Leejkunaj tapuyninku

¿Imaraykutaj Biblia nin: “Tata Diospa ñawpaqempeqa payta munakojkunaj wañuyninkoqa may jatumpaj qhawasqa”, nispa?

▪ Jehovaqa, tukuy kamachisninpa kausayninta may jatunpaj qhawan. Chaywanpis Salmo 116:15 versiculopi nisqanqa, mana uj runaj wañuynillanmantachu parlashan.

Chay textotaqa wañusqata pʼampanapaj discursopi wañoj cristianomanta parlakunanpaj, mana oqharikunanchu tiyan, Jehovaman cheqa sonqo wañupojtinpis. ¿Imaraykú? Imaraykuchus salmistaqa, mana uj runallamantachu parlasharqa. Manaqa Jehová tukuy cheqa sonqo kamachisninpa kausayninkuta may valorniyojpaj qhawasqanmanta. Chayraykutaj llajtan chinkachisqa kananta mana saqenmanchu (Sal. 72:14; 116:8 qhawariy).

Arí, Diosqa llajtan chinkachisqa kananta ni jaykʼaj saqenqachu, chaytataj Salmo 116:15 versiculopi sutʼita rikuchin. Kay tiemponchejpi churanakuyta, qhatiykachasqa kayta ima muchunchej. Chaytaj, Jehová llajtanta jarkʼasqanta sutʼita rikuchin.

Jehovaqa Tukuy Atiyniyoj, munaynintataj juntʼanqapuni. Chayrayku llajtan qʼala chinkachisqa kananta mana saqenqachu. Chayta saqenman chayqa, enemigosnin Paymanta aswan atiyniyojpis kankuman jina kanman, chaytaj mana jinachu. Chantapis Jallpʼapi cheqa sonqo runas kausanankuta munasqan, mana juntʼakunmanchu (Isa. 45:18; 55:10, 11). Mana rikukoj templomanta jawa kaj pationpi, nisunman Jallpʼapi niñachá pipis Jehovata yupaychaj, jatunchaj ima kanmanchu. Chantapis “mosoj jallpʼa[...]” nisunman Diosta yupaychaj cheqan runas, kay Jallpʼapi “mosoj cielo[j]” kamachiyninpi mana kankumanchu (Apo. 21:1). Jallpʼapi ni pí runa kanman chayqa, Cristoj Waranqa Watas Kamachiyninpis nillataj kanmanchu (Apo. 20:4, 5).

Chantapis, Jehová llajtanta enemigosnin chinkachinanta saqenman chayqa, kamachiynin, jatunpaj qhawasqa kaynin ima, iskayrayachisqa kanman. Tukuyta Kamachej kasqanpis, may chʼichichasqa kanman. Jehovaqa, pay kikinta, santo sutinta ima jatunpaj qhawasqanrayku, ni jaykʼaj chay kananta saqenqachu. Kaypi tʼukurina: Diosqa “mana jaykʼajpis pantanchu” nisunman cheqan kajtapuni ruwan, chayrayku tukuy cheqa sonqollapuni payta yupaychajkunata jarkʼanqapuni (Deu. 32:4; Gén. 18:25). Bibliapi nin: “Tata Diosqa sutinta jatunchananrayku mana saqesonqachejchu”, nispa (1 Sam. 12:22). Arí, “Tata Diosqa ayllunta mana saqerparenqachu, nitaj wawasnintapis qonqanqachu” (Sal. 94:14).

Diospa llajtan Jallpʼamanta ni jaykʼaj chinkananta yachayqa, ¡mayta sonqochawanchej! Chayrayku, Jehovata munakunallapuni. Nisqanpitaj atienekuna, pay nin: “Mana mayqen arma ruwasqankupis qanta chinkachisunampaj jina kanqachu. Pichus contraykita parlajtaqa juezpa ñawpaqempi chʼinyachillankipuni. Chay imasta noqaqa kamachisniyman qoni, atipanakupis noqamanta llojsenqa”, nispa (Isa. 54:17).

[22 paginapi sutʼinchaynin]

Diosqa llajtan chinkachisqa kananta ni jaykʼaj saqenqachu