Ñawiriqkunapta tapuyninku

¿Imaraykutaq Moisés, Aaronpa churisnin Eleazarwan, Itamarwan ima, wawqisninku Nadab, Abiú ima wañupusqankumanta qhipaman phiñakurqa? Chantá, ¿imaynamantataq Moisés phiñakuyninta tiyaykuchirqa? (Lev. 10:16-20.)

Jehovaqa, Toldopi sacerdotes imastachus ruwanankuta kamachirqa. Chaymantaqa, Aaronpa churisnin Nadabta, Abiuta ima, “ninata [...], mayqentachus Tata Diosqa mana kamacherqachu larwachinankuta” chayta jaywasqankumanta wañuchirqa (Lev. 10:1, 2). Moisesqa, Aaronpa churisnin Eleazarman, Itamarman ima, wawqisninku wañusqankumanta mana llakikunankuta kamachirqa. Moisesqa paykunawan phiñakurqa juchasrayku qʼulachisqanku chivota mana mikhusqankurayku (Lev. 9:3). ¿Imaraykutaq chayjinatapuni Moisés phiñakurqa?

Jehovaqa, Moisesman Leyta qusqanpi, sacerdote juchasrayku qʼulachinata jaywachkaspa, Dioswan Tinkuna Toldop ñawpaqinpi kaq patiopi chay jaywanamanta juk chhikanta mikhunanta kamachirqa. Ajinamanta sacerdoteqa, qʼulachinasta jaywaykunap juchasninkurayku jaywachkasqanta rikuchirqa. Chaywanpis chay jaywanap yawarnin Diospaq Tʼaqasqa Chiqa may santoman apasqa kanman karqa chayqa, chay jaywanamanta mana mikhuyta atinmanchu karqa. Chay jaywanaqa, ninapi qʼulachisqa kanan karqa (Lev. 6:24-26, 30).

Chay pʼunchaypi tukuy ima kasqanrayku, Moisesqa, Diospa kamachisqanta kasukuchkasqankutachus manachus rikuyta munarqa. Juchasrayku jaywana chivota qʼulaykuchisqankuta yachaspa, may phiñasqa Eleazarta, Itamarta ima, imaraykuchus Diospa kamachiykunasninta mana kasukusqankuta, chay jaywanamanta mana mikhusqankuta ima tapurqa. Paykunaqa, Diospaq Tʼaqasqa Chiqaman chay jaywanap yawarnin mana apasqa kaptinqa, chay kamachiykunata kasukunankupuni karqa (Lev. 10:17, 18).

Eleazar, Itamar ima ajinata ruwanankupaqqa, ichapis tatanku Aarón kamachinman karqa, chayrayku Aarón Moiseswan parlarqa. Chantapis ñawpaqtaña iskay churisnin wañuchisqas kasqankurayku, ichapis payqa chay wak iskay churisnin llimphu sunqu yuyayniyuq jucharayku jaywanamanta mikhuytachus manachus atisqankumanta iskaychasqa kachkarqanku. Ichapis mikhuptinku Jehová mana allinpaqchu qhawananta yuyarqa. Paykunaqa, Nadabpa, Abiupa ruwasqankumanta mana juchayuqchu karqanku (Lev. 10:19).

Chantapis Aaronqa, familianmanta kaqkuna ñawpaq kutirayku sacerdotesjina ruwanasninkuta ruwachkasqankurayku, Diosta tukuy imapi kusichinankupaqjina ruwananku kasqanta yuyarqa. Chaywanpis Nadabwan, Abiuwanqa Jehovap sutinta pisipaq qhawasqankurayku wañuchisqas karqanku. Aaronqa, ichá wak sacerdotes kaqkuna chay qʼulachisqa jaywanamanta mana mikhunankuta yuyarqa, juchallikuq familiankumanta kasqankurayku.

Moisesqa, Aaronpa sutʼinchasqanta uyarirqa, Bibliaqa nin: “Moisesqa chayta uyarispa, sonqo juntʼasqa qhepakorqa”, nispa (Lev. 10:20). Jehovapis Aarón sutʼinchasqanwan sunqu juntʼasqataq qhipakurqa.