¿Jehovaj jatun kayninta lliphipichishankichu?
¿Jehovaj jatun kayninta lliphipichishankichu?
“Uj espejopi jina, Diospa jatun kaynimpa kʼanchayninta [lliphipichinchej].” (2 COR. 3:18.)
¿IMATÁ KUTICHIWAJ?
¿Imaraykutaj juchasapa kaspapis Jehovata jatunchayta atinchej?
¿Imaynatataj Diosmanta mañakuy, tantakuykuna ima jatun kayninta lliphipichinapaj yanapawanchej?
¿Imataj Jehovata wiñaypaj jatunchanapaj yanapawasunman?
1, 2. ¿Imaraykú Jehovaj jatun kayninta lliphipichiyta atinchej?
TUKUYPIS, tatasninchejman tumpallatapis rijchʼakunchejpuni. Runasqa yoqallitusta jinata niyta yachanku: “Tataykej papa qʼallunpuni kanki”, nispa. Uj imillitatataj ninku: “Mayta mamaykita yuyarichiwanki”, nispa. Chantapis wawasqa, imatachá tatasninku ruwanku, kikinta ruwanku. ¿Noqanchejrí Tatanchej Jehová jina ruwasunmanchu? Payta mana rikuyta atispapis, kʼacha kaykunasninta rikunchej. ¿Imaynasmantá? Ruwasqasninta qhawaspa, Bibliata ukhunchaspa, leesqanchejpi tʼukurispa, astawanqa Churin Jesucristoj yachachisqanpi, ruwasqasninpi ima tʼukurispa (Juan 1:18; Rom. 1:20). Arí, Jehovaj jatun kayninta lliphipichiyta atinchej.
2 Diosqa niraj Adanta, Evata ima ruwashaspa, runas munayninta juntʼayta, pay jina kayta, jatunchayta ima atinankuta yacharqa (Génesis 1:26, 27 leey). Cristianosqa Ruwawajninchejpa kʼacha kaykunasninta rikuchispa, jatun kayninta lliphipichinchej. Chaytataj tukuy ruwayta atinchej, maymanta kaspapis, ima layamanta kaspapis, imayna yachachisqa kaspapis. ¿Imaraykú? Imaraykuchus “Diosqa mana wakillantachu allimpaj qhawan, manachayqa mayqen nacionllamantapis pichá Diosta manchachikoj, cheqa kajtataj ruwaj runatamin Diosqa allin ñawiwan qhawan” (Hech. 10:34, 35).
3. ¿Imaynataj Jehovata sirvispa sientekunchej?
3 Espirituwan ajllasqa cristianosqa, Jehovaj jatun kayninta lliphipichinku. Apóstol Pablo paykunamanta ujnin kaspa, jinata qhelqarqa: “Tukuyninchej qhawashanchej uya qhatarasqa uj espejopi jina, Diospa jatun kaynimpa kʼanchayninta [lliphipichinchej]. [...] Astawan astawan Diospa jatun kaynin noqanchejpi rikuchikunampaj”, nispa (2 Cor. 3:18). Profeta Moisés, Sinaí orqomanta Chunka Kamachiykunawan uraykamojtin, Jehovawan parlasqanrayku uyan lliphipisharqa (Éxo. 34:29, 30). Cristianosrí mana ajinapichu rikukunchej, uyanchejpis mana lliphipinchu. Chaywanpis Jehovamanta, imaynachus kasqanmanta, runaspaj imatachus munasqanmanta ima runasman willaspa, kusiyninchejta rikuchinchej. Ajllasqa cristianos, noqanchej ima, ñaupa tiempopi metalmanta espejos jina, Jehovaj jatun kayninta kausayninchejpi, willayninchejpi ima lliphipichiyta atinchej (2 Cor. 4:1). Sapa uj kayta tapurikuna: “¿Lliphipichishanichu Jehovaj jatun kayninta cristiano jina kausakuspa, willaspa ima?”, nispa.
JEHOVAJ JATUN KAYNINTA LLIPHIPICHIYTA MUNANCHEJ
4, 5. a) ¿Imapitaj Pablo jinallataj rikukunchej? b) ¿Imamantaj jucha chayachiwanchej?
4 Cristianosqa, tukuy ima ruwasqanchejwan Ruwawajninchejta jatunchayta munanchej. Ashkha kutispitaj chayta mana ruwayta atinchejchu. Pablopis ajinallapitaj rikukorqa (Romanos 7:21-25 leey). Imaraykuchus ajinapi rikukusqanchejmanta pay nerqa: “Tukuy runas juchallikusqankurayku, paykunaqa Diospa jatun kaynimpa kʼanchayninta mana taripayta atinkuchu”, nispa (Rom. 3:23). Arí, Adanmanta juchata herenciata japʼisqanchejrayku, juchaj atiyninpi kanchej (Rom. 5:12; 6:12).
5 ¿Imataj jucharí? Diospa kayninwan, kamachiykunasninwan, munayninwan churanakoj imas kanku. Juchaqa, Dioswan masichakusqanchejta mana allinman tukuchin, jatun kayninta lliphipichejtataj mana saqewanchejchu. Imaynatachus flechaj runa, japʼichinanman mana chayachinchu ajinata. Wakin kuteqa yachashaspa juchallikunchej, wakin kutitaj mana reparakuspalla (Núm. 15:27-31). Juchaqa runaspi sumaj saphichasqa kashan, Ruwawajninchejmantataj karunchan (Sal. 51:5; Isa. 59:2; Col. 1:21). Runasqa Jehovamanta karunchasqa kasqankurayku, jatun kayninta mana lliphipichiyta atinkuchu. Chaytaj, runata jucha mana allinman chayachisqanta sutʼita rikuchin.
6. ¿Imaraykutaj juchasapas kaspapis Diosta jatunchayta atinchej?
6 Jehovaqa juchasapas kajtinchejpis, uj “suyakuyta” qowanchej (Rom. 15:13). Juchamanta kacharichinawanchejpajqa, Jesucristota noqanchejrayku wañunanpaj kachamorqa. Wañuyninpi creejtinchejqa, niña kamachejta jina “juchata kasun[chejchu]”, Jehovaj jatun kaynintataj lliphipichiyta atinchej (Rom. 5:19; 6:6; Juan 3:16). Paywan allinta masichakunchej chayqa, allinpaj qhawawanchej, qhepamantaj niña juchasapaschu kasun, wiñaypajtaj kausakusun. Kaypi tʼukurina: Diosqa juchasapa kajtinchejpis, jatun kayninta lliphipichiyta atisqanchejta yachan. ¿Manachu chay may sumaj?
¿IMAYNATÁ DIOSPA JATUN KAYNINTA LLIPHIPICHISUNMAN?
7. ¿Imatataj Diospa jatun kayninta lliphipichinapaj reparakunanchej tiyan?
7 Diospa jatun kayninpa kʼanchayninta lliphipichinapajqa, pantaj runas kasqanchejta reparakuna (2 Cró. 6:36, 37). Imaspichus pantashasqanchejta reparakuspataj, atipanapaj mayta kallpachakuna. Ajinallamanta Diosta jatunchayta atisun. Sutʼincharinapaj, qʼala runasta qhawayman yachaykukusunman chay, ¿imatá ruwananchej tiyan? Ñaupajtaqa yanapata necesitasqanchejta reparakuna, yanapatataj maskʼana (Sant. 5:14, 15). Jehovata jatunchanapajqa, chaytaraj ruwananchej tiyan. Chayrayku Jehovaj kamachisnenqa, kamachiykunasninman jinachus manachus kausakushasqanchejta, sapa kuti qhawarikuna (Pro. 28:18; 1 Cor. 10:12). Diospa jatun kayninta lliphipichiyta munanchej chayqa, imapi pantashajtinchejpis, chayta atipanapaj kallpachakunallapuni.
8. Juchasapas kaspapis, ¿imatá ruwananchej tiyan?
8 Tukuy runasmantaqa, Jesuslla tukuy imapi Tatanta kusicherqa, jatun kaynintataj allinta lliphipicherqa. Noqanchejrí pantanchejpuni, chaywanpis pay jina ruwanapaj tukuy atisqanchejta kallpachakuna (1 Ped. 2:21). Jehovaqa, payta jatunchanapaj kallpachakusqanchejta, ñauparishasqanchejta ima reparan, bendeciwanchejtaj.
9. ¿May jinatapunitaj Biblia Jehovata kusichiyta munaj cristianosta yanapan?
9 Bibliaqa, ñanninchejpaj kʼanchay jina, Diospa jatun kayninta aswan allinta lliphipichinapajtaj yanapawanchej. Chayrayku leerinanchej, chaypi tʼukurinanchej, allinta ukhunchananchej ima tiyan (Sal. 1:1-3). Sapa pʼunchay leerisun chayqa, allin cristianosman tukusun (Santiago1:22-25 leey). Bibliamanta astawan yachakojtinchej, creeyninchej astawan sinchʼiyan. Jatun juchasta qhesachanapaj, Jehovata kusichinapajtaj tanqawanchej (Sal. 119:11, 47, 48).
10. ¿Imaynatataj Jehovamanta mañakuy payta aswan allinta yupaychanapaj yanapawanchej?
10 Chantapis Diospa jatun kayninta lliphipichinapajqa, “mana saykʼuspa Diosmanta mañaku[napuni]” (Rom. 12:12). Arí, munasqanman jina yupaychanapaj yanapata mañakunanchej tiyan. Chantá espíritu santonta, aswan sinchʼi creeyta, juchapi mana urmanapaj kallpata, “cheqa kaj palabrata maychus kajta yachachi[napaj]” yachayta ima, qonawanchejta mañakuna (2 Tim. 2:15; Mat. 6:13; Luc. 11:13; 17:5). Imaynatachus uj yoqallitu tatanpi atienekun, ajinallatataj Tatanchej Jehovapi atienekuna. Payta allinta yupaychanapaj mañakojtinchejqa, yanapanawanchejmanta mana iskayrayanachu. Nitaj mañakusqanchej phiñachinanta yuyanachu. Astawanpis jatunchanapaj, agradecekunapaj, chʼampaykunata atipanapaj yanapanawanchejta ima mana manchachikuspa mañakuna. Sutinta jatunchanapajpis mañakunallataj (Sal. 86:12, 13; Sant. 1:5-7).
11. ¿Imaynatá tantakuykuna Diospa jatun kayninta lliphipichinapaj yanapawanchej?
11 Diosqa, valorniyoj ovejitasninta qhawananpaj “allin kamachi, yuyayniyoj[ta]” churan (Mat. 24:45-47; Sal. 100:3). Chay “allin kamachi[taj]”, Jehovaj jatun kayninta lliphipichinanchejta munan. Tantakuykunaqa, sumaj cristianos kanapaj yanapawanchej, imaynatachus pʼachasta siraj, ima pʼachanchejtapis “allinchan” ajinata allinchawanchej (Heb. 10:24, 25). Chayrayku mana qhepata chayanachu. Qhepata chayayman yachaykukusunman chayqa, Jehovata aswan allinta yupaychanapaj yanapata necesitasqanchejmanta, wakinta mana japʼisunmanchu.
DIOS JINA RUWANA
12. ¿Imaynatá Dios jina ruwasunman?
12 Jehovaj jatun kayninta lliphipichinapajqa, “payta qhawarispa kikinta” ruwana (Efe. 5:1). Chaypajqa yuyasqanman jina yuyana. Yuyasqanchejman jinalla imatapis ruwasunman chayqa, mana jatunchasunmanchu, nitaj noqanchejpaj allinchu kanman. Kay pacha Kuraj Supaypa atiyninpi kasqanrayku, Jehovaj chejnikusqan imasta mayta chejnikuna, munakusqan imastataj mayta munakuna (Sal. 97:10; 1 Juan 5:19). Diosta maychus kajta yupaychanapajqa, tukuy imata jatunchasqa kananpaj jina ruwananchej tiyan (1 Corintios 10:31 leey).
13. ¿Imaraykutaj juchata chejninanchej tiyan, chantá imatataj ruwananchej tiyan?
13 Jehová Diosqa juchata chejninkun, noqanchejpis chejnikunallanchejtaj tiyan. Jinata ruwasunchej chayqa, imapis juchallichinawanchejpaj jina kajmanta, mayta karunchakusun. Diospa contranpi oqharikoyqa jucha, chaymantataj mayta karunchakuna, mana jinata ruwaspaqa Diosta mana jatunchasunmanchu (Deu. 13:6-9). Chayrayku Diospa contranpi oqharikojkunamanta, cristianos kasqankuta nispa Jehovata pisipaj qhawajkunamanta ima, familianchejmanta kajtinkupis karunchakunanchej tiyan (1 Cor. 5:11). Diospa contranpi oqharikojkuna, llajtanpaj sajrata rimajkuna ima, imatachus nisqanku mana cheqachu kasqanta sutʼinchayta munayqa qhasilla. Chantapis qhelqasqaspi, Internetpi, waj imaspiwan, imatachus nisqankuta tumpallatapis yachayta munayqa nipuni allinchu kanman. Imaraykuchus, Jehovawan masichakusqanchejta chinkachinayanman (Isaías 5:20; Mateo 7:6 leey).
14. ¿Jehovaj ima kʼacha kaynintataj astawan rikuchinanchej tiyan, imaraykú?
14 Jehová jina kayta munanchej chayqa, munakuyta rikuchina (1 Juan 4:16-19). Munanakusqanchejqa, Jesuspa discipulosnin, Jehovaj kamachisnin ima kasqanchejta rikuchin (Juan 13:34, 35). Juchasapas kasqanchejrayku wakin kuti, munakuyta mana rikuchiyta atillasunchu, jinapis tukuy imapi munakuyta rikuchinapaj mayta kallpachakunanchej tiyan. Munakuyta, waj kʼacha kaykunata ima rikuchisun chayqa, ni jaykʼaj sajra kajta, nitaj jatun juchastapis ruwasunchu (2 Ped. 1:5-7).
15. ¿Imaynatá munakuy, wajkunawan allinta kausakunapaj yanapawanchej?
15 Munakoyqa, runa masinchejpaj allin kajta ruwanapaj tanqawanchej (Rom. 13:8-10). Qosanchejta chayri warminchejta munakunchej chayqa, ni jaykʼaj wasanchasunchu. Ancianosta munakunchej, ruwasqankutataj jatunpaj qhawanchej chayqa, paykunata kasukusun, nisqankuman jinataj ruwasun. Wawaspis tatasninkuta munakunku chayqa, jatunpaj qhawanqanku, kasukonqanku, nitaj paykunapaj sajrata rimanqankuchu. Chantá runa masinchejta munakunchej chayqa, jatunpaj qhawasun, nitaj runaykachasunchu (Sant. 3:9). Ancianospis Diospa ovejitasninta munakunku chayqa, khuyakuywan paykunata qhawanqanku (Hech. 20:28, 29).
16. ¿Imaynatá munakuyta rikuchiy willayninchejpi yanapawanchej?
16 Runasman willaspapis munakuyta rikuchinanchej tiyan. Jehovata mayta munakusqanchejrayku, runas mana uyariyta munajtinkupis chayri sajrawan kutichiwajtinchejpis, allin willaykunata willallasunpuni. Chantapis Reinomanta aswan allinta willasun, wakichikusuntaj. Jehovata, runa masinchejta ima cheqamanta munakunchej chayqa, kay llankʼayta ni jaykʼaj llasa qʼepita jina qhawasunchu, nitaj tanqasqa jinallachu ruwasun. Astawanqa jatunpaj qhawaspa, kusiywan juntʼasun (Mat. 10:7).
JEHOVATA JATUNCHANALLAPUNI
17. ¿Imatataj Diospa jatun kayninta lliphipichinapaj ruwananchej tiyan?
17 May chhika runasmanta nisqaqa, juchallikuy mana allinchu kasqanta reparanchej. Chayrayku Diospa jatun kayninta lliphipichinapaj, imaspichus pantasqanchejta atipanapajtaj mayta kallpachakuna kasqanta reparanchej. Imaspichus pantasqanchejta reparakoyqa, sonqo yuyayninchejta allinta yachachinapaj yanapawanchej. Ajinamanta mana saqesunchu ima sajra yuyaypis noqanchejpi saphichakunanta (Rom. 7:22, 23). Diosqa, juchaman urmanapaj jina kasqanchejta yachan, chayrayku imapi rikukojtinchejpis cheqa sonqollapuni kanapaj yanapawasun (2 Cor. 12:10).
18, 19. a) ¿Imaynatataj Satanasta, supaykunasninta ima atipasunman? b) ¿Imatataj ruwayta munasunchej?
18 Chantapis Jehovaj jatun kayninta lliphipichinapajqa, Satanasta, supaykunasninta ima atipanapaj kallpachakuna. Chaypajtaj “Diospa qosqan maqanakuna pʼachawan” pʼachallikuna (Efe. 6:11-13). Satanasqa, Dioslla jatunchasqa kanan kajtinpis, jatunchachikuyta munashallanpuni. Chantapis Diosta yupaychayninchejpi, tukuy imaymanamanta miskʼachiyta munashawanchej. Chayrayku uj qhari, uj warmi chayri uj yoqallitu juchasapa kaspapis cheqa sonqollapuni chayqa, Diosta jatunchan, Satanastaj mayta kʼumuykachan. May chhika runas ajinata kʼumuykachachishanchej. Chayrayku janaj pachapi kausajkuna jina, Jehovata jatunchanallapuni, paykuna ninku: “Señor Diosniyku, qanllamin jatunchanapaj jina kanki, may sumajpaj jina qhawana, tukuy atiyniyojtaj, imaraykuchus qanmin tukuy kaj chhikata ruwarqanki; munayniykirayku ruwasqa karqanku, kakushankutaj”, nispa (Apo. 4:11).
19 Ima kajtinpis, Jehovata jatunchallaytapuni munanchej. Payqa, maytachá kusikun may chhika runas pay jina ruwanankupaj, jatun kayninta lliphipichinankupaj ima, mayta kallpachakusqankuta rikuspa (Pro. 27:11). David jina ninanchej tiyan, pay nerqa: “Tata Diosníy, tukuy sonqo graciasta qospa, yupaychasqayki, sutiykitataj jatunchasajpuni wiñaypaj”, nispa (Sal. 86:12, 13). Jehovaj tukuy kamachisnenqa, jatun kayninta allinta lliphipichisun, wiñay wiñayninpajtaj jatunchasun. ¡Chaymá sumaj kanqaqa! ¿Munawajchu Jehovaj jatun kayninta wiñaypaj lliphipichiyta? Jina kajtenqa, kunanmantapacha tukuy ima ruwasqaykipi lliphipichiy.
[Tapuykuna]
[27 paginapi dibujos/fotos]
¿Kay jinasmanta Jehovaj jatun kayninta lliphipichishankichu?
