“Qhawakuychej fariseospa levadurankumanta”

Jesús discipulosninman nerqa: “Qhawakuychej fariseospa levadurankumanta. Chayqa puraj uya kayninku”, nispa (Luc. 12:1). ¿Imatá Jesús juchachasharqa? Waj textopi, fariseospa “yachachiyninkumanta” parlashasqanta sutʼinchan (Mat. 16:12).

Bibliapeqa levadura rimayta, runasta imachus sajraman tukuchin chaymanta parlananpaj, wakin kuti oqharikun. Runasqa, fariseospa yachachiyninkuman jina, yuyasqankuman jinataj ruwaspa, sajra kajta ruwaj kanku. Chaywanpis, ¿imaraykutaj yachachiyninku mana allinchu karqa?

1 Ancha cheqan runaspaj qhawakoj kanku, runastapis pisipaj qhawaj kanku.

Jesusqa uj rijchʼanachinanpi, chay jina runas kasqankumanta parlaspa, jinata nerqa: “Fariseo kajqa sayaspa, payllapaj mañakushasqa: Diosníy, graciasta qoyki, imaraykuchus mana wakinkuna jina suwachu, sajrachu, qhenchachu kani, nitaj kay impuestero jinachu kani. Noqaqa semanapi iskay kutita ayunota ruwani, tukuy kapuyniymantataj sapa chunkamanta ujta qoni, nispa. Impuestero runatajrí karullamanta, manchachikuywan mana patallamampis qhawariyta munasqachu. Chaynejta pechollanta takakuspa, nisqa: Diosníy, khuyariway ari noqa juchasapata”, nispa (Luc. 18:11-13).

Impuestero runaqa, llampʼu sonqo karqa, Jesustaj chay runamanta allinta parlaspa nerqa: “Chay impuestero kutipusqa wasinman juchasnin pampachasqa, fariseotajrí mana, imaraykuchus jatunchakojqa kʼumuykachachisqa rikhurenqa, kʼumuykukojtajrí jatunchasqa kanqa”, nispa (Luc. 18:14). Jesusqa, impuesteros sutʼi suwas kasqankuta yacharqa, chaywanpis uyariyta munajkunata yanapayta munarqa. Paykunamantataj, Mateowan Zaqueowan discipulosninman tukorqanku.

Imatapis allinta ruwayta yachaspa, qotuchakuypi ruwaykunasniyoj kaspa, wajkuna imapipis pantasqankutapuni rikuspa ima, runaykachayta qallarisunman. Jina kajtenqa, usqhayllata cheqanchakuna, imajtinchus Biblia nin: “Munakuyniyoj runaqa pacienciayoj, kʼachataj. [...] Mana envidiakunchu, nitaj may kasqanta yuyakunchu, nillataj jatunchakunchu. [...] Mana ruwanchu mana allin kajtaqa, nitaj payllapajchu imatapis maskʼan. Mana usqhayllata phiñakunchu, nitaj yuyarikullampunichu paypa contranta ima sajrata ruwasqankumantapis. [...] Mana kusikunchu mana cheqan kajmantaqa, astawanqa kusikun cheqa kajmanta”, nispa (1 Cor. 13:4-6).

Apóstol Pablo jina yuyananchej tiyan. Payqa, “Cristo Jesús kay pachaman jamorqa juchasapasta salvanampaj” niytawan, “chay juchasapasmantataj noqa aswan kuraj kani” nerqa (1 Tim. 1:15).

Tʼukurinapaj:

¿Reparakunichu juchasapa kasqayta, Jehovaj kʼacha yanapayninraykulla salvasqa kayta atisqaytapis? Chayri Diosta unaytaña yupaychasqayrayku, llajtanpi ruwanasniyoj kasqayrayku, imatapis allinta ruwayta atisqayrayku ima, ¿aswan allin kasqaytachu yuyakuni?

  2 Cheqan runasta jina qhawachikunankupaj tukuy imata ruwaj kanku. Allinpaj qhawachikuyta, sumaj sutiwan rejsisqa kaytataj munaj kanku.

Jesús nerqa: “Paykunaqa tukuy imasta ruwanku allimpaj qhawasqa kayta munaspa. Diosmanta Qhelqasqamanta pisi palabras qhelqasqata frentesninkuman, makisninkuman ima watakunku. Jatuchaj waychʼasniyoj pʼachastataj churakunku. Jatun mikhuykunapipis ñawpajpipuni tiyayta munanku, jinallatataj sinagogaspipis. Plazaspi napaykuchikuyta munanku runaswan: Yachachej Señor, nichikuspa”, nispa (Mat. 23:5-7). Jesusrí mana jinachu karqa, mana juchayoj, Diospa Churintaj kaspapis, llampʼu sonqo karqa. Uj kuti, uj waynuchu “Kʼacha Yachachej Señor” nejtin, jinata kuticherqa: “Imaraykutaj Kʼacha Yachachej niwankiri? Mana pipis kʼachaqa kanchu; Dios sapallan kʼachaqa”, nispa (Mar. 10:18). Waj kutipitaj discipulosninpa chakisninkuta mayllaspa, llampʼu sonqo kanankuta yachacherqa (Juan 13:1-15).

Cheqa cristianoqa, tukuy sonqo hermanosninta yanapan (Gál. 5:13). Qotuchakuyta qhawayta munajqa, ajina kanan tiyan. “Kuraj qhawaj kayta” munayqa mana juchachu, chaywanpis wajkunata yanapayta munaspa chay ruwayta munananku tiyan. “Kuraj qhawaj” kayqa, mana pitapis aswan atiyniyojman tukuchinchu. Paykunaqa, Jesús jina “llampʼu” sonqo kananku tiyan (1 Tim. 3:1, 6; Mat. 11:29).

Tʼukurinapaj:

¿Qotuchakuyta qhawajkunallatachu allinta parlapayani ichapis qotuchakuypi ruwaykunata qonawankuta suyaspa? ¿Diospa llajtanpi allinpaj qhawachinawanpaj jina ruwaykunata japʼinallaypajchu kallpachakuni? ¿Wajkunamanta aswan patapichu kayta munani?

  3 Ashkha kamachiykunata, costumbresta ima rikhuricherqanku, Diospa Leynintataj llasa qʼepiman tukucherqanku.

Moisespa Leyninpeqa, israelitas Jehovata imaynatachus yupaychanankupaj ashkha kamachiykuna karqa. Chaywanpis mana tukuy imitatapunichu sutʼincharqa. Sutʼincharinapaj, Samarikuna pʼunchaypi mana llankʼanankuchu karqa. Chaywanpis imastapunichus ruwanankuta chayri mana ruwanankuta mana sutʼincharqachu (Éxo. 20:10). Fariseostaj Leypi mana allintachu sutʼinchasqanta yuyaspa, kamachiykunata, costumbresta ima paykunalla rikhuricherqanku. Jesusrí Leyman jinapuni ruwarqa, nitaj fariseos kamachiykunata rikhurichisqankuman jinachu (Mat. 5:17, 18; 23:23). Payqa imaraykuchus Dios chay kamachiykunata qosqanta allinta entienderqa, kʼachas, khuyakuyniyoj ima kanankuta munasqantapis. Arí, discipulosnin pantajtinkupis, kʼachallapuni karqa. Sutʼincharinapaj, japʼichisqa kanan chʼisipi, kinsa discipulosninta rijchʼarisqa kanankuta nerqa. Paykunarí kutin kutita puñurparerqanku. Chaypipis Jesusqa paykunawan kʼachallapuni karqa, nerqataj: “Cheqatapuni espiritoqa wakichisqa kashan kasunapaj, aycha cuerpotajrí pisi kallpayoj”, nispa (Mar. 14:34-42).

Tʼukurinapaj:

¿Mana ruway atina kamachiykunatachu rikhurichini, chayman jina ruwanankupajchu wajkunatapis tanqani? ¿Kamachiykunaman jinachu yuyasqayta tukuchini? ¿Wajkuna mana ruway atina imasta ruwanankutachu suyani?

Sapa ujninchej Jesuspa yachachiynin, Fariseospa yachachiyninkuwan mana kikinchu kasqanpi tʼukurina. Imallapipis cheqanchakunayki kajtenqa, kallpachakuy.

[28 paginapi dibujo/foto]

Fariseosqa, Diospa Palabranmanta pisi palabras qhelqasqata cajitaspi watakoj kanku (Mat. 23:2, 5)

[29 paginapi dibujos/fotos]

Ancianosqa, jatunchakoj fariseosmanta nisqaqa llampʼu sonqowan wajkunata sirvinku

[30 paginapi dibujo/foto]

¿Jesús jinachu kʼachas kanchej?