¿Imaraykú Diospa espiritun pusanawanchikta necesitanchik?
¿Imaraykú Diospa espiritun pusanawanchikta necesitanchik?
“Qanqa Diosniy ka[nki]. Qampa sumaj [espirituyki, NM] cheqan ñanta pusawachun.” (SAL. 143:10.)
1. Mana riqsisqayki lugarman richkanki chay, ¿ima yanapatataq necesitanki?
MANA riqsisqayki lugarman richkasqaykita tʼukuriy. Chantapis mana sapallaykichu richkanki, manaqa chay lugarta riqsiqwan richkanki, paypitaq atienekunki. Payqa ñanta allinta riqsin, chay lugarmantaq chayachisunqapuni. Chantapis nisusqanta kasukunki chayqa mana chinkankichu.
2, 3. a) ¿Ima kallpatataq Jehová unay tiempopi apaykacharqa? b) ¿Imaynatá yachanchik espíritu santo yanapanawanchik kasqanta?
2 Kawsayninchikpiqa, yanapata necesitanchikpuni. Bibliap pʼitisninqa, imachus yanapayta atiwasqanchikta sutʼinchachkan. Génesis libropiqa, Jehová imatachus ñawpa tiempopi ruwasqanta niwanchik: “Qallariypeqa Dios cielotawan, kay pachatawan ruwarqa”, nispa. Chantapis chaykunata ruwananpaq imatachus apaykachasqanta rikuchillantaq “Diospa [kʼuchi kallpanqa, NM] yaku patata” muyuykachachkasqanta (Gén. 1:1, 2). ¿Imataq chay muyuykachkasqan kallpa? Diospa espíritu santon, chay kallpanniqtataq tukuy imatapis ruwarqa (Job 33:4; Sal. 104:30).
3 Jehovaqa, mana ruwanallawanchikpaqchu espiritunta apaykacharqa, manaqa yanapanawanchikpaqpis. Diospa Churinqa, discipulosninman nirqa: “Espíritu [...] cheqa kajman pusasonqachej”, nispa (Juan 16:13). Chantá, ¿imapunitaq espíritu santo? ¿Imaynatataq chaywan yanapachikuyta atinchik?
¿Imataq espíritu santo?
4, 5. a) ¿Imatataq Trinidadpi creeqkuna espíritu santomanta pantasqata yuyanku? b) ¿Imaynatataq espíritu santo imachus kasqanta sutʼinchasunman?
4 Diosmanta willachkaspaqa, Trinidadpi creeqkunata tarinchik. Chaypi creesqankurayku Tatajina, Churijina ima, espíritu santo juk runa kasqanta yuyanku (1 Cor. 8:6). Chay yachachiymanjinataq achkha Bibliaspiqa chay rimay mayusculaswan qillqasqa kachkan, ajinata: Espíritu Santo. Chaywanpis griego qalluta yachachiq Joan F. Mira, 2006 watapi Españapi, Evangeliosta, Hechos librota, Apocalipsistawan español qalluman tikrachispa urqhurqa. Chaypitaq espíritu santo rimaytaqa, minusculasllawan qillqarqa. Bibliapiqa espíritu santo mana runachu kasqanta nin. Chayta pay sutʼincharqa. *
5 ¿Imataq espíritu santo? Kay Traducción del Nuevo Mundo de las Santas Escrituras (con referencias) nisqa Bibliapi Génesis 1:2 sutʼinchayninpi nin: “Hebreo qallumanta rú·aj rimayqa, ‘espíritu’ rimayman tikrakun, chantá ‘wayra’ rimayman, wak rimaykunawantaq mana rikukuq kʼuchi kallpa kasqanta rikuchikun” (Génesis 3:8, 8:1 sutʼinchaykunasninwan kikinchay, NM). Imaynatachus wayrata mana rikuspapis, kallpayuq kasqanta reparanchik, ajinallatataq espíritu santotapis mana rikunchikchu. Imaraykuchus mana runajinachu, nitaq cuerpoyuqchu, chaywanpis kasqantapuni reparanchik. Chaytataq Diosqa, runasman chayri imallamanpis munayninta juntʼananpaq qun, chayniqtataq yanapan. Chay sumaq kʼuchi kallpa Diosmanta jamusqanmantaqa, mana iskaychakusunmanchu (Isaías 40:12, 13 ñawiriy).
6. ¿Imatataq David Jehovamanta mañakurqa?
6 Jehovaqa, kawsayninchikpi espíritu santonniqta yanapawasunman. Chaytataq Davidman nirqa: “Yachachisqayki, yuyaychasqaykitaj mayqen ñantachus rinaykita”, nispa (Sal. 32:8). Chantá, ¿salmistarí Jehovap yanapayninta japʼiyta munarqachu? Arí, imaraykuchus ajinata mañakurqa: “Munayniykita ruwayta yachachiway, qanqa Diosniy kasqaykirayku. Qampa sumaj [espirituyki, NM] cheqan ñanta pusawachun”, nispa (Sal. 143:10). Ñuqanchikpis Diospa espíritu santonwan yanapachikuyta munananchik tiyan. ¿Imaraykú? Tawa imasta ukhuncharina.
Ñuqallanchikmanta imatapis mana ruwayta atisunmanchu
7, 8. a) ¿Imaraykutaq Diospa yanapaynintapuni necesitanchik? b) Sapallanchikmanta imatapis kay saqra pachapi ruwaptinchik, ¿imataq kanman? Juk kikinchaywan sutʼinchariy.
7 Jehovap espiritun pusanawanchikta necesitanchik, 1) sapallanchikmanta imatapis mana ruwayta atisqanchikrayku. Pusay rimayqa, “ñanta rikuchiy”, “reparachiy”, “yuyaychay” ninayan. Arí, runaqa mana sapallanmanta imatapis ruwananpaqjinachu ruwasqa karqa, pantaq runaman tukuptinrí astawanraq. Chayrayku Jeremías qillqarqa: “Tata Dios, yachani runaqa kawsayninmanta mana dueñochu kasqanta, nitaj kawsaynimpi imatachus ruwananta niyta atisqanta”, nispa (Jer. 10:23). Chantapis Jehovaqa, Jeremiasman imayna runachus sunqunchikpi kasqanchikrayku mana imatapis sapallanchikmanta ruwayta atisqanchikta nirqa: “Tukuy imamanta nisqaqa runaj sonqonmin aswan chʼawka, nitaj chaypaj jampi kanchu. Pitaj chayta entiendeyta atinmanri?”, nispa (Jer. 17:9; Mat. 15:19).
8 Juk runa mana riqsisqan lugarman richkasqanpi tʼukurina. Sapan riptinqa, ichá chinkanman. Arí, imatachus ruwananta ni yachaspaqa, ichá wañunman. Ajinallataq kanman, kay saqra pachapi Diospa yanapayninta mana necesitasqanta yuyaq runawanqa. Chayrayku Davidjina, Jehovap yanapayninta mañakuspalla kay saqra pachapi kawsayninchikta mana chinkachisunchu, pay mañakurqa: “Ñankunaykita rikuchiway, Tata Dios, purinasniykinejta pusaway”, nispa (Sal. 23:3; 25:4). ¿Imaynatá chay yanapata japʼisunman?
9. Kay 17 paginapi rikuchinjina, ¿imaynatá Diospa espiritun kawsayninchikpi yanapawanchik?
9 Kʼumuykukuq sunqu kaptinchik, Jehovapitaq atienekuptinchikqa, Payqa espíritu santonta pusanawanchikpaq quwasun. Chaywanpis, ¿imaynatá chay kallpa yanapawanchik? Jesusqa, discipulosninman sutʼincharqa: “Sonqochaj [espíritu santotaq, NM] pitachus sutiypi Dios Tata kachamonqa, paymin tukuy imata yachachisonqachej, yuyarichisonqachejtaj tukuy ima nisqayta”, nispa (Juan 14:26). Diospa yanapayninta mañakunallapuni, Bibliatataq ukhuncharina maypichus Jesuspa yachachiykunasnin qillqasqa kachkan. Ajinamantaqa, Diospa mana taripay atina yachayninta entiendenapaq espíritu santo yanapawasun. Chantapis Diospa munayninta juntʼallasunpuni (1 Cor. 2:10). Imallapis mana suyasqanchikmanjina kaptintaq, espíritu santo imatachus ruwananchikpaq yanapawasun. Bibliamanta yachakusqanchikta yuyarichiwasun, imaynatachus chaymanjina kawsayninchikpi ruwananchikpaqtaq yanapawasun.
Jesusqa, Diospa espiritunwan pusachikurqa
10, 11. ¿Imatataq Diospa kʼata Churin munarqa, chantá imaynatá espíritu santo payta yanaparqa?
10 Espíritu santop yanapayninta necesitanchik, 2) Diospa kʼata Churin, espíritu santoniqta pusasqa kasqanrayku. Payqa niraq Jallpʼaman jamuchkaspa, kay profeciata sumaqta riqsirqaña: “Chaypa patampi Tata Diospa [espíritun, NM] kanqa, chay [espiritutaq, NM] qonqa yachayta, yuyayta, yuyaychayta, atiyta, tukuy imata rejsiyta, Tata Diosta manchachikuyta ima” (Isa. 11:2). Jesusqa maytachá espíritu santop yanapayninta munarqa, imaraykuchus chaywanqa Jallpʼapi kachkaspa chʼampaykunata atipanman karqa.
11 Jesusqa, Jehovap nisqan juntʼakusqanta rikurqa. Imaraykuchus Evangeliospiqa, Jesús bautizakusqantawan “Jordán Mayumanta [espíritu santowan] juntʼasqa, chay [espiritutaq, NM] chʼin pampaman” pusasqanta rikuchinku (Luc. 4:1). Chaypiqa, ayunarqa, Diosmanta mañakurqa, tʼukurirqa ima. Chantapis ichá imatachus aswan qhipaman ruwananpaq Jehová kamachiykunata qurqa, yuyaycharqa ima. Imatapis ruwananpaq, yuyananpaq ima Cristop yuyayninpi, sunqunpi ima, Diospa kʼuchi kallpanpis llamkʼachkanmanjina karqa. Chayrayku imallapis kaptin, Tatanpa munayninmanjina imatachus ruwananta allinta yacharqa.
12. ¿Imaraykutaq Diosmanta mañakunanchik tiyan espíritu santon pusanawanchikta?
12 Jesusqa, kawsayninpi espíritu santota necesitasqanta allinta yacharqa. Chayrayku discipulosninman Diosmanta mañakunankuta, chaywantaq pusachikunankuta yuyarichirqa (Lucas 11:9-13 ñawiriy). ¿Imaraykutaq ñuqanchikpis chayta ruwananchik tiyan? Diospa kʼuchi kallpan yuyayninchikta Cristop yuyayninmanjina tukuchiyta atisqanrayku (Rom. 12:2; 1 Cor. 2:16). Kawsayninchikpi espíritu santowan pusachikusun chayqa, Cristojina yuyasun, payjina kawsananchikpaqtaq kallpachakusun (1 Ped. 2:21).
Kay pachap yuyayninqa pantachiwasunman
13. ¿Imataq kay pachap yuyaynin, imasmantaq tanqan?
13 Espíritu santop yanapayninta necesitanchik, 3) kay pachap chʼichi espiritumanta jarkʼanawanchikrayku. Chay espirituqa achkha runaspa kawsayninpi llamkʼachkan. Chaytaq kay pacha runastaqa, Diospa espiritunman churanakuq imasta ruwanankupaq tanqan. Chantapis Cristojina yuyanankupaq yanapananmantaqa, kay pachap kamachiqnin Satanasjina yuyanankupaq, ruwanankupaq ima tanqan (Efesios 2:1-3; Tito 3:3 ñawiriy). Chayrayku, chay espiritumanjina, aychap imasninta ruwaqqa, may llakiyman chayanqa. Nitaq Diospa Reinonta herenciatajina japʼinqachu (Gál. 5:19-21).
14, 15. Kay pachap yuyayninwan mana atipachikunapaq, ¿imatá ruwasunman?
14 Jehovaqa, kay pachap yuyayninta atipanapaq, tukuy necesitasqanchikta quwanchik. Chayrayku apóstol Pabloqa, yuyaycharqa: “Kallpachakuychej Señorpi, jatun atiynimpitaj [...] sajra pʼunchaypi sinchʼita sayanaykichejpaj”, nispa (Efe. 6:10, 13). Jehovaqa, espíritu santonniqta Satanaspa churanakuyninta muchunapaq kallpachawanchik (Apo. 12:9). Kay pachap yuyayninqa may atiyniyuq, nitaq chaymanta karunchasqa kayta atisunmanpunichu. Chaywanpis ni pantachinawanchikchu tiyan, imaraykuchus espíritu santoqa aswan atiyniyuq, yanapawanchiktaq.
15 Apóstol Pedroqa, chay tiempopi chiqa yupaychaymanta karunchakuqkunamanta ajinata nirqa: “Cheqan ñanta saqespa, [...] pantasqa ñanninta rishanku”, nispa (2 Ped. 2:15). “Mana kay pachaj yuyaynintachu [...] manachayqa Diosmanta jamoj” espirituta japʼisqanchikmanta, ¡may agradecesqa kanchik! (1 Cor. 2:12). Chay espirituwan yanapachikuptinchik, Jehová tukuy imata quwasqanchikmanjinataq ruwaptinchikqa, chiqa ñanllapipuni kasun. Satanaspa pachanmantaq churanakusun (Gál. 5:16).
Espíritu santoqa allin puquyta wiñachin
16. ¿Ima puquytataq ñuqanchikpi espíritu santo puquchinman?
16 Espíritu santop yanapayninta necesitanchik, 4) ñuqanchikpi allin puquyta wiñachisqanrayku (Gálatas 5:22, 23 ñawiriy). Tukuyninchik aswan munakuyniyuq kayta, kusikuyniyuq kayta, llampʼu sunquyuq kayta ima necesitanchik. ¿Tukuyñachu pacienciayuq, khuyakuyniyuq, kʼacha kayniyuq ima kanchik? ¿Pitaq creeyniyuqña, llampʼu sunquña, saqra munaywan mana atipachikuqña kasqanta ninman? Espíritu santoqa, achkha kʼacha kaykunata wiñachin, chaytaq familianchikta, hermanosninchikta ima yanapan, ñuqanchiktapis. Chaywanpis chayta puquchiyqa, mana tukukunchu, imaraykuchus wiñachiyta atillasunmanpuni.
17. ¿Imaynatá espiritup kʼacha kaykunasninta astawan wiñachisunman?
17 ¿Parlasqay, ruwasqay ima espíritu santowan pusachikusqaytachu, chantá puquyninta wiñachisqaytachu rikuchin? (2 Cor. 13:5; Gál. 5:25). Ichá wakin kʼacha kaykunasninta niraq allintachu wiñachichkasqanchikta reparasunman. Jina kaptin, ¿imatá ruwasun? Espíritu santo yanapanawanchikta saqina. Chaypaqtaq kʼacha kaykunata Bibliapi, publicacionespi ima ukhunchana. Ajinamanta kawsayninchikpi imaynatachus wiñachinanchik kasqanta entiendesun, sapa kuti astawan kallpachakuchkasqanchiktataq rikuchisun. * Chantapis ñuqanchikta, hermanosninchikta ima, imaynatachus yanapawasqanchikta reparaspaqa, mayta necesitasqanchikta sutʼita entiendesun.
Diospa espíritu santon yanapanawanchikta saqinchikchu
18. ¿Imaynatá Jesús espíritu santowan yanapachikurqa?
18 Jesusqa, kawsayninpi Diospa espíritu santon mayta yanapasqanta repararqa, chaytataq Biblia nin. Chantapis, ima ruwayman tanqaptinpis chaymanjinapuni tukuy sunqu ruwaq (Mar. 1:12, 13; Luc. 4:14). ¿Ñuqanchikrí ajinallatataqchu ruwanchik?
19. ¿Imatá kawsayninchikpi espíritu santo yanapanawanchikpaq ruwananchik tiyan?
19 Kay tiempopipis espíritu santoqa, yanapachikuyta saqikuqkunap yuyayninkupi, sunqunkupi ima llamkʼachkan. ¿Imatá yanapanawanchikpaq, allin ñanta pusanawanchikpaq ima ruwananchik tiyan? Jehovamanta chay kallpata qunawanchikpaq, yanapachikunanchikpaq ima mañakunallanchikpuni tiyan (Efesios 3:14-16 ñawiriy). Chaymantataq mañakusqanchikmanjina ruwananchik tiyan, Bibliap yuyaychasqanta maskʼaspa, imaraykuchus Bibliaqa espíritu santowan yuyaychasqa kachkan (2 Tim. 3:16, 17). Chantapis kamachisqanta kasukunanchik tiyan, espíritu santo yanapaynintataq tukuy sunqu japʼikunanchik tiyan. Arí, kay saqra pachapi Jehová yanapayta atiwasqanchikpi atienekusqanchikta rikuchinanchikpuni tiyan.
[Sutʼinchaykunasnin]
^ párr. 4 Payqa chay librop qallariyninpi nin, “2 siglomanta chayri 3 siglomanta ñawiriqkunaqa, espíritu santo, Diosjina kananta, sapallanmantataq imatapis ruwananta, Tatamanta, Churimanta ima wakjina kanantataq mana yuyallarqankupischu. Imaraykuchus chay tiempopiqa, Trinidad nisqa yachachiy ni karqaraqchu”.
^ párr. 17 Astawan chaykunata ukhunchanaykipaqqa, Índice de las publicaciones Watch Tower nisqapi “Fruto del espíritu de Dios” chantá “Lista por aspecto” nisqata qhawariy.
¿Imatá yuyarikunchik?
• ¿Imaynatá kawsayninchikpi espíritu santo yanapawanchik?
• Tawaniqmanta espíritu santop yanapayninta necesitasqanchikta sutʼinchay.
• ¿Imatá espíritu santo allinta yanapanawanchikpaq ruwananchik tiyan?
[Tapuykuna]
[15 paginapi dibujo/foto]
Diospa espíritu santonmanjinapuni Jesusqa ruwarqa
[17 paginapi dibujo/foto]
Espíritu santoqa, yuyayninchikpi, sunqunchikpi ima, yapanawanchikpaq llamkʼan
