Runasman usqhayta willanallapuni

“Diospa Palabranta [usqhayta] willaraypuni.” (2 TIM. 4:2.)

¿SUTʼINCHAYTA ATIWAJCHU?

¿Imaraykutaj ñaupa cristianos usqhayta willarqanku?

¿Imaynatataj usqhaytallapuni willasunman?

¿Imaraykutaj ni jaykʼaj jina usqhayllata Reinomanta willananchej tiyan?

1, 2. ¿Ima tapuykunataj “Diospa Palabranta [usqhayta] willaraypuni” nisqa kamachiymanta rikhurin?

RUNASTA salvaspa llankʼajkunaqa usqhayllata llankʼanku. Sutʼincharinapaj, nina laurayta thasnojkunaqa, runaspa kausaynin wañuy patapi kasqanta yachaspa, wajyajtinku usqhayllata rinku.

² Jehovamanta sutʼinchajkunaqa, runas salvakunankupaj yanapayta munanchej. Chayrayku, Reinomanta allin willaykunata willanata kamachiwasqanchejta, usqhayllata ruwanchej. Manataj patan urantachu ruwarpanchej. Chantá, apóstol Pablo “Diospa Palabranta [usqhayta] willaraypuni” nispa, ¿imatá niyta munasharqa? (2 Tim. 4:2.) ¿Imataj usqhayta willay ninayan? ¿Imaraykú usqhayta willananchej tiyan?

¿IMARAYKÚ USQHAYTA WILLANANCHEJ TIYAN?

3. ¿Imatataj willayninchejwan tariyta chayri chinkachiyta atisunman?

³ Willayninchejwan imatachus tariyta chayri chinkachiyta atisqanchejpi tʼukurispa, ichá allin willaykunata runa masinchejman usqhayta willana kasqanta reparasun (Rom. 10:13, 14). Diospa Palabran nin: “Sichus juchapi purej runata noqa nisaj: Cheqamanta qan wañunki, nispa, paytajchus juchanmanta kutirikun, allinta purin cheqan imasta ruwaspa, [...] cheqamanta kawsanqa, manataj wañonqachu. Chay ñawpa jucha ruwasqasnenqa mana yuyarisqachu kanqa” (Eze. 33:14-16). Bibliaqa, Reinomanta yachachejkunaman nin: “Qan kikiykita salvakunki, jinallataj uyarisojkunatapis”, nispa (1 Tim. 4:16; Eze. 3:16-21).

4. ¿Imaraykú jaqay tiempopi Diospa contranpi oqharikojkuna rikhurinanta nikusqan, usqhayta willakunanpaj tanqarqa?

⁴ Imaraykuchus Pablo, Timoteoman usqhayta willarananta nisqanta entiendenapaj, kay yachaqanapaj versiculomanta qhepan versiculospi imatachus nisqanta  qhawarina, chaypi nin: “Diospa Palabranta willaraypuni tutapis, pʼunchaypis, ima ratollapis; jinataj juchata reparachiy, kʼamiy, runastataj sonqonkupi kallpachay, pacienciawan allinta yachachispa. Chayta nini, imaraykuchus uj pʼunchay jamonqa, chay pʼunchaypitaj runas mana uyariyta munanqankuchu cheqa kaj yachachiyta. Manachayqa sajra munayninkuman jina yachachejkunata tantanqanku, imaynatachus uyariyta munasqankuta yachachinankupaj. Cheqa kajta mana uyariyta munanqankuchu” (2 Tim. 4:2-4). Jesusqa, Diospa contranpi oqharikojkuna, ashkhas rikhurinankuta nerqa (Mat. 13:24, 25, 38). Chay pʼunchay qayllaykusqanrayku Timoteoqa, “Diospa Palabran[man]ta” qotuchakuy ukhupipis usqhayta willanan karqa, cristianos llulla yachachiykunawan mana apachikunankupaj. Runaspa kausaynin wañuy patapi kasharqa. ¿Imatá kay tiempomanta nisunman?

5, 6. ¿Ima yachachiykunataj tukuynejpi uyarikun?

⁵ Diospa contranpi oqharikuy, tukuynejpi astawan yapaykukun (2 Tes. 2:3, 8). ¿Ima yachachiykunatataj runas uyariyta munanku? Ashkha lugarespeqa jinallamanta runas rikhurisqankuta yachachiy, religión jinaña. Yachayniyoj runaspa yachachiyninku kajtinpis, religionpa yachachiyninman jinaña tukun. Imaraykuchus Diosta, runa masinkuta ima, chay yachachiyman jina qhawanku. Dios, runasmanta mana interesakusqanta yachachikusqanpis, tukuynejpi uyarikun, chayrayku nillataj Paymanta interesakunata ninku. Chay yachachiykunaqa Dioswan allinpi kanankumanta jarkʼan. ¿Imaraykutaj ashkha runas chayta uyarinku? Kayta yuyachisqanrayku: “Munasqaykiman jina imatapis ruwallay, ni piman cuentata qonaykichu kanqa”. Paykunaqa chaytapuni uyariyta munanku (Salmo 10:4 leey).

⁶ Runasqa, waj yachachiykunata creellankutaj. Iglesiasman rinkuraj chay runasqa, yachachejninku, jinata ninankuta munanku: “Imata ruwajtiykipis Diosqa munakusunki”, nispa. Sacerdotes, pastores ima, runas uyariyta munasqallankuta ninku, iglesiaspi ruwasqanku, misas, fiestas, lantis ima, Diospa bendicionninwan kasqanta yuyachinku. Iglesiasman rejkunaqa, kausayninku wañuy patapi kashasqanta, ¡ni reparankuchu! (Sal. 115:4-8.) Chaywanpis, rijchʼarinankupaj, Bibliaj cheqa yachachiyninta entiendenankupaj ima yanapajtinchejqa, Diospa Reinonpa bendicionesninta japʼenqanku.

¿IMA NIYTA MUNAN USQHAYTA WILLAY?

7. ¿Imaynamantá usqhayta willasqanchejta rikuchisunman?

⁷ Uj sumaj operaj doctorqa, operashaspa mana waj imaspichu yuyanan tiyan, runaspa kausaynin wañuy patapi kasqanrayku. Cristiano willayta usqhayta juntʼasqanchejta rikuchinapajpis, tukuy yuyayninchejta chaypi churananchej tiyan. Chaypajqa runas imaspichus, ima tapuykunapichus interesakusqankupi tʼukurina. Chantá uyariyta atiwasqanchej horaspi willaj risunman (Rom. 1:15, 16; 1 Tim. 4:16).

8. ¿Ima niyta munan usqhayta imatapis ruway?

⁸ Ruwayninchejta usqhayta juntʼasqanchejqa, imastachus ñaupajman churasqanchejpi rikukonqa (Génesis 19:15 leey). Kaypi tʼukuriy: analisista orqhochikusqaykitawan, doctorniyki consultorionman wajyasuspa kayta sutʼimanta nisunkiman: “Sinchʼi onqosqa kashanki. Onqoyniykirayku imatapis ruwanaykipaj killa jinallaña kapusunki”, nispa. Mana nina laurayta thasnoj runa jinachu, usqhayta llojsinpuwaj, ¿icharí? Astawanqa, doctor yuyaychasusqanta allinta uyariwaj, wasiykiman ripuspataj imatachus ñaupajta ruwanaykipi tʼukuriwaj.

9. ¿Imaraykutaj Pablo, Efesopi kashajtin usqhayllata willasqanta nisunman?

⁹ Pablo usqhayllata willasqanqa, Éfeso qotuchaykuypi ancianosman Asiapi willasqanmanta  cartata qhelqasqanpi sutʼi rikukun (Hechos 20:18-21 leey). Payqa, chayaytawansina wasimanta wasi allin willaykunata willarqa. Chantapis iskay watata “Tirano nisqaj escuelan[pi] [...] sapa pʼunchay paykunata yachachej” (Hech. 19:1, 8-10). Usqhayllata willasqanqa, sapa pʼunchay ruwanasninpi rikukorqa. Willayninchejta usqhayta juntʼaymanta kamacheyqa, mana llasa qʼepita jina qhawanapajchu. Chaywanpis runasman willayqa, kausayninchejpi ñaupajpi kanan tiyan.

10. ¿Imaraykutaj pasaj pachaj wataspi usqhayta willaj cristianos kasqankumanta kusikunchej?

¹⁰ Bibliamanta Yachaqajkuna juchʼuy qotu, 1914 wata ñaupajta willakunanpaj campañata qallarerqanku, chaytaj usqhayllata willay imachus ninayasqanta rikuchin. Paykunaqa, pisilla kaspapis usqhayta willana tiempo kasqanta reparaspa, sonqo kʼajaywan willarqanku. May chhika periodicospi umallirichiykunata orqhoj kanku, chantapis “Foto-Drama de la Creación” nisqa colorniyoj dibujosta, peliculata jina qhawachej kanku. Ajinamanta ashkha runasman allin willaykunata chayacherqanku. Paykuna usqhayta willasqankurayku, noqanchejpis Reinomanta willayta uyarerqanchej (Salmo 119:60 leey).

PAJTATAJ USQHAYTA WILLAYTA QONQAWAJ

11. ¿Imataj wakinkunata usqhayta willananku kasqanta qonqachin?

¹¹ Waj imaspi yuyayqa, imaraykuchus willayninchej allin kasqanta qonqachiwasunman. Satanaspa sajra pachanqa, munasqallanchejpi yuyanapaj chayri qhasi mana kaj imaspi tiempota usuchinapaj tanqawanchej (1 Ped. 5:8; 1 Juan 2:15-17). Wakenqa, Jehovata sirviyta ñaupajman churaj kanku, kunantaj usqhayta willana tiempopi kasqanchejta qonqapunku. Ajina karqa ñaupa cristianospa tiemponkumanta Demaswan. Payqa, Pablota yanapajkunamanta ujnin kaspapis, kay pachaj imasninwan apachikorqa. Pablota sinchʼi llakiypi kashajtin kallpachananmantaqa saqerpayarqa (File. 23, 24; 2 Tim. 4:10).

12. ¿Imatá kunan ruwayta atinchej, imastataj wiñay kausaypi ruwayta atisunchej?

¹² Usqhayta willana kasqanta mana qonqananchejpajqa, kay pachaj imasninwan mana apachikunachu tiyan. Astawanqa “cheqa kaj kawsaymanta chʼipaku[napaj]” kallpachakuna (1 Tim. 6:18, 19). Yachanchej jina, Diospa Reinon kamachishajtenqa, Paraisopi sumaj imasta ruwanapaj tiempo kallanqa. Chaywanpis, runa masinchejta Armagedonpi salvakunankupaj yanapayta atisqanchejqa, ni jaykʼaj ujtawan ruwakonqachu.

13. Cristianosña kaspa, ¿imaynatataj usqhayllatapuni willasunman?

¹³ Ashkha runas Jehovata mana rejsinkuchu. Chayrayku, ¿imaynatataj usqhayllatapuni willasunman? Kayta yuyarikuna: noqanchejpis ñaupajtaqa laqhapi jina kasharqanchej. Chaywanpis Diosmanta, Cristomanta ima cheqa kajta yachakorqanchej. Kunantaj, wajkunaman chayta yachachiyta atinchej (Efesios 5:14 leey). Pablo qhelqarqa: “Allinta qhawakuychej imaynatachus kawsasqaykichejta; ama kawsaychejchu wampus jinaqa, manachayqa yuyayniyojkuna jina. Tiempo kashajtillanraj, allin kajta ruwaychej, imaraykuchus kunan pʼunchaykunaqa mana allinchu”, nispa (Efe. 5:15, 16). Kay sajra pacha chaupipi, “tiempo kashajtillanraj” Diosman qayllaykuchiwasqanchej imasta ruwana.

NI JAYKʼAJ JINA TIEMPOPI KAUSASHANCHEJ

14-16. ¿Imaraykutaj ni jaykʼaj jina usqhayllata Reinomanta willananchej tiyan?

¹⁴ Cristiano willayqa, unaymantapacha usqhayllatapuni ruwakun. Kunantaj ni jaykʼaj jina astawanraj. Kay 1914 watamantapacha, Bibliapi señalmanta parlasqan tukuynin juntʼakushan (Mat. 24:3-51). Runaspa  kausaynin, ni jaykʼaj jina wañuy patapi kashan. Kunallanraj tratosta ruwakojtinpis, jatuchaj suyuspi tʼojyachinapajpacha 2000 bombas nucleares nisqaraj tiyan. Autoridadesqa, bombas nuclearesta ruwakunanpaj material may chhika “chinkasqanta” ninku. ¿Wakin material terroristaspa makisninkupichu kashanman? Yachayniyoj runasqa, terroristas guerrata qallarichejtinku, tukuy runas chinkananta ninku. Chaywanpis mana guerrallachu, runaj kausayninta chinkachinayashan.

¹⁵ Kay 2009 watapi, The Lancet chantá Londresmanta University College nisqa, tiemponchejmanta parlaspa uj willaypi nerqa: “Tiempo cambiasqanqa, runaj kausayninta chinkachinayashan”. Nillantaj: “Tiempo cambiasqanqa qhepan wataspi, casi tukuy llajtasman chayanqa, may chhika runasta wañurachenqa, onqoykuchenqa ima”, nispa. Mama qochamanta yaku wasaykamusqanrayku, chʼaki watas, loco paras, sinchʼi onqoykuna, sinchʼi wayras, tukuy ima pisiyajtin maqanakuykuna kasqanrayku ima, may chhika lugares chinkanman. Arí, maqanakuykuna, tukuy imastaj kasqan runaj kausayninta chinkachinayashan.

¹⁶ Ichapis wakin runas, guerra nuclear nisqa kananta nikusqan, “señal[pa]” imasninta juntʼananta yuyankuman. Chaywanpis, may chhika runas imapunichus chay señal ninayasqanta mana entiendenkuchu. Ashkha watastaña señalpa imasnin rikukushan, chaytaj Cristoj kutimuyninpiña kashasqanchejta, kay pachaj tukukuynintaj qayllitapiña kasqanta rikuchin (Mat. 24:3). Ni jaykʼaj, señalpa imasninta chay jina sutʼita rikukorqachu. Runas, Diosman qayllaykunankupaj rijchʼarinanku horaña, chaypajtaj willayninchej yanapanman.

17, 18. a) Ima tiempopichus kashasqanchejta yachaspa, ¿imatá ruwananchej tiyan? b) ¿Imastaj Reinoj willayninta runas uyarinankupaj tanqanman?

¹⁷ Diosta munakusqanchejta rukuchinapaj, kay qhepa pʼunchaykunapi kamachiwasqanchej willayta juntʼanapaj ima, may pisi tiempollaña tiyan. Pablo, Romamanta cristianosman qhelqasqanqa kunan aswan sutʼi. Pay nerqa: “Tiempota allinta reparaspa. Yachanchej puñuymanta rijchʼarina horaña kasqanta, imaraykuchus salvacionninchejqa aswan qayllapi kashan, creesqanchej, chay pʼunchaymantaqa” (Rom. 13:11).

¹⁸ Ichapis wakin runas, kay qhepa pʼunchaykunapaj profeciasta juntʼakojta rikuspa, Diosman qayllaykunanku kasqanta reparankuman. Wakintaj, runa yanapata necesitasqanta reparanku, kay pachapi kamachejkuna, qolqe pisiyasqanrayku, mana allinta kamachiyta atisqankuta rikuspa, guerra nuclear nisqa kananta uyarispa, sajra ruwaykunata, aireta chʼichichashasqankuta ima rikuspa. Wakinrí familiankupi ima kajtin, nisunman sinchʼi onqoyrayku, divorciakusqankurayku chayri familiankumanta pillapis wañupusqanrayku, Diosman qayllaykuyta necesitasqankuta reparanku. Willaspaqa, chay runasta yanapayta atinchej.

USQHAYTA WILLANA KASQAN TANQAWANCHEJ

19, 20. ¿Imaynatá ashkha cristianos kausayninkuta tijracherqanku usqhayta willayninkuta ruwayta munaspa?

¹⁹ Ashkha cristianosqa usqhayta willana kasqanta yachaspa, astawan llankʼayta qallarinku. Sutʼincharinapaj, Ecuadormanta uj qhariwarmi, 2006 watapi “Mantengamos el ojo sencillo” nisqa uj pʼunchaypaj jatun tantakuypaj wakichikusqanta uyariytawan, ruwayninkuta pisiyachinankuta nerqanku. Imastachus mana necesitasqankuta uj listapi qhelqarqanku, kinsa killanmantaj kinsa cuartosniyoj wasinkumanta, uj cuartollayoj wasiman riporqanku. Wakin imasninkuta venderqanku, manusninkutapis pagarqanku. Pisi tiemponmantaj precursores auxiliares  jina llankʼayta qallarerqanku, chantá qotuchakuykunata waturejpa yuyaychasqanta japʼikuspa, willajkuna necesitakun chay qotuchakuyman riporqanku.

²⁰ Estados Unidosmanta uj hermano, jinata qhelqarqa: “Señoraywan 2006 watapi jatun tantakuyman rishajtiyku, 30 watastaña bautizasqas kasharqayku. Autopi wasiykuman kutipushajtiykutaj, cristianos kapuyninchejta pisiyachiymanta yuyaychakusqanta, imaynatachus ruwanaykumanta parlarerqayku (Mat. 6:19-22). Kinsa wasisniyoj, sumaj autosniyoj, uj boteyoj, wasi jina autoyoj ima karqayku. Mana yuyayniyoj jina ruwasqaykuta reparakuspataj, Diospaj astawan llankʼanaykuta nerqayku. Kay 2008 watapi warmi wawayku jina, precursores regulares kayta qallarerqayku. Hermanoswan astawan llankʼay, ¡mayta kusichiwarqayku! Maypichus pisi willajkuna kanku chaypi sirverqayku, Jehovapaj astawan ruwaytaj payman qayllaykuchiwayku. Runas Diospa Palabranmanta cheqa kajta uyarispa, entiendespa ima mayta kusikusqankuta rikusqaykoqa, ni imawan kikinchakunchu”, nispa.

21. ¿Imata yachasqanchejtaj usqhayta willamunapaj tanqawanchej?

²¹ Kay sajra pacha tumpamantawan imapichus tukunanta yachanchejña: “Diosqa mana cheqan kajman jina kawsaj runasta juzgaspa, chinkarparichenqa” (2 Ped. 3:7). Diospa Palabranmanta yachasqanchejqa, jatun ñakʼariy qayllitapiña kasqanta, mosoj pacha chayamunanta ima, sonqo kʼajaywan willamunapaj tanqawanchej. Sumaj suyakuymanta, runasman usqhayllatapuni willanachej kasqanta yachanchej. Tukuy atisqanchejta usqhayta willaspaqa Diosta, runa masinchejta ima munakusqanchejta rikuchinchej.

[Tapuykuna]