Leejkunaj tapuyninku

¿Uj cristiano qʼala runasta qhawasqanrayku qotuchakuymanta qharqosqa kayta atinmanchu?

▪ Arí. Chayrayku qʼala runasta qhawaymanta, tukuy laya millay imasta mana iskayrayaspa qhesachananchej tiyan: nisunman revistaspi qhawayta, leeyta, peliculaspi, videospi chayri Internetpi qhawayta.

Qʼala runasta qhawayqa, tukuynejmanña chayan. Ni jaykʼaj jina, tukuy edadniyoj runasman Internetnejta chayan. Wakinmanqa, mana munashajtillanku chaykuna rikhurin. Wakintaj paykunapuni qhawayta maskʼanku, ichapis wasinkupi chayri oficinankupi, maypichus pakayllapi leeyta chayri qʼala runasta qhawayta atinku. ¿Imaraykutaj chayta qhaway cristianospaj uj tojlla?

Jesusqa, imaraykuchus mana allin kasqanmanta, jinata nerqa: “Sichus pipis uj warmita qhawan munapayaspa chayqa, ñapis paywan sonqompi khuchichakunña”, nispa (Mat. 5:28). Casarasqa kajkuna qhariwarmi jina puñuykunankoqa mana juchachu, astawanqa paykunapaj kusiy (Pro. 5:15-19; 1 Cor. 7:2-5). Chaywanpis qʼala runasta qhawayqa, khuchichakuykunata rikuchispa, millay yuyaykunata rijchʼarichin, mayqenkunatachus Jesús juchacharqa. Sutʼimanta nispaqa, qʼala runasta qhawaj chayri chaykunamanta leej, kay kamachiyta pʼakin: “Wañuchiychej ari qankunapi [...]: Khuchichakuyta, millay ruwayta, sajra imasta munapayayta, sajra kajta moqʼeyta, anchata  qolqeta munapayayta ima; chayqa lantita yupaychaywan ninakun” (Col. 3:5).

¿Imataj kanman uj cristiano uj kutita chayri iskay kutita qʼala runasta qhawarqa chay? Asaf jina, urmananpajña kashanman, pay nerqa: “Noqarí tumpamantawan urmayman karqa. Chakisneyqa yaqhalla llustʼarqa”, nispa. Chay cristiano, qʼala runasta chayri uj qhari, uj warmiwan khuchichakushajta qhawashanman karqa chayqa, sonqon juchachanman, nitaj Dioswan allinpichu kanman. Astawanpis Asaf jina sientekunman, pay nerqa: “Sapa pʼunchay seqʼosqa kani, sapa paqarintaj jasutʼisqa”, nispa (Sal. 73:2, 14).

Uj cristiano chay juchapi urmaspaqa, Jehovawan niña allinpichu kasqanta, yanapatataj necesitasqanta reparakunan tiyan. Qotuchakuypitaj yanapata tarinman. Biblia nin: “Sichus qankunamanta pipis juchaman urman chayqa, qankuna Espirituman jina kawsajkunaqa llampʼu sonqowan allin ñanman kutichiychej. Qampis allinta qhawarikuy; pajtataj qampis urmanaykipaj jina kashawaj” (Gál. 6:1). Arí, uj chayri iskay ancianos yanapayta atinkuman. Paykunaqa, Jehová “sanoyachi[nanpi]”, “juchampis pampachasqallataj” kananpi atienekuspa, paywan khuska mañakonqanku (Sant. 5:13-15). Qʼala runasta qhawayman yachaykukojkunaqa, yanapata maskʼaspa Asaf jina sientekunku, pichus nerqa: “Diosman qayllakusaj. Noqapajqa chaymin aswan sumajqa”, nispa (Sal. 73:28).

Chaywanpis apóstol Pabloqa, wakinkuna “millay kawsayninkuta, khuchichakuspa qhenchachakuyta, aychaj sajra munaynintapis [nisunman millay puriyta]” mana saqespa, mana pesachikusqankuta nerqa (2 Cor. 12:21). * Profesor Marvin R.Vincent sutʼinchasqanmanjina, griego qallupi “millay kawsayninkuta” nispa, “manchay chʼichi ruwaykunamanta parlasharqa”. Qʼala runasta qhawaymanta wakin layaqa, mana runaspa qʼalasninta, chayri uj qhari, uj warmiwan khuchichakushajta qhawayllachu, manaqa aswan millay. Wakin kutisqa kaykuna rikukun: qharipura chayri warmipura khuchichakusqanku, ashkha ukhupi khuchichakusqanku, animaleswan khuchichakusqanku, wawasta khuchichachisqanku, ashkha ukhupi aviolasqanku, warmista ñakʼarichisqanku, khuchichakuspa waj jinasmanta ñakʼarichisqanku ima. Pablo nisqanman jina wakenqa, “yuyayninku laqhayasqa kajtin” “manaña imamanta pʼenqakuspa, millay kawsayman qokunku, imaymana chʼichi ruwaywan mana sajsayta atispa” (Efe. 4:18, 19).

Chantapis Pabloqa, “millay kawsay[manta]” Gálatas 5:19-21 versiculospi parlallarqataj. Gran Bretañamanta uj teólogo jinata nin: “Kay rimayqa, mana ruwana millay imasta munapayaymanta parlashanman”, nispa. Arí, tukuy cristianos chay ruwaykuna, “mana ruwana millay” chʼichi imas kasqanta yachanchej. Pabloqa, Gálatas 5:19-21 versiculospi, “chay imasta ruwajkunaqa mana Diospa reinonta herenciata jina japʼenqankuchu” nerqa. Chayrayku uj cristiano, uj tiempota chayri unaysitutaña qʼala runasmanta millay imasta, millay khuchichakuykunata ima qhawashanman chay, ¿imataj kanman? Chay viciota mana saqejtin, nitaj pesachikojtenqa, qotuchakuymanta qharqosqa kanman. Qotuchakuy llimphu, jarkʼasqa ima kanallanpajpuni (1 Cor. 5:5, 11).

Qʼala runasmanta tukuy laya millay imasta qhawajkuna, yanapata maskʼasqankuta, kausayninkuta mayta tijrachisqankuta ima yachayqa may sumaj. Jesusqa, ñaupa tiempo Sardismanta wakin cristianosman jinata nerqa: “Qampi wakin allin imas kashankuraj, chay imasrí chinkanayashankuña. Chaykunata watejmanta sayarichiy, [...] Yuyarikuy chay cheqa yachachiyta uyarisqaykita, chayman jinataj ruway; jinataj noqaman kutirikamuy. Manachus rijchʼarinki chayqa, suwa jamun, ajinata jamusaj, nitaj ima horapichus jamunayta yachankichu”, nispa (Apo. 3:2, 3). Arí, qʼala runasta qhawaymanta ayqey, pesachikuy ima atikun (Jud. 22, 23).

Chaywanpis aswan allin kanqa, sapa ujninchej chayman mana urmanapaj kallpachakunanchej. Chayrayku, qʼala runasmanta tukuy laya millay imasta qhawaymanta, ¡mayta karunchakuna!

[Sutʼinchaynin]

[30 paginapi sutʼinchaynin]

Uj cristiano juchapi urmaspaqa, Jehovawan niña allinpichu kasqanta, yanapatataj necesitasqanta reparakunan tiyan