Olivier Randriamora kausayninmanta willariwanchej

“Yachani wajcha jina imaynachus kawsakuyta, [...] chhika patapi kawsakuytapis. Yachasqa kani sajsasqa kaypi, chayri yarqhasqa kaypipis, [...] ashkha kapuyniyoj kaypi, pisichikuypipis. Imallapipis tarikuspa, atipayta atisajpuni, kallpachawajniy [Dios kasqanrayku]” (Fili. 4:12, 13).

AJINATA Pablo qhelqasqanqa noqata, warmiy Olyta ima, Madagascar suyupi willasqaykupi mayta kallpachawarqayku. Apóstol Pablo jina, kusisqa kausakunaykupaj, imallapipis rikukuspa Jehovapipuni tukuy sonqo atienekunaykuta yachakorqayku.

Kay 1982 watapi, Olyj maman Jehovamanta sutʼinchajkunawan Bibliamanta yachakuyta qallarerqa. Noqapis chay watallapitaj yachakuyta qallarerqani, Olytaj aswan qhepaman, paywanqa casarakunaypaj parlarqaniña. Kay 1983 watapi casarakorqayku, 1985 watapitaj bautizakorqayku, precursores auxiliares jinataj llankʼayta qallarerqayku. Chantá 1986 watapi, julio killapi precursores regulares jina llankʼayta qallarerqayku.

Kay 1987 watapi, septiembre killapi precursores especiales jina sutichasqa karqayku. Madagascarpa ujnin juchʼuy llajtitanmantaj rerqayku, maypichus qotuchakuykuna mana karqachu. Madagascar suyupeqa 18 ayllus, ashkha juchʼuy ayllus ima tiyan, tukuy laya costumbresniyojtaj kanku. Ashkha parlaykunata parlajtinkupis, Malgache qalluta astawanqa parlanku. Rinaykuman chayaspaqa, parlayninkuta yachakuyta qallarerqayku, ajinamanta runas astawan uyariwarqayku.

Qallariypeqa, sapa domingo noqa umallirichej kani, tukojtiytaj warmillay tʼajllarikoj. Imaraykuchus paylla chaypi kaj. Diosmanta Parlayta Yachanapaj tantakuytapis ruwallajtaj kayku, warmiytaj wajwanpis parlashanman jina sapallan rikuchiykunata ruwaj. Chaywanpis qotuchakuykuna waturej hermano, tantakuykunata uj jinamanta ruwanaykuta niwarqayku. Chaytaj mayta kusichiwarqayku.

Cartasqa wakin kuti mana chayamojchu, chayrayku sapa killa qolqeta yanapata jina japʼisqaykoqa mana chayamojchu. Jinapis pisillawan kausakuyta yachakorqayku. Uj kuteqa, iskay pʼunchaypaj jatun tantakuyman 130 kilometrosta jina viajanayku karqa, qolqeykutaj rinaykupaj mana alcanzawarqaykuchu. Chay kutipi, uj hermano yuyaychawasqaykuta yuyarikorqayku, pay niwarqayku: “Ima chʼampaypi kaspapis Jehovaman willakuychej. Imaraykuchus paypaj llankʼashankichej”, nispa. Chayrayku Diosmanta mañakuytawan, chakipi rinaykuta nerqayku. Niraj puririshajtiykutaj, uj hermano waturej jamuwarqayku, qolqesitutataj regalawarqayku. Chaytaj pasajeykupaj cabal karqa.

 QOTUCHAKUYKUNATA WATURIYKU

Febrero 1991 watapi qotuchakuykunata waturej jina sutichasqa karqani. Chay kutipajqa, juchʼuy qotuykupi jisqʼon willajkunaña karqa, kinsataj bautizasqa karqanku. Tantakuykunamanpis, 50 runas jina jamoj kanku. Sumaj wakichisqa kasqaykutawanqa, capitalnin Antananarivo llajtaman qotuchakuykunata waturinaykupaj kachasqa karqayku. Kay 1993 watapi, waj lugarpiñataj qotuchakuykunata waturerqayku. Chaypi kausaytaj, mana llajtapi jinachu karqa.

Qotuchakuykunata, karupi juchʼuy qotusta ima waturinaykupajqa, 145 kilometrosta jina monte ukhunta chakipi rinayku karqa. Qʼepiykupeqa, necesitasqallaykuta apakoj kayku, peliculata jina fotosta rikuchispa umallirichinay kajtillan, aswan llasata apaj kayku, chay tiempopi ajinata ruwakusqanrayku. Chay kutisqa, warmiy rikuchinapaj aparatota qʼepej, noqataj autoj baterianta qʼepej kani.

Uj qotuchakuymanta, waj qotuchakuymanqa, 40 kilometrosta jina sapa pʼunchay lomanta, mayunta, tʼuru tʼurunta ima rej kayku. Wakin kuteqa ñan kantupi puñoj kayku, chaywanpis uj ranchituta alojakunaykupaj maskʼaj kayku. Wakin kuti, mana rejsisqa runaswan wasinkupi wajyachikoj kayku. Alojamientota tariytawanqa, chʼisinpi mikhunaykupaj waykʼoj kayku. Olyqa, mankata mañakuspa, uj mayumanta chayri qayllapi kaj qochaman rej. Chaykamataj, hachawan llantʼata kʼutoj kani. Chayta ruwayqa tiempopaj karqa. Maypi jinalla uj wallpata rantikoj kayku, noqaykutaj wañuchispa pelarqoj kayku.

Mikhuykuytawanqa mayllakunaykupaj yakuta maskʼaj kayku, ashkha kutispitaj cocinapi puñoj kayku. Parajtintaj, para mana chʼaqaykunawaykupaj, perqaman atiykukuspa puñoj kayku.

Wajyarikuwaj kayku chay runasman, Diosmanta willarejpuni kayku. Rinaykuman chayajtiykutaj, hermanosqa kʼachas kaj kanku, wasinkupitaj sumajta japʼikuwaj kayku. Waturisqaykumanta may agradecesqa kashasqankuta rikuspataj, ñanpi imaspichus rikukusqaykuta qonqapoj kayku.

Hermanospa wasinkupi qhepakuspaqa, ruwanasninkupi yanapariy gustawaj kayku. Ajinamanta, noqaykuwan willayman rinankupaj tiempoyoj kaj kanku. Mana suyajchu kayku sumajta mikhuchinawaykuta, sumaj imastataj qonawaykutaqa. Hermanosqa, chayta mana ruwayta atinkumanchu karqa.

KARUPI JUCHʼUY QOTUSTA WATURIYKU

Karupi juchʼuy qotusta watureyqa may kusiy kaj. Hermanosqa ashkha ruwanasta suyachiwaj kayku. Samarinaykupajpis mana tiempo kajchu (Mar. 6:31). Uj kuteqa, qhariwarmi hermanos 40 runasman Bibliamanta yachachisharqanku chaykunata, noqaykuwan yachakunankupaj wasinkuman wajyarisqanku. Olywan hermanawanqa, 20 runasman jina yachacherqanku. Noqawan hermanowantaj, 20 runasman jinallataj. Uj runaman yachachiyta tukusqaykutawan, wajmanñataj yachachiyta qallarerqayku. Tardenpi tumpata sayarispataj, tantakuykunata ruwarqayku, chantá runasman yachachillarqaykupuni. Tutakamataj chayta ruwarqayku.

 Uj kuteqa, karupi juchʼuy qotuta waturishajtiyku, tukuy hermanoswan qaylla ranchituman willaj rerqayku. Pusaj horata jina paqarinpi maukʼa pʼachasniyoj llojserqayku, imaraykuchus montenta karuta rinayku karqa. Khuskan pʼunchaytataj chayman chayarqayku, llimphu pʼachata churaykukuspataj wasimanta wasi willayta qallarerqayku. Chay rancho juchʼuylla kasqanrayku, noqaykutaj ashkha kasqaykurayku, khuskan horallapi tukurparqayku. Chaymanta, waj ranchitumanñataj rerqayku, chaypi willaytawantaj chay chhika karuta kutinpullarqaykutaj. Qallariypeqa, mana sonqo juntʼasqachu kasharqayku, imaraykuchus uj horallata willanaykupaj chhika unayta purerqayku, maytataj kallpachakorqayku. Chaywanpis hermanosqa mana quejakorqankuchu, kusisqallapunitaj kasharqanku.

Taviranambo llajtapeqa, loma punta qayllapi juchʼuy qotu karqa. Chayman chayasqaykutawanqa, uj cuartollayoj wasita tarerqayku, chaypitaj uj familia tiyakusqa, paykunataj hermanosninchej kasqanku. Wasinku ladopitaj juchʼuy wasi kasqa, chaypi tantakuykunata ruwaj kasqanku. Chayllapi wasiyoj hermano: “¡Hermanos!”, nispa qhaparerqa. Qayllallapi kaj lomamantataj waj hermano: “¡Imataj!”, nispa kutichimorqa. Paytaj: “¡Qotuchakuykunata waturej hermano chayamun!”, nispa nerqa. “¡Yau!”, nispataj kutichimorqa. Aswan karupi tiyakojkunamanpis jinallatatajsina willarqanku, tumpamantawantaj chamuyta qallarerqanku. Tantakuy qallarinanpajtaj 100 runas jina kasharqanku.

VIAJASPA TUKUY IMAPI RIKUKORQAYKU

Kay 1996 watapi, Antananarivo llajta qayllamanñataj qotuchakuykunata waturinaykupaj kachasqa karqayku, chaypipis ashkha imaspi rikukorqayku. Uj pʼunchayqa, Antananarivo llajtamanta 240 kilometrospi jina, Besakay llajtitapi juchʼuy qotuta waturinayku karqa. Chaymanqa auto mana sinchʼita rejchu. Juchʼuy camión chayman rishasqanta yachaspataj, choferwan parlarispa chay automan wicharerqayku. Chaypeqa 30 pasajeros jina kasqa, wakin carrocería patapi winkusqas, wakintaj qhepamanta japʼikuspa rishasqanku.

Sapa kuti jina, chay camionpis khuskan ñanpi fregarparikorqa. Chayrayku ashkha horasta chakipi rinayku karqa. Rishajtiykutaj jatun camión rikhurimorqa, mayqenchus pasajeroswan, qʼepiswan ima juntʼa kasqa. Jinapis choferqa sayarqa, sayasqa rinayku kajtinpis wicharerqayku. Uj mayuman chayaspataj, puenteta allinchashasqankurayku  watejmanta purinayku karqa. Jinapitaj uj juchʼuy llajtitaman chayarqayku, maypichus precursores especiales karqanku. Paykunata mana waturinayku kajtinpis, puenteta allinchanankukama, waj auto rikhurimunankama ima paykunawan willaspa qhepakorqayku.

Semanamanta waj auto pasajtin, chaypi rillarqaykupuni. Ñan tʼoqo tʼoqolla kasqanrayku, sapa rato autota tanqanaykupaj chaki moqosniykukama yakuman yaykunayku karqa. Ashkha kutispi miskʼaspa urmarqayku. Sutʼiyayta uj ranchitoman chayaspataj, uraqaporqayku. Auto ñanta wistʼuykuspa, arroz chajra chaupita chakipi rerqayku, qonchu yakutaj cinturaykukama chayawarqayku.

Chay lugarpi chay kutillaraj kashasqaykurayku, wakin tarpojkunaman Diosmanta willarerqayku. Jehovamanta sutʼinchajkunaj wasinkuman imaynatachus chayanaykuta tapurerqayku. Paykunalla hermanos kasqankuta yachaspataj, mayta kusikorqayku.

WAJKUNATA PRECURSORES KANANKUPAJ YANAPAYKU

Chay wataspi, wajkunata precursores kanankupaj yanapasqaykumanta mayta kusikuyku. Uj kuteqa, jisqʼon precursores regularesniyoj qotuchakuyta waturerqayku. Sapa ujninkuta, uj willajllatapis precursor kananpaj yanapanankuta nerqayku. Sojta killanman kutejtiykutaj, 22 precursoresmanña chayasqanku. Iskay precursorasqa, tatasninkuta precursores kanankupaj yanapasqanku, pikunachus ancianos karqanku. Paykunataj waj ancianota precursor kananpaj yanapallasqankutaj. Chay ancianotaj pisi tiemponman precursor especial karqa. Aswan qhepamantaj, warminwan khuska qotuchakuykunata waturiyta qallarerqa. Chay iskay ancianosmanta ujnenqa, qotuchakuykunata waturej jina llankʼashan, ujnintaj Tantakunapaj Wasista ruwaypi yanapakushan.

Sapa pʼunchay Jehovaman mayta agradecekuyku, imaraykuchus mana yanapayninwanqa, mana imatapis ruwayta atiykumanchu karqa. Wakin kuti saykʼusqa chayri onqosqa kajtiykupis, willayniykupi imastachus ruwasqaykuta yuyarikuspa, mayta kusikuyku. Jehová Dioslla chay llankʼayta ñauparichiyta atin. Chay llankʼaypi tumpallatapis yanapakusqaykumanta mayta kusikuyku, kunantaj precursores especiales jina yanapakushayku. Arí, kusisqa kausakunapajqa, imallapipis rikukuspa Jehovapipuni tukuy sonqo atienekunata yachakuyku, imaraykuchus paylla atiyta qowanchej.

[6 paginapi sutʼinchaynin]

Kusisqa kausakunapajqa, imallapipis rikukuspa Jehovapipuni tukuy sonqo atienekunata yachakuyku

[4 paginapi mapa, dibujos/fotos]

Madagascar llajtata puka jallpʼa kasqanrayku, Gran Isla Roja nispa sutichanku, Jallpʼantinmantataj tawa kaj aswan jatun churu, chayllapitaj wakin laya animales tiyan

[5 paginapi dibujo/foto]

Viajaspa tukuy imapi rikukorqayku

[5 paginapi dibujos/fotos]

Bibliamanta yachachiy mayta gustawayku