¿Pimantataj manchachikuymanri?
¿Pimantataj manchachikuymanri?
“Contraypipis sayarichunku waykhaykunawankupaj; noqaqa kakullasaj Diospi atienekuspa.” (SAL. 27:3.)
KAY VERSICULOSMAN JINA, ¿IMATAJ KALLPACHASONQA?
1. ¿Ima tapuykunata kutichinapajtaj 27 Salmota ukhunchariy yanapawasun?
¿IMARAYKUTAJ kay pacha mana allinman tukushajtinpis willayninchej mayta ñauparishan? ¿Imaraykutaj runas qolqemanta pisisqa kajtinkupis, tiemponchejta, kallpanchejta ima, willanapaj churanchej? ¿Imaynatá runas imachus qhepaman kananmanta manchachikojtinkupis, mana manchachikunchejchu? Rey David, 27 Salmota Dios yuyaychasqanman jina qhelqasqan, chay tapuykunaman kutichin.
2. ¿Imaynatá runas mayta manchachikusqankurayku sientekunku? ¿Imapitaj noqanchej atienekunchej?
2 Davidqa chay salmota jinata qallarerqa: “Tata Diosqa kʼanchawajniy, salvawajniytaj. Pimantataj manchachikuymanri? Tata Diosqa kawsayniyta waqaychan”, nispa (Sal. 27:1). Mayta manchachikoyqa uj runata llauchʼiyachin, nitaj imata ruwajtapis saqenchu. Chaywanpis Jehovata manchachikojqa, ni imamanta manchachikunan kanchu (1 Ped. 3:14). Jehovata waqaychajninta jina qhawajqa, “mana imamanta manchachikuspa tiyakonqa” (Pro. 1:33; 3:25). ¿Imaraykú? Chayta qhawarina.
“TATA DIOSQA KʼANCHAWAJNIY, SALVAWAJNIYTAJ”
3. ¿Imaynamantataj Jehová kʼanchawajninchej? Chaywanpis, ¿imatá ruwananchej tiyan?
3 Bibliapi “Tata Diosqa kʼanchawajniy” nisqanqa, Jehová cheqa kajta yachachiwasqanchejta niyta munan (Sal. 27:1). Yachanchej jina kʼanchayqa, urmanapaj jina imasta ñanpi reparachiwanchej, chaywanpis mana chaykunata chinkachinchu. Chayrayku rikusqanchejman jina, imatapis ruwananchej tiyan. Kikillantataj Jehovaqa, kay pachapi imaraykuchus tukuy imapis pasashasqanta sutʼinchawanchej, imasmantachus jarkʼakunata willawanchej, Bibliapitaj sumaj yuyaychaykunata qowanchej. Chaywanpis, yachakusqanchejman jina ruwananchej tiyan. Ajinamanta Salmista jina, yachaywan imatapis ruwasun. Pay nerqa: “Kamachisqasniykeqa aswan yachayniyojta ruwawan contraypi kajkunamanta nisqaqa [...]. Tukuy yachachiwajkunamanta nisqaqa astawan entiendeni” (Sal. 119:98, 99, 130).
4. a) ¿Imaraykutaj David, Jehová salvajnin kasqanta nerqa? b) ¿Maykʼajtaj Jehová salvawajninchej kanqa?
4 Salmo 27:1 nisqanman jina Davidqa, ñaupaj kutispi Jehová salvasqanta yuyarikorqa. Sutʼincharinapaj, “leonmanta, jinallataj jukumarimantapis” librarqa. Chantapis, jatun karay runa Goliatta atipananpaj yanaparqa. Aswan qhepamanpis, rey Saúl lanzawan wañuchinanmanta kutin kutita jarkʼarqa (1 Sam. 17:37, 49, 50; 18:11, 12; 19:10). Chayraykuchá David, Jehová salvajnin kasqanta nerqa. Tumpamantawanqa, “jatun ñakʼariy” tiempopi, kamachisninta Davidta jinallataj jarkʼanqa. Paykunajtapis salvajninku kanqa (Apo. 7:14; 2 Ped. 2:9).
JEHOVÁ YANAPAWASQANCHEJTA YUYARIKUNA
5, 6. a) ¿Imaynatataj ñaupa tiempopi Jehová yanapawasqanchejta yuyarikuy kallpachawanchej? b) ¿Imaraykutaj Jehová kamachisninrayku imatachus ruwasqanta ukhunchariy kallpachawanchej?
5 Kay Salmo 27:2, 3 (leey) versiculospi, mana manchachikunapaj imatachus ruwanata rikuchin. Davidqa, Jehová ñaupaj kutispi imasmantachus librasqanta yuyarikorqa (1 Sam. 17:34-37). Chay yuyarikusqantaj, sinchʼi llakiykunata atipananpaj kallpacharqa. Qanrí, ¿yuyarikunkichu imaynatachus Jehová ñaupaj kutispi yanapasusqanta? ¿Chay yuyarikusqayki kallpachasunkichu? Sutʼincharinapaj, sinchʼi llakiypi kashaspa, ¿Jehovamanta mayta mañakorqankichu? Chay kutipi Jehová imaynatachus yuyaychasusqanta, muchunaykipaj kallpachasusqanta ima, ¿rikorqankichu? Diosta kusiywan sirvinaykipaj imaynatachus chʼampaykunasniyki chinkapusqanta, ¿yuyarikunkichu? Chayri Diosta astawan sirvinaykipaj “sumaj jatun punku” kicharikususqanta, ¿yuyarikunkichu? (1 Cor. 16:9, Qheshwa Biblia.) ¿Imaynataj chaypi tʼukurispa sientekunki? Chaykunata yuyarikuspaqa, Jehová sinchʼi chʼampaykunata atipanaykipaj, chayri muchunaykipaj yanapasunanpi atienekunki, ¿icharí? (Rom. 5:3-5.)
6 ¿Uj atiyniyoj gobierno Diospa llajtanta chinkachiyta munashanman chayri? Kay tiempopeqa, ashkha runas chayta ruwayta munarqankuña, nitaj atinkuchu. Ñaupa tiempopi Jehová imatachus llajtanrayku ruwasqanpi tʼukurispaqa, qhepaman imachus kananmanta mana manchachikusunchu (Dan. 3:28).
CHEQA YUPAYCHAYTA JATUNPAJ QHAWANA
7, 8. a) Salmo 27:4 nisqanman jina, ¿imatataj David Jehovamanta mañakorqa? b) ¿Imataj Jehovaj mana rikukoj templon, imaynatataj chaypi yupaychanchej?
7 Chantapis, kallpachasqallapuni kanapajqa, cheqa yupaychayta munakuna (Salmo 27:4 leey). Davidpa tiemponpeqa, “Tata Diospa wasi[n]”, Dioswan tinkukuna toldo karqa. Chaywanpis Davidllataj, uj templo ruwakunanpaj wakichiyta qallarerqa, mayqentachus wawan Salomón aswan qhepaman ruwarqa. Chaymanta unayninman Jesusqa, manaña uj templopichu Diosta yupaychakunan kasqanta sutʼincharqa (Juan 4:21-23). Apóstol Pabloqa, Hebreos 8-10 capitulospi, Diospa mana rikukoj templon, 29 watapi rikhurisqanta nerqa. Chaytaj Jesús bautizakushajtin, Jehovamantaj munayninta ruwananpaj jaywakushajtin karqa (Heb. 10:10). Chay mana rikukoj temploqa, Jesucristoj wañuyninnejta Jehovata yupaychaywan ninakun, chaynejtataj Diosman qayllaykunchej. ¿Imaynatataj Jehovata chay templopi yupaychanchej? Mañakuspa “chʼuwa sonqowan, tukuy sonqo creespa” ima, suyakuyninchejmanta mana iskayrayaspa wajkunaman willaspa, tantakuykunapi hermanosninchejta kallpachaspa, familiapi Diosta yupaychanapaj tantakuyta ruwaspa ima (Heb. 10:21-25). Cheqa yupaychayta jatunpaj qhawayqa, kay sajra pʼunchaykunaj tukukuyninpi kallpachawanchej.
8 Jallpʼantinpi Jehovaj cheqa sonqo kamachisnenqa, runasman astawan willanankupaj kallpachakunku, waj qalluta yachakunku, willajkuna necesitakun chaymantaj ripunku. Ruwasqankuwanqa, salmista jina mañakusqankuta rikuchinku: Jehová allinpaj qhawananta, ima kajtinpis payta yupaychayta munasqankuta ima (Salmo 27:6 leey).
DIOS YANAPANAWANCHEJPI ATIENEKUNA
9, 10. ¿Imatá Salmo 27:10 niyta munan?
9 Davidqa, Dios yanapananpi atienekusqantapuni rikucherqa, pay nerqa: “Tatay mamay saqerpariwajtinkupis, Tata Diosqa mana saqerpariwanqachu”, nispa (Sal. 27:10). Ñaupaj kaj Samuel libropi, 22 capitulopi nisqanman jina, Davidtaqa tatasnin mana saqerparqankuchu. Chaywanpis kay tiempopeqa, Diospa ashkha kamachisninta, familianku mayta chejninku, jinapis qotuchakuypi yanapata, jarkʼayta ima tarinku.
10 Jehovaqa cheqa sonqo kamachisninta, wajkuna saqerparejtinkupis yanapayta munan. Chayrayku waj chʼampaypi rikukojtinkupis yanapallanqataj. Sutʼincharinapaj, familianchejman necesitasqankuta imaynatachus qonamanta llakisqa kanchej chay, Jehová yanapanawanchejmanta, mana iskayrayanachu (Heb. 13:5, 6). Payqa, tukuy cheqa sonqo kamachisnin, imapichus rikukusqankuta, imatachus necesitasqankuta ima yachan.
11. ¿Imatataj waj runas Jehovapi atienekusqanchejmanta ninkuman? Sutʼinchariy.
11 Liberiapi tiyakoj Victoriamanta parlarina. Payqa Bibliamanta yachakorqa. Bautizakuyta munaspa ñauparishajtintaj, paywan tiyakoj qhari, kinsa wawasnintawan saqerparqa. Victoria mana wasiyoj, nitaj llankʼayniyoj kaspapis, ñauparispa bautizakorqa. Pisi tiemponmantaj, 13 watayoj warmi wawan, qolqe juntʼa billeterata tarikusqa. Mana japʼikapuyta munashanankupajtaj, mashkha qolqechus kasqanta ni yupaykullasqankupischu. Astawanqa, chay ratopacha dueñonta wajyasqanku, pichus soldado kasqa. Paytaj nisqa: “Jehovamanta sutʼinchajkuna jina, tukuy kankuman chayqa, kay pachapi kausay aswan sumaj, allintaj kanman”. Victoriataj, Jehová mosoj pachata apamuyta munasqanta, Bibliapi rikucherqa. Chay soldadoqa, kutichipusqanmanta tʼukulla qhepakorqa, chayraykutaj ashkha qolqeta regalarqa. Arí, Jehovamanta sutʼinchajkunaqa, ajina kasqanchejmanta rejsisqa kanchej. Imajtinchus, tukuy ima necesitasqanchejta Jehová qonawanchejpi atienekunchej.
12. Imatapis pierdespa Jehovata sirvispallapuni, ¿imatataj rikuchinchej? Sutʼinchay.
12 Manaraj bautizasqa willaj Thomasmanta parlarina, pichus Sierra Leona suyupi tiyakun. Payqa, uj colegiopi profesormanta llankʼayta qallarerqa. Chaywanpis, watata jina mana pagarqankuchu, tramitesta tukuchanantaraj nerqanku. Sueldonta japʼinanpajqa, chay colegiomanta directorwanraj parlanan karqa, pichus sacerdote karqa. Chay sacerdotetaj, Jehovamanta sutʼinchajkuna imaspichus creesqanku, chay colegiopi mana allinpaj qhawasqachu kasqanta nerqa. Chantataj, imaspichus creesqanta chayri llankʼayninta ajllananta nerqa. Thomasqa chay llankʼayninta, sueldonta ima pierderqa, waj llankʼaytataj tarikorqa. Chaypitaj radiosta, telefonosta ima allinchanan karqa. Thomaspa, wajkunaj kausayninku ima, Jehovapi atienekojtinchej, ni imamanta manchachikusqanchejta rikuchin. Imajtinchus Jehová tukuy imata ruwarqa, llajtantataj jarkʼanpuni. Chayrayku, jarkʼanawanchejmanta mana iskayrayanchejchu.
13. ¿Imaynatataj wajcha suyuspi Diosmanta willay mayta ñauparishan?
13 Wajcha suyuspeqa, Jehovamanta sutʼinchajkuna sonqo kʼajaywan willanku. ¿Imaraykú? Uj sucursalmanta jinata qhelqamorqanku: “Bibliamanta yachakuyta munajkunamanta ashkha, mana llankʼayniyoj kasqankurayku, pʼunchaypi yachakunankupaj tiempoyoj kanku. Hermanospis, willanankupaj astawan tiempochakunku. Aswan wajcha lugarespi runas ajinata kausasqankurayku, qhepa pʼunchaykunapi kausashasqanchejta sutʼita reparanku”. Uj suyupeqa sapa willaj, kinsa runasmanta astawan, Bibliamanta yachachin. Chaypi 12 watastaña llankʼaj misionero, jinata qhelqarqa: “Ashkha willajkuna pisi kapuynillayoj kasqankurayku, astawan willayta, Bibliamanta yachachiyta ima atinku”.
14. ¿Imaynasmantataj Dios llajtanta jarkʼanqa?
14 Jehovaqa, tukuy imapi llajtanta yanapananta, jarkʼananta, librananta ima nin. Noqanchejtaj paypi atienekunchej (Sal. 37:28; 91:1-3). “Jatun ñakʼariy” tiempomanta llojsimojkunaqa, may chhika kanqanku (Apo. 7:9, 14). Chayrayku, paykuna kay qhepa pʼunchaykunapi mana chinkachisqa kanankuta yachanchej. Astawanpis Jehovaqa, tukuy imata muchunankupaj, paywan masichakusqankuta mana chinkachinankupaj ima, tukuy ima necesitasqankuta qonqa. Armagedonpitaj llajtanta jarkʼanqa.
“TATA DIOS, ÑANNIYKITA RIKUCHIWAY”
15, 16. ¿Imaynatá Dios yachachiwasqanchejman jina ruway yanapawanchej? Sutʼinchariy.
15 Kallpachasqallapuni kanapajqa, Dios yachachinallawanchejtapuni necesitanchej. David jinata nerqa: “Tata Dios, ñanniykita rikuchiway, cheqan ñantataj pusaway, enemigosniyrayku”, nispa (Sal. 27:11). Dios yachachinawanchejpajqa Bibliaj nisqanta, llajtannejta yuyaychawasqanchejta ima, allinta japʼikuna, usqhayllatataj kasukuna. Ashkha hermanosqa, Biblia yuyaychasqanman jina, kapusqallankuwan kausakunku. Manunkuta juntʼanku, mana necesitasqankuta imastataj vendenku. Chayrayku runas qolqemanta pisisqa kajtinkupis, mana anchata llakikunchu. Chantapis, mana necesitasqanku imasta mana rantinanku kasqanrayku, astawan willanankupaj tiempochakunku. Chayrayku allin kanman sapa uj kayta tapurikunanchej: “¿Bibliapi, allin kamachi yuyayniyojpa publicacionesninpi ima nisqanman jinachu, mana atinaypaj jina kajtinpis ruwani? (Mat. 24:45.)
16 Jehová yachachinawanchejta, cheqan ñanta pusanawanchejta ima saqesun chayqa, ni imata manchachikusunchu. Estados Unidosmanta uj precursor regularqa, patronninmanta uj llankʼayta mañakorqa. Mana profesionniyoj kasqanraykutaj, ni jaykʼaj chay llankʼayta tarinanta nerqa. Chay llankʼayqa, tukuy familian precursoresllapuni kanankupaj yanapanman karqa. Ajinapi rikukuwaj karqa chay, ¿pesachikuwajchu karqa precursor kanaykirayku mana profesionniyoj kasqaykimanta? Iskay semananman chay patronqa, llankʼayninmanta wijchʼuchikorqa. Waj patrontaj imatachus ruwayta munasqanta hermanota taporqa. Paytaj Jehovamanta sutʼinchaj kasqanta, warminwan Diospaj astawan llankʼasqankuta, chayllatapuni ruwayta munasqankuta ima sutʼincharqa. Manaraj parlayta tukushajtintaj, chay patrón jinata nerqa: “Mana wajkuna jinachu kasqaykita repararqaniña. Tatay wañuy patapiña kashajtenqa, iskay Jehovamanta sutʼinchajkuna, sapa pʼunchay Bibliata leepoj jamoj kanku. Noqataj maykʼajllapis uj Jehovamanta sutʼinchajta yanapanayta nikorqani”, nispa. Qʼayantintaj, ñaupaj patronnin mana qoyta munasqan llankʼayta, qorqanku. Arí, Jehovaqa, Reinonta ñaupajman churajtinchej, nisqanman jina, necesitasqanchejta qowasunpuni (Mat. 6:33).
CREEYNIYOJ, SUYAKUYNIYOJ IMA KANANCHEJ TIYAN
17. ¿Imataj qhepaman imachus kananmanta mana manchachikunapaj yanapawasun?
17 David nerqa: “Yachanipuni Tata Diospa kʼacha kayninta rikunayta kay kawsaypi”, nispa (Sal. 27:13). Arí, Davidqa Jehovaj nisqasninpi creerqa, chaytaj suyakuyniyoj kananpaj yanaparqa. Noqanchejpis pay jinallataj creeyniyoj, suyakuyniyoj ima kananchej tiyan. Kaypi tʼukuriy: Dios, mana suyakuyta qowajtinchej, 27 Salmopi kʼacha kaykunasninmanta parlasqantataj mana jatunpaj qhawajtinchej, ¿imataj noqanchejmanta kanman? Chayrayku, kallpachanawanchejpaj, Armagedonpi jarkʼanawanchejpaj ima, Jehovamanta mañakunallapuni (Salmo 27:14 leey).
[Tapuykuna]
[23 paginapi dibujo/foto]
Davidqa, Jehová ñaupaj kutispi librasqanmanta yuyarikuspa kallpachakorqa
[25 paginapi dibujo/foto]
Pisi kapuyniyoj kaspa, ¿manachu Jehovapaj astawan llankʼasunman?
