Ñawiriqkunapta tapuyninku

¿Ima horastaq Jesús kurkupi warkhusqa karqarí?

Kay tapuyqa, Marcos, Juan libro ima, Jesuspa wañupuyninmanta mana kikintachu parlasqankurayku rikhurin. Marcos libroqa, “[Jesusta kurkuman warkhuchkaptinku] tutamanta jisqʼon hora” kasqanta nin (Mar. 15:25). Chaywanpis Juan libroqa, Pilato Jesusta kurkupi warkhunankupaq “chawpi pʼunchay[ta]jina” judiosman jaywaykusqanta nin (Juan 19:14-16). Bibliamanta yachaqkunaqa, chayta tukuy imaymanamanta sutʼinchayta munanku, Bibliapitaq ima horatachus kurkuman warkhusqankuta mana sutʼinchanchu. Chaywanpis imaraykuchus mana kikintachu nisqankuta yachanapaqqa, imaynatachus chay tiempopi runas tiempota qhawaq kasqankuta ukhuncharina.

Jesuspa tiemponpi judiosqa, pʼunchayta chunka iskayniyuq horaspi tʼaqaq kanku, chaytaq Inti lluqsimusqanmantapacha qallariq (Juan 11:9). Chayrayku “tutamanta yunta watay hora[qa]” pusaq horamanta, jisqʼun horakama karqa, chantá “chawpi pʼunchayta[q]” chunka jukniyuq horamanta, yaqha chunka iskay horakama karqa. Chaywanpis Intiqa, wakin killaspi mana kikin horapipunichu lluqsimun, nitaq kikin horallapitaqchu yaykupun, jinallataq pʼunchaypis karu chayri pisi. Chantapis ñawpa tiempomanta runasqa, ima horachus kasqanta yachanankupaq Intita qhawaq kanku, chayrayku ima horachus kasqanta mana allinta tanteaqchu kanku. Griegopi Qillqasqa, yunta watay hora chayta, chawpi pʼunchayniqta, chawpi pʼunchay pasayta nisqanmanta parlaspaqa, mana juk hora qayllamantapunichu parlachkan (Mat. 20:3, 5; Hech. 10:3, 9, 30). Wakin kutisllapi, “chawpi pʼunchaymanta juk horanman” nin, chay horapipuni imachus ruwakusqanmanta ninanpaq (Juan 4:52, NM).

Evangeliosta qillqaqkunaqa, Jesuspa wañupusqan pʼunchaypi wak imas rikukusqanmanta, nisunman ima horapichus imapis kasqanmanta kikinta qillqasqanku. Sutʼincharinapaq; tawantin Evangelios sutʼiyamuchkaptinña kuraq sacerdotes, kuraqkuna ima, juntapi tantaykukuspa Poncio Pilatoman Jesusta apasqankuta ninku (Mat. 27:1; Mar. 15:1; Luc. 22:66, 67; Juan 18:28). Chantapis Mateo, Marcos, Lucas libro imaqa, chawpi pʼunchayta Jesús kurkupi warkhusqa kachkaptin, “samay hora kama” chayri chawpi tardekama laqhayaykusqanta ninku (Mat. 27:45, 46; Mar. 15:33, 34; Luc. 23:44).

Jesusta ima horapichus wañuchisqankumanta parlaspa, yuyarinallataq kanman chay tiempopi runasqa, runata manaraq wañuchichkaspa mayta jasutʼiq kasqankuta. Wakin kutiqa, mana khuyarispa may kallpawan jasutʼisqankurayku runaqa wañuq. Jesustapis jinatachá jasutʼirqanku, imaraykuchus kurkuta mana qʼipiyta atirqachu, chayrayku wak runa qʼipirqa (Luc. 23:26; Juan 19:17). Juk runata manaraq kurkuman warkhuchkaspa mayta jasutʼiq kanku, chayrayku Jesusta jasutʼiyta qallarisqankumantapacha, kurkupi warkhunankukama juk tiempochá pasarqa. Chayraykuchá Evangeliosta qillqaqkunaqa, mana kikin horamantachu parlarqanku. Imaraykuchus sapa juk Jesusta kurkupi warkhusqanku horamanta chayri jasutʼiyta qallarisqanku horamanta ichapis qillqarqanku.

Apóstol Juanqa, Mateo, Marcos, Lucas libro ima, qillqakusqanmantaraq, Juan librota qillqarqa, payqa chay librosta ñawirirqachá. Chayrayku Jesusta ima horapichus kurkuman warkhusqankuta nisqan, Marcospa nisqanwan, mana kikinchu karqa. Chayrayku nisunman Juanqa, Marcospa qillqasqanta mana copiasqanta. Chaywanpis, Marcosta, Juanta ima, Dios yuyaycharqa qillqanankupaq, Biblia imaraykuchus mana kikin horamantachu parlasqankuta mana sutʼinchaptinpis, chay librospi atienekusunman.