¿Bibliata ñawirispa maytachu kusikunki?

LORENA nin: “Bibliata ñawirichkaspa kusikunaymantaqa, puñuy atiwaqpacha. Mana entiendeyta atisqayrayku wak imaspi yuyaq kani”, nispa.

Achkha cristianos chayjinapi rikukunku. Chaywanpis Bibliata ñawirinankupaq mayta kallpachakunku. Marco nin: “Bibliata ñawirichkaspa, ukhuncharichkaspa imaqa, usqhayllata wak imaspi yuyayta qallarinchik, aswan qhipapaqtaq saqinchik. Ñuqaqa Diosmanta mayta mañakunay karqa, Bibliata sapa pʼunchay ñawirinallaypaqpunitaq mayta kallpachakunay karqa”, nispa.

¿Imatá Bibliata ñawiriyta mayta munanaykipaq ruwawaq? ¿Imataq may kusiywan ñawirinaykipaq yanapasunkiman? Kay yuyaychaykunata qhawarina.

Imatachus ruwayta munasqayki imaynatachus ruwanayki

Niraq ñawirichkaspa Diosmanta mañakuy, manataq wak imaspi yuyaychu. Bibliata ñawiriyta mayta munanaykipaq, yuyayniykita, sunquykita ima, wakichinanpaq Jehovamanta mañakuy, ajinamanta Diospa yachayninta allinta japʼiqanaykipaq (Sal. 119:34). Mana ajinata ruwaspaqa, usqhayllata saykʼupusunman manañataq ñawiriyta munasunmanchu. Lina nin: “Wakin kutispiqa, usqhayllata ñawirisqayrayku imamantachus parlachkasqanta mana japʼiqanichu. Chayrayku Jehovamanta mañakuni Bibliata ñawiriyman yachakunaypaq ajinamanta mana wak imaspi yuyanaypaq”, nispa.

Imatachus yachakuchkasqaykita allinpaq qhaway. Wiñay kawsayta japʼinaykipaqqa, Bibliap yuyaychasqanta allinta japʼiqanaykimanta, chaymanjina ruwanaykimantataq kachkan. Chayrayku ñawirichkaspaqa, ima yuyaychaykunachus kawsayniykipi yanapasunanpi allin kanman yuyanaykipaq kallpachakunayki. Cristian nin: “Ñawirichkaspaqa imaspichus, imaraykuchus pantachkasqayta qhawarikunay tiyan. Chantapis Bibliapi, publicacionespi ima sumaq yuyaychaykunata, ñuqapaqjinapuni tarispaqa mayta kusikuni. Qillqaqkunawan mana riqsinakuptiykupis”, nispa.

Imastachus qhipaman ruwayta atisqaykita ruway. Bibliapi qharismanta, warmismanta ima parlasqanmanta astawan yachakuy. Paykunamanta astawan yachakunaykipaqqa, kay Perspicacia para comprender las Escrituras chayri Índice de las publicaciones Watch Tower nisqapi maskʼay. Chay runas kasqankupipuni yuyaspaqa, paykuna ruwasqanku kawsayniykipi mayta yanapasunqa.

Bibliapi runasman wak imasmantañataq yachachinaykipaq maskʼariy (Hech. 17:2, 3). Sofiaqa Bibliata ukhuncharispa chayta ruwan, pay nin: “Runaswan parlarinaypaqqa wak yuyaychaykunata maskʼarini. Ajinamanta Bibliamanta chiqa yachachiykunata aswan allinta sutʼinchayta atini. Torremanta Qhawaq revistapi, ukhuncharinaypaq maytapuni yanapawan”, nispa (2 Tim. 2:15).

Rikuchkawaqpisjina yuyay. Hebreos 4:12 nin: “Diospa Palabranqa kawsayniyoj”, nispa. Bibliapi ñawirichkasqaykita rikuchkawaqpisjina yuyay. Chay runaspis kawaqjina qhaway, uyariy ima. Kaypi tʼukuriy: “¿Imapitaq kawsaynin kawsayniyman rikchʼakun? ¿Imaynatá  paykunajina kawsayniypi chʼampaykuna rikhuriptin ruwayman?”. Chaytaq ñawirisqaykita japʼiqanaykipaq, yuyarinaykipaq ima yanapasunqa.

Mana japʼiqayta atinapaqjina kaq pʼitista ukhunchariy chaymanta sutʼinchaq publicacionestapis. Sapallayki Bibliata sapa ukhunchachkaspaqa, unaysituta ukhunchariy. Juk sumaq yachayta tarispaqa astawan ukhunchay, mana riqsisqayki rimaykunata imachus niyta munasqantapis maskʼay, chantá Traducción del Nuevo Mundo de las Santas Escrituras con referencias nisqa Bibliapi notasninta ñawiriy. Diosmanta astawan yachakuspa chaymanjinataq kawsakuspaqa, Diospa Palabranta ñawiriy mayta kusichisunqa. Salmistajinataq niyta atinki, pay nirqa: “Kamachisqasniykita herenciaypaj wiñaypaj japʼikapuni; kamachisqasniykeqa sonqoyta kusichinku”, nispa (Sal. 119:111).

Bibliata ukhuncharichkaspaqa, ama usqhayllata ukhunchariychu. Tantakuykunapaqqa wakichikunallaykitaq tiyan. Raquel nin: “Achkha ruwanasniyuq kasqayrayku, ñawirichkasqayta mana japʼiqayta atinichu. Chayrayku pisisitullata allinta japʼiqanaypaqjina ukhuncharini”, nispa. Cristian nin: “Usqhay usqhayllata ukhunchaspaqa, ñawirisqayta mana japʼiqanichu, nitaq sunquymanpis chayanchu, chayrayku sunqu yuyayniy mayta juchachawan”, nispa. Chaypaqqa allin kanman tiempochakuy.

Bibliata sunqu kʼajaywan ñawiriyta munay. Apóstol Pedro yuyaycharqa: “Imaynatachus ñuñoj wawaqa lecheta munan, ajinallatataj qankunapis munaychej mana imawan chhapusqa Diospa chʼuwa palabranta, salvasqa kayniykichejpi sumajta wiñanaykichejpaj”, nispa (1 Ped. 2:2, 3). Wawasqa nacekusqankumantapacha mamankup lechenta mayta munanku, ñuqanchikrí Diospa Palabranwan kallpachakuyta necesitanchik. Bibliamanta juk paginata sapa pʼunchay ñawirispaqa, astawan ñawiriyta munanki. Qallariypiqa ichapis mana atinapaqjina kanman, chaywanpis pisi tiemponman ñawiriyta mayta munanki.

Ñawirisqaykipi tʼukuriy. Tʼukuriypis Bibliamanta yachakusqanchikta, yachasqanchikwan jukchanapaq mayta yanapawanchik. Imaynatachus kʼacha rumisitusta jukchaykuspa sumaq wallqaman tukuchinchik ajina sumaq yachaywanpis (Sal. 19:14; Pro. 3:3).

 Ama tiempota usuchiychu

Bibliata ukhunchayqa mana atikullanchu, chaywanpis mayta kallpachakuyqa mana qhasipaqchu kanqa. Chantapis Diosmanta astawan yachaspaqa wiñay tukusqa cristianoman tukunki (Heb. 5:12-14). Chantá ukhunchaspaqa, imachus allin imataqchus mana allin kasqanta yachanki, aswan yachayniyuq ima kanki chaytaq kusisqa, sunqu juntʼasqa, sunqu tiyasqa ima kawsakunaykipaq yanapasunqa. Bibliata ñawiriqkunapaq, chaymanjina ruwaqkunapaq imaqa, Biblia yuyayta qusqanqa, “kawsay sachʼa jina” (Pro. 3:13-18).

Diospa Palabranta mana saqispa ukhunchaqqa, sumaq yuyayniyuq runaman tukunqa (Pro. 15:14). Ajinamanta Bibliamanjina wakkunata yuyaychayta atinki. Bibliap yuyaychasqanmanjina, “allin kamachi, yuyayniyojtaj” publicacionesta qusqanmanjina imallatapis akllaptiykiqa, sunqu tiyasqa kawsakuyta atinki (Mat. 24:45). Chantapis Diospa Palabran yuyaychasqanmanjina, ruwanki, parlanki, kawsakunki ima. Mana chayllachu manaqa Jehovamanpis astawan qayllaykuyta atinki (Sal. 1:2, 3).

Sunqumantapacha Jehovata munakusqanchikqa, iñiyninchikmanta parlanapaq tanqawanchik. Chayta ruwaypis mayta kusichiwanchik. Sofiaqa, Bibliamanta wakin pʼitista yuyarinanpaq, runasman yachachichkaspa uqharinanpaq ima kallpachakunanta nin. Payqa achkha runasta yanapachkan chaytaq mayta kusichin. Sofía nin: “Bibliata may kusiywan ñawirisqankuqa mayta kusichiwan”, nispa.

Chaywanpis Bibliata kusiywan ñawirispaqa astawan Jehovaman qayllaykunki. Chantapis ukhunchariyqa astawan sutʼita Diospa kamachiykunasninta kʼacha kaykunasninta nisunman munakuyta, khuyakuyta, chiqan kayta ima yachanaykipaq yanapasunqa. Chayrayku tukuy atisqaykimanjina Bibliata ukhunchanaykipaq tiempochakuy. Chayta ruwayqa sumaq qurita tariyjina (Sal. 19:7-11).

[5 paginapi recuadro, dibujos/fotos]

IMAYNATACHUS BIBLIATA ÑAWIRIWAQ

▪ Niraq ñawirichkaspa Diosmanta mañakuy, manataq wak imaspi yuyaychu.

▪ Imatachus yachakuchkasqaykita allinpaq qhaway.

▪ Imastachus qhipaman ruwayta atisqaykita ruway.

▪ Bibliapi runasman wak imasmantañataq yachachinaykipaq maskʼariy.

▪ Rikuchkawaqpisjina yuyay.

▪ Mana japʼiqayta atinapaqjina kaq pʼitista ukhunchariy chaymanta sutʼinchaq publicacionestapis.

▪ Bibliata ukhuncharichkaspaqa, ama usqhayllata ukhunchariychu.

▪ Bibliata sunqu kʼajaywan ñawiriyta munay.

▪ Ñawirisqaykipi tʼukuriy.

[4 paginapi dibujo/foto]

Imatachus ñawirichkasqayki chʼampayniykipis kanmanjina yuyay