“Tiemposta, watastapis” churaj Diospi atienekuna
“Tiemposta, watastapis” churaj Diospi atienekuna
“Paymin tiemposta, watastapis waj jinaman tukuchin; reyesta churan, chinkachintaj.” (DAN. 2:21.)
¿IMATÁ KUTICHISUNMAN?
¿Imaynamantá Diospa ruwasqasnin, profecías juntʼakusqan ima Jehová Tiempoj Señornin kasqanta rikuchin?
Jehová “tiemposta, watastapis” churaj Dios kasqanta entiendespa, ¿imatá ruwananchej tiyan?
¿Imaraykutaj Jehová, kay pachapi ima kajtinpis chayri runas imata ruwayta munajtinkupis, maykʼajchus munaynin juntʼakunanta nisqanta mana tijrachinchu?
1, 2. ¿Imaynatataj yachanchej Jehová imachus tiempo kasqanta sumajta entiendesqanta?
JEHOVAQA niraj runasta ruwashaspa, tiempota midinapaj kʼanchaykunata ruwarqa. Tawa kaj pʼunchaypi nerqa: “Kʼanchaykuna kachun cielopi, pʼunchayta wajman, tutatataj wajman tʼaqanampaj, jinallataj señal kanampaj tiempospaj, pʼunchaykunapaj, wataspajwan”, nispa (Gén. 1:14, 19, 26). Chayqa, Diospa munaynin karqa, juntʼakorqapunitaj.
2 Yachayniyoj runasrí, imachus tiempo kasqanmanta kunankama chʼajwapi jina kashanku. Uj libropi nin: “Tiempoqa mana sutʼinchay atina kaspa jinan. Imapunichus kasqanta ni pi entiendenchu”. Chaywanpis “cielota ruwaj Tata Diosqa” sumajta entienden, “Paymin kay pachatapis ruwarqa”. Pay nin: “Qallariymantapacha qhepaman imaschus kananmanta willani. Noqaqa unaymantapacha willani, manaraj imapis kashajtin”, nispa (Isa. 45:18; 46:10). Kunanqa Diospa wakin ruwasqasninmanta, juntʼakusqan profeciasmanta ima parlarisun. Chaytaj Tiempoj Señornin Jehovapi, Palabranpi ima atienekusqanchejta kallpachanqa.
RUWASQA KAJ IMAS, TIEMPOJ SEÑORNINPI ATIENEKUNAPAJ YANAPAWANCHEJ
3. ¿Imaynataj tukuy imapis ruwasqa kashanku? Wakinmanta parlariy
3 Cielopi, Jallpʼapi ima, juchʼuy imitas tiyan, chaykunataj imapajchus ruwasqa kasqankuman jina maychus tiemponpi ruwanankuta juntʼanku. Jatuchaj imaspis kallantaj, chaykunapis tiempollanpitaj ruwanankuta juntʼanku. Chaytaj, tukuy imapis uj relojniyoj jina kasqanta rikuchin. Sutʼincharinapaj, janaj pachapi planetas, chʼaskas ima, maynintachus rinankutapuni rinku. Maypipunichus kashasqanku sutʼi yachakusqan, runasta ima tiempopichus kashasqankuta yachanankupaj, viajaspa maynintachus rinankupaj ima yanapan. Chay tukuy imasta Ruwajta, “atiynimpis chay jinapuni kasqanrayku” jatunchananchej tiyan (Isaías 40:26 leey).
4. ¿Imaynamantá tukuy laya kausajkuna relojniyojpis kankuman jina kasqanku, Jehová yachayniyoj kasqanta rikuchin?
4 Tukuy laya kausajkuna, nisunman sachʼas, animales ima relojniyojpis kankuman jina, tukuy imata tiemponpi ruwanku. Ashkha pʼisqosqa maykʼajchus wajnejman ripunankuta allinta yachanku (Jer. 8:7). Noqanchejpis ukhunchejpi relojniyoj jina kanchej. Cuerponchejqa pʼunchaychus chayri tutachus kasqanta willawanchej. Chayrayku avionpi waj suyuman viajajtinchejqa, maypichus mana kikin horachu, cuerponchej ashkha pʼunchaykunapiraj chay horaman yachaykukun. Arí, Jehovaqa “tiemposta, watastapis” churaj Dios. Chantapis may atiyniyoj, yachayniyojtaj, chaytaj ruwasqasninpi sutʼi rikukun (Salmo 104:24 leey). Chayrayku, Tiempoj Señorninpa munaynin juntʼakunanmanta, mana iskayrayanchejchu.
PROFECÍAS TIEMPONPI JUNTʼAKUSQAN DIOSPI ATIENEKUNAPAJ TANQAWANCHEJ
5. a) ¿Imaynallamantataj imachus runaspaj qhepaman kananta yachasunman? b) ¿Imaraykutaj imachus qhepaman, maykʼajtajchus kananta Jehová niyta atin?
5 Diospa ruwasqasnenqa, “mana rikukoj” imasninmanta mayta yachachiwanchej. Chaywanpis, ¿imataj runaspaj aswan qhepaman kanqa? (Rom. 1:20.) Chayta kutichinapajqa, Palabranpi Dios sutʼinchasqanta ukhunchana kanqa. Chaypeqa ashkha profecías tiemponpi juntʼakusqanta willawanchej. ¿Imaraykutaj Jehová imachus qhepaman kananta niyta atin? Imachus qhepaman kananta sutʼita yachasqanrayku. Chantapis munayninman jina, maykʼajchus ruwakunanta nisqanman jinataj juntʼachiyta atin.
6. ¿Imaynatá Bibliaj profeciasnin juntʼakusqanta entiendenanchejta Jehová munasqanta yachanchej?
6 Jehovaqa, kamachisnin Bibliaj profeciasninta entiendenankuta, chaywantaj yanapachikunankuta munan. Chayrayku Payqa, tiempota allinta entiendespapis, maykʼajchus imapis kananta willaspa, entiendenanchejpaj jinalla sutʼinchan (Salmo 90:4 leey). Apocalipsis libropeqa, “tawa angeles[man]ta” parlan “pikunachus chay horapaj, chay pʼunchaypaj, chay killapaj, chay watapaj wakichisqa” kashanku, runastaj chay rimaykunata allinta entiendenchej (Apo. 9:14, 15). Wakin profeciasqa, Jehovaj nisqan tiempopipuni juntʼakorqa. Chaytaj “tiemposta, watastapis” churaj Diospi, Palabranpi ima atienekunapaj yanapawanchej. Wakinta qhawarina.
7. Jerusalenmanta, Judamanta ima Jeremiaspa profecían juntʼakusqan, ¿imaynamantá Jehová Tiempoj Señornin kasqanta rikuchin?
7 Yaqha 2700 watas ñaupajta, “Josiaspa churin Joacim tawa watastaña Judapi kamachishajtin, Tata Diosqa Jeremiasman parlaspa, willarqa Judá aylluman imachus jamunanta” (Jer. 25:1). Tiempoj Señornenqa, Jerusalén thuñisqa kananta, judiostaj Babiloniaman apasqa kanankuta nerqa. Chaypitaj “qanchis chunka watas juntʼata Babiloniamanta reypa makimpi” kananku karqa. Babiloniamanta soldadosqa 607 watapi Jesús niraj jamushajtin (J.n.j.) Jerusalenta thuñerqanku, judiospis Babiloniaman apasqa karqanku. ¿Imataj kanman karqa 70 watas juntʼakojtin? Jehovaqa, Jeremiasnejta nerqa: “Noqa Tata Dios nillanitaj: Qanchis chunka watas Babiloniapi juntʼakojtinkama, noqa qankunaman kutikusaj, juntʼasajtaj, kay cheqaman qankunata kutichimunayta nerqani, chay allin nisqayta”, nispa (Jer. 25:11, 12; 29:10). Chay profeciataj 537 watapipuni (J.n.j.) juntʼakorqa, medoswan persaswan, judiosta Babiloniamanta kacharichisqankutawan.
8, 9. ¿Imaynatá Danielpa profeciasnin, Jehová “tiemposta, watastapis” churaj Dios kasqanta rikuchin?
8 Judíos, Babiloniamanta llojsinankupaj iskay wata faltashajtin, Diosqa waj profeciata Danielnejta willarqa. Jerusalén llajta watejmanta ruwakunanpaj kamachikusqanmanta 483 watasninman, Mesías rikhurinan karqa. Medopersiamanta reyqa, 455 watapi (J.n.j.) chayta kamacherqa. Chaymanta 483 watasninman, 29 watapi Nazaretmanta Jesús espíritu santowan ajllasqa kaspa, Mesiasman tukorqa (Neh. 2:1, 4-8; Dan. 9:24, 25; Luc. 3:1, 2, 21, 22). *
9 Diospa Reinonmanta profeciastañataj ukhuncharina. Bibliapeqa, Cristo 1914 watapi kamachiyta qallarinanta nikorqa. Jesuspa kutimuyninmanta “ima señal[chus]” kananta nikushajtin, Satanás janaj pachamanta wijchʼumusqa kajtin, Jallpʼapi ima ñakʼariykunachus kananta willakorqa (Mat. 24:3-14; Apo. 12:9, 12). Waj profeciaspitaj, 1914 watapi “mana judío kajkuna[j] pʼunchayninku juntʼakunan[ta]” willakorqa. Diospa Reinontajrí janaj pachapi sayachisqa kanan karqa (Luc. 21:24; Dan. 4:10-17). *
10. ¿Imastaj qhepaman maychus tiemponpi juntʼakonqa?
10 ¿Imataj qhepaman kanqa? Jesusqa “manchay ñakʼariy” tiempo jamunanta nerqa. Chantataj Waranqa Watas Kamachiynin qallarenqa. Chay profecías maychus tiemponpi juntʼakunanmanta mana iskayrayanchejchu. Kayta yuyarikuna: Jehovaqa Jesús Jallpʼapi kashajtin, “ima pʼunchaychus, ima horachus” chaykuna kananta nisqaña (Mat. 24:21, 36; Apo. 20:6).
“TIEMPO KASHAJTILLANRAJ, ALLIN KAJTA” RUWANA
11. ¿Imatá tukukuy pʼunchaykunapiña kausashasqanchejta yachaspa ruwananchej tiyan?
11 Diospa Reinon kamachishasqantaña, “tukukuy” pʼunchaykunapiñataj kausashasqanchejta yachaspa, ¿imatá ruwananchej tiyan? (Dan. 12:4.) Ashkha runas, kay pacha mana allinman tukushasqanta ninku. Jinapis tukukuy pʼunchaykunapi chaykuna kananta, Biblia unayña willasqanta mana reparankuchu. Wakintaj kay pachapi chʼampaykuna niña allinchakunanta yuyanku, wajkunataj runas imaynamantapis allin kausayta apamunankuta suyanku (1 Tes. 5:3). ¿Noqanchejrí imatá yuyanchej? Satanaspa sajra pachan tukukunanpaj pisi tiempollaña kasqanta entiendenchej chayqa, “tiemposta, watastapis” churaj Diosta sirvinapaj, runasman paymanta yachachinapaj ima mayta kallpachakusun (2 Tim. 3:1). Tiemponchejtapis sapa uj sumajta apaykachasun (Efesios 5:15-17 leey).
12. ¿Imatataj Jesús, Noej tiemponmanta nisqan yachachiwanchej?
12 Kay pachapeqa waj imaspi yuyanapaj tukuy ima tiyan. Chayrayku “tiempo kashajtillanraj, allin kajta” ruwayqa mana atikullanchu. Jesús nerqaña: “Imaynachus Noepa tiempompi karqa, ajinallataj Runaj Churimpa kutimuynimpis kanqa”, nispa. ¿Imaynataj Noej tiemponpi karqa? Chay tiempo tukukunanta, sajra runas Jatun Parapi wañuranankuta ima ñaupajmantaña nikorqa. Noeqa, “cheqan kajta willaj” runa karqa, tiemponpi runasmantaj Diosmanta willarqa (Mat. 24:37; 2 Ped. 2:5). “Runas[tajrí] mikhusharqanku, ujyasharqanku, casarakusharqanku, ususisninkutapis casarachisharqanku [...]. Mana imatapis reparakorqankuchu jatun para jamunankama, tukuyninkutaj chinkachisqa karqanku”. Chayrayku Jesús yuyaycharqa: “Wakichisqa kaychej, imaraykuchus mana yuyasqaykichej horapi Runaj Churenqa kutimonqa”, nispa (Mat. 24:38, 39, 44). Noqanchejqa Noé jina ruwananchej tiyan, nitaj chay tiempomanta runas jinaqa. ¿Imataj wakichisqa kanapaj yanapawasun?
13, 14. Runaj Churin jamunanta suyashaspa, ¿imatataj cheqa sonqollapuni kanapaj Jehovamanta yuyarikunanchej tiyan?
13 Runaj Churin mana suyasqanchej pʼunchayta jamunan kajtinpis, Jehová Tiempoj Señornin kasqanta ama qonqakunachu. Kay pachapi ima kajtinpis, runas imata ruwayta munajtinkupis, Jehovaqa munaynin juntʼakunanpaj maykʼajchus imapis kananta, imapichus tukukunanta ima niyta atin (Daniel 2:21 leey). Proverbios 21:1 nin: “Reypa sonqon Tata Diospa makimpeqa purej yaku jina, imaraykuchus Tata Diosqa maynintachus munasqanman jina pusan”, nispa.
14 Arí, Jehovaqa nisqan tiempopi munaynin juntʼakunanpaj imatapis ruwayta atin. Kay pachapi jatuchaj ruwaykunaqa, profecías juntʼakunanpaj yanapan, astawanpis Diospa Reinonmanta allin willaykunata Jallpʼantinpi willakusqan. Unión Soviética nisqa chinkasqanpi, imapichus tukusqanpi ima tʼukurina. Runasqa, chaymanta qhepaman, gobiernospi tukuy ima pisi tiempollapi tijrakunanta mana yuyarqankuchu. Ajinata tijrakusqanrayku, ñaupajta mana willajta saqejchu kanku chay lugarespi, ni jaykʼaj jina mayta willakushan. Chayrayku tukuyninchej, “tiemposta, watastapis” churaj Diosta sirvinapaj, tiemponchejta churana.
JEHOVÁ TIEMPONPI IMATAPIS RUWASQANPI ATIENEKUNA
15. ¿Imaynatataj Diospa llajtanpi imapis tijrakojtin Paypi atienekusqanchejta rikuchinchej?
15 Qhepa pʼunchaykunapi Reinomanta willanallapajpuni, Jehová munayninta maychus tiemponpi juntʼananmanta mana iskayrayanachu. Kay pachapi tukuy imapis tijrakushasqanrayku, ichapis waj jinasmantañataj willana, yachachina ima kanqa. Diospa llajtanqa wakin kuti, aswan allinmanta willanapaj ichá imatapis tijrachenqa. ¿Imaynamantá “tiemposta, watastapis” churaj Diospi atienekusqanchejta rikuchisun? Chay tijrachikusqanman jina ruwaspa, Churinmantaj cheqa sonqo kaspa, pichus qotuchakuypa “uman” (Efe. 5:23).
16. ¿Imaraykutaj Jehová “yanapayninta[...] tiempo[n]pi” qonawanchejpi atienekunchej?
16 Jehovaqa, ima ratollapis paymanta mañakunanchejta munan, “yanapayninta[...] tiempo[n]pi” qonawanchejpi atienekuspa (Heb. 4:16). Chaytaj mayta munakuwasqanchejta, sapa ujmanta llakikusqanta ima rikuchin (Mat. 6:8; 10:29-31). Diospa yanapayninta sapa kuti mañakuspa, chayman jina ruwaspa, yuyaychawasqanchejman jina ruwaspa ima, creeyninchejta rikuchina. Hermanosninchejpaj mañapuytapis amapuni qonqanachu.
17, 18. a) ¿Imatá Jehová tumpamantawan enemigosninwan ruwanqa? b) ¿Imatataj ama qonqanachu?
17 Mana iskayrayana tiempochu “manapis cree[su]nmanchu jina”, manaqa sumaj sayasqa creeyniyoj kana tiempo (Rom. 4:20). Diospa enemigosnenqa, —Satanás, atiyninpi kajkuna ima— Jesús kamachiwasqanchej ruwayta sayachiyta munanku (Mat. 28:19, 20). Kuraj Supay churanakuwajtinchejpis, “kawsaj Diospi [atienekunchej], pichus tukuy runasta salvayta munan, pitajchus creejkunata salvan”. Payqa “cheqan kajman jina kawsajkunata ñakʼariymantapis librayta yachan” (1 Tim. 4:10; 2 Ped. 2:9).
18 Jehovaqa, tumpamantawan kay sajra pachata tukuchenqa. Cristoqa, Diospa enemigosninta chinkachenqa, Jehovaj kamachiynintaj jatunchasqa kanqa. Maykʼajchus, imaynatajchus kananta mana yachanchejchu. Chaywanpis tiemponpi juntʼakunanta yachanchej. Chayrayku ima “tiempos[pichus], watas[pichus]” kausashasqanchejta ama qonqanachu. Amataj wakin runas jinaqa ninachu: “Qallariypi jina imaynachus karqa, pachallampuni kakushan”, nispa (1 Tes. 5:1; 2 Ped. 3:3, 4).
SUYAKUNALLAPUNI
19, 20. ¿Imaraykutaj “Diosnillaypi suyakusaj” ninanchej tiyan?
19 Diosqa runasta ruwaytawan, paymanta, ruwasqasninmanta ima yachakunankupaj, wiñay kausayta qoyta munarqa. Eclesiastés 3:11 Jehovamanta nin: “Diosqa tukuy imata tiempompi kʼachituta ruwarqa. Payllataj runaj sonqonman wiñay kasqanta churarqa; chaywampis runaqa manapuni yachayta atinchu imatachus Dios qallariymantapacha ruwasqanta kunankama”, nispa.
20 Jehová imatachus runaspaj munasqanqa ni jaykʼaj tijrakunchu, chaytaj mayta kusichiwanchej (Mal. 3:6). “Manataj paypi ima llanthullapis kuyurej kanchu” (Sant. 1:17, Qheshwa Biblia). Llanthoqa, Jallpʼa muyusqanrayku, ni ujnejllapichu qhepakun, chaywanpis Jehovaqa tiempo pasajtinpis kikillanpuni, payqa “wiñay” Rey (1 Tim. 1:17). Chayrayku, jinata nina tiyan: “Salvawajniy Diosnillaypi suyakusaj”, nispa (Miq. 7:7). Salmo 31:24 nisqanta kasukuna, chaypi nin: “Sonqochakuychej kallpachakuychejtaj, Tata Diospi tukuy suyakojkuna”, nispa.
[Sutʼinchaykunasnin]
[Tapuykuna]
[19 paginapi dibujo/foto]
Danielqa, Diospa profeciasnin juntʼakunanpi creerqa
[21 paginapi dibujo/foto]
Jehovaj munayninta ruwanaykipaj, ¿allintachu tiempoykita apaykachashanki?
