Elva Gjerde kausayninmanta willariwanchej

Pasaj 70 wataspi, uj runa wasiykupi visitashawajtiyku tatayta yuyaycharerqa. Chaytaj kausayniyta tijracherqa. Chaymantapacha wajkunapis mayta yanapawarqanku. Astawanpis Dioswan masichakusqayta may valorniyojpaj qhawani. Willarisqaykichej.

NOQAQA 1932 watapi nacekorqani, Sydney (Australia) llajtapi. Tatasneyqa Diospi creespapis, iglesiaman ni rejchu kanku. Noqaqa, Diosta manchachikoj kani, imaraykuchus mamay niwaj: “Diosqa qhawamushasunkipuni, imatapis mana allinta ruwajtiykitaj castigasonqa”, nispa. Jinapis Bibliata leey mayta gustawaj. Semana tukukuytataj, tiyay waturej jamuwaj kayku, Bibliamantataj sumajta cuentariwaj. Chayrayku, ¡mayta suyaj kani!

Sipasllaraj kashajtiy, uj kuraj hermana librosta tatayman jaywasqa. Chay librosta leespa, tʼukulla qhepakorqa, Bibliamanta yachakuytataj qallarerqa. Uj tuta, uj hermanowan yachakushajtin, pakayllamanta uyarishasqayta reparawarqa. Puñoj rinaypaj ujtawan kachanawanpaj jina kashajtin, hermano jinata yuyaycharqa: “¿Manachu Elva noqanchejwan tiyarikullanman?”, nispa. Chay nisqanqa kausayniyta tijracherqa, Jehovawan masichakunaypajtaj yanapawarqa.

Pisi tiemponman, tataywan tantakuykunaman riyta qallarerqayku. Payqa kausayninta tijrachiyta qallarerqa, niñataj ancha phiñachu kaj. Mamaywan, kuray hermanoy Frankwan, Bibliaj yachachiynin tatayta yanapasqanta rikuspa, tantakuykunaman riyta qallarerqanku. * Tawantiyku ñauparispa, bautizakorqayku. Chaymantapacha ashkha machitu hermanoswan masichakuyta qallarerqani, paykunaqa ashkha kutispi mayta yanapawarqanku.

IMATACHUS KAUSAYNIYPI RUWANAYTA AJLLARQANI

Qotuchakuymanta machitu hermanoswan kayqa, mayta gustawaj. Alice Place hermana, familiayman ñaupaj kutirayku Diosmanta willarerqa. Paytaj jatun mamay jina karqa. Pay imaynatachus willanayta yachachiwarqa, bautizakunaykama ñauparinaypajtaj yanapawarqa, 15 watasniyoj kashajtiy bautizakorqani.

Chantapis Percy, Madge (Margaret) Dunham hermanoswan sumajta masichakorqani. Paykunaqa machuyasqa qhariwarmi karqanku. Imatachus kausayniypi ajllanaypajtaj yanapawarqanku. Matemáticas mayta gustawasqanrayku, profesora kayta munarqani. Paykunaqa, 1930 watas  chaynejpi Letonia suyupi misioneros karqanku. Europa suyuspi iskay kaj Guerra Mundial qallarejtintaj, Australia Betelman llankʼaj rerqanku. Chaytaj Sydney llajtaj kantunpi karqa. Iskayninku noqamanta mayta interesakoj kanku. Misionero jina llankʼasqankumanta cuentarispataj, miskʼirichiwaj kanku. Matematicasmanta profesora kanaymantaqa, Bibliamanta yachachiy aswan allin kasqanta reparachiwarqanku. Chayrayku, uj pʼunchay misionera kanayta nikorqani.

Percywan Madgewanqa, wakichikunaypaj precursora kanayta niwarqanku. Chayrayku 1948 watapi, 16 watasniyoj kashajtiy precursora kayta qallarerqani, qotuchakuyniypi 16 jovenesña precursores karqanku. Chaytaj Hurstville (Sydney) llajtapi karqa.

Tawa watasta, tawa llajtaspi willarqani, chaykunataj Nueva Gales del Sur, chantá Queensland japʼiypi karqanku. Bibliamanta yachakuyta munajkunamanta ujnenqa, Betty Law (casarakuspataj Remnant) karqa. Iskay watawan kurajniy, kʼacha ima karqa. Qhepamantaj, precursoras jina Cowra llajtitapi khuska llankʼarqayku. Chaytaj Sydney llajtamanta 230 kilometrospi kashan. Pisi tiempollata khuska llankʼaspapis, amigasllapuni kayku.

Aswan qhepaman, precursora especialta sutichawaspa, Narrandera llajtitaman kachawarqanku. Chaytaj Cowra llajtamanta 220 kilometrospi kashan. Chaypitaj Joy Lennox (casarakuspataj Hunter) mosoj compañeray karqa. Payqa, sumaj precursora karqa, iskay watawantaj kurajniy karqa. Chaypeqa noqallayku Jehovamanta sutʼinchajkuna karqayku. Ray, Esther Irons qhariwarmi, wajyarikuwasqaykurayku wasinkupi puñukoj kayku. Paykuna, tawa wawasninkuwan, Diosmanta yachakuyta munarqanku. Semanapeqa, Ray, qhari wawanwan ovejasta michej kanku, uj haciendapitaj trigota tarpoj kanku. Esthertaj warmi wawasninwan pensionninkuta atiendej kanku. Domingostaqa Joywan, chay familiapaj, tren purinapi llankʼakunapaj ima, aycha kankata ashkhata waykʼoj kayku. Chay runaspis chay wasipi alojakoj kanku. Ajinamanta, alquilerta wakinta juntʼaj kayku. Mesasta llimphuchaytawan, chay familiawan sapa semanapaj wakichikusqan La Atalaya revistata ukhunchaj kayku. Sojtantinku Diosmanta yachakusqankurayku, Narrandera qotuchakuymanta ñaupaj kajkuna karqanku.

Kay 1951 watapi Sydney llajtapi Jehovamanta sutʼinchajkunaj jatun tantakuyninkuman rerqani. Jatun carpa urapi, misioneros kayta munaj precursorespaj uj sumaj tantakuy ruwakorqa, chaypitaj 300 kuraj tantakorqayku. Brooklynpi Betelmanta jamoj Nathan Knorr hermanoqa, Jallpʼaj kʼuchusninkama willay, mayta necesitakusqanta sutʼinchawarqayku. Tukuy, mana chʼirmirispa uyarerqayku. Tiempowantaj chay precursoresmanta ashkhas, Pacífico Sur nisqaj llajtasninpi, waj lugarespiwan ñaupaj kutirayku Reinomanta willayta qallarerqanku. Noqatataj, Australiamanta 17 precursorestawan, Escuela de Galaad, clase 19 nisqaman wajyariwarqayku, chaytaj 1952 watapi karqa. Misionera kayta munasqay, 20 watasniyoj kashajtillayraj juntʼakorqa.

MANAÑA KIKINCHU KANAY KARQA

Escuela de Galaadpi, Bibliamanta astawan yachakorqani, creeyniy kallpachakorqa, niñataj kikinchu karqani. Sipasllaraj kasqayrayku, ni imapi pantayta munajchu kani, wajkunapis kikinta ruwanankuta munaj kani. Wakin ruwaykunaqa, mana allinchu rijchʼawaj. Uj kuti hermano Nathan Knorrta, Betelmanta jovenestawan pelotawan pujllajta rikuspa, tʼukushaj qhepakorqani.

Escuela de Galaadpi yachachejkuna, ashkha yachayniyoj kasqankurayku, imaynachus kasqayta  repararqankuchá. Chayrayku noqamanta llakikuspa, maychus kajllata yuyanaypaj yanapawarqanku. Pisimanta pisi, Jehová munakuyniyoj, agradecekoj Dios kasqanta, atisqanchejman jinalla mañawasqanchejta ima entienderqani. Noqawan yachakojkunamanta wakinpis yanapallawarqankutaj. Uj hermana niwarqa: “Elva, Jehovaqa mana seqʼonawanchu puriykachan. Ama mana atisqaykitaqa ruwayta munaychu”, nispa. Ajina sutʼita niwasqanqa, sonqoymanpuni chayarqa.

Galaadpi yachakuyta tukusqaykutawan, phishqata Namibia (África) suyuman kachawarqayku. Pisi tiemponman tukuyniykumanta 80 runasmanña Bibliamanta yachachisharqayku. Misionera jina llankʼay, chay suyupis mayta gustawaj. Chaywanpis, Galaadpi rejsisqay waynuchuwan sonqoyta suwachikorqani, payqa Suizaman kachasqa karqa. Chayrayku watanman chayman ripuspa, paywan casarakorqani. Chaypeqa iskayniykuña qotuchakuykunata waturerqayku.

MAY LLAKIYPI RIKUKUNI

Phishqa watasta qutuchakuykunata kusiywan waturisqaykumanta, Suizapi Betelman llankʼanaykupaj wajyarisqa karqayku. Chaypeqa ashkha machitu hermanos, unaytaña Diosta yupaychaj hermanos ima karqanku. Paykunawan familia jina kayqa sumaj karqa.

Chaywanpis pisi tiemponman may llakiypi rikukorqani. Qosay noqata, Jehovatapis wasanchawasqaykuta yacharqani, saqerpawarqataj. Chayrayku sonqo pʼakisqa qhepakorqani. Betelmanta machitu hermanos munakuywan mana yanapawankumanchu karqa chay, imanaymanchus karqa. Piwanpis parlayta necesitajtiy uyariwarqanku, wakin kuti sapallay kayta munajtiypis entiendewarqanku. Kʼachamanta sonqochawasqanku, llakiyniyta atipanaypaj mayta yanapawarqa, Jehovamantaj astawan qayllaykuchiwarqa.

Imatachus ñaupajpi machitu hermanos niwasqankuta yuyarikorqani, paykunapis jatun llakiykunapi rikukusqanku. Madge Dunham hermana niwarqa: “Elva, Jehovata yupaychashajtiyki creeyniyki ashkha kutispi pruebaman churasqa kanqa. Chaywanpis sinchʼi llakiykunaqa, mayta munakusqayki runasllamantataj jamonqa. Jinapi rikukojtiyki, Jehovaman astawan chʼipakuy. Mana juchasapa runastachu yupaychashasqaykita amapuni qonqaychu”, nispa. Niwasqanqa, sinchʼi llakiykunapi kashajtiy mayta yanapawarqa. Chayrayku, mana qosay pantasqanraykuchu Jehovamanta karunchakunayta nikorqani.

Qhepamanqa, Autralia suyuman kutiporqani, familiay qayllapi precursora jina llankʼanaypaj. Barcopi viajashajtiy, wakin pasajeroswan Bibliamanta sumajta parlarerqani. Ujnenqa, Noruega suyumanta Arne Gjerde sutiyoj kʼacha runa karqa, willarisqaytaj mayta gustarqa. Aswan qhepaman, Sydney llajtaman visitaj jamuwarqayku. Payqa usqhayta ñauparispa bautizakorqa. Kay 1963 watapitaj paywan casarakorqani. Iskay watanman wawayku Gary nacekorqa.

WAJ JATUN LLAKIYPI RIKUKUNI

Qosaywan wawaywan kusisqa kausakorqayku. Pisi tiemponman qosayqa, machuyasqa tatasniy noqaykuwan tiyakunankupaj, wasiykuta jatunyacherqa. Sojta watastaña casarasqa kasqaykumantataj, waj llakiypi rikukorqayku. Qosay ñojtunpi cancerniyoj kasqanta yacharqayku. Chayrayku  radioterapia nisqawan tratamientopi unayta karqa, noqataj sapa pʼunchay hospitalpi waturej kani. Qallariypeqa sumajllata kutirerqa, chaywanpis sinchʼiyaspa ñojtun sayarparqa. Semanasllataña kausananta niwajtinkupis wapuyarerqa, wasimanpis apakaporqayku, pisimanta pisi kutirikunanpajtaj yanaparqani. Tiempowanqa watejmanta purerqa, anciano jina ruwanasnintataj ruwallarqapuni. Kusisqallapuni kasqan, chancisto kasqan ima mayta yanaparqa, atiendenaypajpis yanapawarqa.

Pisi watasninman 1986 watapi sinchʼiyallarqataj. Chaypajqa tatasniy wañuporqankuña. Chayrayku Sydneymanta kʼachitu Azul orqos nisqaman riporqayku, amigosniykoj qayllankupi kanaykupaj. Qhepamantaj, wawayku Gary, kʼacha hermana Karinwan casarakorqa. Killasninman paykuna niwasqaykurayku, ñaupajta qosaywan tiyakoj kayku chay callemanta aswan jaqaynejman, tawantiyku tiyakoj riporqayku.

Qosay, 18 killasta camallapiña karqa. Atiendenata necesitasqanrayku, astawanqa wasillapi qhepakoj kani. Sapa pʼunchay iskay horata Bibliata, publicacionesta ima ukhunchasqayrayku, llakiyniyta muchunaypaj ashkha yuyaychaykunata tarerqani. Qotuchakuyniykumanta machitu hermanos, visitawaspa mayta kallpachawarqanku, wakenqa noqa jinallataj rikukusqanku. Qosayqa 2003 watamanta abril killapi wañuporqa, payqa kausarinpunanmanta mana iskayrayarqachu.

PIPICHUS ASTAWAN ATIENEKUSQAY

Sipasllaraj kashajtiy, ni imapi pantayta munajchu kani, chaywanpis wakin kutilla munasqanchejman jina imapis llojsisqanta yachakuni. Kausayniypeqa ashkha kutispi kusiypi karqani. Chaywanpis sinchʼi llakiykunapi rikukullarqanitaj. Iskaynin qosasniy saqerpawanku, ujqa wasanchawasqanrayku, ujnintaj onqoyninrayku. Chay llakiy tiempopi, ashkha hermanos yuyaychawarqanku, sonqochawarqankutaj. Chaywanpis Jehovapi astawan atienekorqani, paymin aswan “Machu Runaqa” (Dan. 7:9, 10). Palabranwan imaynachus kasqayta allincharqa, misionera jina llankʼashajtiytaj allin rinawanpaj yanapawarqa. Llakiykunapi rikukojtiytaj sonqochawaspa “almayta kusicherqa” (Sal. 94:18, 19). Familiay, hermanos, astawanpis machitus, munakuywan mayta yanapawarqanku. Sapa uj, noqawan “khuska llakiypi sayaykunampaj” kausaqe karqa (Pro. 17:17).

Kausayniypi tʼukurispa, Jobpa nisqan cheqapuni kasqanta niyman, pay nerqa: “Machu runasqa sumaj yachayniyoj kanku, unayta kawsasqallankutaj paykunaman yachachin”, nispa (Job 12:12). Machitu hermanos yuyaychawasqankuwan, sonqochawasqankuwan ima yanapawarqanku. Paykunawan sumajta masichakusqayqa, ¡ni imawan kikinchakunchu!

Kunanqa 80 watasniyojña kani, chayrayku noqañataj machitu hermana kani. Imaspichus kausayniypi rikukusqay, mitaymanta kajkunata necesitasqankupi yanapanaypaj tanqawan. Paykunata visitarispa yanapariy mayta gustawan. Joveneswan kaspapis mayta kusikuni. Paykunaqa kallpachawanku, kusiyninkutapis chimpachiwanku. Yuyaycharinaypay, yanaparinaypaj ima maskʼawajtinkutaj, kusiywan yanapani.

[Sutʼinchaynin]

[14 paginapi dibujo/foto]

Joy Lennoxwan, Narrandera llajtapi precursoras kashajtiyku

[15 paginapi dibujo/foto]

Elva hermana, Suiza Betelmanta wakin hermanoswan 1960 watapi

[16 paginapi dibujo/foto]

Qosay Arneta atiendeshajtiy