“Ruwayta munasqay juntʼakun”

Emiliaqa, 15 watas ñaupajta precursora regular karqa, chaywanpis saqeporqa. Kunallanraj, chay tiempopi may kusisqa kasqanpi tʼukurerqa, chayrayku watejmanta precursora kayta munarqa.

Chaywanpis llankʼaynin, mana tiempoyojta saqej, chaytaj llakichej. Uj kuti Emiliaqa, llankʼaj masisninpa ñaupaqenkupi llakiywan kayta nerqa: “Pisi horasllataña llankʼanayqa, sumaj kanman”, nispa. Patronantaj chayta yachaytawan, nisqan cheqachus manachus kasqanta yachananpaj, tapoj rerqa. Emiliataj ajinapuni kasqanta kuticherqa. Chaywanpis pisi horasllataña llankʼananpajqa, empresata kamachejwan parlanan karqa. Chay empresapi llankʼajkunaqa, llankʼayninkuman astawan qokunanku karqa. Chayrayku Emiliaqa, allinta wakichikorqa, sumajta parlananpajtaj Jehovamanta kallpata mañakorqa.

Emiliaqa, empresata kamachejwan parlashaspa, mana manchikuspa kʼachallamanta, pisi horasllataña llankʼayta munasqanta nerqa. Mana llankʼasqan horaspitaj, runasta yanapasqanta sutʼinchaspa, kayta nerqa: “Jehovamanta sutʼinchaj kani, runastataj Bibliamanta yachakunankupaj yanapani. Kay tiempopi runasqa imachus allin, imatajchus mana allin kasqanta niña reparayta atinkuchu, chayrayku Bibliaj yuyaychayninta mayta necesitanku. Sumajllatapuni llankʼasaj, chaywanpis wajkunata yanapanaypaj, pisi horasllataña llankʼayta munayman”.

Empresata kamachejqa, sumajta uyarispa, paypis runasta yanapaypi uj kuti tʼukurisqanta niytawan, jinata nerqa: “Chayta ruwayta munasqaykirayku, pisi horasllataña llankʼanki. Jinapis pisillataña gananayki kasqanta yachanki, ¿icharí?”. Emiliataj chayta yachasqanta nispa, pisi qolqellawanña kausakuyta munasqanta nerqa. Wajkunata astawan yanapayta munasqantataj sutʼincharqa. Empresata kamachejtaj nerqa: “Ni imata suyaspalla runasta yanapajkunata, may allinpaj qhawani”.

Kunantaj Emiliaqa, semanapi tawa pʼunchayllataña llankʼan. Chay empresapeqa ni pita ajinata llankʼajta saqejchu kanku. Pagontapis yaparqanku, kunanqa ñaupajta jinallataj ganan. Pay nin: “Ruwayta munasqay juntʼakun. Watejmanta precursora kani”.

Qanrí precursor kanaykipaj, ¿kausayniykipi imastachus tijrachinaykipi tʼukurinkiñachu?

[32 paginapi dibujo/foto]

Empresata kamachej nerqa: “Ni imata suyaspalla runasta yanapajkunata, may allinpaj qhawani”