Kacharichej Diosta sirvina

“Diosta munakoyqa kamachisqasninta juntʼaymin, kamachisqasninta juntʼaytaj atina jinalla.” (1 JUAN 5:3.)

¿IMATATAJ KUTICHIWAJ?

¿Imaynatá Satanás, Diospa kamachiykunasnin mana juntʼay atina kasqanta yuyachiyta munawanchej?

¿Imaraykutaj amigosta ajllashaspa sumajta qhawarikunanchej tiyan?

¿Imataj kacharichej Diosman cheqa sonqollapuni kanapaj yanapawasun?

1. Jehová tukuy imamanta kacharichisqa kajtinpis, ¿imatataj mana ruwanchu? ¿Imatataj Adanta Evatawan ruwanankuta saqerqa?

¿PILLATAJ tukuy imamanta kacharichisqa kashan? Jehovalla. Chaywanpis mana chayraykoqa munasqanman jina imatapis ruwallanchu, nitaj kamachisninta ñawillanpichu purichishan. Astawanpis kausayninkupi imatapis ajllanankuta saqen, munasqankuman jinataj imatapis ajllanankuta. Sutʼincharinapaj, Adantawan Evatawanqa, “allin kajta mana allin kajta yachanamanta sachʼaj” poqoynillanta mana mikhunankuta kamacherqa (Gén. 2:17). Chayrayku paykunaqa, Diospa munayninta juntʼayta, sumaj kacharichisqastaj kayta atinkuman karqa.

2. ¿Imaynatá ñaupa tatasninchej juchaj wata runasninman tukorqanku?

² ¿Imaraykutaj Jehová, ñaupa tatasninchej chay jina kacharichisqas kanankuta saqerqa? Payman rijchʼakojta ruwasqanrayku, sonqo yuyayta qosqanrayku ima. Diosqa, payta munakusqanku allin kajta ruwanankupaj tanqananta suyarqa (Gén. 1:27; Rom. 2:15). Chaywanpis mana agradecekorqankuchu, kacharichisqa kayta qosqantapis pisipaj qhawarqanku. Astawanpis Satanasta kasorqanku, sapallankumantataj imachus allin, imatajchus mana allin kasqanta ajllarqanku. Ajinamanta aswan kacharichisqa kayta yuyarqanku, chaywanpis pantarqanku. Chayrayku paykuna, mirayninku ima juchaj wata runasninman tukorqanku, chaytaj ñakʼariyllata, wañuytataj apamun (Rom. 5:12).

3, 4. ¿Imatataj Satanás, Jehovaj kamachiykunasninmanta yuyachiyta munawanchej?

³ Satanasqa iskay juntʼa runasta, ashkha angelesta ima, Jehovaj kamachiyninta qhesachanankupaj chʼaukiyarqa.  Noqanchejtaqa astawanraj chʼaukiyawasunman. Payqa, Diospa kamachiykunasnin mana juntʼay atina kasqanta, kusisqa kausanapajtaj jarkʼawasqanchejta yuyachiyta munawanchej (1 Juan 5:3). Kikinta yuyaj runaswan anchata kaspaqa, paykuna jina yuyayta qallarisunman. Uj hermana 24 watasniyoj, pichus khuchichakuypi urmarqa, nin: “Mana allin amigoswan purisqay, astawanpis munasqankuman jinapuni ruwasqay, sajra kajman tanqawarqa”, nispa. Noqanchejtapis ichá amigosninchej sajra kajman tanqawasunman.

⁴ Chay jina amigosqa qotuchakuypipis kallanmantaj. Uj joven cristiano nin: “Wakin amigosneyqa, mana Jehovamanta sutʼinchaj kajkunawan rejsinakoj kanku. Tiempowantaj paykunawan sapa kuti kaspa, paykuna jinaña kashasqayta reparakorqani. Dioswan masichakusqaypis llauchʼiyarqa, niña kusiywanchu tantakuykunaman rej kani, willaymanpis ñakʼayllata rej kani. Jinamanta waj amigosta maskʼakunay kasqanta repararqani, chaytataj ruwarqani”, nispa. Arí, amigosninchejqa allin kajman chayri sajra kajman tanqawanchej. Ajinapuni kasqanta Bibliapi qhawarina (Rom. 15:4).

“TUKUY ISRAELITASPA SONQONKUTA SUWARQA”

5, 6. ¿Imaynatá Absalón ashkha israelitasta chʼaukiyarqa? ¿Allinchu ruwasqan llojserqa?

⁵ Bibliaqa, wajkunata sajra ruwayman tanqajkunamanta parlan. Ujnenqa rey Davidpaj wawan Absalón karqa. Payqa may alajo runasina karqa. Chaywanpis Satanás jina payllapaj imatapis munarqa, tatanpa kamachina tiyananta ima munapayarqa. * Sumajta yuyaychakuspa, tatanpa kamachiyninta qhechunayarqa. ¿Imaynamantá? Israelitasta yanapajman tukuspa, kamachej paykunamanta mana llakikusqanta nispa ima. Absalonqa, imaynatachus Kuraj Supay, Edén huertapi ruwarqa, jinallatataj ruwarqa. Kʼacha runaman rijchʼakuspa, tatanta qhasimanta tumparqa (2 Sam. 15:1-5).

⁶ ¿Allinchu ruwasqan llojserqa? Wakin imaspeqa allin rerqa. Imaraykuchus Bibliapi nin jina, “tukuy israelitaspa sonqonkuta suwarqa” (2 Sam. 15:6). Chaywanpis runaykachasqanqa ñakʼariyllaman aparqa. Chantapis pay, ashkha chʼaukiyasqan runas ima, wañorqanku (2 Sam. 18:7, 14-17).

7. ¿Imastataj Absalonmanta yachakunchej? (Kay 14 paginapi dibujota qhawariy.)

⁷ ¿Imaynatá chay israelitas chʼaukiyachikullarqanku? Ichapis Absalón imastachus qonanta nisqanta munarqanku chayri wapu kayninwan sonqonkuta suwachikorqanku. Mana sutʼitachu yachajtinchejpis, paykunaqa Jehovaman, ajllasqan reyman ima, mana cheqa sonqochu karqanku. Kunanpis Satanasqa, Absalón jina runasnejta Jehovaj kamachisninpa sonqonkuta suwayta munan. Wakenqa ninku: “Diospa kamachiykunasnenqa, mana juntʼay atina”, chayri “¡Jehovata mana sirvejkunaqa, mayta kusirikunku!”, nispa. ¿Sutʼitachu reparanchej chaykuna llulla kasqanta, Jehovamantaj cheqa sonqollapunichu kanchej? ¿Reparanchejchu “Diospa sumaj kacharichej” leynin, Cristoj leynin imalla kacharichiwasqanchejta? (Sant. 1:25.) Chay leyta jatunpaj qhawasqanchejta rikuchina, Jehovata kusichinapaj jinataj imatapis ajllana (1 Pedro 2:16 leey).

8. ¿Pikunaj kausayninkutaj, Jehovata mana kasukuy llakiyllata apamusqanta rikuchin?

⁸ Satanasqa urmachinanpaj, jovenesta astawan qhawashan. Uj hermano, pichus 30 watasniyojña, nin: “Waynuchu kashaspaqa,  Jehovaj kamachiykunasnin mana jarkʼawasqantachu, manaqa watasqata jina japʼiwasqanta yuyaj kani”, nispa. Chayrayku khuchichakuypi urmarqa. Chayta ruwaspa, ¿aswan kusisqachu karqa? Mana. Payllataj nin: “Ashkha watasta mayta juchachakorqani, sonqo yuyayniypis juchachallawarqapuni”, nispa. Uj hermanapis sipasllaraj kasqanmanta yuyarikuspa nin: “Khuchichakuytawanqa, may llakisqa sientekorqani, ni imapaj valesqaytataj yuyarqani. Chaymanta 19 watasña pasajtinpis, yuyarikullanipuni”, nispa. Waj hermana nin: “Juchallikusqay, familiayta, amigosniyta ima mayta llakichisqanta yachaspa, sinchʼita llakikorqani. Jehová mana allinpaj qhawasusqanta yachayqa, may llakiy”, nispa. Satanasqa, imachus kananpi mana yuyaspalla juchallikunaykita munan.

9. a) ¿Imatataj tapurikunanchej tiyan Jehovamanta, kamachiykunasninmanta, yuyaychaykunasninmanta ima? b) ¿Imaraykutaj Jehovata sumajta rejsinanchej tiyan?

⁹ Rikunchej jina, Diosta mana kasukoyqa ashkha llakiykunallata apamun. Ashkha jóvenes, kuraj runas ima, mayta ñakʼarisparaj chayta yachakusqankoqa, may llakiy (Gál. 6:7, 8). Chayrayku sapa uj tapurikuna: “¿Ima tojllaswanchus Satanás urmachiyta munawasqanta reparayta atinichu? ¿Aswan sumaj amigoyta jinachu Jehovata qhawani, chantá cheqa kajtapuni nisqanpi, allinniytapunitaj maskʼasqanpi atienekunichu? ¿Creenichu allin imasmanta, kusichinawanpaj imasmanta ima, Dios ni jaykʼaj jarkʼawasqanta?” (Isaías 48:17, 18 leey). “Arí” niyta munanchej chayqa, Jehovata sumajta rejsinanchej tiyan. Chantapis munakuwasqanchejrayku kamachiykunata,  yuyaychaykunata ima churasqanta reparananchej tiyan, nitaj watasqata jina japʼinawanchejpajchu (Sal. 25:14).

JEHOVAMANTA JATUN YUYAYTA, KASUKOJ SONQOTAWAN MAÑAKUNA

10. ¿Imaraykutaj rey Salomón jina ruwanapaj kallpachakunanchej tiyan?

¹⁰ Salomonqa, waynuchullaraj kashaspa Diosman llampʼu sonqowan jinata nerqa: “Noqarí waynallaraj kani; mana yachanirajchu imaynatachus kamachinayta”, nispa. Chantataj jatun yuyayta, kasukoj sonqotawan mañakorqa (1 Rey. 3:7-9, 12). Jehovataj sonqomantapacha mañakusqanrayku, chayta qorqa. Noqanchejmanpis, mashkha watayoj kajtinchejpis qollawasuntaj. Mana milagronejtachu yachayta, sumaj yuyayta ima qowasun. Chaywanpis Bibliata sumajta ukhunchasun, espíritu santonta mañakusun, qotuchakuynejta yuyaychawasqanchejwantaj allinta yanapachikusun chayqa, yachayta qowasun (Sant. 1:5). Arí, Jehovaqa, mana kasukojkunamanta, kay pachapi “yachayniyojkunamanta yuyayniyojkunamantawan” nisqaqa, jovenllaraj kaj kamachisnintapis aswan yachayniyoj kanankupaj yanapan (Luc. 10:21; Salmo 119:98-100 leey).

11-13. a) ¿Ima sumaj yuyaychaykunatataj Salmo 26:4, Proverbios 13:20, 1 Corintios 15:33 versiculospi yachakunchej? b) ¿Imaynatataj chay yuyaychaykunaman jina kausakusunman?

¹¹ Rikunchej jina, Jehovata sumajta rejsinapajqa, Bibliata allinta ukhunchana, leesqanchejpitaj tʼukurina. Sutʼincharinapaj, pikunawanchus masichakunanchej kasqanmanta, Bibliaj yuyaychaykunasninta qhawarina. Salmo 26:4 versículo nin: “Llulla runaswan ni jaykʼaj kawsakorqanichu, nitaj puraj uyaswanqa tantakorqanichu”, nispa. Proverbios 13:20 versiculopi nin: “Yachayniyojkunawan purejqa yachayniyojllataj kanqa. Wampu runaswan purejrí mana allinman chayanqa”, nispa. Chantá 1 Corintios 15:33 nin: “Sajra runaswan pureyqa kʼacha ususta chinkachin”.

¹² ¿Imastataj chay versiculospi yachakunchej? 1) Jehovaqa, amigosninchejta allinta ajllananchejta munan, imajtinchus allin rinawanchejta, qayllallanpipunitaj kananchejta munan. 2) Amigosninchejqa allin kajman chayri sajra kajman tanqawanchejpuni. Chantapis chay versículos imaynachus qhelqasqa kashasqankoqa, Jehová sonqonchejta kuyurichiyta munasqanta rikuchin. ¿Imaynamantá? Chay versiculospeqa, mana “Ama kayta, nitaj jaqayta ruwaychu” nispachu kamachin. Manaqa, imachus cheqa kasqanta sutʼita niwanchej. Jehová kaytapis niwasunman jina: “Kayqa ajina, kaytaj ajina. ¿Imatataj kunan ruwanki? ¿Imataj sonqoykipi kashan?”, nispa.

¹³ Chantapis chay versiculospi nisqan cheqapuni kasqanrayku, tukuy tiempopaj, tukuy imapitaj yanapawanchej. Kaykunata tapurikuna: “¿Imaynatá ‘puraj uyaswan’ masichakuymanta jarkʼakuyman? ¿Imastaj paykunawan masichakunaypaj tanqawanman? (Pro. 3:32; 6:12.) ¿Pikunataj Jehová ‘yachayniyojkunawan’ masichakunayta niwasqan kanku, chantá pikunataj ‘wampu’ runas kanku? (Sal. 111:10; 112:1; Pro. 1:7.) ¿Mayqen ‘kʼacha usustataj’ chinkachisaj mana masichakunay runaswan purispa? ¿Kay pachallapichu mana allin amigos tiyan? (2 Ped. 2:1-3.)”. Allin kanman chay tapuykunaj kutichiykunasninpi tʼukuriy.

14. Familiapi Diosta Yupaychanapaj Chʼisita, ¿imaynatá aswan sumajta ruwasunman?

¹⁴ Noqanchej chayri familianchej imastachus ruwayta munasqanchejmanta, Jehová imatachus yuyasqanta yachanapaj, waj textosta ukhuncharispa kikillantataj tʼukurisunman. * Tatasqa Familiapi Diosta Yupaychanapaj Chʼisipi, chaykunata ukhuncharinkuman. Chaytaj, familianmanta sapa  ujta yanapananpaj kasqanta yuyarikunan tiyan. ¿Imapaj? Diospa leyesnin, yuyaychaykunasnin ima munakuyninta rikuchisqanta entiendenankupaj (Sal. 119:72). Ajinamanta familian aswan ujchasqa kanqa, Jehovamanpis astawan qayllaykonqa.

15. ¿Imaynatá jatun yuyayniyoj, kasukoj sonqoyojtaj kashasqanchejta yachasunman?

¹⁵ ¿Imaynatá jatun yuyayniyoj, kasukoj sonqoyojtaj kashasqanchejta yachasunman? Unay tiempomanta cheqa sonqo runas jinachus, manachus yuyashasqanchejta qhawarikuspa. Sutʼincharinapaj David nerqa: “Diosníy, tukuy sonqo munayniykita ruwayta munani. Yachachiwasqasniykita sonqoypi waqaychani”, nispa (Sal. 40:8). Kay 119 Salmota qhelqajtaj, nerqa: “Maytapuni kamachisqasniykita munakuni; tukuy pʼunchaynintin chayllapi unanchani”, nispa (Sal. 119:97). Chay jina munakoyqa, mana jinallamantachu rikhurin. Chaypajqa Bibliata sumajta ukhuncharina, Diosmanta mañakuna, tʼukurina ima. Chantapis Diospa kamachiykunasninta kasukojtinchej, bendeciwasqanchejta rikuspa chay jina munakuyniyoj kasunchej (Sal. 34:8).

CRISTIANOS JINA KACHARICHISQA KANAPAJ KALLPACHAKUNA

16. ¿Imatataj yuyarikunanchej tiyan kacharichisqa kanapaj maqanakushasqanchejpi atipanapaj?

¹⁶ Tiempo pasasqanma jina ashkha suyusqa, kacharichisqa kayta maskʼaspa guerrasta ruwanku. Noqanchejqa cristianos jina kacharichisqa kanapaj, astawanraj maqanakunanchej tiyan. Yachachej jina Satanaswan, pachanpa sajra munayninwan, juchasapa kayninchejwan, chʼauka sonqonchejwan ima maqanakunchej (Jer. 17:9; Efe. 2:3). Jehovaj yanapayninwantaj, atipayta atisun. Juchʼuy imaspi chayri jatun imaspi atipaspa ñaupajtaqa, Jehovata kusichisun (Pro. 27:11). Chantataj “Diospa sumaj kacharichej” leynin kacharichishawasqanchejta reparaspa, kausayman pusaj kʼullku ñanta rinallapajpuni astawan kallpachakuyta munasun. Qhepamantaj aswan sumaj kacharichiyta tarisun, mayqentachus Jehová cheqa sonqo kamachisninpaj waqaychashan (Sant. 1:25; Mat. 7:13, 14).

17. ¿Imaraykutaj pantaspa mana llakiywan atipachikunanchejchu tiyan? ¿Imaynatá Jehová yanapawanchej?

¹⁷ Arí, tukuyninchej imallapipis pantanchejpuni (Ecl. 7:20). Pantaspaqa, ama llakiywan atipachikunachu, nitaj ni imapaj valesqanchejta yuyanachu. Juchapi urmanchej chayqa, sayarikuspa ñaupajllamanpuni rina, ancianospa yanapayninta maskʼananchej kajtinpis. Santiago nerqa: “Creespa mañapojtinkutaj, chay runaqa sanoyachisqa kanqa, Señortaj payta sayarichenqa. Sitajchus juchallikorqa chayqa, chay juchampis pampachasqallataj kanqa”, nispa (Sant. 5:15). Jehová may khuyakuyniyoj kasqanta, sonqonchejpi allin imata rikuspa qotuchakuyman pusamuwasqanchejta ima, ni jaykʼaj qonqanachu (Salmo 103:8, 9 leey). Payman cheqa sonqos kanapaj kallpachakusun chayqa, ni jaykʼaj saqerpawasunchu (1 Cró. 28:9).

18. ¿Imatá Jehová jarkʼanawanchejpaj ruwananchej tiyan?

¹⁸ Jesusqa, wañupunan pʼunchay ñaupaj chʼisinpi, Jehovamanta discipulosninpaj, jinata mañakorqa: “Mañakuni paykunata sajra kajmanta waqaychanaykita”, nispa (Juan 17:15). Kunanpis kikillantataj discipulosninmanta interesakun. Chayrayku, Jesuspa mañakusqanta Dios uyarinanpi atienekusunman. Arí, kay sajra pʼunchaykunapi jarkʼawasunpuni. Biblia nin: “Mana juchayojkunapajqa paymin jarkʼakunanku escudoqa. Payqa cheqan ñanta rejkunata waqaychan”, nispa (Pro. 2:7, 8). Juntʼa sonqo kayqa mana atikullanchu, chaywanpis juntʼa sonqo kaspalla wiñay kausayta, cheqamanta kacharichisqa kayta ima tarisun (Rom. 8:21). Chay ñanmanta, ¡ni pi orqhonawanchejta saqenachu!

[Sutʼinchaykunasnin]

[Tapuykuna]

[14 paginapi dibujos/fotos]

¿Pikunataj kay tiempopi Absalón jina kanku, imaynatataj paykunamanta jarkʼakusunman?