanchik (Mat. 28:19, 20).

3. a) ¿Imapitaq espíritu santowan, atiywan mana kikinchu kanku? b) ¿Imaynatá Diospa atiynin yanapawanchik?

³ Jesusqa, discipulosninman nirqa: “Espíritu Santo qankunaman jamojtin, atiywan juntʼachisqa kankichej”, nispa. Espíritu santoqa, atiywan mana kikinchu. Imaraykuchus espíritu santoqa, Diospa kʼuchi kallpan, chay kallpawanqa, runata chayri imallatapis munayninta ruwananpaq kallpachan. Chaywanpis atiytaqa, “imallatapis ruwanapaq atiy kasqanta nikun”. Chay atiyqa, juk runapi chayri imapipis pakasqa kanman, necesitakuptintaq rikhurin. Sutʼincharinapaq, espíritu santotaqa corrientewan kikinchasunman, Diospa atiynintataq pilapi waqaychasqa corrientewan. Jehová kamachisninman espíritu santoniqta atiyta quwasqanchikqa, payman qukusqanchikta juntʼanapaq, kay pachap millay ruwaykunasninta atipanapaq ima, yanapawanchik (Miqueas 3:8; Colosenses 1:29, ñawiriy).

4. ¿Imatá kay yachaqanapi ukhuncharisun, imapaqtaq?

⁴ ¿Imaynatá espíritu santoniqta atiyta japʼisqanchikta rikuchinchik? ¿Imaynatá espíritu santo kallpachawasqanchikmanjina tukuy imata ruwasunman? Cristianosqa, Diosta chiqa sunqullawanpuni yupaychanchik, chaywanpis Satanás achkha chʼampaykunata rikhurichisqanrayku, saqra pacharayku, juchasapas kasqanchikrayku ima, achkha llakiykunapi rikukunchik. Kay chʼampaykunataqa, atipananchikpuni tiyan, ajinamanta chiqa sunqusllapuni, Diosmanta mana saykʼuspa willamullasunpuni, Jehovap qayllallanpipunitaq kasunchik. Kunanqa, mana juchaman urmanapaq, mana saykʼunapaq, mana llawchhiyanapaq ima, espíritu santo imaynatachus yanapawasqanchikta qhawarina.

Mana juchaman urmanapaq atiy

5. ¿Imaynatá Diosmanta mañakuy kallpachawasunman?

⁵ Jesusqa, discipulosninman ajinata mañakunankuta yachachirqa: “Amataj saqeychu juchaman urmanaykuta, astawampis, jarkʼawayku  sajramanta”, nispa (Mat. 6:13). Jehovaqa, chiqa sunqu kamachisnin ajinata mañakusqankuta uyarinqapuni. Chantá Jesusqa, wak kutipi nillarqataq: “Janaj pachapi kaj Tata[qa] Espíritu Santota qonqa mañakojkunaman”, nispa (Luc. 11:13). Diosqa, chiqan kaqta ruwanapaq kallpanta quwanchik, chayta yachaytaq ¡mayta kusichiwanchik! Chaywanpis chayqa mana ninayanchu ni ima juchaman tanqasqa kananchikta (1 Cor. 10:13). Manaqa juchaman urmanapaqjina kachkaspaqa, Diosmanta astawan tukuy sunqu mañakunanchik tiyan (Mat. 26:42).

6. ¿Imaynatá Jesús, Satanaspa nisqanta qhisacharqa?

⁶ Jesusqa, Kuraq Supay juchaman tanqachkaptin, kutichinanpaq Bibliap nisqanta uqharirqa, Diospa Palabranta allinta riqsisqanrayku. Ima rimaykunatachus Jesús uqharisqanta qhawarina, nirqa: “Diosmanta Qhelqasqapi nin [...]. Qhelqasqallataj kashan [...]. Riy kaymanta, Satanás. Diosmanta Qhelqasqapi nin: ‘Señor Diosniykita yupaychanki, pay sapallantataj sirvinki’”, nispa. Jesusqa, Jehovata, Palabranta ima, munakusqanrayku, Kuraq supay nisqasninta qhisacharqa (Mat. 4:1-10). Satanasqa, Jesusta ni imaynamanta juchallichiyta atispa ripurqa.

7. ¿Imaynatá Biblia mana juchaman urmanapaq yanapawanchik?

⁷ Jesusqa, Kuraq Supay juchaman urmananpaq tanqachkaptin, Diospa Palabranpi atienekurqa, ñuqanchikqa astawanraq Diospa Palabranpi atienekunanchik tiyan. Chaypaq ñawpaqtaqa, Jehovap kamachiykunasninta yachakunanchik tiyan, chaykunatataq maychus kaqmanjina juntʼanapaq kallpachakuna, ajinamanta Satanasta, tuqllasninta ima, qhisachasunchik. Achkha runasqa, Bibliamanta yachakuspa, Diospa yachaynin, chiqan kaynin ima, may sumaq kasqanta yachakuspa, Satanasta qhisachanku. Arí, Diospa Palabranqa may atiyniyuq, imaraykuchus runap “yuyasqanta, sonqompi imatachus munasqantapis” sutʼita rikuchin (Heb. 4:12). Chantapis, Diospa Palabranta astawan ñawirisun, chaypitaq tʼukurisun chayqa, Jehová mana saqirpariq, chiqa Diostaq kasqanta allinta yachakusun (Dan. 9:13). Biblia atiyniyuq kasqanrayku, ima pʼitischus mana juchaman urmanapaq yanapanawanchikpi tʼukurinapaq tiempochakuna tiyan.

8. ¿Imaynasmantataq espíritu santota japʼinchik?

⁸ Jesusqa, Diospa Palabranta riqsisqanrayku, “espíritu santowan juntʼasqa” kasqanrayku ima, juchaman urmayta atiparqa (Luc. 4:1). Ñuqanchikpis, Jehovap qayllallanpipuni kasun chayqa, sumaq kallpachasqas kasun, ima saqra kaqtapis atipayta atisun. ¿Imaynatá Diosman qayllaykuyta atisunman? Bibliata ukhunchaspa, Paymanta mañakuspa, hermanosninchikwan tantakuspa ima, chaykunaniqtataq espíritu santonwan juntʼachiwanchik (Sant. 4:7, 8). Achkha hermanosqa, Diosta yupaychanapaq astawan tiempota churay, mayta yanapasqanta ninku. Chantapis, Diosman astawan qayllaykunankupaq wak imaspi yuyaypis yanapallasqantataq ninku.

9, 10. a) Maypichus tiyakunki chaypi, ¿ima saqra ruwaykunamantaq tanqasqa kanki? b) Saykʼusqas kachkaptinchik, saqra ruwaykunapi mana urmananchikpaq, ¿imaynatá tʼukuriy, Diosmanta mañakuy ima, yanapawasunman?

⁹ ¿Ima saqra ruwaykunamantaq tanqasqa karqanchik? Kaykunapi tʼukuriy: casarasqas kaspa, ¿juk qhariwan chayri juk warmiwan coqueteayta munarqanchikchu? Chayri soltero kaspa, Diosta mana yupaychaq qhari chayri warmi paywan lluqsinanchikta niwaptinchik, ¿qhisachayta atillarqanchikchu? Chantapis, telepi chayri Internetpi millay ruwaykuna rikhuriptin, ¿qhawallaytapunichu munarqanchik? Chay tuqllasta qhisachanapaqqa, ñawpaqmantaña ima llakiykunachus kananpi tʼukurinanchik tiyan. Imallatapis mana allinta tʼukurispa ruwaptinchikqa, watiqmanta ruwaykullasunmantaq ajinamanta pisimanta pisi jatun juchaman urmasunman (Sant. 1:14, 15). Chantapis chayta ruwaspaqa, Jehovata, qutuchakuymanta hermanosta, familianchikta ima, mayta llakichinanchikpi tʼukurinallataq. Diospa yuyaychaykunasninta jatunpaq  qhawaptinchikqa, sunqu yuyayninchik mana juchachawasunchu (Salmo 119:37; Proverbios 22:3, ñawiriy). Chayjina tuqllasman urmanapaqjina kachkaspaqa, atipayta atinapaq Diosmanta kallpata mañakuna.

¹⁰ Chantapis, Jesús juchaman urmananpaq tanqasqa kasqanmanta kayta yuyarikullasunmantaq. Jesusqa, chʼin pampapi 40 pʼunchaykunata mana imata mikhuspa kachkaptin, Satanás payman qayllaykurqa. Kuraq Supayqa, chay kutipi urmachiyta atisqanta yuyarqa (Luc. 4:13). Kunanpis, maykʼaqchus juchaman urmanapaqjina kachkaptinchik, tukuy laya tuqllasta churawanchik. Chayrayku, Jehovap qayllanpi kanallapaqpuni kallpachakuna. Saykʼusqa, llawchhiyasqa ima, kachkaptinchikqa, Jehovap jarkʼayninta, espíritu santontapis mañakuna (2 Cor. 12:8-10).

Saykʼuyta, llawchhiyaytapis atipanapaq atiy

11, 12. a) ¿Imaraykutaq achkha runas llawchhiyasqas kachkanku? b) ¿Imataq llawchhiyayta atipanapaq kallpachawasun?

¹¹ Juchasapa runas kasqanchikrayku, saqra pʼunchaykunapi kawsasqanchikrayku ima, wakin kutiqa llawchhiyasqas sientekusunman. Runasqa, chayjina saqra pʼunchaykunata ni jaykʼaq rikurqankuchu (2 Tim. 3:1-5). Chantapis Armagedón pʼunchay qayllapiña kasqanrayku, sapa kuti astawan qullqi pisiyan, tukuy laya chʼampaykuna ima rikhurin. Chayrayku wakin runasqa, familiasninkuta uywayta mana atillankuchu. Chaymanta llakikusqankutaq may sakʼusqasta saqin. Jina llakiypi rikuptiyki, ¿imataq muchunallaykipaqpuni yanapasunkiman?

¹² Jesusqa, yanapanawanchikpaq espíritu santota qunawanchikta nirqa (Juan 14:16, 17, ñawiriy). Espíritu santoqa, tukuy imamanta aswan atiyniyuq. Jehovaqa, ima chʼampaytapis atipanapaq, muchunapaq espiritunwan “aswan ashkhataraj” kallpachawanchik (Efe. 3:20). Apóstol Pabloqa, “imaymanaswan ñitʼisqa” kaptinchikpis espíritu santoniqta “may sumaj atey[ta] Diosmanta” japʼisqanchikta nirqa (2 Cor. 4:7, 8). Jehovaqa, mana ima llakiyninchiktapis chinkachinantachu nin, manaqa espíritu santonniqta kallpachanawanchikta niwanchik (Fili. 4:13).

13. a) ¿Imaynatá Stephanie llakiykunasninta atipananpaq atiyta japʼirqa? b) ¿Stephanietajina pillatapis riqsinkichu?

¹³ Stephaniep kawsayninmanta qhawarina, payqa 19 watasniyuq precursora regulartaq. Payqa 12 watasniyuq kachkaspa, umitanmanta mayta unquykurqa. Juk tumorniyuq kasqantataq nirqanku. Chaymantapacha iskay kutitaña operanku, radioterapia nisqatataq ruwanku,  iskay kutitawan umanmanta unqurqa. Chay unquytaq ñawisninta ayphuyachirqa, cuerponmanta lluqʼi lado kaqpis mana anchata kuyuriyta atirqachu. Stephanieqa, mana wak imaspi kallpanta usuchiyta munanchu, tantakuykunaman, willaq rinanpaq ima, kallpayuq kayta munasqanrayku. Chaywanpis payqa, Jehová tukuy imaymanasmanta kallpachasqanta reparan. Sutʼincharinapaq, may llakisqa kachkaptin, publicacionespi cristianospa kawsayninkumanta ñawirisqanqa mayta sunquchan. Qutuchakuymanta hermanosqa, tarjetasta apachispa, tantakuykuna niraq qallarichkaptin, tukukusqantawan ima, paywan parlarispa kallpacharinku. Wakin Bibliamanta yachakuyta munaqkuna pay yachachinanpaq, Stephaniep wasinman rinku. Chayrayku Stephanieqa, Jehová ancha kʼacha kasqanta yuyaspa, Salmo 41:3 gustasqan pʼiti paypi juntʼakuchkasqanta nin.

14. Saykʼusqas sientekuptinchik, ¿imatá mana ruwananchikchu tiyan, imaraykú?

¹⁴ Saykʼusqas chayri chʼampaykunapi kachkaptinchik, ichá sapallanchikpi chayri familianchikwan Bibliata ukhunchay, Diosmanta willaq riy, tantakuykunaman riy imaqa, anchata saykʼuchiwasqanchikta yuyasunman. Chaywanpis chayta yuyaspaqa, mayta pantachkasunman. ¿Imaraykú? Imaraykuchus Diosta yupaychanapaq ruwanasqa, espíritu santota japʼinapaq yanapawanchik, chaytaq mayta kallpachawanchik (Mateo 11:28, 29, ñawiriy). Wakin kutispiqa, tantakuykunaman may saykʼusqa rinchik, chaywanpis tantakuy tukukuptinqa, may kallpachasqas sientekunchik, ¿icharí?

15. a) ¿Jehová, payman chiqa sunqu kananchikpaq mana kallpachakunanchik kasqantachu nichkawanchik? Bibliawan sutʼinchariy. b) ¿Imatá Dios qunawanchikta nin, ima tapuytaq tiyan?

¹⁵ Chaywanpis, Jesuspa discipulon kayqa, mana atikullanchu. Imaraykuchus Diosman chiqa sunqullapuni kanapaqqa, mayta kallpachakunanchik tiyan (Mat. 16:24-26; Luc. 13:24). Chaywanpis kallpanchik pisiyaptinqa, Jehová espíritu santonniqta kallpata quyta atiwanchik. Profeta Isaiasqa, kayta nirqa: “Tata Diospi atienekuspa suyakojkunarí watejmanta kallpata japʼenqanku. Paykunaqa phawanqanku ankas jina. Paykunaqa correnqanku, manataj saykʼonqankuchu; karusta thaskispapis, mana llawchʼiyanqankuchu”, nispa (Isa. 40:29-31). Jina kaptin, ¿imaraykutaq wakin runasqa Diospaq llamkʼay saykʼuchikusqanta ninku?

16. Mana saykʼunapaq, mana llawchhiyanapaq, ¿imastá ruwasunman?

¹⁶ Bibliaqa, “aswan allin kajta” ñawpaqman churananchikta, yuyaychawanchik (Fili. 1:10). Pabloqa, cristianop kawsayninta karu ñanta tʼijuywan kikincharqa, chayrayku yuyaycharqa: “Tukuy imachus llasa[wasqanchikta] wijchʼupunachej. Chantá pacienciawan ñawpajllamampuni tʼijunachej, Dios churapuwarqanchej, chay ñanta”, nispa (Heb. 12:1). Kay sutʼinchayqa, qhasi mana kaq ruwaykunata, tiemponchikta usuchiq imastapis qhisachananchik kasqanta rikuchiwanchik. Ichá achkha ruwanasniyuqña kaspapis, wak imastawan ruwayta munasunman, chaytaq saykʼuchiwasunman, llakichiwasunman ima. Jina kaptin, allin kanman tapurikunanchik: “¿Machkha tiempotataq llamkʼayman qukuni? ¿Machkha kutitataq vacacionesta urqhuni? ¿Machkha horastataq sunquyta kusirichini, pukllani ima?”, nispa. Maychus kaqta yuyayqa, maychus atisqallanchikta ruwayta reparanapaq yanapawasun, ajinamanta mana wak qhasi mana kaq imaspi kallpanchikta tukuchisunchu.

17. ¿Imaraykutaq wakin cristianos llawchhiyasqas sientekunku chantá Jehovap nisqan imaynatá kallpachanman?

¹⁷ Wakin hermanosqa, yuyasqankumanjina  mana tukukuy pʼunchaykuna chayamusqanrayku llawchhiyapunku (Pro. 13:12). ¿Imataq kallpachanman? Habacuc 2:3 nisqan: “Manaraj chayamunchu mosqoypi jina rikusqayki juntʼakunanqa; chaywampis juntʼakonqapuni. Qheparejmanña rijchʼasunki chaypis suyarillay, juntʼakunan tiempoqa chayamonqapuni”, nispa. Rikunchikjina, kay pachap tukukuyninqa, chayamunqapuni maykʼaqchus Jehová nin chaypacha.

18. a) ¿Diospa ima nisqasnintaq kallpachawanchik? b) ¿Imastá qhipan yachaqanapi ukhunchasun?

¹⁸ Arí, Jehovap chiqa sunqu kamachisninqa, saykʼuy chinkananta tukuy pachapi runastaq “imaynachus wayna kashaspa” kallpayuq karqanku ajinaman tukunankuta, mayta suyachkanchik (Job 33:25). Chaywanpis kay tiempopi, Jehovap ruwaykunasninta ruwaspaqa, espíritu santoniqta kallpachawanchik (2 Cor. 4:16; Efe. 3:16). Diospa wiñaypaq bendicionesninta japʼinapaqqa, mana saykʼunachu. Musuq pachapiqa, tukuy llakiykunasninchik nisunman saykʼuy, wak imas, saqraman tanqasqa kaypis chinkanqa. Qhipan yachaqanapiqa, qhatiykachawaptinchik, saqra ruwayman tanqasqa kaptinchik ima, imaynatachus espíritu santo kallpachawasqanchikta ukhuncharisun.

¿Imatá kutichiwaq?

• ¿Imaynatá Bibliata ñawiriy kallpachawanchik?

• ¿Imaynatá Diosmanta mañakuy, tʼukuriypis kallpachawanchik?

• ¿Imatá mana anchata llawchhiyanapaq ruwasunman?

[Tapuykuna]

[24 paginapi dibujo/foto]

Tantakuykunaqa, Jehovap qayllanpi kanallapaqpuni kallpachawanchik