“Unqusqa kasqayqa mana wiñaypaqchu”

Sara van der Monde kawsayninmanta willariwanchik

Runasqa niwanku: “Sara, asirichkallaqtapuni rikuyku. ¿Imaraykutaq kusisqallapuni kanki?”, nispa. Ñuqataq sumaq suyakuyniyuq kasqayta nini. Imaraykuchus “unqusqa kasqayqa mana wiñaypaqchu”.

FRANCIA suyupi (París), 1974 watapi nacekurqani. Nacechkaptiyqa, mamay mana unqukuyta atillarqachu, doctorestaq parálisis cerebral nisqa unquyniyuq kasqayta nirqanku. Chantapis chakisniyta, makisniytawanqa ñakʼayta kuyuchiq kani, parlasqaypis mana entiendekuqchu. Chantá tʼuku unquyniyuq, unqulitaq karqani.

Iskay watasniyuq kachkaptiyqa, Melbourne llaqtaman (Australia) ripurqayku. Iskay watasninmantaq tatayqa, mamaytawan saqirpariwarqayku. Chaypacha ñawpaq kutirayku, Diospa qayllanpi kasqayta repararqani. Mamayqa, Jehovamanta sutʼinchaq karqa, tantakuykunamantaq pusawaq. Chaypitaq Dios munakuwasqanta, interesakusqanta ima yachakurqani. Chaytaq, mamaypa munakuyninwan kallpachawasqanwan ima, mana manchachikunaypaq yanapawarqa, manaña unayjinachu kaptinpis.

Mamayqa, Jehovamanta mañakuyta yachachillawarqataq. Chaytataq atillani, imaraykuchus parlasqayqa yuyayniypi kachkan. Chʼinllamanta chayri simiy ukhullapi mañakuptiypis Jehová tukuy imata entiendewasqanta yachayqa sunquchawan (Sal. 65:2).

Chʼampaykunawan mana atipachikunichu

Phichqa watasniyuq kachkaptiyqa, unquyniy sinchiyaykusqanrayku juk aparato ortopédico nisqata purinaypaq necesitarqani. Mana allinta puriyta atirqanichu. Chunka jukniyuq watasniyuqtaq niña atirqanichu. Camaymanta jatarinaypaqpis, juk maquinawan yanapachikuq kani. Chay maquinaqa, silla de ruedasniymanpis tiyaykuchiwaq. Sillaytaqa, juk palancawan purichini.

Wakin kutispiqa llakikuni. Chaywanpis familiaykupi nisqaykumanta yuyarikuni: “Mana ruwayta atisqaykimantaqa, ama llakikuychu. Manaqa atisqallaykita ruway”. Chaywantaq caballota lluqʼayta, botepi puriyta, campopi jarakuyta, chʼinniqpi autota apaykachayta ima atirqani. Chantá pintay, siray, borday, edredonesta siray, tʼuru imitasta ruway ima, mayta gustawan.

Mana tukuy imata ruwayta atisqayrayku, wakinqa Diosta mana yupaychayta atisqayta yuyanku. Profesorayqa, 18 watasniyuq kachkaptiy wasiymanta ripuspa mamaypa religionninta saqinayta niwarqa. Chantapis alojamientota maskʼaysinawanta niwarqa.  Chaywanpis ni jaykʼaq creeyniyta saqinayta, sapallay kawsakunaypaq wakichisqa kaspalla ripunayta ima nirqani.

Profesoraywan parlarisqaymanta pisi tiemponman Jehovamanta sutʼinchaqjina bautizakurqani. Iskay watasninmantaq juk juchʼuy wasillaman ripurqani. Chaypitaq kusisqa tiyakuni, tukuy necesitasqay kapuwan, munasqaymanjinataq imatapis ruwani.

Mana suyachkaptillay niwasqanku

Kawsayniypiqa, wak imaspiwan rikukurqani. Juk pʼunchayqa, juk compañeroy ñuqawan casarakuyta munasqanta niwasqan, tʼukuta saqiwarqa. Payqa ñuqajina unqusqallataq. Ñawpaqtaqa, kusirikurqani, imaraykuchus tukuy sipaskunajina casarakuyta munayman. Chaywanpis iskay unqusqas casarakuspaqa, mana kusisqa kawsakuyta atinkumanchu. Chantapis payqa, wak religionmanta karqa, imaspichus creesqayku, ruwanasniyku, wak imasta ruwayta munasqayku ima, mana kikinchu karqa. Chayrayku, ¿imaynatá kusisqas kawsakuyta atiykuman karqa? Ñuqaqa, hermanollawan casarakuyta atisqanta yacharqani (1 Cor. 7:39). Chayrayku kʼachallamanta mana paywan casarakuyta atisqayta kutichirqani.

Kunanqa, allinta ruwasqayta yachani. Chantá Diospa musuq pachanpi kusisqa kanayta creenipuni (Sal. 145:16; 2 Ped. 3:13). Chaykamaqa, imaynachus kasqaywan kusisqa kaspa, Jehovata chiqa sunqullapuni yupaychayta munani.

Silla de ruedasniyta saqiyta, correyta ima, mayta suyachkani. Ajina kaptin nisaq: “Unqusqa karqani, kunantaqrí manaña unqusqachu, wiñaypaqtaq ajina kakusaq”, nispa.