Salvakunapaj Jehová waqaychawanchej

“Creesqaykichejrayku qankunapis Diospa atiyninwan waqaychasqallataj kankichej, chay jamoj salvacionta taripanaykichejpaj, mayqenchus wakichisqa kashan qhepa pʼunchaykunapi rikuchisqa kanampaj.” (1 PED. 1:5.)

¿IMATÁ KUTICHISUNMAN?

¿Imaynatá cheqa religionman Jehová pusamuwarqanchej?

¿Imaynatá Jehová yuyaychasqasninwan pusanawanchejta saqenchej?

¿Imaynatá Jehová sonqochawanchej?

1, 2. a) ¿Imaraykutaj Jehová cheqa sonqollapuni kanapaj yanapayta atiwasqanchejta nisunman? b) ¿Maykamataj Jehová rejsiwanchej?

JESÚS nerqa: “Pichus tukukuykama sinchʼita sayajrí, chaymá salvasqa kanqa”, nispa (Mat. 24:13). Chayta nispaqa, Satanaspa sajra pachanta Jehová castigashajtin mana wañunapaj, tukukuykama cheqa sonqosllapuni kananchejta rikuchisharqa. Chaywanpis, ¿kallpallanchejpi, yachaynillanchejpi atienekuspa aguantananchejtachu Jehová suyan? Mana. Biblia kayta nin: “Diosqa cheqamin, manataj saqesonqachejchu mana sayay atinata tanqasqa kanaykichejta. Astawanqa juchaman urmanapaj tanqasqa kashajtiykichej, Diosllataj yanapasonqachej imaynatachus chay juchaman urmanamanta lluspʼinaykichejpaj, chaywan atipaspa” (1 Cor. 10:13). ¿Ima niytá munan kay rimaykuna?

² Jehovaqa tukuy imata noqanchejmanta yachan, ima llakiypichus rikukusqanchejta, imaynachus kasqanchejta, maykamachus aguantayta atisqanchejtapis. Ajinallamanta juchaman urmanapaj tanqasqa kananchejta saqesqanqa, muchuyta atinapaj jinalla kasqanta yachan. ¿Cheqamantachu sumajta rejsiwanchej? Arí. Palabranqa, sapa ujninchejmanta tukuy imitanchejta rejsisqanta rikuchiwanchej. Paypajqa, kausayninchej, imastachus ruwasqanchej ima sutʼipi kashan. Chantapis imatachus yuyasqanchejta, imatachus ruwayta munasqanchejta ima allinta yachan (Salmo 139:1-6 leey).

3, 4. a) ¿Imaynatá Davidpa kausaynin, Jehová sapa runapi interesakusqanta rikuchiwanchej? b) ¿Imatataj kay tiempopi tʼukunapaj jina ruwashan?

³ Mana imapis kashajtinchej, Dios noqanchejpi interesakusqanqa mana creenapaj jina, ¿icharí? Davidpis kikillantataj yuyaspa, Jehovaman nerqa: “Qampa ruwasqayki cielota rikuspa, churasqayki killata, chʼaskastawan ima, noqa nini. Imataj runa kasqa paymanta  yuyarikunaykipajri?”, nispa (Sal. 8:3, 4). Kay tapuytaqa ichapis kausayninpi tʼukurispa ruwarqa. Isaíj sullkʼa wawallan kajtinpis Jehovaqa, “pitachus munasqanta” jina qhawarqa. Paytaqa, “ovejasta campopi michi[sqanmanta]” tʼaqarqa, “Israel ayllu[n]pa kamachejnin kana[n]paj” (1 Sam. 13:14; 2 Sam. 7:8). Davidqa ovejeritolla kajtinpis, tʼukurisqan imaspi Dios interesakusqanta rikuspa, ¡Tʼukullachá qhepakorqa!

⁴ Kunanpis Jehová noqanchejmanta mayta interesakusqanta rikuspa, tʼukulla qhepakunchej. Payqa, cheqa religionnejta “tukuy naciones[pa] tiyapusqanta” tantashan, paykunatataj cheqa sonqosllapuni Payta yupaychanankupaj yanapashan (Hag. 2:7, 8). Cheqa sonqosllapuni kananchejpaj imaynatachus yanapawasqanchejta entiendenapaj, imaynatachus cheqa religionman runasta pusamusqantaraj qhawarina.

DIOS CHURINMAN PUSAWARQANCHEJ

5. ¿Imaynamantá Jehová runasta Churinman pusan? Sutʼinchay.

⁵ Jesús nerqa: “Mana pipis noqaman jamunmanchu, manachus kachamuwaj Tatay pusamunman chayqa”, nispa (Juan 6:44). Chay rimaykunaqa, Cristoj discipulosnin kananchejpaj, Diospa yanapayninta necesitasqanchejta rikuchin. Chaywanpis, ¿imaynatá Jehová, ovejas jina llampʼu sonqoyoj runasta Churinman pusan? Allin willaykunanejta, espíritu santonnejta ima. Sutʼincharinapaj, Pablowan, waj misioneroswan Filipos llajtata visitashajtinku, Lidia sutiyoj warmiwan tinkorqanku, allin willaykunatataj payman willarqanku. Biblia nin: “[Jehovataj] Lidiaj sonqonta kicharerqa, Pabloj nisqanta tukuy sonqo uyarinampaj”, nispa. Rikunchej jina Lidiataqa, chay willayta entiendenanpaj espíritu santonwan Dios yanaparqa. Ajinamanta pay, familianmanta kajkuna ima bautizakorqanku (Hech. 16:13-15).

6. ¿Imaynatá Dios cheqa religionman pusamuwarqanchej?

⁶ ¿Lidiallawanchu ajina karqa? Mana. Jehovaman cristianos jina qokunchejña chayqa, Lidiata jina cheqa yupaychayman pusamuwarqanchej. Chantapis janaj pachapi Tatanchejqa, Lidiapi jinallataj sonqonchejpi kʼacha kaykunata rikorqa. Allin willaykunata uyarishajtinchej, espíritu santonwan Jehová entiendenapaj yanapawarqanchej (1 Cor. 2:11, 12). Yachakusqanchejman jina kausanapaj, munayninta ruwanapaj ima kallpachakusqanchejta bendecisqanta rikorqanchej. Kausayninchejta Payman qoshajtinchejtaj mayta kusikorqa. Arí, Payta sirviyta qallarisqanchejmantapacha, tukuy imapi yanapashallawanchejpuni.

7. ¿Imaynamantá yachanchej cheqa sonqo kananchejpaj Jehová yanapanawanchejta?

⁷ Dioswan puriyta qallarisqanchejmantapacha, payqa mana kachariwanchejchu. Mana sapallanchejmantachu cheqa kajman yaykorqanchej, nitaj sapallanchejmantachu chayllapipuni kayta atisun, chaytataj Jehová sumajta yachan. Apóstol Pedro, ajllasqa cristianosman nerqa: “Creesqaykichejrayku qankunapis Diospa atiyninwan waqaychasqallataj kankichej, chay jamoj salvacionta taripanaykichejpaj, mayqenchus wakichisqa kashan qhepa pʼunchaykunapi rikuchisqa kanampaj, chayta”, nispa (1 Ped. 1:5).  Kay rimaykunaqa tukuy cristianospajwan, chayrayku sapa ujninchej chaypi interesakunanchej tiyan. ¿Imaraykú? Diosman cheqa sonqo kananchejpajqa yanapayninta tukuy necesitanchej.

DIOSQA MANA MISKʼANAPAJ WAQAYCHAWANCHEJ

8. ¿Imaraykutaj juchapi mana urmanapaj kallpachakunanchej tiyan?

⁸ Kausayninchejpi chʼampaykuna kasqanrayku, juchasapa kasqanchejrayku ima, imatapis mana Jehová jinachu qhawasunman. Chaytaj mana reparayllata juchaman urmachiwasunman (Gálatas 6:1 leey). Chayta astawan sutʼinchanapaj, Davidpa kausayninmanta parlarina.

9, 10. ¿Imaraykutaj Jehová Davidta mana juchallikunanpaj yanaparqa, imaynatataj kunanpis yanapawanchej?

⁹ Davidqa, rey Saúl qhatiykachashajtin munayninwan mana atipachikorqachu, nitaj chay envidiakoj reymanta vengakorqachu (1 Sam. 24:2-7). Pisi tiemponmanrí niña kikintachu ruwarqa. Davidqa paypaj, runasninpaj ima mikhunata, yakuta ima necesitasqanrayku israelita Nabalmanta kʼachallamanta yanapata mañakorqa. Nabal sajrawan kutichejtintaj, mayta phiñakuspa, vengakuyta munaspa ima, Nabalpa wasinmanta tukuy qharista wañurachinanta nerqa. Mana juchayoj runasta wañuchisqanmanta Dios juchachananpi, ni tʼukurillarqapischu. Chaywanpis Nabalpa warmin Abigaíl, juchallikunanmanta jarkʼarqa. Davidqa, Jehová Abigailta kachasqanta reparaspa, jinata payman nerqa: “Bendecisqa kachun Israelpa Señornin Tata Diosqa pay kachamususqanmanta noqata taripawajta. Qampis bendecisqallataj kay, sumajta umachakusqaykimanta. Jinamanta qan jarkʼawarqanki wañuchimunay kashajtin, noqa kikiy chay sajramanta pagachikunay kashajtin”, nispa (1 Sam. 25:9-13, 21, 22, 32, 33).

¹⁰ ¿Imatataj chaymanta yachakunchej? Jehovaqa Davidta, Abigailnejta juchaman mana urmananpaj yanaparqa. Kunanpis kikillantataj yanapawanchej. Chaywanpis juchaman urmanapaj jina kajtinchej, mana sapa kutichu pitapis kachamuwasun. Chantapis munaynin juntʼakunanpaj, imatachus ruwananta chayri imatachus saqenanta mana yachanchejchu (Ecl. 11:5). Jinapis Jehovaqa, imaspichus rikukusqanchejta sumajta yachan, cheqa sonqo kananchejpajtaj yanapawanchej. Payllataj niwanchej: “Ñawisneyqa qanllapi kashan, yachachisqayki, yuyaychasqaykitaj mayqen ñantachus rinaykita”, nispa (Sal. 32:8). Chantá, ¿imaynamantá Jehová yuyaychawanchej? ¿Imatá yanapanawanchejpaj ruwasunman? ¿Imaraykú Jehová kay tiempopi llajtanta yanapashasqanta nisunman? Apocalipsis libropi kutichiykunata qhawarina.

DIOSQA YUYAYCHAYKUNASNINWAN JARKʼAWANCHEJ

11. ¿Maykamataj Jehová imaschus qotuchakuykunapi kasqanta yachan?

¹¹ Apocalipsis 2, 3 capitulospi mosqoypi jina rikukusqanman jinaqa, Jatunchasqa Jesucristo Asia Menormanta qanchis qotuchakuykunata qhawarerqa. Cristoqa, mana chay qotuchakuykunata pata patallantachu qhawarparerqa, manaqa imastapunichus ruwashasqankuta. Wakin kuteqa, sutista ima oqharerqa, tukuyninkutataj necesitakusqanman jina sonqocharqa, yuyaycharqa ima. ¿Imatá chaymanta yachakunchej? Qanchis qotuchakuykunaqa 1914 watamanta qhepaman, ajllasqa cristianoswan ninakun. Yuyaychaykunata qosqantaj, Jallpʼantinpi Diospa llajtanmanta tukuy qotuchakuykunapaj. Arí, Jehovaqa Churinnejta llajtanta ñaupajman apashan. ¿Imatá yanapanawanchejpaj ruwasunman?

12. ¿Imaynatá Jehovawan pusachikunchej?

¹² ¿Imaynamantá Jehovaj yanapayninta  japʼinchej? Bibliata sapallanchejpi ukhuncharispa. Jehovaqa, allin kamachi yuyayniyojnejta Bibliamanta ashkha yuyaychaykunata regalota jina qowanchej (Mat. 24:45). Chaykunawan yanapachikuyta munanchej chayqa, ukhunchanapaj tiempochakuna, chayman jinataj ruwana. Arí, Jehovaqa Bibliata sapallanchejpi ukhunchasqanchejnejta, mana urmanapaj “waqaychayta ati[wanchej]” (Jud. 24). ¿Manachu wakin kuti publicacionesmanta ima yachachiypis qanpaj jina wakichikusqanta repararqanki? Ajina chayqa, Jehovaj cheqanchayninta jina japʼikuy. Wakin kuteqa, amigoyki imatapis reparachisunanpaj takarisunkiman. Ajinallatataj Jehovaqa, tukuy kamachisninta jina, kausayniykimanta, imaynachus kasqaykimanta ima imallatapis allinchanaykipaj, espíritu santonwan yanapasunkiman. Espiritunwan yanapanawanchejta saqenchej chayqa, Jehovawan pusachikusun (Salmo 139:23, 24 leey). Chayrayku, imaynatachus Bibliata ukhunchashasqanchejtaqa, qhawarikunapuni tiyan.

13. ¿Imaraykutaj imaynatachus Bibliata ukhunchashasqanchejta qhawarikunanchej tiyan?

¹³ Tiemponchejta kusirikuyllapi usuchinchej chayqa, sapallanchejpi Bibliata ukhunchanapaj niña tiempo kanqachu. Uj hermano nerqa: “Bibliata sapallanchejpi ukhunchaytaqa qonqarpallasunman. Kunanqa sonqota kusirichinapaj tukuy imas tiyan, aswan baratotaj. Chaykunataj telenejta, computadoranejta, telefononejta ima rikhurin. Chaykunawan libre muyuykusqa kanchej”, nispa. Mana qhawarikojtinchejqa, sapallanchejpi Bibliata ukhunchanapaj tiemponchej, pʼunchaymanta pʼunchay chinkapunankama pisiyanqa (Efe. 5:15-17). Chayrayku kaykunata tapurikuna: “¿Tiempochakunichu Diospa Palabranta sumajta ukhunchanaypaj? Chayri ¿tantakuykunapi umallirichinay chayri parlarinay kajtillanchu wakichikuni?”, nispa. Ajina chayqa, ichapis Familiapi Diosta Yupaychanapaj chʼisita chayri sapallanchejpi ukhunchashasqanchejta aswan sumajmanta ruwana kanqa. Ajinamanta Jehová salvakunapaj sumaj yachayta qowasqanchejwan yanapachikusun (Pro. 2:1-5).

DIOSQA SONQOCHASPA SINCHʼITA SAYACHIWANCHEJ

14. Jehovaqa imaynachus sonqonchej kashasqanta yachan, ¿imaynatá chayta Biblia rikuchin?

¹⁴ Davidqa mana atipay atina chʼampaykunapi rikukorqa (1 Sam. 30:3-6). Jehovaqa imaynachus Davidpa sonqon kashasqanta yacharqa, chaytaj Diospa yuyaychasqanman jina qhelqasqanpi rikukun (Salmo 34:18; 56:8 leey). Noqanchejpatapis yachallantaj. Llakiywan atipachikushajtinchej, “sonqon[chejta]” nanachikojtinchej chayri “manaña salvasqa kayta” suyajtinchej, Jehová kʼaskaykamuwanchej. Chaytaj Davidta jina, mayta sonqochawanchej. Payqa ujnin takiyninpi jinata nerqa: “Khuyakuyniykipi maytapuni kusikusaj. Qan rikunki llakiyniyta, yachankitaj phutikuyniyta”, nispa (Sal. 31:7). Diosqa mana chʼampaykunasnillanchejtachu rejsin, manaqa sinchʼita sayachinawanchejpaj sonqochawanchej, kallpachawanchej ima. Chaytataj tantakuykunanejta ruwan.

15. ¿Imatá Asafpa kausayninmanta yachakunchej?

 ¹⁵ Asafpa kausaynenqa, tantakuykunaman riy mayta yanapawasqanchejta rikuchiwanchej. Chay sacerdoteqa, may chhika sajra ruwaykunata rikusqanrayku, Diosta sirviy qhasi mana kajlla kasqanta yuyarqa, phutikorqataj. Pay nerqa: “Noqa ancha llakisqa karqani, sonqoytaj tʼojsisqa jina nanarqa”, nispa. Chayraykutaj Jehovata yupaychayta saqepuyta munarqa. ¿Imataj maychus kajllata yuyananpaj yanaparqa? Pay nerqa: “Diospa wasinman yaykorqani”, nispa. Chaypeqa Diosta yupaychajkunawan kaspa yuyayninman churakorqa. Chantapis, sajra runas kusisqa kausasqanku mana wiñaypajchu kasqanta, Jehová tukuy imata allinchanantataj repararqa (Sal. 73:2, 13-22). Kunanpis kikillanpitaj rikukunchej. Satanaspa sajra pachanpi, sajra ruwaykunata rikusqanchejrayku ichapis saykʼusqaña kanchej. Jehovata kusisqallapuni sirvinapajqa, hermanosninchejwan tantakuspa sonqo tiyayta, yanapata ima tarinchej.

16. ¿Imaynatá Anaj kausaynin yanapawanchej?

¹⁶ Chaywanpis, ¿qotuchakuypi imallapis tantakuyman mana rinapaj jina kajtinrí? Ichá qotuchakuypi ima ruwaytapis saqesqanchejrayku, pʼenqasqa kashasunman. Chayri uj hermanowan chayri uj hermanawan phiñasqa kashasunman. Jina kajtenqa, Anaj kausaynin mayta yanapawasunman (1 Samuel 1:4-8 leey). Payqa qosanpa ujnin warmin Peninawan chʼampaypi kasqanrayku mayta ñakʼarerqa. Llakiynenqa astawan yapaykukoj Silopi kaj Toldopi jaywanasta Jehovaman qonankupaj sapa wata rejtinku. Chayraykutaj “waqallajpuni, manataj mikhojchu”. Chaywanpis Jehovata yupaychananpaj, chay jarkʼananta mana saqerqachu. Jehovataj cheqa sonqo kasqanta rikuspa bendicerqa (1 Sam. 1:11, 20).

17, 18. a) ¿Imaynasmantataj tantakuykunapi sonqochayta tarinchej? b) Salvakunanchejpaj Jehová munakuywan jarkʼawasqanchejpi tʼukurispa, ¿imaynataj sientekunki?

¹⁷ Cristianosqa Ana jina, mana saqespa tantakuykunaman rinanchejpuni tiyan. Chaypeqa necesitasqanchejman jina kallpachakunchej (Heb. 10:24, 25). Hermanospa munakuyninku, paykunawan masichakusqanchej ima kallpachawanchej. Ichapis uj umallirichiypi imatapis nikusqan, uj hermanoj kutichisqan sonqonchejman chayanman. Chayri niraj tantakuy qallarishajtin chayri tukukojtin uj hermanowan parlarejtinchej, uyariwasunman chayri sonqochawasunman (Pro. 15:23; 17:17). Chantapis khuska, Jehovaman takejtinchej sonqonchej qhallallarin. “Ashkha llakiyniyoj” kashajtinchej astawan kallpachanawanchejta necesitanchej, chaytataj tantakuykunapi tarisunman. Jehovaqa chaykunapi “sonqochawasqa[nchejwan]” sumajta sayachiwanchej, cheqa sonqosllapuni kanapajtaj kallpachawanchej (Sal. 94:18, 19).

¹⁸ Munakuywan Diosninchej jarkʼawasqanchejmanta Asaf jina sientekunchej, pichus jinata takerqa: “Paña makiymanta japʼiwanki. Yuyaychawasqaykiwan ñanta pusawanki”, nispa (Sal. 73:23, 24). Salvakunanchejpaj Jehová waqaychawasqanchejmanta, ¡may agradecesqas kashanchej!

[Tapuykuna]

[28 paginapi dibujo/foto]

Qantapis Jehová pusamusunki

[30 paginapi dibujo/foto]

Diospa yuyaychasqasnenqa jarkʼanawanchejpaj

[31 paginapi dibujo/foto]

Sonqochayta tarisqanchejqa sinchʼita sayachiwanchej