Chʼampaykunapi rikukuspa, ¿Fineesjina ruwayta atisunmanchu?

ANCIANOS ruwasqankutaqa may jatunpaq qhawana. Chaywanpis Bibliapiqa, ruwanasninku mana atikunanpaqjinallachu kasqanta rikuchin. Arí, paykunaqa, juk hermano mayta juchallikuptin “Tata Diospa sutimpi” juzgananku tiyan (2 Cró. 19:6). Wakin ruwaykunapaqtaq ichá mana wakichisqachu kachkasqankuta reparakunkuman. Moisesqa ajinapi rikukurqa. Faraonman rinanta Jehová kamachiptin nirqa: “Pitaj noqa kani Faraonman ri[naypaqri?]”, nispa (Éxo. 3:11).

Yachanchikjina Bibliata qillqakunanpaqqa, espíritu santonniqta Dios yuyaycharqa, chay kallpaniqllatataq ancianostapis sutichakun. Bibliaqa, Diospa wakin kamachisnin imatachus chʼampaykunapi rikukuspa ruwasqankuta willan. Fineesmanta parlarina, payqa Eleazarpa churin karqa, Aaronpa allchhintaq. Chayrayku kuraq kaq Sacerdote kanan karqa. Kawsayninpiqa kimsa kutispi chʼampaykunapi rikukurqa, chay kutispitaq allin yuyayniyuq kasqanta, mana manchachikusqanta, Diospitaq atienekusqanta rikuchirqa. Ancianosqa, mayta paymanta yachakunkuman.

“Chayta rikuspa” rirqa

Finees waynallaraq kachkaptin, israelitasqa Moab pampaspi jarakuchkarqanku. Bibliapi nin: “Qharisqa Moabmanta warmiswan khuchichakuyta qallarerqanku”. Chantapis “chay mikhuykunata mikhuysikorqanku, yupaycharqankutaj moabitaspa lantisninkuta” (Núm. 25:1, 2). Jehovaqa, chay juchachakuqkunata wañuchirqa, jasutʼirqataq. Finees chay millay juchata ruwasqankumanta, wañurachkasqankumanta ima yachaspa, ¿imayna sientekurqa?

Bibliapi nillanpuni: “Uj israelitaqa Madianita warmita jaraman pusaykorqa Moisespa rikunanta, tukuy israelitas tantakuspa Dioswan Tinkukuna Toldo punkupi waqarashajtinku” (Núm. 25:6). ¿Imatá Finees ruwanman karqa? Fineesqa, chay juchallikuq runamanta sullkʼa karqa, chantapis chay runaqa Diosmanta yachachiq karqa (Núm. 25:14).

Fineesqa, Jehovata manchachikurqa manataq runastachu. Chay juchallikuqkunata rikuspa qhipankuta rirqa, chay puñuna cuartoman yaykuytawan tʼuqsina lanzawan tʼuqsispa wañurachirqa. ¿Imaynatá Jehová chay ruwasqanta qhawarqa? Diosqa, chayta ruwasqanrayku Fineeswan juk tratota ruwarqa, pay, miraynin ima “sacerdotej ruwanasninta wiñaypaj ruwana[nku]paj”. Wañuchinakupis manaña karqachu (Núm. 25:7-13).

Kay tiempomanta ancianosqa, mana wañuchinkuchu. Chaywanpis Fineesjina allin yuyayniyuq kanku manataq manchachikunkuchu. Ajinata Guilherme ruwarqa, payqa mana unaytaraqchu ancianojina kachkarqa. Paytaqa, juk juchallikuq hermanota juzganankupaq tantakuyman waqyarirqanku. Chay juchallikuq hermanoqa, ancianollataq karqa, Guilhermetataq ñawpa wataspi yanapasqa. Guilherme nin: “Chayjinapi rikukuspaqa may llakisqa kachkarqani. Wakin kutispiqa ni puñuypis chayawaqchu. Jehovap kamachiykunasninmanjina  juzganaypaq, mayta tʼukurirqani. Sapa pʼunchay Diosmanta mañakurqani, Bibliamanta publicacionestataq allinta ukhuncharirqani”, nispa. Chay hermanoqa, ajinata ruwasqanrayku mana manchachikuspa chay chʼampayta allinchayta, chay hermanota yanapaytataq atirqa (1 Tim. 4:11, 12).

Ancianos chayjinapi rikukuspa maychus kaqta, mana manchachikuspataq ruwasqankumantaqa, iñiyniyuq kayta, chiqa sunqus kaytataq yachakunchik. Pillapis mayta juchallikusqanmanta yachaspataq, willananchik tiyan, ajinamanta paykunajina mana manchachikusqanchikta rikuchisun. Chantapis qutuchakuymanta qharqusqa kaqwan manaña masichakuspa, chiqa sunqu kasqanchikta rikuchinanchik tiyan, amigonchik chayri familianchik kaptinpis (1 Cor. 5:11-13).

Sumaq yuyayniyuq kaspa wañuchinaku kananmanta jarkʼarqa

Fineesqa, mana wayna kasqanraykullachu mana manchachikurqa. Arí, payqa allin yuyayniyuq runa kasqanta rikuchirqa. Juk kutipiqa, Rubén ayllu, Gad ayllu, Manasés khuskan ayllu ima, Jordán mayu qayllapi juk altarta ruwasqanku. Israelitastaq chayta yachaspa Jehovata wasanchachkasqankuta yuyarqanku, maqanakuq kachaykukunankupaqtaq wakichikurqanku (Jos. 22:11, 12).

¿Imatá Finees ruwarqa? Payqa allinta yuyaychakuspa sapa ayllumanta kuraqkunawan tantakurqa, imaraykuchus chay altarta ruwasqankutataq tapurqa. Paykunaqa, chay altarta “Tata Diosta sirvi[nankupaq]” ruwasqankuta nirqanku. Ajinamanta manaña wañuchinaku karqachu (Jos. 22:13-34).

Pillatapis wak hermanop contranta rimaqta chayri juchachachkaqta uyarispaqa, allin kanman Fineesjina allin yuyayniyuq kananchik. Chaytaq mana usqhayllata phiñakunanchikpaq nitaq imatapis parlarparinanchikpaq yanapawasun (Prov. 19:11).

¿Imaynatá ancianos Fineesjina ruwankuman? Jaimeqa, 10 watas kuraqña anciano, pay nin: “Pillapis wak hermanowan mana allinta apanakusqanta willariwaptinqa, mana juknillanman sayaykukuspa parlanaypaq, Biblia yuyaychasqanmanjinataq yuyaychanaypaq Jehovamantaraq mañakuni. Juk kutipiqa, juk hermana wak qutuchakuymanta hermano parlasqanwan sunqunta nanarparichisqanmanta quejakuwarqa. Chay hermanowanqa, amigoy kasqanrayku chay chʼampaymanta parlayta atillayman karqa. Chaywanpis chay hermanawanraq Bibliap wakin yuyaychaykunasninta ukhuncharirqani. Chay hermanowan parlanantataq nirqani (Mat. 5:23, 24). Chay hermanaqa chaymanjina ruwarqa, chaywanpis mana allinyanakurqachu chayrayku wak yuyaychaykunamanjina ruwanantañataq nirqani. Payqa chay chʼampayninmanta watiqmanta Diosmanta mañakunanta, chay hermanota perdonananpaqtaq kallpachakunanta nirqa”, nispa.

¿Chay chʼampay allinyarqachu? Jaimeqa nin: “Qhipan killasninman chay hermanaqa  watiqmanta parlapawarqa. Chay hermano mana allinta parlapasqanrayku perdonakusqanta willawarqa. Paywantaq willaq lluqsinan karqa, allinpaq qhawasqantataq nirqa. Chay chʼampayqa allinchakurqa. Jukllaman sayaykukuspa, chay chʼampayman satʼikuyman karqa chayqa, nichá allinyanakunkumanchu karqa”, nispa. Chayraykuchá Biblia nin: “Ama chay ratopacha juezman willamuychu”, nispa (Prov. 25:8). Allin yuyayniyuq ancianosqa, phiñanasqa cristianosta Biblia yuyaychasqanmanjina allinpi kawsayta maskʼanankuta yuyaychanku.

Jehovamanta mañakurqa

Fineesqa, watasninman Diospa llaqtanpi kuraq sacerdote karqa. Waynamantapacha allin yuyayniyuq kasqan, mana manchachikuyniyuq kasqan ima, chʼampaykunata allinchananpaq yanaparqa. Jehovapi atienekusqanraykullataq chaykunata ruwayta atirqa.

Juk kutipi Benjamín ayllumanta kaq Gabaa llaqtayuq runasqa, juk levitap tanta warminta abusarqanku, wañuchirqankutaq. Chayrayku Israelpa wak ayllusninqa Benjamín ayllup contranta maqanakuq rirqanku (Jue. 20:1-11). Paykunaqa, niraq maqanakuq richkaspa Diosmanta mañakurqanku, jinapis iskay kutipi atipachikurqanku, achkhastaq wañurqanku (Jue. 20:14-25). ¿Qhasillapaq mañakusqankutachu yuyankuman karqa? ¿Manachu Jehová chay juchankumanta jasutʼisqa kanankuta munanman karqa?

Kuraq kaq sacerdote Fineesqa, Diospi atienekuspallapuni watiqmanta imatachus ruwananta mana manchachikuspa ruwarqa. Jehovatataq tapurqa: “Watejmanta maqanakoj atiykumanchu riyta Benjamín ayllumanta masisniykuwan, chayri atipasqa jinachu qhepakusqayku?”, nispa. Jehovaqa, chay mañakuyninta uyarispa Benjamín aylluta atipanankuta, Gabaa llaqtata ruphachispa tukuchinankuta ima saqirqa (Jue. 20:27-48).

¿Imatá kaymanta yachakunchik? Qutuchakuykunapiqa, ancianos chʼampaykunata allinchanankupaq kallpachakuptinkupis Diospa yanapaynintataq sinchita mañakuptinkupis ichá chʼampaykunaqa kallanqapuni. Jina kaptinqa, allin kanman Jesuspa nisqanta yuyarikunanku, pay nirqa: “Mañakuychej, qosonqachejtaj; maskʼaychej, tarinkichejtaj; punkuta takaychej, kicharimusonqachejtaj”, nispa (Luc. 11:9). Chantapis ancianosqa, Jehová mañakuyninkuta mana usqhayta uyarisqanta yuyankuman, chaywanpis pay uyarinanpipuni atienekunkuman.

Sutʼincharinapaq Irlanda suyupi juknin qutuchakuynin Tantakunapaq Wasita usqhayta necesitarqanku. Chaywanpis , chay llaqtamanta funcionario de urbanismo nisqaqa, hermanos maypichus, imaynatachus chayta ruwanankupaq planosta apaptinku, mana ruwakunanta munarqachu. Chayrayku hermanosqa aswan atiyniyuq kamachiqman rinanku karqa. Niraq richkaspataq Diosmanta mañakurqanku. ¿Chay mañakuyninku Fineestajinachu yanapanman karqa?

Chay llaqtamanta kaq anciano nin: “Mayta Diosmanta mañakuytawan oficina central nisqaman rirqayku. Chaypi llamkʼaq runawanqa semanasmantaraq parlanaykuta niwaptiykupis, paywan phichqa minutosta parlarqayku. Planosniykuta rikuytawan, ruwayta atillasqaykuta niwarqayku, chaymantapachataq chay llaqtamanta funcionario de urbanismo nisqaqa, mayta yanapawarqayku. Ajinamantataq Diosmanta mañakuyqa mayta yanapasqanta repararqayku. Arí, Jehovaqa paypi atienekuq ancianospa mañakuyninkuta uyarinpuni.

Fineesqa, Israel llaqtata yanapanan karqa. Mana manchachikuspa, allin yuyaywan, Diospi atienekuspataq chʼampaykunata atiparqa, chayraykutaq Diospa ñawpaqinpi allinpaq qhawasqa karqa. Waranqa watas pasasqanmantataq Esdras qillqarqa: “Aswan ñawpajtaqa Eleazarpa churin Finees paykunaj kamachejninku karqa. Tata Diostaj paywan karqa”, nispa (1 Cró. 9:20). Chantapis kay tiempomanta ancianosmanta, chiqa sunquwan Diosta yupaychaq cristianosmanta ima, kikillantataq nikunanta suyasunman.