“¿Fotota orqhoriwaykumanchu?”

Jatun tantakuymanta iskay kaj pʼunchay tukukusqantawan, Josué pichus Mexicomanta Betelpi sirvin, waj Jehovamanta sutʼinchajkunawan Querétaro nisqa llajtaman puriykacharej rerqanku. Chaypitaj Colombiamanta qhariwarmi Javierwan, Maruwan, pikunachus chay llajtata visitasharqanku, Josueta fotota orqhorinanta mañarqanku. Chay qhariwarmeqa, Josué, amigosninwan sumaj pʼachallisqas, solapasniyojtaj kashasqankurayku, graduacionpichus chayri waj raymipichus kashasqankuta taporqanku. Josuetaj Jehovamanta sutʼinchajkunaj ujnin jatun tantakuyninkuman risqankuta sutʼincharqa, domingo pʼunchaypajtaj paykunata wajyarerqa.

Chay qhariwarmeqa, chayman rinankupaj jina pʼachata mana apakusqankurayku, mana allinchu sientekunankuta yuyarqanku. Jinapis Josueqa sutinta, Betelpa telefononta ima qorqa.

Tawa killanmantaj Javierwan, Maruwanqa pikunachus Mexicopi tiyakorqanku, Josueman telefononejta mana yuyasqanman jinalla, jatun tantakuyman risqankuta, uj hermano visitarinantataj munasqankuta nerqanku. Pisimantawantaj Bibliamanta yachakuyta qallarerqanku, tantakuykunamanpis rerqankupacha. Chunka killasninmantaj willajkunaña karqanku. Chantá Toronto (Canadá) llajtaman riporqanku, chaypitaj ñauparispallapuni bautizakorqanku.

Aswan qhipamantaj Javierqa, Josueman uj cartata qhelqarqa, chaypitaj imaraykuchus cheqa kajta japʼikusqanta sutʼincharqa: “Niraj jatun tantakuyman rishajtiykoqa warmiywan, Diospa yanapayninta necesitasqaykuta nisharqayku. Qankuna sumaj pʼachallisqa kashasqaykichejrayku, risqaykichej tantakuy may sumaj kasqanta yuyarqayku. Jatun tantakuypitaj chayman rejkuna kʼachas kasqankumanta, maypichus tiyakunaykuta, Bibliatapis maskʼaysiwasqaykumanta tʼukulla qhepakorqayku. Pʼachaykumantapis, ni pí qhawarawarqaykuchu”, nispa.

Josueqa, yachayniyoj rey Salomonpa nisqan cheqapuni kasqanta rikorqa. Pay nerqa: “Tutamanta mujuta tarpunki, chʼisiyaykuytapis ama tiyaykullaychu, imaraykuchus mana yachankichu mayqenchus aswan allin kananta, kaychus, jaqaychus, chayri iskayninchus allin kananta”, nispa (Ecl. 11:6). Runasta, jamoj jatun tantakuyman chayri uj umallirichiyta uyarej jamunankupaj, ¿qanpis wajyarispa mujuta tarpuwajchu? Kayta ama qonqanachu: Jehovaqa Javier jina, Maru jina Diospa yanapayninmanta chʼakichikoj runasta pusamunanpaj apaykachawasunman (Isa. 55:1).

[32 paginapi dibujo/foto]

Lloqʼemanta pañaman: Alejandro Voeguelin, Maru Pineda, Alejandro Pineda, Javier Pineda, Josué Ramírez ima, México sucursalpi