Tukuy sonqo ruwarqanku... Ecuadorpi

ITALIAMANTA uj joven hermano, Bruno sutiyoj, imatachus ruwananta mana yacharqachu. Payqa colegiomanta llojserqa, mejor alumno kasqanraykutaj familiaresnin, profesoresnin ima universidadman yaykunanpaj tanqarqanku. Chaywanpis Brunoqa, Jehovaman qokushaspa, kausayninpi payta sirviyta ñaupajman churananta nisqa. ¿Imatá ruwarqa? Pay nin: “Qokusqayman jina kausakunayta Jehovaman nerqani, paytataj ñaupajman churanayta. Chaywanpis mana kikillantachu ruwayta munasqayta, manaqa tukuy imaymanamanta Payta sirviyta munasqayta nerqani”.

 Brunoqa, watasninman Ecuadorman riporqa. ¿Imaynataj rerqa? Pay nin: “Jehová mañakuyniyman uyariwasqanqa, yuyasqaymantapis astawanraj karqa”, nispa. Ecuadorman chayaspa, ashkha wiñay tukusqa jovenesta rejsisqa. Paykunapis, Jehovata astawan sirvinankupaj chayman ripusqanku.

JEHOVÁ WAJYARISQANTA JÓVENES KASUKUNKU

Jehová nin: “Allinta qhawariychej, chantá rikunkichej, imaynatachus noqa janaj pacha ventanasta kicharispa, may chhika bendicioneswan juntʼachimusqaykichej, chayta” (Mal. 3:10). Brunoqa, Jallpʼantinmanta ashkha jóvenes jina, chayta kasukorqa. Chay jovenesqa, Diosta munakusqankurayku, chayta ruwanku. Imaraykuchus pisi willajkunalla kanku chay suyuman ripuspa, tiemponkuta, kallpankuta, kapuyninkuta ima, churanku.

Paykunaqa rinanku suyuman chayaspa, “cosechaqa ashkha, oqharejkunarí pisi” kasqanta sutʼita reparanku (Mat. 9:37). Jaquelinemanta parlarina, payqa Alemaniamanta. Ecuadorpi kaj sucursalman may kusiywan jinata qhelqarqa: “Iskay wata kurajtaña kaypi sirvishani, 13 runasmantaj Bibliamanta yachachishani, chaykunamanta tawa tantakuyman mana faltakuspa rinku. ¡May kusisqa kashani!”, nispa. Canadamanta Chantal sutiyoj hermana jinata nin: “Kay 2008 watapi,  Ecuador suyuman riporqani, mama qocha kantupi kaj llajtaman. Chaypitaj uj qotuchakuylla karqa. Kunanqa kinsa qotuchakuykunaña tiyan, 30 kuraj precursorestaj. Jinata runas ñauparisqankuta rikusqayqa, may sumajpuni. Cordillera de los Andes nisqapi tarikoj lugarman ripusqayqa niraj unaychu, chaytaj mama qochamanta 2.700 metros patapi jina kashan. Chay lugarpi 75.000 runas tiyakojtinkupis, uj qotuchakuylla tiyan. Runasqa sumajta uyarikunku, noqataj chaypi sirvispa may kusisqa kashani”.

CHʼAMPAYKUNATA ATIPARQANKU

Waj suyupi sirveyqa mana atikullanchu. Wakin jovenesqa, suyunkumanta niraj llojsishaspaña chʼampaykunapi rikukunku. Estados Unidosmanta Kayla, yuyarikuspa jinata nin: “Wakin hermanosqa allinniyta munaspapis, mana allinta parlaspa sonqoyta nanachiwarqanku. Waj suyuman imaraykuchus precursora jina ripuyta munasqayta mana entienderqankuchu. Chayrayku wakin kuteqa, imatachus ruwanaymanta iskayrayarqani”, nispa. Jinapis Kaylaqa riporqa. Imachus yanapasqanmanta pay nin: “Diosmanta mayta mañakorqani, creeypi sumaj sayasqa hermanoswantaj parlarerqani. Chaytaj, tukuy sonqo sirvejkunata Jehová bendecisqanta rikuchiwarqa”.

Wakenqa, waj qalluta parlayta mana atillarqankuchu. Irlandamanta Siobhan nin: “Mana parlariyta atisqaymanta rabiakoj kani. Pacienciayoj kayta yachakunay karqa, chantapis chay qalluta yachakunaypaj kallpachakunay karqa, pantaspataj asikunay karqa”, nispa. Estoniamanta Anna nin: “Qʼoñiman, jallpʼaman, qhasa yakuwan mayllakuyman ima yachakullarqani, castellanota parlaytarí mana atillarqanichu. Ashkha kutispi, kaykamalla ninaypaj karqani. Chaywanpis pantasqaypi yuyanaymantaqa, mashkhatañachus yachakusqaypi yuyanay karqa”.

Chantapis imatachus saqesqankuta faltachankupuni. Estados Unidosmanta Jonathan jinata nin: “Rinay lugarman chayasqaytawan, familiayta, amigosniyta ima mayta faltacharqani. Chaywanpis, runasman willanaypaj, Bibliata sapallaypi ukhunchanaypaj ima tiempoyta astawan churasqay, llakiyniyta atipanaypaj yanapawarqa. Willaypi  sumaj riwasqan, qotuchakuypi ashkha amigosta tarisqaypis, kusisqa kanaypaj yanapawarqa”.

Chantapis waj lugarespi kausayqa, mana kikinchu. Canadamanta Beau sutiyoj hermano jinata nin: “Suyunchejpeqa, luzmanta, yakumanta ima mana llakikunchejchu. Kaypitaj, chaykunaqa mana kallanchu”, nispa. Wajcha suyuspeqa, autos pisilla, runas mana leeyta, nitaj qhelqayta yachankuchu. Austriamanta Ines hermanataqa, runas kʼachas kasqanku chaykunata atipananpaj yanaparqa. Pay nin: “Runasqa, wajyarikuyta yachanku, kʼachas, llampʼu sonqos kanku, sumajtataj yanapakunku. Astawanpis, Diosmanta mayta yachakuyta munanku”.

“MAY CHHIKA BENDICIONESWAN JUNTʼACHIMUSQAYKICHEJ”

Tukuy chay jovenesqa, Ecuador suyupi sirvinankupaj mayta kallpachakunanku karqa. Chaywanpis Diosqa, “mañakusqanchejmantapis yuyasqanchejmantapis aswan ashkhataraj” qosqanta sutʼita rikorqanku (Efe. 3:20). Chantá, “may chhika bendicioneswan juntʼachimusqaykichej” nisqanman jinapuni Dios ruwasqanta rikullarqankutaj (Mal. 3:10). Imaynachus sientekusqankuta qhawarina.

Bruno: “Ecuadorman chayasqaytawan, Amazonas nisqa lugarpi sirverqani. Chantá sucursalta jatunchaypi yanapakorqani, kunantaj Betelpi yanapakushani. Italiapi kashajteyqa, Jehovata sirviyta ñaupajman churanayta nerqani, paytaj tukuy imaymanamanta payta sirviyta munasqayta juntʼanaypaj yanapawan”.

Beau: “Jehovawan masichakusqay sinchʼiyan, imajtinchus Ecuadorpeqa, tukuy tiempoyta payta sirvinaypaj churani. Chantapis kʼachitu lugaresta rejsini, chayta ruwaytaqa mayta munaj kani”.

Anna: “Soltera kasqayrayku, misionera jina kanayta ni yuyallarqanipischu, kunantaj atikusqanta yachani. Jehová mayta bendeciwan, noqataj wajkunaman yachachispa, Tantakunapaj Wasista ruwaypi yanapakuspa, wajkunawan masichakuspa ima, may kusisqa kashani”.

Elke: “Austriapeqa, ujllatapis Bibliamanta yachachinaypaj Jehovamanta mañakoj kani. ¡Kaypitaj, 15 runasman yachachishani! Yachachisqay runas ñauparispa may kusisqas kashasqankuta rikuspa, mayta kusikuni”.

Joel: “Mana rejsisqa lugarpi Jehovata sirveyqa may sumaj. Paypi astawan atienekuyta yachakuni, kallpachakusqayta bendecisqanta rikuspapis, mayta kusikuni. Estados Unidosmanta chayamushajteyqa, juchʼuy qotupi sojta willajkunalla karqa. Watanmantaj 21 willajkunaña karqayku, Jesuspa Wañuyninta Yuyarinapaj tantakuypitaj 110 runas karqayku”.

QANRÍ, ¿IMATATAJ RUWANKI?

Cristiano joven kanki chay, ¿manachu pisi willajkunalla kanku chayman ripuyta atiwaj? Chayta ruwanaykipajqa, ñaupajmanta allinta wakichikunayki tiyan. Astawanpis Jehovata, runa masiykita ima, mayta munakunayki tiyan. Chay munakuy kapusunki chay, rinaykipaj jinataj kanki chayqa, Jehovaman chayta willay. Chantapis, tatasniykiwan, qotuchakuymanta ancianoswan ima parlariwaj. Ajinamanta, qanpis Jehovata astawan sirviyta atisqaykita reparakunki.

[3 paginapi sutʼinchaynin]

“Diosmanta mayta mañakorqani, creeypi sumaj sayasqa hermanoswantaj parlarerqani. Chaytaj, tukuy sonqo sirvejkunata Jehová bendecisqanta rikuchiwarqa.” (Kayla, Estados Unidosmanta)

[6 paginapi recuadro, dibujo/foto]

¿Imaynatá waj suyupi willanaykipaj wakichikuwaj?

• Bibliata sapallaykipi ukhunchayman yachaykukuy

• Reinomanta Willayninchejpi 2011 agosto, 4-6 paginasninta leeriy

• Waj suyupi sirverqanku chaykunawan parlariy

• Rinayki suyu imaynachus kasqanta, imaynatachus kausakusqankuta ima yachay

• Ima qallutachus parlasqankuta tumpallatapis yachakuy

[6 paginapi recuadro, dibujo/foto]

¿Imawantaj wakin kausakunku?

• Suyunkupi mashkha killallatapis llankʼaspa

• Wasinkuta chayri negocionkuta alquilaspa

• Internetnejta trabajaspa

[4, 5 paginaspi dibujos/fotos]

1 Jaqueline (Alemania)

2 Bruno (Italia)

3 Beau (Canadá)

4 Siobhan (Irlanda)

5 Joel (Estados Unidos)

6 Jonathan (Estados Unidos)

7 Anna (Estonia)

8 Elke (Austria)

9 Chantal (Canadá)

10 Ines (Austria)