Casarasqaspaq solterospaq ima sumaq yuyaychaykuna
Casarasqaspaq solterospaq ima sumaq yuyaychaykuna
“Chayta niykichej qankuna [...] allin kajta ruwanaykichejpaj, cheqan kajtawan, ni imaj jarkʼasqan Señorta tukuy sonqo sirvinaykichejpaj.” (1 COR. 7:35.)
1, 2. ¿Imaraykutaq casarasqaspaq solterospaq ima Bibliap yuyaychasqanta ukhuncharinanchik tiyan?
JUK qharitaqa juk warmiwan apanakusqan kusichinman chayri llakichinman. Juk warmipis juk qhariwan apanakuspaqa ajinallapitaq rikukunman. Chayrayku cristianosqa, Jehovap yanapayninta maskʼanku, juk qhari juk warmiwan chayri juk warmi juk qhariwan mana sunqusninkuta nanachinakunankupaq. Chaywanpis mana chayraykullachu chayta ruwanku. Imaraykuchus wakin soltero cristianostaqa, imaynachus kasqankuwan kusisqa kachkaptinkupis amigosninku chayri familiaresninku casarakunankupaq tanqanku. Wakintaq casarakuyta munaspapis mana paykunapaqjina qharita chayri warmita tarinkuraqchu. Casarakuypiña yuyaqkunataq imaynatachus sumaq wakichisqa qusa chayri sumaq wakichisqa warmi kanankupaq yanapata necesitanku. Chantá casarasqas chayri solteros kaptinchikpis, khuchichakuypi urmananchikpaqjina imaspis rikhurinman.
2 Chayrayku casarasqas chayri solteros kasqanchikqa mana kusisqa kanallanchikpaqchu yanapawanchik, manaqa Dioswan allinpi kananchikpaqpis. Apóstol Pabloqa, ñawpaq kaq Corintiosman 7 tʼaqapi qillqasqanpi soltero kaymanta, casarakuymanta ima sumaqta yuyaycharqa, chaytataq allin kanman ukhuncharinanchik. Payqa, “allin kajta” ruwananchikta, “Señorta tukuy sonqo sirvi[nanchikta]” ima, munaspa qillqarqa (1 Cor. 7:35). Sumaq yuyaychaykunasninta ukhuncharichkaspaqa, casarasqas chayri solteros kaspapis, imaynatachus Jehovata aswan allinta sirviyta atisqanchikpi tʼukurina.
Sapa juk akllananchik tiyan
3, 4. a) ¿Imatataq ruwayta munanman pillapis familiarninta chayri amigonta solterollapuni kachkasqanta rikuspa? b) ¿Imaynatá Pablop yuyaychasqan casarakuyta maychus kaqllata qhawanapaq yanapawanchik?
3 Unay tiempomanta judiosqa, casarakunapuni kasqanta yuyaq kanku. Kay tiempopipis wakin lugarespiqa, solterollapuni kaqpaq, amigosnin chayri familiaresnin, paykunamanta llakikuspa piwanchus casarakuyta atisqanta yuyaychanku. Maskʼananpaq astawan kallpachakunantataq ninku chayri pillamantapis parlarinku. Chayri sumaqta yuyaychakuspa pillatapis riqsichinku ajinamantataq kʼaskachinku. Chaykunataq phiñanakuyman, sunqusninkuta nanachinakuyman, pʼinqayman ima chayachinman.
4 Pabloqa, mana pitapis casarakunantapuni, nitaq solterollapuni qhipakunantachu nirqa (1 Cor. 7:7). Payqa, sapallan Jehovata sirvispapis kusisqa kachkarqa, chaywanpis casarakuyta munaqkunataqa mana pisipaqchu qhawarqa. Arí, soltero kakuyta chayri casarakuytaqa, sapa juk akllayta atin, ni piwan imatachus ruwananta tanqachikuspa.
Soltero kachkaspa Diospaq sumaqta llamkʼay
5, 6. ¿Imaraykutaq Pablo, cristianosta soltero kay aswan allin kasqanta yuyaycharqa?
5 Pabloqa, corintiosman yuyaychachkaspa, solteros aswan allinta Diosta yupaychayta atisqankuta nirqa (1 Corintios 7:8 ñawiriy). Chantapis mana casarasqa kaspapis ni jaykʼaq llulla religionta kamachiqkunajinaqa, mana casarasqa kasqanrayku may kasqanta yuyakuqchu. Astawanpis soltero cristianosqa, Diospaq astawan llamkʼayta atisqankuta nirqa.
6 Arí, paykunaqa, casarasqa cristianosmanta nisqaqa qutuchakuypi achkha ruwanasta ruwayta atinkuman. Pablopis sapallan kasqanrayku “mana judío kajkunaman kachasqa apóstol” sutichasqa kayta atirqa (Rom. 11:13). Chantapis Hechos 13 tʼaqamanta 20 tʼaqakama nisqanmanjinaqa, wak misioneroswan viajarqa, mana willakusqan lugarespi willarqa, qutuchakuykunata sayarichirqa ima. Ni pijina achkha chʼampaykunapi rikukurqa (2 Cor. 11:23-27, 32, 33). Llakiypi rikukuspapis runasman Diosmanta yachachispaqa, mayta kusikurqa (1 Tes. 1:2-7, 9; 2:19). Warmiyuq, wawasniyuq ima kaspaqa, nichá chaykunata ruwayta atinmanchu karqa.
7. ¿Imaynatá iskay precursoras solteras kachkaspa Diospaq astawan llamkʼachkanku?
7 Achkha soltero cristianosqa, Diospaq astawan llamkʼanku. Sarawan, Limbaniawanqa, Boliviapi precursorasjina llamkʼachkanku. Paykunaqa, juk juchʼuy llaqtitaman ripurqanku, chaypitaq unayña ni pi willachkarqachu. Chay llaqtitapiqa, mana corriente kanchu, paykunataq ninku: “Runasqa, mana radioyuq, nitaq teleyuq kasqankurayku, ñawiriyllaman qukunku”, nispa. Chantapis wakin vecinosninkuqa, manaña urqhukuq publicacionesninchikta paykunaman rikuchirqanku. Chay runastaq chay publicacionesta ñawirichkallankupuni. Chay hermanasqa, yaqha sapa wasipi, Bibliamanta astawan yachakuyta munaqkunata tarinku. Chayrayku llaqtitantinpi willaytaqa, unaypi tukuchanku. Juk paya warmi paykunaman nirqa: “Qayllapiñachá tukukuyqa, Jehovamanta sutʼinchaqkunaqa kaykamaña willaq jamusqanku”, nispa. Willasqankuraykutaq, achkha runas tantakuyman riyta qallarirqanku.
8, 9. a) ¿Imaraykutaq soltero kachkaspa Diosta sirviy allin kasqanta Pablo nirqa? b) ¿Imastataq soltero cristianos ruwayta atinku?
8 Casarasqas kaqkunapis, maypichus mana willayta atikullanchu chaypi runasman Diosmanta yachachispa mayta kusikunku. Chaywanpis soltero precursoresqa, wak ruwaykunatawan ruwayta atinku, chaykunatataq casarasqa kaqkuna chayri wawasniyuq kaqkunaqa mana atillankumanchu. Pabloqa, solteros kaqkuna astawan Jehovata sirviyta atisqankuta nispaqa, astawanraq ruwakunan kanan kasqanta nichkarqa. Chantapis payjina kusisqa kanankuta munarqa.
9 Estados Unidosmanta juk soltera precursora qillqarqa: “Wakinqa, kusisqa kanapaq casarakunapuni kasqanta yuyanku. Ñuqarí, kusisqallapuni kanapaqqa, Jehovawan allinpi kananchikmanta kasqanta reparani. Solterosqa, achkha chʼampaykunapi rikukusunman, chaywanpis Diospaq astawan llamkʼaptinchikqa, sumaq regalo”, nispa. Nillarqataq: “Soltero kayqa, mana kusikunanchikmanta jarkʼawanchikchu. Jehovaqa, tukuyta munakuwanchik solteros chayri casarasqas kaptinchikpis”, nispa. Kunanqa, chay hermana maypichus pisi willaqkuna kanku chaypi kachkan. Chayrayku tukuy solteros kaqkuna, kayta tapurikunkuman: “¿Atiymanchu sapallay kachkaspa Diosmanta astawan willayta?”, nispa. Ajinata ruwaspaqa, soltero kay Diospa may sumaq regalon kasqanta reparawaq.
Casarakuyta munaq solteros
10, 11. Allin qusata chayri allin warmita mana tarikuptinku, ¿imaynatá Jehová casarakuyta munaqkunata yanapan?
10 Wakin cristianosqa, juk tiempota soltero kakuytawan casarakuyta munanku. Jehovap yanapayninta necesitasqankuta yachaspataq allin qusata chayri allin warmita tarinankupaq paymanta mañakunku (1 Corintios 7:36 ñawiriy). *
11 Wakin cristianosqa, Jehovata tukuy sunqu yupaychaq qusata chayri warmita tariyta munanku. ¿Chayjinapichu qampis rikukunki? Jina kaptinqa, Jehovamanta mañakullaypuni (Fili. 4:6, 7). Unaytaña suyakuchkanki chaypis, ama llakikuychu. Dios yanapasunanpi atienekuy, paytaq llakiyniykita atipanaykipaq yanapasunqa (Heb. 13:6).
12. ¿Imaraykutaq allinta tʼukurina pillapis ñuqanchikwan casarakuyta munasqanta niwaptinchik?
12 Diosta mana allinta yupaychaq cristiano chayri mana cristiano kaq runa, qamwan casarakuyta munasqanta nisuptin, ¿imatá ruwawaq? ¿Sapayakusqaykiraykuchu mana allinta tʼukurispa paywan casarakuwaq? Mana allinta akllaspaqa, aswan llakiypiraq rikukunaykita yuyarikuy. Casarasqa kaspañaqa, niña imatapis ruwayta atikunchu (1 Cor. 7:27). Chayrayku ni jaykʼaq mana allinta tʼukurispaqa, imatapis ruwarpanallachu. Mayta pantasunman, chaymantataq wiñaypaq pesachikusunman (1 Corintios 7:39 ñawiriy).
¿Imaynatá casarasqajina kawsanapaq wakichikuna?
13-15. ¿Imasmantataq casarakunapaq riqsinakuchkaspa parlarinanku tiyan?
13 Rikurqanchikjina Pabloqa, soltero kaqkuna, Diosta aswan allinta yupaychayta atisqankuta nirqa. Chaywanpis casarakuyta munaqkunataqa, mana pisipaqchu qhawarqa. Astawanqa espíritu santo yuyaychasqanmanjina, casarasqa kaqkunata yanapananpaq sumaq yuyaychaykunata qillqarqa. Paykuna allinta, jukchasqastaq kawsakunankupaq.
14 Wakinqa, niraq casarakuchkaspa allinta tʼukurinanku tiyan. Imaraykuchus casarakunankupaq riqsinakuchkaspaqa, ni pipis paykunajina munanakusqankuta, chaytaq kusisqa kawsanankupaq yanapananta yuyankuman. Casarakuspataq ajinallatapuni yuyanku, chayrayku ni pi tʼaqanachinanta yuyanku. Maychus kaqta yuyankuman chayqa, qhariwarmijina kawsayninkupi chʼampaykuna kananta, chaykunatataq mana mayta munanakusqallankuwanchu atipananku kasqanta reparankuman (1 Corintios 7:28 ñawiriy). *
15 Achkhasqa, wakin imaspi mana kikintachu yuyasqankuta casarakusparaq reparakunku. Ichapis qullqimanta, kusirikuymanta, maypichus tiyanankumanta chayri familiasninkuta waturikunankumanta parlaspaqa, mana kikintachu yuyankuman. Chantapis, pantaq runas kasqankurayku mayqinnillankupis imallatapis mana munasqankumanjinapunichu ruwankuman. Chaywanpis niraq casarachkaspaqa, qhawanakullaq kanku, chaymantataq chayqa mayta llakichinman. Chayrayku niraq casarakuchkaspa iskayninku chaykunamanta parlarinanku tiyan.
16. ¿Imaraykutaq casarasqa kaqkuna imaynatachus chʼampaykunata allinchanankumanta allinta parlarinanku tiyan?
16 Casarasqa kaqkunaqa, allinta, kusisqataq kawsakunankupaq iskayninku ima chʼampaytapis atipananku tiyan. Chantapis imaynatachus wawasninkuta uywanankumanta, machuyasqa tatasninkuta qhawanankumanta ima, allinta parlarinanku tiyan. Manataq familiapi chʼampaykuna kasqan tʼaqanachinanta saqinankuchu tiyan. Bibliap yuyaychasqanmanjina ruwaspaqa, chʼampaykunasninkuta allinchayta atinqanku, chayri mana llakiywan atipachikuspa ñawpaqllamanpuni rinqanku. Ajinamantaqa jukchasqallapuni, kusisqallapunitaq kawsakunqanku (1 Cor. 7:10, 11).
17. ¿Imaraykutaq casarasqa kaqkuna “kay pacha imas[ninpi]” astawan yuyanku?
17 Pabloqa, qhariwarmi kawsaymanta astawan kay 1 Corintios 7:32-34 (ñawiriy) pʼitispi sutʼinchan. Casarasqa qhariqa, “kay pacha imaspi” nisunman mikhunapi, pʼachapi, wasipi, wak imaspiwan astawan yuyan. ¿Imaraykú? Imaraykuchus warminta qhawanan tiyan, imachus kusichisqantataq ruwanan tiyan. Soltero kachkaspaqa, Diosta sirvinallanpaq astawan tiempochakuq. Chaywanpis casarakuspaqa, warminpaq astawan tiempochakunan tiyan. Warminpis kikillantataq ruwanan tiyan. Arí, paykunaqa qhariwarmi kawsayninkupi kusisqa kanankupaq tiempochakunanku, kallpachakunanku ima tiyan. Chaytataq Jehová Tatanchikqa allinta yachan.
18. Casarakuspa, ¿imapaqtaq astawan tiempochakunanku tiyan?
18 Pablop nisqanmantaqa kayta yachakullasunmantaq. Juk qusa chayri juk warmi, niraq casarakuchkaspaqa, qutuchakuypi achkha ruwaykunata ruwananpaq tiempochakuq, casarakusparí wakin ruwaykunasninta saqispa warminpaq chayri qusanpaq astawan tiempochakun. Chayrayku, kusikunankupaq ruwaykunasninmantapis tiempochakunallankutaq tiyan. Kaypi tʼukurina, juk qusa amigosninwan soltero kachkaspajina sapa kuti pukllaq riptin, ¿warmin kusikunmanchu? Chantá juk warmi amigasnillanwan kaptinrí, ¿qusan kusikullanmantaqchu? Arí, qusan chayri warmin mana anchata munakusqanta yuyanman, saqirparisqajina, llakisqataq sientekunman. Chaywanpis iskayninku jukchasqallapuni kawsanankupaq kallpachakuptinkuqa, mana ajinapichu rikukunqanku (Efe. 5:31).
Jehovaqa llimphu kananchikta munan
19, 20. a) ¿Imaraykutaq casarasqa kay khuchichakuymanta mana jarkʼawasunmanpunichu? b) ¿Imapitaq casarasqa kaqkuna unayta mana khuska kaspa urmankuman?
19 Jehovap kamachisninqa, khuchichakuy juchamanta ayqinanku kasqanta yachanku. Wakinqa, chay juchapi mana urmanankuraykulla casaranku. Chaywanpis casarasqa kayqa mana khuchichakuymanta jarkʼawasunmanpunichu. Sutʼincharinapaq, unay tiempopiqa, pirqasniyuq kaq llaqtas ukhupi kaqkunalla jarkʼakuyta atiq kanku. Jawaman lluqsiqkunaqa, suwasmanta, wañuchiqkunamanta ima, mana jarkʼakuyta atiqchu kanku. Ajinallatataq casarasqa kaqkunapis, Jehovap kamachisqanta ruwaspalla khuchichakuymanta jarkʼakunqanku, imaraykuchus Pay qhariwarmi kawsayta qallarichirqa.
20 Pabloqa, chayta 1 Corintios 7:2-5 pʼitispi sutʼinchan. Qusanwanqa, warmillan puñuykuyta atin, qusanpis payllawan puñuykuyta atin. Sapa jukninku qusanwan chayri warminwan puñuykuspa “imatachus ruwanan[ku]ta juntʼa[nanku]” tiyan. Chaywanpis wakinqa, llamkʼayninkurayku chayri sapallanku mayllamanpis unayta risqankurayku, qusankuwan chayri warminkuwan mana khuska puñunkuñachu. Chayjinapi rikukuspa pillapis “mana kakuyta” atisqanrayku Satanaspa tuqllanpi urmanman, qhinchachakunmantaq chayqa, ¡may llakiy kanman! Jehovaqa, familiankuta allinta qhawanankupaq, chantá jukchasqallapuni kawsanankupaq kallpachakuq qusasta, bendicenqa (Sal. 37:25).
Bibliap yuyaychasqanqa allinninchikpaq
21. a) ¿Imaraykutaq soltero kayta chayri casarakuyta akllayta mana atikullanchu? b) ¿Imaynatá 1 Corintios 7 tʼaqa yuyaychasqan yanapawanchik?
21 Soltero kayta chayri casarakuyta akllayqa, mana atikullanchu. Pantaq runas kasqanchikrayku chʼampaykunaqa kanqapuni. Chayrayku Jehovap ñawpaqinpi allinpaq qhawasqa kaqkunapis, casarasqas chayri soltero kaspapis, wakin kutispi chayjina chʼampaykunapi rikukullankutaq. Chaywanpis 1 Corintios 7 tʼaqa yuyaychasqanmanjina ruwaqqa, achkha chʼampaykunamanta jarkʼakunqa. Astawanqa, casarasqa chayri soltero kaspapis Diospa ñawpaqinpi “allinta ruwan[qa]” (1 Corintios 7:37, 38 ñawiriy). * Arí, Diospa ñawpaqinpi allinpaq qhawasqa kayqa, aswan sumaq wak imasmanta nisqaqa. Ajinallamantataq musuq pachapi wiñaypaq kawsayta atisun, chaypitaq qhariswan warmiswanqa, manaña kay tiempopijinachu chʼampaykunapi rikukusun.
[Sutʼinchaykunasnin]
^ párr. 10 1 Corintios 7:36 (NM): “Sichus pipis soltero kayta akllasqanmanjina llimphulla kawsayta mana atisqanta yuyanman, paytaq ni tʼika phanchaq waynañachu chayqa, ajinatataq ruwakunan kaptinqa, munasqanta ruwachun, mana juchallinchu. Casarachunku.”
^ párr. 14 Chaypaqtaq Imaynatá familiaykipi kusisqa kawsakuwaq libropi, 2 yachaqananpi 16-19 parrafosninta ñawiriy.
^ párr. 21 1 Corintios 7:37, 38 (NM): “Pitaqchus sunqunpi sumaq sayasqa, nitaq casarayta munanchu, manaqa munayninta atipan, sunqunpitaq yuyan soltero kayta chayqa, allinta ruwan. Chaywanpis, pitaqchus soltero kayta munaq casaran chayqa allinta ruwan. Mana casaraqrí aswan allinta ruwan.”
¿Imaynatá kutichiwaq?
• ¿Imaraykutaq mana pitapis casarakunanpaq tanqananchikchu tiyan?
• ¿Imaynamantá mana casarasqa cristiano Diospaq astawan llamkʼanman?
• ¿Imaynatá casarakunankupaq riqsinakuchkaqkuna qhariwarmi kawsaypaq wakichikunkuman?
• ¿Imaraykutaq casarasqa kay khuchichakuymanta mana jarkʼawasunmanpunichu?
[Tapuykuna]
[14 paginapi dibujos/fotos]
Mana casarasqa hermanosqa, Diospaq llamkʼanankupaq tiempochakuspa aswan kusisqas kanku
[16 paginapi dibujo/foto]
¿Imapaqtaq casarasqas astawan tiempochakunanku tiyan?
