Ñawiriqkunapta tapuyninku

¿Machkha profeciaschus Hebreopi Qillqasqasmanta Jesuspi juntʼakusqanta yachakunchu?

Hebreopi Qillqasqasta ukhunchachkaspaqa, achkha profecías Jesucristopi juntʼakusqanta tarinchik. Kay profeciasqa, Mesías maymantachus jamunanta, maykʼaqchus rikhurinanta, imatachus ruwananta, imaynatachus ñakʼarichinankuta, Jehovap munayninta juntʼananta ima willarqanku. Tukuynintaq Jesuspuni, Mesías kasqanta reparanapaq yanapawanchik. Chaywanpis Bibliapi Mesiasmanta achkha profecías kaptinpis, ¿machkhachus kasqanta yupayta atisunmanchu?

Mesiasmanta juk profecía imachus kasqanmantaqa, mana tukuy runaschu kikinta yuyanku. Alfred Edersheim kay Comentario bíblico histórico nisqa libronpi, rabinos nisqa ñawpa qillqasqankupiqa 456 profecías Hebreopi Qillqasqaspi kasqanta yuyasqankuta nirqa. Chaykunapitaq mana Mesiasmantapunichu parlakun. Kay 456 qillqasqasta allinta ukhunchaspaqa, mana sutʼita yachakunchu tukuynin profecías Cristomantapuni parlachkasqanta. Sutʼincharinapaq Edersheim nin, judíosqa kay Génesis 8:11 pʼitita Mesiasmanta juk profeciatajina qhawasqankuta. Paykunaqa, “juk paloma olivo laqhita achumusqanqa, Mesiaspa urqunmanta urqusqa kasqanta” nirqanku. Chantapis kay Éxodo 12:42 nisqanta judíos ukhupi pantasqata yuyasqankumanta sutʼinchallantaq: “Imaynatachus Moisés chʼin pampamanta lluqsimurqa, ajinallatataq Mesiaspis Romamanta jamunan karqa”. Arí, achkha yachayniyuq runas, Bibliamanta yachakuqkuna imaqa, chay pʼitis mana Jesucristomantachu parlasqanta sutʼita reparanku.

Chantapis ima profeciastachus Jesucristo juntʼasqanta yupayta munaspapis, machkhachus kasqantaqa mana yachasunmanchu. Sutʼincharinapaqqa, Isaías 53 tʼaqata qhawarina. Kay 2-7 pʼitisqa Mesiasmanta ajinata sutʼinchan: “Mana kʼachituchu karqa [...]. Runasqa payta qhesacharqanku, pisipaj qhawarqanku [...]. Cheqamanta payqa onqoyninchejta aparqa [...]. Payqa tʼojsisqa karqa Diospa contranta oqharikusqanchejrayku [...]. Payqa cordero jina ñakʼanaman apasqa karqa”. Kay tʼaqata, ¿juk profeciatajinallachu qhawasunchik chayri achkha profeciastajinachu?

Kay Isaías 11:1 nisqanta qhawarina chaypi nin: “Uj kʼullumanta ijimonqa, chay kʼulloqa Isai; saphisninmantataj ijimojqa poqonqa”, nispa. Chantapis 10 pʼitiqa yaqha kikin rimaykunawan chayllamantataq parlan. Kay iskay pʼitista, ¿iskay profeciastajinachu chayri juk profeciatajinallachu yupasunchik? Arí, Isaías 53, 11 tʼaqaspi kaq profeciasta imaynatachus yupasqanchikmanjina machkha profeciaschus Mesiasmanta kasqanta yachasunman.

Chantapis Hebreopi Qillqasqaspi Mesiasmanta machkha profeciaschus kasqantaqa, mana yachananchikpunichu tiyan. Jehovap llaqtanqa, achkha profeciasmanta, juntʼakusqankumanta ima achkhataña qillqan. * Kaykunataq Bibliata sapallanchikpi, familianchikwan ima ukhunchachkaptinchik, willayninchikpitaq mayta yanapawasunman, kallpachawasunman ima. Chantá machkha profeciaschus kasqanta mana yachaptinchikpis, Jesuspuni Cristo chayri Mesías kasqanta sutʼita rikuchiwanchik.

[Sutʼinchaynin]