Mana qunqanapaqjina tantakuy

JEHOVAMANTA SUTʼINCHAQKUNAQA, Jatun Tantakunapaq Wasipi 2010 watapi 2 octubre pʼunchaypi Jersey Llaqtapi (Nueva Jersey, Estados Unidos), watapi juk kutita corporación Watch Tower Bible and Tract Society of Pennsylvania 126 tantakuyta ruwanankupaq tantakurqanku. Chaypitaq Diospa Llaqtanta Kamachiqkunamanta Stephen Lett hermanoqa jinata nirqa: “Kay tantakuy tukukusqantawanqa, tukuychá nisun: ‘Diospa Llaqtan kay watapi tantakusqanchikqa ni jaykʼaq qunqanapaqjina karqa’”, nispa. Chayta nisqantaq chay tantakuyman riqkunata mayta kallpacharqa. ¿Imasmantá chaypi parlakurqa?

Lett hermanoqa, Ezequiel musquypijina Jehovap carretanta rikusqanmanta umallirichirqa. Chay jatun carretaqa Diospa Llaqtanwan ninakun, chaytataq paylla apaykachan. Angelesqa, janaqpachapi kaq llaqtan, Jehovajinataq imallatapis usqhayta ruwanku. Chantá kay pachapi kaq llaqtanpis kay qhipa wataspi ñawparichkallanpuni.

Sutʼincharinapaq chay tantakuypiqa, wakin sucursales wak sucursaleswan jukchakusqanmanta parlakurqa. Chayraykutaq chay suyuspi kaq Betelespi llamkʼaq hermanosqa, astawan willayta atinqanku. Lett hermanoqa, uyariqkunata allin kamachi, Diospa Llaqtanta kamachiqkunawan chiqa sunqulllapuni, allin yuyayniyuqtaq kanankupaq Jehovamanta mañakunankuta nirqa (Mat. 24:45-47).

May sumaq willaykuna, tapuykuna ima

Tab Honsberger hermanoqa, Comité de Sucursal de Haití nisqamanta, paytaq Haití suyupi 2010 watapi 12 enero pʼunchaypi, jallpʼa ikhakuy kasqanmanta, chaypitaq 300.000 runas wañupusqankumanta willarqa. Chantapis nillarqataq cristianos nichikuqkunata kamachiqkunaqa, saqra runasta Dios castigasqanta, kʼacha runastataq jarkʼasqanta nichkasqankuta. Chaywanpis jina kaptin, ¿imaraykutaq achkha saqra runas, carcelpa pirqasnin thuñikuptin kacharichisqas karqanku? Haití suyumanta achkha llampʼu sunqu runasqa, imaraykuchus kay tiempopi chayjina llakiykuna kasqanta yachaspa, mayta sunquchakunku. Chantapis Honsberger hermanoqa, imatachus juk hermano warmin wañupusqanmanta nisqanta nirqa: “Sapa pʼunchay waqani. Maykʼaqkamachus llakikusaq, chaywanpis Jehovap llaqtanpi munakuyta rikusqayqa, mayta sunquchawan. Imapichus suyakunaytapis sutʼita yachani, wak runasmantaq yachachiyta munani”, nispa.

Mark Sanderson hermanoqa, Filipinas suyupi Comité de Sucursalpi llamkʼaq, kunantaq  Betel de Brooklyn nisqapi kachkan. Payqa Filipinasmanta willarqa. Chantapis may kusiywan Filipinas suyupi 32 killaspi willaqkunaqa yapakullasqantapuni, Bibliamanta yachakuqkunapis willaqkunamanta aswan achkha kasqanta nirqa. Payqa, Miguel hermanomanta parlarirqa paypa allchhintaqa wañuchisqanku. Chay hermanoqa, chay wañuchiqta juzgakunanpaq, carcelpi wisqʼasqa kananpaq ima tukuy imata ruwarqa. Juk pʼunchaypi pay carcelman willaq riptin chay wañuchiq runata taripasqa. Pʼinqaypi rikukuspapis kʼachamanta parlapasqa, Bibliamanta yachachinantataq nirqa. Chay runaqa yachakuyta munarqa, Jehovata munakusqanraykutaq bautizakusqa. Kunanqa, Miguelpa sumaq amigon, carcelpi pisi watasllataña kananpaqtaq yanapachkan. *

Chantá, Departamento de Escuelas Teocráticas nisqamanta yachachiq, Mark Noumair hermano, kimsa qhariwarmikunata tapurirqa, paykunataq karqanku: Alex, Sarah Reinmueller; David, Krista Schafer; Robert, Ketra Ciranko ima. Reinmueller hermanoqa, Publicacionespaq Comisión nisqapi yanapan, paytaq 15 watasniyuq kachkaspa, chiqa kaq kawsayninpi aswan sumaq kasqanta reparasqanmanta sutʼincharqa. Chay wataspiqa Canadapi precursor karqa, achkha kutispitaq sapallan willarqa. Chantá Betelpi kaq hermanosmanta pikunachus yanapasqanta hermano Mark tapuptin, kimsa chiqa sunqu runasmanta parlarirqa, imaynatachus paykuna Diosta yupaychaypi ñawparinanpaq yanapasqankuta sutʼincharqa. Warmin Sarahtaq, juk hermanawan amigas kasqankumanta parlarirqa, chay hermanaqa Chinapi achkha watasta iñiyninrayku carcelpi wisqʼasqa kasqa. Sarahqa, Jehovapi atienekuyta yachasqanta nirqa chaytataq mañakuyniqta ruwarqa.

David Schafer hermanoqa, Yachachinapaq Comisión nisqapi yanapan. Payqa mamanpa iñiyninmanta allinta parlarqa, wayna kachkaptintaq llamtʼiri hermanospa yanapayninwan precursor auxiliarjina llamkʼayta atisqanta nirqa. Krista warmintaq betelmanta machitu hermanos yanapasqankumanta yuyarikurqa, paykunaqa Jesús kamachisqanmanjina “pisi imaspi maychus kajta ruwa[sqanku]” (Luc. 16:10).

Robert Ciranko hermanoqa, Qillqaqkunapaq Comisión nisqapi llamkʼan. Paytaq tawa abuelosninmanta parlarqa, paykunaqa Hungría suyumanta akllasqa cristianos karqanku. Yuqallitullaraq kachkaptin 1950 watamanta qhipaman, jatun tantakuykunaman risqan mayta kallpachasqanta nirqa, imaraykuchus  Diospa llaqtan, qutuchakuyninmanta aswan jatun kasqanta repararqa. Warmin Ketraqa, juk qutuchakuypi precursora kasqanmanta, chaypitaq achkha chʼampaykuna kasqanmanta parlarirqa, chayjinapi kaspa Diosman chiqa sunqu kayta yachakusqanta nirqa. Sinchita llamkʼasqanrayku, precursora especialjina sutichasqa karqa, wak sumaq jukchasqa qutuchakuymantaq kachasqa karqa.

Chantá Manfred Tonak hermanoqa, Etiopiamanta willarqa. Chay suyuqa, unay tiempomantapachaña, chaypitaq 9.000 willaqkuna tiyan. Achkha hermanosqa Adís Abeba llaqtapi, qayllasninpi ima tiyakunku. Karupi kaq llaqtasninpitaq niraq allinta willakunchu. Chayrayku Etiopía suyumanta wak suyuspi tiyakuq hermanos yanapanankuta mañakurqa. Paykunamantataq achkhas chay llaqtasman pisi tiempollapaq yanapaq rirqanku. Runasman yachachirqanku, tukuytataq kallpacharqanku.

Chantapis Rusiapi kaq hermanosmanta, juiciospi kasqankumanta ima, tʼaqasqa kaq umallirichiykunamanta parlarillasunmantaq. Aulis Bergdahl hermanoqa, Comité de Sucursal de Rusia nisqapi llamkʼan. Payqa, chay suyumanta hermanos astawanqa Moscú llaqtamanta hermanos qhatiykachasqas kasqankumanta parlarqa. Philip Brumley hermanoqa, sucursal Estados Unidosmanta Departamento de Asuntos Legales nisqapi llamkʼan. Payqa, Jehovamanta sutʼinchaqkunata jisqʼun kutita juchachasqankuta, kay pasaq killaspi Tribunal Europeo de Derechos Humanos nisqa allinchasqanmanta parlarqa. Chay tribunalqa, qhasillamanta juchachasqankuta, manataq leymanjinachu kasqanta nirqa. Manaraq chay kamachiy juntʼakuchkaptinpis, Brumley hermanoqa wak suyuspi ajina juiciospi yanapananpaq sumaqpuni kasqanta nirqa.

Chaymantataq Lett hermanoqa, Francia suyupi unaymantaña Jehovamanta sutʼinchaqkunata impuestosta mañakusqanmanta, kay tribunal tramitepi kananta saqisqanta willarqa. Kay tribunalqa, may respetasqa nitaq tukuy juiciostachu uyarin. Kunankamataq chay tribunalqa 39 juiciosta Jehovamanta sutʼinchaqkunata uyarirqa chaykunamantataq 37 juiciosta atiparqanku. Lett hermanoqa chaypaq Diosmanta mañakunallankutapuni nirqa.

Tukuchanapaqtaq Richard Morlan hermano umallirichirqa. Payqa kay Escuela para Ancianos de Congregación nisqapi yachachin, chay yanapa kasqanmanta may kusisqa parlarqa, chantá ancianospis, may agradecesqas kachkasqankuta willarqa.

 Diospa Llaqtanta Kamachiqkunamanta wak umallirichiqkuna

Wak umallirichiykunataqa, Diospa Llaqtanta Kamachiqkuna umallirichirqanku. Ñawpaqtaqa, Guy Pierce hermano kay 2011 watapaq akllasqa pʼitita: Jehovap sutinpi jarkʼakunachik, nisqata ukhuncharqa (Sof. 3:12). Chantapis Jehovap pʼunchaynin qayllapiña kasqanrayku, may kusiy, tʼukurinapaqjina tiempopitaq kawsachkasqanchikta nirqa. Chaywanpis runasqa llulla religionespi, politicapi, qullqipi, wak imaspi jarkʼakuyta maskʼanku. Arí, jarkʼakuyta tarinanchikpaqqa, Jehovap sutinta uqharinanchik tiyan, chaypaqtaq Diosta riqsinanchik tiyan, jatunpaq qhawananchik tiyan, paypi atienekunanchik tiyan, tukuy sunqunchikwantaq munakunanchik tiyan.

Chantá David Splane hermano, “¿Diospa samarikunan pʼunchayman yaykunchikñachu?”, nispa umallirichirqa. Samarikunan pʼunchayninpi kachkaspapis Jehová mana jinallachu kachkasqanta nirqa. Imaraykuchus “kunankama[qa] trabajasha[llanpuni]”, Churinpis Tatanpa munaynin kay Jallpʼapi juntʼanapaq kikillantataq ruwan (Juan 5:17). ¿Imaynatá Diospa samarikunan pʼunchayninman yaykunchik? Juchallikuyta, ancha chiqan runapaq qhawakuyta ima qhisachaspa. Chantapis Diospi iñina, munayninmanjina kawsana, juntʼakunanpaqtaq atisqanchikta yanapana. Wakin kutispiqa chayta ruway mana atikullanchu, chaywanpis Diospa Llaqtan yuyaychawasqanchikrayku, yachachiwasqanchikrayku ima ruwayta atinchik. David Splane hermanoqa, umallirichiyninta Diospa samarikunan pʼunchayninman yaykunapaq kallpachakuna kasqanta nispa tukucharqa.

Anthony Morris hermanoqa,“¿Imataq suyawanchik?”, nispa umallirichirqa. Juk tatajinataq munakuywan, uyariqkunata imayna tiempopichus kawsakuchkasqanchikta, profecías juntʼakunanta nisunman “tukuy imapis allillan; ni imamanta llakikuna kanchu” nisqa profecía juntʼakunanta, llulla religión chinkachisqa kananta ima mayta suyakunanchikta yuyarichirqa. Chaywanpis wakin kutipiqa, Armagedón qallarisqantaña uyarinanchikta chaykunataq juk tuqllajina kanankuta nirqa (1 Tes. 5:2, 3; Apo. 17:15-17). Pacienciakuspa, Miqueas 7:7 nisqamanjinataq kusisqallapuni kanata nirqa. Chantapis Diospa Llaqtanta Kamachiqkunap maqanakuq soldadosjina qayllallanpipuni kananchikpaq kallpachariwarqanchik. Ajinatataq tukucharqa: “Sonqochakuychej kallpachakuychejtaj, Tata Diospi tukuy suyakojkuna”, nispa (Sal. 31:24).

Chay umallirichiykunaqa, mana qunqanapaqjina karqa. Geoffrey Jackson hermanoqa, juk watatajina Torremanta Qhawaq musuq revistata entiendeyta atikunanpaqjina inglespi urqhukunanta nirqa, chaytaq mana allinta entiendeqkunapaq kanqa. Diospa Llaqtanta Kamachiqkunaqa, Estados Unidosmanta superintendentes de Distrito nisqasta, warmisninkuta ima wasisninkupi waturikunanpaq kamachirqa, chaytataq Stephen Lett hermano willarqa. Chantapis Escuela de Entrenamiento Ministerial nisqa, Escuela Bíblica para Varones Solteros nisqa sutiwan riqsikunanta nirqa, chantá Escuela Bíblica para Matrimonios Cristianos nisqa kananta willallarqataq. Chaytaq qhariwarmikuna Jehovap Llaqtanpi yanapanankupaq aswan wakichisqas kanankupaq yanapanqa. Tukuchananpaqtaq Lett hermanoqa, kunanmantapacha sapa wata iskay kutita Escuela para Superintendentes Viajantes y sus Esposas nisqa, chantá Escuela para Miembros de Comités de Sucursal y sus Esposas nisqa, Pattersonpi ruwakunanta nirqa. Chay escuelasman riqkunaqa, tiemponman watiqmanta riyta atillanqankutaq.

Unaymantaña Diospa Llaqtanta Kamachiqkunamanta kaq John E. Barr hermano 97 watasniyuq, kay tantakuyta sunqumantapacha Diosmanta mañakuspa tukucharqa. * Tantakuy tukukuptintaq tukuy may kusisqas kachkarqanku, mana qunqanapaqjina kasqantataq repararqanku.

[Sutʼinchaykunasnin]

[19 paginapi sutʼinchaynin]

Chay tantakuypi kaqkunaqa hermanosta tapukusqanta uyarispa kusikurqanku

[20 paginapi sutʼinchaynin]

Jehovaqa, Etiopiapi willakusqanta bendicerqa