BIBLIATA noqanchejwan yachakojkunamanta ashkhas, ajinata ninku: “¡Nipuni wasimanta wasi riyta atiymanchu!”, nispa. ¿Imaraykú? Mana rejsisqa runasman willananku kasqanrayku. Chaywanpis chaytaqa sumajta umallirichej runa nerqa, pichus Bibliamanta unaytaña yachacherqa.

Kay Zionʼs Watch Tower revistata leejkunamanta ashkhas, iglesiankuta saqeporqanku, paykuna jina Bibliamanta yachakuyta munajkunawantaj kayta munaj kanku. Chayrayku chay revistapi, paykuna jina creejkunata maskʼanankuta, Bibliata ukhunchanankupajtaj tantakunankutapuni nerqa. Kay 1894 wata chaypi Sociedad Watch Tower nisqa, waturinankuta mañaj qotusman hermanosta kachayta qallarerqa. Chay sumaj llankʼajkunaqa, llampʼu sonqo karqanku, Bibliata sumajta rejserqanku, sumajta parlaj, yachachej ima kanku, Jesuspa wañuyninpi creesqankutataj rikucherqanku, chayrayku paykunata ajllakoj. Paykunaqa, uj chayri iskay pʼunchayllata waturispapis, ashkha ruwanasniyoj kaj kanku. Ashkha Bibliamanta Yachaqajkunaqa, chay hermanos umallirichisqankuman runasta wajyarispa, willayta qallarerqanku. Uj kuti, hermano Hugo Riemer, escuelapi tuta umallirichiytawan, chaupi tuta pasaykama Bibliamanta tapuykunaman kuticherqa. Qhepamantaj Diospa llajtanta kamachejkunamanta karqa. Payqa, saykʼusqa kaspapis, chay tantakuy “sumaj kasqanta” kusiywan nerqa.

Kay Watch Tower revista, qotusta waturejkuna, “creeypi kallpachanankupaj kachasqa kasqankuta” nerqa. ¿Imaynamantá? Hermanospa wasinkupi tantakuykunanejta. Chaynejpi tiyakoj Bibliamanta Yachaqajkunaqa, chay umallirichiyta uyarej, tapuykunata, kutichiykunata ruwakusqanman ima rej kanku. Chantataj, hermanos wakichisqankuta mikhoj kanku. Hermana Maude Abbott imillita kashajtin, tutamanta ruwakusqan umallirichiyman risqanta yuyarikun. Tantakuy tukukojtintaj, patiopi jatun mesapi mikhusqanku. Pay nin: “¡Ashkha mikhuna karqa, miskʼitaj! Mortadela, wallpa kanka, tukuy laya tʼanta, tortas ima karqa. Tukuy, sajsanakama mikhorqayku. Tardenpitaj waj umallirichiyta uyarerqayku. Chaywanpis, puñuyllata chʼutorqayku”, nispa. Hermano Benjamin Barton, unayta qotusta waturerqa, uj kutitaj chanzapi nerqa: “Tukuy chay miskʼi mikhunata mikhuyman karqa chayqa, unayñachá wañuyman karqa”, nispa. Tiemponmantaj, Brooklyn centralmanta uj cartata apachikorqa. Chaypitaj hermanasta yuyaychakorqa “maychus kajllata waykʼunankuta”, waturejkuna sumajta “puñukuyta atinankupaj”.

Waturej hermanosqa, dibujoswan, maquetaswan waj imaswan ima sumajta yachachej kanku. Sutʼincharinapaj, hermano Richard Harvey Barber, “gustachinapaj jinapuni” umallirichej. Chantá hermano Walter J. Thorn, may kʼacha karqa, “unaymanta Diospa kamachisnin jinataj” yachachej. Chantapis hermano Shield Toutjian, uj autopi rishajtinku: “¡Sayay!” nispa ujllata qhaparisqa. Automanta phinkiqaspa tʼikasta pallasqa, paywan viajajkunamantaj Jehovaj ruwasqasninmanta parlayta qallarisqa.

Qotusta waturejkunaqa, ashkha chʼampaykunapi rikukoj kanku, machuyasqankuman jinataj astawanraj. Wakinrí, wasimanta wasi willayman mana  yachakuyta aterqankuchu. Kay Watch Tower 15 marzo 1924 revista, kayta nerqa: “[Cheqa cristianosqa], reinomanta willanankupuni tiyan. Qotusta waturejkunataj chaypaj kachasqa kanku”, nispa.

Qotusta waturejkunamanta wakenqa, chaymanta phiñakuspa llankʼayninkuta saqeporqanku, wakintaj waj religionta sayaricherqanku. Hermano Robie D. Adkins, sumaj umallirichej hermanomanta yuyarikun, pichus qotusta waturej. Chaywanpis tijrakojtin may llakisqa jinata quejakusqa: “Plataformallamanta yachachiyta yachani. ¡Nipuni wasimanta wasi riyta atiymanchu!”, nispa. Hermano Robie yuyarikuspa nin: “Paytaqa uj jatun tantakuypi rikorqani, mayqenchus 1924 watapi Columbus (Ohio) llajtapi ruwakorqa. Chaypeqa sachʼa llanthupi, mana rejsiy sapallan sayasharqa. Chaynejpitaj ashkha hermanos kusisqa kasharqanku, paytaj qʼala umphuyasqa kasharqa. Chantá niña rikorqanichu, imaraykuchus pisi tiemponman Diospa llajtanta saqeporqa”, nispa. “May chhika hermanosrí, ladonta kusisqa pasarqanku, librosta autonkuman apaspa” wasimanta wasi mayta willayta munaspa (Hech. 20:20, 21).

Qotusta waturejkunamanta ashkha, wakichinanku hermanos jinallatajchá kharkaterqanku, jinapis sonqo kʼajaywan willarqanku. Alemán qalluta parlaj hermano Maxwell G. Friendqa, wasimanta wasi willaymanta jinata qhelqamorqa: “Qotusta waturejkuna chaytawan ruwayta atisqankoqa, sumaj bendición noqapajqa”, nispa. Waj waturejtaj John Adams Bohnet, Reinomanta willaj rinankuta nikojtin, hermanos kusisqa kashasqankuta nerqa. Ashkhastaj “sonqo kʼajaywan willaj riyta” munasqankuta.

Watas pasasqanman jina qotuchakuyta waturejkunaqa, hermanosta mayta yanapanku. Jehovata unaytaña sirvej hermano Norman Larson nerqa: “Yoqallitumantaña, qotusta waturejkuna ruwasqankuta sumajpaj qhawarqani. [...] Paykunaqa, cheqan ñanta purinaypaj yanapawarqanku”, nispa. Kunanpis qotuchakuykunata waturejkunaqa, cheqa sonqo kaspa, wajkunaj allinninkuta maskʼaspa ima tukuyta yanapawanchej. ¿Imapaj? “¡Noqaqa wasimanta wasi riyta atini!”, ninapaj.

[32 paginapi sutʼinchaynin]

Qotusta waturej jamojtin may kusiy kaj

[31 paginapi dibujo/foto]

Benjamin Barton, 1905 watapi 170 qotusta waturerqa

[32 paginapi dibujo/foto]

Walter J. Thorn may kʼacha karqa, hermanostaj Tatáy nej kanku

[32 paginapi dibujo/foto]

J. A. Browne 1902 watapi Jamaicaman 14 qotusta yanapaj, kallpachaj ima rerqa

[32 paginapi dibujo/foto]

Qotusta waturejkunaqa, hermanospa creeyninkuta kallpachaj kanku, ujchaj kanku, Diospa llajtanmantaj qayllaykuchej kanku