¿Imaynatá wajkunata yuyaychanki?

¿Pillapis yuyaycharinaykita nisorqachu? ¿Jinata tapusorqankuchu?: “¿Imatá ruwanay kanman?, ¿kay fiestaman rinay allinchu kanman?, ¿kay carrerata estudianay allinchu kanman?, ¿paywan rejsinakunay allinchu kanman?”, nispa.

Ichá pillapis imatachus ajllananpaj yuyaycharinaykita tukuy sonqo mañakusunkiman, chaytaj amigosninwan, familianwan, chayri Jehovawan allinpi kananpaj yanapanman chayri mana. ¿Imaman jinataj yuyaychanki? ¿Imatá wajkunata yuyaychaspa ruwayta yachanki? Imallamantapis yuyaychanayki kajtin, Proverbios 15:28 nisqanta kasuy: “Cheqan runaqa kutichinampaj sumajtaraj yuyaychakun”, nispa. Kunanqa Bibliamanta phishqa yuyaychaykunata qhawarina, chaytaj allinta yuyaychanapaj yanapawasun.

1 Imachus kasqanta allintaraj entiendey.

“Manaraj allinta uyarishaspa imatapis kuticheyqa wampu kaymin, pʼenqaytaj.” (PRO. 18:13.)

Allinta yuyaychanapajqa, yuyaychachikoj imapichus rikukushasqanta, imatachus yuyasqanta ima yachanaraj tiyan. Sutʼincharinapaj, pillapis maynintachus wasiykiman jamunanta tapusojtin, ¿imatá ñaupajta yachanayki tiyan? Maypichus kashasqanta mana yachaspa, ¿yanapariwajchu? Mana. Ajinallatataj pillatapis allinta yuyaycharinapajqa, “maypichus kashasqantaraj” yachana tiyan, nisunman imapichus rikukusqanta, imatachus yuyasqanta ima. Imaynapichus kashasqanmanta mana tukuynintachu yachaspaqa, umanta astawan muyuchisunman (Luc. 6:39).

Mashkhatachus yuyaychachikusqanta watuy. Niraj yuyaychashaspa kayta tapurinayki allin kanman: “¿Bibliaj mayqen yuyaychaykunasnintaj yanapasunkiman?, ¿ajllasqaykimanta mayqenkunataj allin chayri mana allinchu kanman?, ¿mashkha yuyaychaykunatataj maskʼarqanki?, ¿imaynatá qotuchakuymanta ancianos, tatasniyki chayri Bibliamanta yachachisojniyki yanapasorqanku?”, nispa.

Kutichisusqanqa mashkhatañachus yanapata tarinanpaj kallpachakusqanta, imastañachus yuyaychasqankuta ima yachanaykipaj yanapasonqa. Chantapis uyariyta munasqallanta ninaykitachus manachus maskʼashasqanta reparanki (2 Tim. 4:3).

  2 Ama usqhayllata kutichiychu.

“Uyariyta yachaychej, amataj anchata parlaychejchu.” (SANT. 1:19, 20.)

Allinninkuta munaspapis, usqhayllata kutichisunman. Chay niwasqanchejmanta niraj allinta ukhunchashaspa, ¿allinchu kanman usqhayllata kutichinanchej? Proverbios 29:20 nin: “Uj wampu runamantaraj atisunman imatapis suyayta, mana unanchaspalla parlajmanta nisqaqa”.

Wajkunaman yuyaychasqayki, Diospa yuyayninman jina kananpaj tiempota orqhokuy. Kayta tapurikuy: ‘¿“Kay pachaj yuyaynin[man jinachu]” yuyashani?’, nispa (1 Cor. 2:12, 13). Mana allinninkuta munayllachu kasqanta, ama qonqaychu. Apóstol Pedroqa, Jesús mana juntʼay atina jina ruwayta ruwanan kasqanta yachaspa, jinata nerqa: “Señor, Dios Tataqa amapuni chayta munachunchu. Ama chaytaqa parlallaypischu”, nispa. ¿Imatá chaymanta yachakunchej? Tukuy sonqo yanapayta munaspapis, imatachus nishasqanchejta mana qhawarikuspaqa, “mana Diospa imasnimpichu yuyasha[sunman], manachayqa runaspa imasnillampi” (Mat. 16:21-23). Chayrayku, niraj imatapis parlashaspaqa tʼukurinanchejpuni tiyan. Chantapis imatachus yachakusqanchejqa, Diospa yachayninman ni kantullanmanpis chayanchu (Job 38:1-4; Pro. 11:2).

3 Llampʼu sonqowan Diospa Palabranman jinapuni yuyaychay.

“Yachallankichejtaj mana imatapis sapallaymanta ruwasqayta. Jinallatataj yachankichej Dios Tataj yachachiwasqallanta parlasqayta.” (JUAN 8:28.)

Tapusojman: ¿“Qan kayman chayqa, kayta ruwayman...” nispachu kutichiwaj? Uj chʼampay allinchakunanpaj jinalla kajtinpis, Jesus jina llampʼu sonqo kana, maykamallachus ruwayta atisqanchejtapis reparakuna. Jesusqa, pi runamantapis aswan yachayniyoj karqa, aswan unaytataj kausarqa, chaywanpis kayta nerqa: “Mana imatapis noqallamantachu parlarqani; [...] Dios Tataj kamachiwasqanta parlani, yachachinitaj”, nispa (Juan 12:49, 50). Jesuspa yachachisqan, yuyaychasqan ima, Tatanpa munayninman jinapuni karqa.

Sutʼincharinapaj, Lucas 22:49 nisqanman jinaqa, Jesusta japʼinankupaj jinaña kashajtin, discipulosnin jarkʼanankupaj maqanakunankutachus manachus taporqanku. Ujnin discipulonqa espadanta orqhorqapuni. Mateo 26:52-54 versiculospi rikuchin jina, Jesusqa chay jinapi rikukuspapis, chay discipulonta imachus Diospa munaynin kasqanpi tʼukurichinanpaj tiempochakorqa. Payqa, Génesis 9:6, versiculopi nisqanta, chantá Salmo 22, Isaías 53 capitulopi profeciasta sumajta rejserqa. Chayrayku sumajta yuyaychayta aterqa, chaytaj runaspa kausayninta salvarqa, Jehovatapis kusicherqa.

4 Publicacionesman jina yuyaychay.

“Pitaj chay allin kamachi, yuyayniyojtaj kanman, mayqentachus patronnin churanman kamachi masisninman horampi mikhunata jaywanampaj, chay?” (MAT. 24:45.)

Jesusqa, mikhunata jina necesitasqanchejta qonawanchejpaj, allin kamachi yuyayniyojta churan. Qan, mana atina jina yuyaychaykunata qonayki kajtin, ¿publicacionesta sumajta ukhunchanaykipaj tiempochakunkichu?

Diciembre killamanta sapa Torremanta Qhawajpa kapuynin nisqapi, yuyaychanaykipaj may chhika yanapas tiyan. Chantapis castellanopi Watchtower Library * nisqapi sumaj yuyaychaykunata tarinaykipaj waj hermanota maskʼaysisunanta niwaj. Chaykunapi yuyaychakusqanta mana maskʼasunman chayqa, mayta pantasunman. Chaykunapeqa, yuyaychaykunata maskʼajkunapaj, ashkha yanapas tiyan. Wajkuna, chaykunapi Bibliaj yuyaychaykunasninta maskʼanankupaj, Diospa Palabranpi tʼukurinankupaj ima, ¿yanapayta atinkichu? Imaynatachus uj mapa maypichus kashasqanchejta yachanapaj, maynintachus rinanchejpaj ima yanapawanchej. Ajinallatataj ukhunchanapaj publicacionesqa wiñay kausayta taripanapaj jina, imatapis allinta ajllanapaj yanapawanchej.

Ashkha ancianos, Torremanta Qhawajpa kapuynin nisqapi, chayri Watchtower Library nisqapi maskʼayta, hermanosta yachachinku. Ajinamanta Bibliaj nisqanman jina imatapis ruwanankupaj yanapanku. Chantapis hermanosqa tapuykunasninkupaj mana kutichiykunallatachu tarinku, manaqa paykuna kikin ukhunchayman yachaykukunku, Jehová tukuy imata qowasqanchejpitaj atienekunku. Ajinamanta “yachasqa kanku reparanankupaj imachus allin, imatajchus mana allin kasqanta” (Heb. 5:14).

5 Imatachus ruwanankuta ama ajllapuychu.

“Sapa ujpis ruwananta ruwanan tiyan.” (GÁL. 6:4, 5.)

Ima yuyaychayman jinachus ruwananta, sapa uj ajllanan tiyan. Jehovaqa, yuyaychaykunasninman jinachus, manachus ruwayta ajllananchejta saqewanchej (Deu. 30:19, 20). Wakin kuteqa, ashkha yuyaychaykuna kanman, sapa ujtaj chaykunamanta ajllanan tiyan. Yuyaychanaykita munaj, imamantachus tapususqanman jina, ima edadniyojchus kasqanman jina, kayta tapukunayki allin kanman: “¿Kaymanta noqapunichu yuyaychanay kanman?”, nispa. Wakin kuteqa, wakin imasmanta qotuchakuymanta ancianos yuyaychanankuta saqenanchej tiyan, tapukoj, joven kajtintaj tatasninpa makinpi saqena.

[Sutʼinchaynin]

[8 paginapi recuadro, dibujo/foto]

Familiapi Diosta Yupaychashaspa kayta ruwawaj

Imamantachus kunallanraj tapususqankumanta maskʼanayki, allin kanman. Pillatapis tapusojtin yanapanaykipaj, ¿yachaqanasta, Bibliamanta yuyaychaykunata ima, maskʼayta yachankichu? Ichapis uj hermano chayri hermana casarakuyta munan chaywan llojsinan, allinchus manachus kasqanta tapusunkiman. Qhepa kaj paginapi Torremanta Qhawajpa kapuynin nisqapi “Qotuchakuypaj yachaqanas” chayri “Cristianoj kausaynin, kʼacha kaykunasnin ima” nisqata maskʼay. Chantá castellanopi, Watchtower Library nisqapi “Concertar citas” chayri “Matrimonio” nisqata maskʼawaj. Chayta maskʼashajtiyki “Véase también” rikhurisojtin, chaytawan qhawariwaj, chaytaj astawan yanapasonqa.

 [9 paginapi recuadro]

Jehová, llajtannejta ima yanapastachus tarinapaj qowasqanchejqa, sumajta yuyaychanapaj yanapawanchej, yuyaychawanchejtaj. Eclesiastés 12:11 nin: “Yachayniyojkunaj nisqasninkoqa ayjon jina kanku. Yachachejkunaj nisqasninku tantasqasqa sumaj takasqa estaca jina kanku, uj sumaj michejpa churasqan”, nispa. “Ayjon[taqa]”, jallpʼata llankʼashaspa uywasta cheqanta purichinapaj apaykachakoj. Ajinallatataj allin yuyaywan, munakuywan ima yuyaychaykunaqa, allin sonqoyoj runasta allin ñanman churan. “Sumaj takasqa estaca[staj]”, imatapis sumajta sayachin. Ajinallatataj allin yuyaychaykunaqa runasta allinta sayachin. Yachayniyojkunaqa, “yachachejkunaj nisqasninku[ta] tantas[pa]” may kusiyta tarinku, imajtinchus “sumaj michejpa” nisunman Jehovaj yachayninman jina kashan.

Yuyaychashaspaqa, sumaj Michejpa nisqasnillanta parlana. Allinta uyarispa yanapanapaj jina imatapis yuyaychayqa, may sumaj. Bibliaj yuyaychasqanman jina kajtintaj, allin yuyaywan yuyaychasun, chayta japʼikojkunataj wiñay kausayta tarenqanku.