Paypa sutinqa Vallepi kachkan

SAINT MORITZ. Chay sutita, ¿maykʼaqllapis uyarirqankichu? Ichapis. Chay lugarqa, tukuyniqmanta runas risqankurayku may riqsisqa. Chaywanpis, chay llaqtitaqa, Suizap inti lluqsimuynin ladonpa ura kantunpi kachkan, Italiap qayllanpi. Chay Engadina valleqa, Alpes jatuchaq yuraq urquspa kantunpi kachkan. Runasqa, mana chay kʼachitu vallellatachu qhawaq rinku. Astawanpis Parque Nacional Suizo nisqata qhawarimunku, chaypiqa tukuy laya uywas, sachʼas ima tiyan, chaykunataq Ruwawaqninchik Jehovata jatunchanku (Sal. 148:7-10). Chantapis, ichá 1.700 watamantapacha chay vallepi kasqanqa, Diosta jatunchallantaq.

Chay vallepi kaq wasispa pirqasninpiqa, Diospa sutin qillqasqa kachkan, astawanqa wasi punkusninpa patanpi. Unayqa, wasisninkuta kʼachanchanankupaq letrasta pintachiq,  rumipi chʼiquchiq, chayri dibujachiq kanku. Kay fotopiqa, Bever llaqtitapi, juk wasip punkunpa patanpi ajinata nin: “Kay 1715 watapi. Jehová qallarichiq, Jehová tukuchiq. Tukuy ima Dioswan, nitaq imapis mana paywanqa kanchu”, nispa. Rikunchikjina, kay unay letreropiqa, Diospa sutin iskay kutita rikhurin.

Madulain llaqtaman yaykuspaqa, aswan unay kaq letrerotaraq tarinchik, maypichus nin: “Salmo 127. Jehová mana wasichanchu chayqa, qhasillata wasichaqkunaqa llamkʼanku. Lucio Rumedio. Kay 1654 watapi”, nispa.

¿Imaraykutaq chayjina letrerospi Diospa sutin qillqakurqa? Kay reforma protestante nisqa tiempopi Bibliaqa, romanche nisqa qallupi qillqakurqa, chay qallutaqa, Engadina vallepi parlakun. Chay qallupiqa, Bibliata ñawpaqta tikrachirqanku. Chantapis chay lugarpi tiyakuqkuna Diospa Palabranta ñawiriq kanku chaytaq sunqunkupi qhipakurqa. Chayrayku, wasi punkusninkupa patanpi chay letrerosta qillqachispaqa, mana Diospa sutillantachu qillqachirqanku, manaqa, Bibliapi ima pʼitispichus Diospa sutin rikhurin chaykunasta churachirqanku.

Watas pasasqanmanjina chay qillqasqasqa Diospa sutinta jatunchan. Chay vallepi tiyankunki chay, chayri waturiqjinalla chaypi kachkanki chayqa, kay kʼacha Jehová Diosmanta astawan yachakunaykita munayku. Chaytataq Bever llaqtitapi, Jehovamanta sutʼinchaqkunap Tantakunapaq Wasipi yachakuwaq.

[7 paginapi maymantachus foto urqhukusqan]

© Stähli Rolf A/age fotostock