Kʼacha kayqa sinchʼi llakiyta thasnun

PAÍSES BAJOS suyumanta Georgewan, Manonwan uj machuyasqa warmiman allin willaykunata willarej qayllaykusqanku, paytaj phiñasqa kutichisqa. Chay warmejtaqa iskaynin qosasnin, uj wawan ima wañupusqanku, paytaj sinchʼi tullu onqoywan kashasqa. Paywan parlarishajtinku sonqonta tiyaykuchispapis, nipuni kʼachamantachu kutichisqa.

Georgeqa, warminta chay señoraman tʼikasta apapunankuta nisqa, imaraykuchus sapallan, may llakisqa kasqantataj reparasqa. Tʼikasta apapojtinkutaj doña Rieqa, tʼukushaj qhepakusqa. Chaywanpis mana tiempoyoj kasqanrayku, waj kutipaj quedasqanku. Georgewan, Manonwan chay pʼunchaypaj kutejtinkutaj, mana taripasqankuchu. Waj kutispipis nipuni taripasqankuchu, pakakushasqanta ima yuyasqanku.

Georgeqa waj pʼunchaypi, wasinpi taripasqa. Doña Rieqa mana suyasqanmanta disculparikusqa, hospitalpi kashasqantataj sutʼinchasqa. Pay nisqa: “Ripusqaykichejtawan imatachus ruwasqayta, ni creewankichu. ¡Bibliata leeyta qallarerqani!”, nispa. Sumajta parlarisqankutawantaj, Bibliamanta yachakuyta munasqa.

Doña Rieqa Bibliamanta yachakusqanrayku, manaña jaya sonqo señorachu kasqa, manaqa kʼacha, kusisqataj. Wasinmanta mana llojsiyta atispapis, payta visitarej runasman yachakushasqanmanta willayta qallarisqapacha. Onqosqa kasqanrayku mana sapa kutichu tantakuykunaman riyta atispapis, hermanos, hermanas ima visitarejtinku may kusisqa sientekoj. Chantá 82 watasniyoj kashajtin, iskay pʼunchaypaj jatun tantakuypi Diosman qokuspa bautizakorqa.

Wañupusqanmanta pisi killasninmanqa, uj poemata qhelqasqanta tarisqanku. Chaypitaj, machuyaypi sapalla kay may llakiy kasqanta, kʼacha kaytaj may sumaj kasqanta qhelqasqa. Manon nin: “Chay poemaqa sonqoyta kuyurichin. Jehová, paywan kʼacha kanaykupaj yanapawasqaykumantataj mayta kusikuni”, nispa.

Arí, imaynachus Jehová kasqanqa, wajkunaman munakuyta, kʼacha kayta ima, rikuchinapaj tanqawanchej (Efe. 5:1, 2). “Diospa kamachisnin jina [...] kʼacha kay[ta]” rikuchisun chayqa, willayninchejpi aswan sumaj riwasun (2 Cor. 6:4-7).