Charlotte White, Diospaq astawan llamkʼaq hermana Louisville (Kentucky, Estados Unidos) llaqtaman chayaptin, ruedasniyuq maletawan purichkaqta rikuspa runasqa tʼukulla qhipakurqanku.

HERMANA Charlotte 1908 watapi, chay kutillaraq rikhuriq “libro carritota” apaykachaspa, runasta tʼukullata saqirqa. Pay nirqa: “Runas chayta rikuspa mayta parlarqanku, ñuqamantapis parlallarqankutaq”.

Jehovamanta sutʼinchaqkunataqa, Bibliamanta Yachaqaqkuna sutiwan riqsikuq. Paykunaqa, Bibliata ukhunchaspa chiqa kaqta yachakusqankuta runasman willananku kasqanta entienderqanku. Achkhastaq, kay La Aurora del Milenio (qhipaman Estudios de las Escrituras sutiwan riqsikullarqataq) nisqa librosniqta Bibliamanta yachakurqanku. Viajayta munaqkuna, atiqkuna ima, tukuyniqman, jatuchaq, juchʼuy llaqtasman, camposman ima riq kanku, chay librosta yachakuyta munaq runasman saqinankupaq, mayqinkunachus “Bibliamanta Yachaqaqkunapaq yanapas” sutiwan riqsikuq.

Kay 1908 watapi hermana Charlotte, wak sunqu kʼajaywan willaqkunawan, telawan forrasqa suqtapi tʼaqasqa librota 1,65 dolarespi saqiq kanku. Ñawpaq kutipi chay librosta saqinankumantaqa, munaqkunata anotaq kanku, wak pʼunchaytaq astawanpis pago japʼina pʼunchaypi pisillapi saqinankupaq kutiq kanku. Juk churanakuq runa, chay librosta baratopi saqisqankumanta qhayqiyakurqa.

Hermana Malinda Keefer, juk semanallapi 200 chayri 300 librosta runas mañasqankuta yuyarikuq. Chaywanpis chay librosta mayta munasqankurayku juk chʼampay rikhurirqa. Sutʼincharinapaq: suqta  kaq librolla 740 paginasniyuq karqa. Kay The Watch Tower revistapis 50 libros, 18 kilos pesasqanta, chayraykutaq runasman apanapaq “may llasa” kasqanta nirqa, astawanraq hermanaspaq.

James Cole hermanoqa, yuyaychakuspa wisqʼakunanpaqjina ruedasniyuq fierrosta ruwarqa, chaymantaq maletata tornilloswan churakuq. Llasa cajasta manaña apananta rikuspa nirqa: “Niña wasayta pʼakikusaqchu”, nispa. Bibliamanta Yachaqaqkuna 1908 watapi, Jatun tantakuyta ruwasqankupi chay carritota rikuchikurqa, chayqa Cincinnati (Ohio, Estados Unidos) llaqtapi ruwakurqa. Uyariqkunataq kusisqas kachkarqanku. Sapa ladopi kaq remachesninpiqa, inglespi libro carrito (Dawn-Mobile) nisqa qillqasqa karqa, chay maletaspi astawan La Aurora del Milenio librosta apakusqanrayku. Yachaykukuspaqa libroswan juntʼa maletata juk makillawanña apaq kanku. Chantá apanapaq jatunyachiyta chayri juchʼuyachiyta atiq kanku, ruedasnintaq mana asfaltasqa chayri campo ñankunasta purinanpaqjina ruwasqa karqa. Diantinta willaytawan wasiman kutipunapaq, goma ruedasninta maletap juknin ladonman wisqʼakuyta atiq, chakipi chayri trenpi apanapaq.

Diospaq astawan llamkʼaq hermanasqa, mana pagaspalla libro carritota japʼiq kanku. Wak willaqkunapaqtaq 2,50 dólares valerqa. Hermana Malindaqa, pichus fotopi rikhurin, kay libro carritoman amañaykurqa, imaptinchus maleta juntʼata juk makipi apaq, jukninpitaq carteranpi librosta. Pensilvaniamanta juknin qhuya llaqtapi, may chhika runas chay librosta munasqanku. Chayrayku librosta saqinan pʼunchaykuna, kimsa chayri tawa kutita jatun puenteta pasanan karqa.

Aviones empresapi llamkʼaq piloto, 1987 watapi, ruedasniyuq maletata rikhurichirqa. Chaytataq kunan aeropuertospi, jatun llaqtaspa callesninpi ima runas mayta apaykachanku. Chaywanpis pasaq 100 wataspiña sunqu kʼajayniyuq Bibliamanta Yachaqaqkuna, libro carritonkupi Bibliap yachachiykunasninta mujutajina apaspa, runasta tʼukullata saqiq kanku.

[32 paginapi sutʼinchaynin]

Librosta saqinan pʼunchaykunapi, hermana Malindaqa kimsa chayri tawa kutita jatun puenteta pasanan karqa

[32 paginapi sutʼinchaynin]

Librosta apay niña chʼampaychu karqa