Diospa Palabranta mana manchikuspa willarqanku

Chiqa cristianosqa, churanakuypi rikukuspa mana manchachikuq kasqankuta rikuchinku. Chaytataq kay “Testimonio cabal” del Reino de Dios, chantá Los testigos de Jehová, proclamadores del Reino de Dios nisqa libros sutʼita rikuchin. Ñawpa cristianosjina, Jehová espiritunta qunawanchikta, Palabranmanta mana manchikuspa parlanapaq yanapanawanchikta ima mañakunchik (Hech. 4:23-31).

Ñawpaq kaq guerra mundial tiempopi willakusqanmanta, juk hermano qillqarqa: “Diospa kamachisninqa sunqu kʼajaywan ‘El misterio terminado’ (The Finished Mystery) nisqa librota runasman saqirqanku, chaytaq Estudios de las Escrituras libromanta qanchis kaq libro karqa, tukuyniqpitaq saqikurqa. Kay ‘Noticias del Reino’ (Kingdom News) nisqa juk kaq tratado, 1918 watapi urqhukurqa. Chantá ‘Noticias del Reino’ nisqa iskay kaq tratado urqhukullarqataq, maypichus kamachiqkuna imaraykuchus ‘El misterio terminado’ nisqa librota niña jaywakunanta kamachisqanta sutʼincharqa. Qhipamantaq ‘Noticias del Reino’ nisqa kimsa kaq tratado urqhukurqa. Chiqa sunqu akllasqa cristianosqa, chay tratadota achkha runasman jaywarqanku, chaypaqtaq sinchi creeyniyuq, mana manchikuyniyuq ima kananku karqa”.

Kunanqa, Reinomanta musuq willaqkunata wakichikun. Ñawpaqtaqa mana jinachu karqa. Poloniamanta juk hermano Estados Unidosman ripurqa, paytaq 1922 watapi ñawpaq kutirayku willasqanmanta yuyarikuspa qillqarqa: “Imaynatachus publicacionesta saqinayta mana yacharqanichu, inglestapis ni allintachu parlarqani. Chaywanpis doctor atiendeq chay punkuta sapallay takarqani, jinapi juk enfermera kicharimurqa. Imachus pasasqanta ni jaykʼaq qunqasaqchu. Mayta willayta munaspapis, mancharisqa kachkarqani. Maletinniyta kichariptiy tukuy libros enfermerap chakinman urmararqanku. Imatachus nirqanipis, chaywanpis juk publicacionwan qhipachikurqa. Ripuspaqa manaña manchikurqanichu, Jehová bendeciwasqantataq repararqani. Chay diaqa, chay qhatu callepi achkha folletosta saqirqani”.

Juk hermana nirqa: “Jaqay 1933 watapi, achkha hermanos parlantesniyuq autoswan Reinomanta willaq kanku”. Juk kuti pay, qhariwarmi hermanoswan, California (Estados Unidos) llaqtap urqusninpi willachkarqanku. Yuyarikuspa nirqa: “Hermanoqa, autowan urqusman wicharirqa, ñuqaykutaq chay llaqtapi qhipakurqayku. Grabasqa willayta tocachisqanqa, cielomantajina uyarikurqa. Chay llaqtamanta runasqa, hermanota mayta maskʼaykurqanku, nitaq tarirqankuchu. Grabasqa willay tukukuptintaq,  ñuqayku wasisninkupi willamurqayku. Ñuqaqa, parlantesniyuq iskay autoswan willallarqanitaq, achkha runas manapuni uyariyta munarqankuchu. Grabasqa umallirichiykunatarí mana munaspapis uyarirqanku, imaraykuchus wasisninkukama uyarikuq. Chayta ruwanapaqqa, mana manchikuyniyuq kanayku karqa. Chaywanpis mana qhasichu karqa, Jehovap sutinpis jatunchasqa karqa. Chay tiempopi necesitakusqanmanjina ruwakunanpaq, Jehová yanapasqanta rikurqayku”.

Kay 1930 watamanta 1940 wata qallariykama, fonografoswan, Bibliamanta grabasqa umallirichiykunawan ima willakuq. Juk hermana nirqa: “Juk sipas, fonografowan wasimanta wasi willachkarqa. Juk wasipi discota tocachichkaptin, wasiyuq runa mayta phiñarikuspa fonografota jaytʼaspa churananmanta lluqsichirqa, chaywanpis ni juk disco pʼakikurqachu. Chay qayllapi kimsa runas juk camionpi almorzakuchkarqanku, chayta rikuspataq discota paykunapaq tocachinanta nirqanku, publicacionestapis mañakurqanku. Chaytaq hermanata sunqucharqa”. Ajinasta muchunapaqqa, mana manchikuyniyuq kana karqa.

Hermana nillarqataq: “Kay 1940 watapi callespi revistaswan willayta qallarisqaykuta yuyarikuni. Ñawpaqtaqa marchaspa willakuq. Hermanosqa filaspi aceranta letreroswan puriq kanku. Letrerospiqa jinata niq: ‘Religionqa tuqllajina, chʼawkiyawanchiktaq’, chantá ‘Diosta, Rey Cristota ima sirvina’, nispa. Chantá mana qullqita mañaspa tratadosta jaywaq kanku. Chaykunata ruwanapaqqa mana manchikuyniyuq kana karqa. Chaywanpis runas Jehovap sutinta, llaqtanta ima riqsinankupaq yanaparqa”.

Wak hermana nirqa: “Llaqtaspa callesninpi revistasta jaywayqa mana atikullaqchu. Jaqay tiempopi runas Jehovamanta sutʼinchaqkunawan anchata churanakuq kanku [...]. Callep esquinanpi revistasta japʼispa sayanapaq, imatachus nikunanta qhaparinapaq ima, mana manchikunachu karqa. Casi tukuy sabadostaq chayta ruwaq kayku. Wakin kutisqa, runas kʼachas kaq kanku, wakinpitaq phiñasqa qutus muyuykuwaq kayku, wak kutispitaq paykunamanta ayqikunayku karqa”.

Iskay kaq guerra mundial tiempopi, Jehovamanta sutʼinchaqkuna qhatiykachasqa kaspapis mana manchikuspa willarqanku. Kay 1940 watapi 1 diciembre killamanta, 1941 watapi 12 enero killakama, 43 pʼunchaykunata willanapaq campaña ruwakurqa. Chaypi, 50.000 willaqkunajina Estados Unidospi casi pusaq millones folletosta runasman saqirqanku.

Achkha machitu hermanos ñawpa tiempopi imaspichus mana manchikuq runas kasqankumanta yuyarikullankupuni. Wakinqa chay wataspi mana manchikuyniyuq kanankupaq, kayta niq kasqanku: “Sunqu kʼajaywan tukukuykama willanallapuni”, nispa. Kay saqra pacha niraq tukukuchkaptin imaynasmantaraqchus Diospa Reinonmanta willasunchik. Chaywanpis Diospa yanapayninwan, sinchi creeywan, mana manchikuspa ima Palabranmanta willallasunpuni.

[9 paginapi sutʼinchaynin]

Willanapaqqa mana manchikuyniyuq kay necesitakurqapuni