Chiqan kamachiq Cristojina ruwana

POLITICOSPI atienekuqkunaqa, manaña paykunapi atienekunkuchu. Cristop qhipanta riqkunarí achkha bendicionesta japʼinku. Jesús kikin nirqa: “Noqaman jamuychej, tukuy saykʼusqa kajkuna, llasa qʼepiyojkuna ima, noqataj samarichisqaykichej. Yugoyman churakuychej, yachaqakuychejtaj noqamanta. Noqaqa kʼacha, llampʼu sonqotaj kani, almasniykichejpajtaj samakuyta tarinkichej”, nispa (Mat. 11:28, 29). Jesuspa nisqanmanjina kawsayqa, mayta kallpachawanchik. Payqa llakisqasmanta, sunqu pʼakisqasmanta ima, mayta llakikun chayrayku kʼacha kamachiyninta kasukunankupaq waqyarin. ¿Ima niyta munan Cristota kasukuy?

Apóstol Pedro sutʼincharqa: “Cristopis qankunarayku ñakʼarerqa, chayta yachaspa qankunapis kikillantataj ruwanaykichejpaj”, nispa (1 Ped. 2:21). ¿Imaraykutaq Jesusjina ruwananchikpuni tiyan? Juk kikinchaywan sutʼincharina. Unquykusqaykirayku juk hospitalpi kachkasqaykipi tʼukuriy, chay unquypaqtaq mana jampi kanchu, chay unquywan wak runaspis unqusqa kachkanku. Chaywanpis juk doctorlla chay unquymanta jampiyta atin. ¿Manachu nisusqanta uyarispa kasukuwaq, maychus kaqmanjinataq ruwawaq? Arí, kikillantataq aswan qhipaman kawsananchikqa, Jesusta kasukunamanta kachkan. Chaypaqqa kamachiwasqanchikta uyarinanchik, kasukunanchik ima tiyan, payta yanapaqkunatataq yanapananchik tiyan.

Payta uyarinchik, kasukunchik ima

Jesusqa Urqupi yachachichkaspa ajinata tukucharqa: “Sichus pipis kay nisqasniyta uyarispa ruwan chayqa, chay runaqa sumaj yuyayniyoj chhanka patapi wasichakoj runaman rijchʼakun. Para jichʼakamusqa, mayustaj chayamusqanku; wayrataj sinchʼita wayramuspa, chay wasiman wajtakamusqa. Chay wasitajrí mana urmasqachu chhanka patapi ruwasqa kasqanrayku”, nispa (Mat. 7:24, 25).

Jesusqa, pichus nisqasninta uyariqta, kasukuqta ima, “sumaj yuyayniyoj” runa kasqanta nirqa. ¿Ñuqanchikrí Cristo kamachiwasqanchikta tukuy sunquchu kasukunchik, chantá yachachiwasqanchikta jatunpaq, may sumaqpaqtaq qhawasqanchikta rikuchinchikchu? ¿Chayri atinanchikpaqjina kaqkunallatachu juntʼanchik? Jesusqa nirqa: “[Tataypa] munaynillanta ruwani”, nispa (Juan 8:29). Ñuqanchikpis payjina ruwayta munananchik tiyan.

Ñawpa siglopi apostolespis Cristop nisqanta kasukusqankuta rikuchirqanku. Sutʼincharinapaq, juk kutipi Pedro Jesusman nirqa: “Noqaykoqa tukuy kapuyniykuta saqerpariyku qanwan purinaykupaj”, nispa (Mar. 10:28). Apostolesqa Jesuspa nisqasninta may jatunpaq qhawarqanku, chayrayku paypa qhipanta rinankupaq ruwanasninkuta saqirqanku (Mat. 4:18-22).

Payta yanapaqkunata kasukunchik

Jesusqa niraq wañuchichkaptinku, kamachisqanta kayjinamantañataq kasukunanchikta sutʼincharqa, pay nirqa: “Kachasqayta wajyarejqa noqata wajyariwan”, nispa (Juan 13:20). Arí, payqa akllasqa cristianosta “wawqe[sniy]” nispa nirqa (Mat. 25:40). Cristoqa kawsarimuytawan janaqpachaman ripuspa, paykunata “sutimpi willajkuna[ta]” suticharqa. Paykunataq kachamuqninkuq sutinpi runasta Jehovawan allinyakunankupaq waqyarinanku karqa (2 Cor. 5:18-20). Chayrayku Jesusta Kamachiwaqninchiktajina qhawayqa, “wawqe[sninpa]” nisqankuta kasukuy niyta munan.

 Biblianiqta, publicacionesniqta, tantakuykunaniqta ima, yuyaychawasqanchikta, ¿imaynatá qhawanchik? Chaykunaniqtaqa Kamachiwaqninchikpa nisqasninta yuyarikunchik (2 Ped. 3:1, 2). Chantapis chay tukuy imata ukhunchanapaq tiempochakuspaqa, may sumaqpaq qhawasqanchikta rikuchisun. Chantá Bibliamanta juk yuyaychayta sapa kuti yuyarichikuptin, ¿imaynatá qhawanchik? Sutʼincharinapaq Bibliaqa, casarakuyta munaq cristiano “creej[wan]puni” casarakunanta nin (1 Cor. 7:39). Chay yuyaychaytaqa, Torremanta Qhawaq revistapi pachak watas kuraqtaña ukhunchakun. Chayjina yachaqanasta urqhukusqanqa, Cristop wawqisnin, mayta munakuwasqanchikta, allinninchikta munasqankuta ima rikuchiwanchik. Chay yuyaychawasqanchikta kasukuspaqa, Jesuspa niwasqanchiktapis kasukuchkasunmanjina kanqa.

Kay Proverbios 4:18 nin: “Cheqan runaspa ñanninkoqa sutʼiyamuyta inti llojsimushaj jina, pʼunchayamusqanman jinari astawan kʼancharin”, nispa. Chay rimaykunamanjina Jesuspa yuyaychaykunasninqa sapa kuti astawan sutʼinchakun. Chantapis Cristop “wawqe[sninta]”, Bibliap yachachiykunasninta sutʼinchawasqanchikta tukuy sunqu kasukuspa yanapallasunmantaq chaykunataqa “allin kamachi, yuyayniyoj[...]” urqhun (Mat. 24:45).

¿Imaynamantawantaq Cristop wawqisninta yanapasunman? Qutuchakuymanta ancianosta yanapaspa, chaytataq Pablo yuyaychasqanmanjina ruwaspa, pay nirqa: “Kurajkunaykichejta kasuychej, paykunaj kamachiynimpitaj kaychej, imaraykuchus paykunaqa allinniykichejpaj qhawashallasunkichejpuni”, nispa (Heb. 13:17). Ichapis juk anciano Familiapi Diosta Yupaychanapaq Chʼisipi tantakuyta sapa semana ruwananchikta yuyaychariwasunman chayri willayninchikpi aswan allinta ruwanapaq imallapipis llamkʼananchikta yuyaychariwasunman. Chayri qutuchakuykunata waturiq hermano, cristiano kawsayninchikpi imaspichus llamkʼananchik kasqanmanta sumaqta yuyaychariwasunman. Tukuy sunqu chay yuyaychaykunata kasukuptinchik, chaymanjinataq ruwaptinchikqa, Cristop niwasqanchikta kasukusqanchikta rikuchinchik.

Kay pachapiqa ni pi allinta kamachiyta atinchu. Chaywanpis Cristop niwasqanchikta kasukuspaqa, mayta kusikunchik. Chayrayku ni jaykʼaqjina payta yanapaqkunata kasukuyta, yanapayta ima mayta munanchik.

[27 paginapi dibujos/fotos]

Diosta mana yupaychaqwan mana casarakunata, ¿Biblia yuyaychasqanta kasukunkichu?