Kusisqa kanapaq achkha imas kapuwanchik

MAY juchʼuy célula nisqamantapacha, may jatuchaq galaxiaskama, maychus kaqpi churasqa kachkanku. Chaytaq Ruwawaqninchik, “mana pejtuchej Dioschu” kasqanta sutʼita rikuchin (1 Cor. 14:33, Qheshwa Biblia). Dios, kamachisnin payta yupaychanankupaq ruwasqanqa, sumaq wakichisqa kachkan. Arí, may chhika ángeles, runas ima, chiqa yupaychaypi jukchasqa kachkanku, paykunataq yuyayniyuq, akllayta atinankupaqjinataq ruwasqa kanku. ¡Chaymá tʼukunapaqjinaqa!

Ñawpa tiempomanta Israelpi, Jallpʼapi Diospa llaqtanqa, Jerusalenwan ninakurqa, chaypitaq templo, Diospa akllasqan rey ima karqa. Babiloniapi presochasqa israelita, Jerusalenta mayta munakusqanmanta nirqa: “Simiypi qalloyqa pataman kʼaskaykuchun qanmanta mana yuyarikuyman chayqa, manachus tukuy imamanta astawan Jerusalenmanta kusikuyman chayqa” (Sal. 137:6).

¿Jinatachu Diospa llaqtanta qhawanki? Chaypi kaspa, ¿kusisqachu kanki? Wawasniyki, ¿yachankuchu Jallpʼapi Diospa llaqtan imaynatachus qallarisqanta, imayna wakichisqachus kasqanta ima? Chay llaqtapi kasqankuta, ¿jatunpaqchu qhawanku? (1 Ped. 2:17). Familiapi Diosta Yupaychanapaq Chʼisipi, kaypi yuyaychakunqajina ruwaptiykichikqa, Diospa llaqtanta aswan jatunpaq qhawankichik.

“Unay watas” imaschus kasqanta riqsichiy

Israelita familiasqa, Pascuata ruwanankupaq sapa wata tantakuq kanku. Kay raymi ruwakuyta qallarichkaptin, Moisés israelitasman kamachirqa: “Maypachachus wawasniykichej tapusonqachej: Imatataj kay niyta munanri? nispa chaypachaqa, ninkichej: Kayqa niyta munan, ñawpa tatasninchej israelitasta Tata Dios orqhomusqanta jatun atiyninwan Egiptomanta, maypichus wata runas karqanku, chaymanta”, nispa (Éxo. 13:14). Arí, imatachus Jehová llaqtanrayku ruwasqanqa, yuyarisqa kanan karqa. Achkha israelita tatasqa, Moisés kamachisqanmanjina ruwarqanku. Chayrayku may unayninman, juk salmista jinata mañakurqa: “Diosníy, ninrisniykuwan uyariyku tatasniykoj siminkumanta, unay watas paykuna kawsashajtinku imastachus ruwasqasniykimanta”, nispa (Sal. 44:1).

Achkha waynas, sipaskuna ima, kay tiempopi Jehovamanta sutʼinchaqkuna qallarisqankumanta, ichá may “unay watas[ña]” pasasqanta yuyanku. ¿Imaynatá wawasniykiman chay ruwaykuna kasqantapuni rikuchiwaq? Wakin tatasqa yanapachikunku: Los testigos de Jehová, proclamadores del Reino de Dios, nisqa librowan, Anuario librowan, revistaspi cristianospa kawsayninkumanta urqhukusqanwan, chayri wak yanapaykunawan. Juk yanapaqa kunallanraq urqhukun DVD, chaytaq kay tiempopi Diospa llaqtan imaynatachus qallarisqanta sutʼinchan. Chantá Alemania nazi nisqapi, Unión Soviética nisqapi ima, Jehovamanta sutʼinchaqkunata qhatiykachasqankumanta parlaq videosqa, familiasta chʼampaykunapipis Diospi atienekunankupaq yanapan. Allin kanman, familiapi Bibliamanta yachakuchkaspa, chay videosta ukhuncharinaykichik. Jinamanta, wawasniykip iñiyninkuta kallpachanki, pruebaman churasqa kaptinkupis, sinchita sayanallankupaqpuni.

Wawasqa, ñawpa wataspi imaschus kasqanmanta uyarispa, puñuywan atichikunku. Chayrayku, paykunata imallatapis ruwachiwaq. Ichá juk suyuta akllachiwaq, chantá imaynatachus Reinomanta willay chay suyupi qallarisqanta ukhunchaspa, familiaman  sutʼinchankuman. Qutuchakuypi, Diospaq unaytaña chiqa sunquwan llamkʼaq hermano kaptinqa, allin kanman wakin kuti, payta Familiapi Diosta Yupaychachkaptiykichik waqyarinaykichik. Chantá wawasniykita, chay hermanota kawsayninmanta tapurinankuta niwaq. Chayrí, juk Betel wasi ruwakuchkasqanta, achkha suyusmanta jatun tantakuyta chayri fonógrafos nisqawan willakusqanta wawasniykiwan dibujachiwaq.

Sapa juk “maychus ruwananta” juntʼasqanta rikuna

Pabloqa, qutuchakuyta cuerpowan kikincharqa. Pay nirqa: “Cuerpoqa allin wakichisqa kashan, sumaj ujchasqa, sumaj tʼinkisqataj ankuswan. Ajinamanta sapa iman maychus ruwananta juntʼashajtin, tukuy cuerpoqa munakuypi wiñan, purajmanta yanapanakuspa”, nispa (Efe. 4:16). Imayna ruwasqachus kasqanchikpi tʼukurispa, Jehovata jatunpaq qhawanchik, ¿icharí? Jallpʼantinpi Diospa llaqtan imayna wakichisqachus kasqanta ukhunchaspaqa, Diospa “mana tukukuyniyoj imaymana yachayninta”, aswan jatunpaq qhawallasuntaq (Efe. 3:10).

Jehovaqa, janaqpachapi llaqtan imaynachus kasqanta sutʼinchawanchik. Apóstol Juan musquypijina rikusqanpi tʼukurina. Chaytataq Jehovaqa, ñawpaqta Churinmanraq sutʼincharqa. Jesustaq, juk “angelninnejta chay imastaqa kamachin Juanman rejsicherqa”. Juantaq, “testigo jina willarqa chay tukuy imata rikusqanmanta” (Apo. 1:1, 2). Jehová, janaqpachapi llaqtan imaynachus kasqanta riqsichiwasqanchikqa, Jallpʼapi llaqtanpa “sapa iman maychus ruwananta” imaynatachus juntʼachkasqanta yachananchikta munasqanta rikuchiwanchik.

Qutuchakuykunata waturiq hermano, qutuchakuyniykiman jamusqanpi tʼukuriy. Allin kanman, imastachus chay hermano ruwasqanta, imaynatachus waturiynin qutuchakuyta yanapasqanta ima, familiaykiwan yuyarinaykichik. Wak kutispiqa, ichá kayjina tapuykunata ukhunchawaqchik: ¿Imaraykutaq willamusqanchikmanta informeta jaywana tiyan? Diospa llaqtan ñawpaqman rinanpaq, ¿maymantá qullqi urqhukun? Diospa Llaqtanta Kamachiqkuna, ¿imaynatá llamkʼanku? ¿Imaynatá chiqa yachachiykunata chayachimuwanchik?

Jehovap llaqtan imayna wakichisqachus kasqanta yachay, ¿imaynamantá yanapawanchik? Kimsaniqmanta. Ñawpaqtaqa, Diospa llaqtanpi allinninchikpaq sinchita llamkʼaqkunata, aswan jatunpaq qhawasun (1 Tes. 5:12, 13). Kamachiwasqanchikta, tukuy sunqu kasukusun (Hech. 16:4, 5). Chantapis, Diospa llaqtanpi ñawpaqpi kaqkunapi astawan atienekusun, imaptinchus Biblia nisqanmanjinapuni imatapis ruwasqankuta rikusun (Heb. 13:7).

“Rikuychej kamachina wasisninta”

Salmista nirqa: “Sionta muyumuychej, torresninta yupaspa. Sumajta qhawaychej jawa perqasninta. Rikuychej kamachina wasisninta, qhepata jamojkunaman willayta atinaykichejpaj”, nispa (Sal. 48:12-14.) Chayta nispaqa, israelitasta Jerusalenta qayllamanta rikumunankupaq tanqarqa. Paykunaqa, Jerusalenman sapa wata Diosta yupaychaq risqankuta, may sumaq templonta rikusqankuta ima, ¡nichá qunqaqchu kanku! Chayraykutaq, chay rikusqankuta “qhepata jamojkunaman” nisunman wawasninkuman, willaq kanku.

Saba llaqtata kamachiq warmipi tʼukurina. Payqa Salomonpa kamachiyninmanta, may jatun yachayninmanta ima uyarispa, mana creerqachu. ¿Imaynatá uyarisqan chiqapuni kasqanta yacharqa? Payllataq nin: “Noqataj mana creerqanichu jamuspa rikunaykama”, nispa (2 Cró. 9:6). Arí, wakin kutiqa, ñawisninchikwan rikusqanchikpuni sunqunchikman yaykun.

¿Imaynatá wawasniykiman, Diospa llaqtan sumaq wakichisqa kasqanta rikuchiwaq? Wasiyki qayllapi Betel wasi kaptinqa, riqsichimunaykipaq kallpachakuy. Mandypi, Bethanypi ima tʼukurina. Suyunkupi Betel wasiqa, wasinkumanta 1.500 kilometrospi (300 leguas) karupi kachkan. Chaywanpis tatasninkuqa,  paykunata sapa kuti Betelman pusaq kanku, astawanraq sipasyachkaptinkuqa. Paykuna ninku: “Betelta niraq riqsichkaspaqa, monja wasijina kasqanta, chaypi machu runaslla kasqankuta ima, yuyaq kayku. Chaywanpis chayman rispaqa, achkha waynasta sipaskunata ima, Diospaq kusiywan sinchita llamkʼachkaqta rikurqayku. Chayqa, Diospa llaqtan Jallpʼantinpi kasqanta rikuchiwarqayku. Sapa risqaykutaq, Diosman astawan qayllanaykupaq, paypaq llamkʼanaykupaq ima, kallpachawarqayku”, nispa. Mandywan Bethanywanqa, Diospa llaqtanta qayllamanta riqsirqanku. Chaytaq precursoras kanankupaq tanqarqa, aswan qhipamantaq wakin killasta Betelpi llamkʼanankupaq waqyarisqas karqanku.

Kay tiempopiqa, Diospa llaqtanta sumaqta riqsinapaq, juk sumaq yanapa tiyan, chaytaq israelitaspa tiempopi mana karqachu. Arí, achkha videos, DVD nisqa ima urqhukun. Chaykunataq, Diospa llaqtan imayna wakichisqachus kasqanta sutʼinchanku. Kay videostaq kanku: Los testigos de Jehová: organizados para predicar las buenas nuevas, Toda nuestra asociación de hermanos, Unidos gracias a la enseñanza divina nisqa ima. Chantapis, jatun ñakʼariykuna kaptin yanapakuqkuna, jatun tantakuykunata wakichiqkuna, misioneros, betelitas ima, Diospaq sinchita llamkʼasqankuta rikuyqa, Jallpʼantinpi hermanosta astawan munakunapaq tanqawanchik.

Llaqtanchikpi qutuchakuyqa, kallpachakunapaq, willanallapaqpuni ima, mayta yanapawanchik. Chaywanpis, Jallpʼantinmanta ‘tukuy hermanosninchikpi’ familianchikwan khuska tʼukurinapaq, tiempochakuna tiyan. Chayta ruwayqa, iñiypi “sinchʼita saya[napaq]”, kusisqa kanapaq achkha imas kapuwasqanchikta yuyarinapaq ima, yanapawasunchik (1 Ped. 5:9).

 [18 paginapi recuadro, dibujo/foto]

Diospa llaqtanmanta yachakunanchikpuni tiyan

Jehovap llaqtan imaynatachus qallarisqanta, imayna wakichisqachus kasqanta ima yachanapaq, achkha yanapas kapuwanchik. Kay tapuykunata ukhunchaspa qallariwaq:

☞Qutuchakuykunata waturiqkuna, ¿imaynatá llamkʼayninkuta qallarirqanku? Los testigos de Jehová, proclamadores del Reino de Dios, 222-228 paginasta ñawiriy.

☞Kay 1941 watapi Asamblea Teocrática nisqapi “Día de los hijos” sutichasqa, ¿imaraykutaq yuyarinapaqjina karqa? Los testigos de Jehová, proclamadores del Reino de Dios, 86, 88 paginasta ñawiriy.

☞Diospa Llaqtanta Kamachiqkuna, ¿imaynatá juk ruwayta akllanku? “Testimonio cabal” del Reino de Dios, 108-114 paginasta ñawiriy.