“May sumaq kamachiqjina may munasqa amigojinataq”

JOHN BARR hermanoqa, Diospa Llaqtanta Kamachiqkunamanta juknin karqa. Payqa, 2010 watapi 4 diciembre sábado paqarinta wañupuspa Jallpʼapi ruwanasninta tukuchan. Payqa 97 watasniyuq karqa. Chantapis “sumaq kamachiqjina may munasqa amigojinataq” riqsisqa karqa.

Hermano Barrqa, Escociapi (Aberdeen) paqarikurqa, payqa aswan sullkʼa hermanosninmanta karqa. Tatasninqa akllasqa cristianos karqanku. Hermano Barrqa familianmanta munakuywanpuni parlaq, tatasnin allinta yachachisqankumanta may agradecesqa karqa.

Waynuchituña kaspataq mana riqsisqan runaswan parlayta manchachikuq. Chaywanpis, manchachikuyninta atipananpaq mayta kallpachakurqa, 1927 watapi domingo tardenpi 14 watasniyuq kachkaspa tatanwan wasimanta wasi rinanpaq wakichisqa kachkasqanta nirqa. Ajinamanta Diospaq llamkʼayta qallarirqa. Hermano Barrqa, chaymantapacha wañupunankama, sunqu kʼajaywan Diospa Reinonmanta allin willaykunata willallarqapuni.

Johnpa mamanqa yaqha juk accidentepi wañupurqa chaytaq kawsayninpi tʼukurinanpaq yanaparqa. Chayrayku 1929 watapi Jehovaman qukurqa, 1934 watapitaq bautizakurqa. Phichqa watasninmantaq Londresmanta (Inglaterra) Betelpi llamkʼarqa. Ajinamanta 71 watasta Diospaq llamkʼayta qallarirqa.

Hermano Barrqa, 1960 watapi octubre 29 pʼunchaypi Mildredwan casarakurqa, paypaq chayqa “may kʼachapuni” karqa. Mildredqa, sunqu kʼajaywan unay watastaña precursorajina, misionerajinataq karqa. Johnwan Mildredwanqa, Diosta tukuy sunqu yupaychaqkunajina riqsisqas karqanku. Paykunaqa jukchasqas, chiqa sunqustaq karqanku, Mildred 2004 watapi octubre killapi Jallpʼapi ruwanasninta tukuchanankama. Paykunaqa Bibliata sapa pʼunchay khuskapuni qhariwarmijina ñawiriq kanku.

Payta riqsiqkunaqa, John Barr sutita uyarispa sumaq yuyaywan yuyaychaqtajina, maychus kanmanjina ruwaqta, kʼacha runatajina, Bibliap nisqanmanjinapuni ruwaqtajina yuyarikuq kanku. Payqa sumaqta llamkʼaq, khuyakuyniyuq, munakuyniyuq kamachiq, mana wasanchaq amigotaq karqa. Parlasqanpi, umallirichisqanpi, Diosmanta mañakusqanpi ima, chiqa kaqta mayta munakusqanta, Jehovap qayllanpitaq kasqanta rikuchiq.

Hermano Barr manaña kay pachapi ñuqanchikwan kananmanta mayta llakikuspapis mayta kusikunchik tʼinkanta japʼisqanmanta nisunman mana jaykʼaq wañuq cuerpota (1 Cor. 15:53, 54). *

[Sutʼinchaynin]