Reinoj kamachiyninpi kajkuna jina kausana

“Munani ari allinta kawsakunaykichejta, Cristoj evangelionman jina.” (FILI. 1:27.)

¿IMATÁ KUTICHIWAJ?

¿Pikunataj Reinoj kamachiyninpi kayta atinku?

¿Ima ninayantaj Reinoj parlayninta, imaynatachus qallarisqanta, leyesninta ima rejsiy?

¿Imaynatataj Reinoj kamachiyninpi kajkuna, Diospa kamachiykunasninta munakusqankuta rikuchinku?

1, 2. ¿Imaraykutaj Pabloj yuyaychasqan Filiposmanta qotuchakuypaj sumaj karqa?

APÓSTOL Pabloqa, Filipos qotuchakuyman jinata qhelqarqa: “Munani ari allinta kawsakunaykichejta, Cristoj evangelionman jina”, nispa (Filipenses 1:27 leey). Griego qallupi “kawsanaykichejta” rimayqa, “llajtayoj runa jina kausay” ninayan. Chaytaj Filipos qotuchakuymanta kajkunapaj sumaj karqa. Imaraykuchus paykunaqa, Roma llajtayojpis kankuman jina qhawasqa kaj kanku, Romaj leyninwantaj jarkʼasqa kaj kanku. Chaytaj wakin llajtasllapaj karqa, chayrayku paykunapajqa Romanos jina qhawasqa kasqanku, sumaj karqa.

² Pabloqa ajllasqa cristianosman “janaj pacha llajtayojkuna” kasqankuta yuyaricherqa. Chaytaj, mayqen llajtayoj kaymantapis aswan sumaj paykunapaj karqa (Fili. 3:20). Arí, Reinoj kamachiyninpi karqanku, nitaj runaj kamachiyninpichu. Chayrayku Diospa Reinonqa, paykunata jarkʼarqa, sumaj bendicionestataj qorqa (Efe. 2:19-22).

3. a) ¿Pikunataj Reinoj kamachiyninpi kayta atinku? b) ¿Imatataj kay yachaqanapi ukhuncharisun?

³ Pabloj yuyaychasqanqa ñaupajta, ajllasqa cristianospaj karqa, pikunachus Cristowan khuska janaj pachapi kamachenqanku (Fili. 3:20). Chaywanpis, Jallpʼata herenciata jina japʼejkunapaj ima kasqanta nisunman. Imaraykuchus tukuy bautizasqa cristianosqa, Jehovallata Reyninkuta jina sirvinku, kikin kamachiykunatataj kasukunku (Efe. 4:4-6). Kay tiempopeqa ashkha runas, uj qhapaj suyumanta llajtayoj kanankupaj tukuy imata ruwanku. Noqanchejqa, Reinoj kamachiyninpi kayta aswan sumajpaj qhawananchej tiyan. Chayta aswan sumajpaj qhawanapajtaj, uj suyumanta llajtayoj kaywan, Reinoj kamachiyninpi  llajtayoj jina kaywan, imaspichus kikinchakusqanta qhawarina. Chantataj Reinoj kamachiynillanpipuni kanapaj, kinsa imasta ruwana kasqanta ukhuncharisun.

¿IMATÁ WAJ SUYUYOJ KANAPAJ RUWANA?

4. ¿Imataj llimphu parlay, imaynamantá “parlanchej”?

⁴ Qalluta yachakuna. Wakin gobiernosqa, suyunkumanta kayta munajkunata, chaypi parlakoj qalluta yachakunankuta mañanku. Wakenqa, waj suyumantaña kaspapis wataspiraj sumajta parlayta yachakunku. Ichapis imaynatachus qhelqakusqanta, parlakusqanta ima ratu yachaqanku, chaywanpis mana chay qalluta parlariyta atinkuchu. Diospa Reinonpa kamachiyninpi kayta munajkunapis, Biblia nin jina llimphu parlayta yachakunanku tiyan (Sofonías 3:9 leey). ¿Imataj chay llimphu parlay? Diosmanta, munayninmanta ima cheqa yachachiy, chaytaj Bibliapi tarikun. ¿Imaynamantá chay llimphu parlayta parlanchej? Diospa kamachiykunasninman jina, yuyaychaykunasninman jinataj kausaspa. Reinoj kamachiyninpi kajkunaqa, ichapis Bibliaj yachachiykunasninta ratolla yachakunku, bautizakunkutaj. Chaywanpis bautizasqaña kaspapis, llimphu parlayta aswan sumajta “parlanankupaj” kallpachakunanku tiyan. Sapa ujninchej Bibliapi yachakusqanchejman jinapuni kausakunapaj, mayta kallpachakuna.

5. ¿Imaraykutaj Jehovaj llajtanmanta astawan yachakunanchej tiyan?

⁵ Chay suyumanta yachakuna. Waj suyumanta kayta munajkunaqa, imaynatachus chay suyu qallarisqanta, wiñasqanta ima tumpallatapis yachananku kanqa. Ajinallatataj Reinoj kamachiyninpi kayta munajkunaqa, chay gobiernomanta tukuy atisqankuta yachananku tiyan. Corejpa wawasninmanta mayta yachakusunman, pikunachus Israelpi sirverqanku. Paykunaqa, Jerusalenta, Diosta yupaychana lugarta ima munakorqanku. Chayraykutaj chay llajtamanta wajkunaman parlaspa miskʼichikoj kanku. Chaywanpis mana kʼachitu kasqanraykullachu, manaqa chay llajta, Diosta yupaychana lugar ima, imawanchus ninakusqanta yachasqankurayku. Arí Jerusalenqa, “jatun Reypa” nisunman Jehovaj llajtan karqa. Imaraykuchus Jehovata chaypi yupaychakoj, Leynintataj yachachikoj. Jehovaqa, Jerusalenmanta reypaj kamachiyninpi kajkunata allinpaj qhawaj, munakojtaj (Salmo 48:1, 2, 9, 12-14). Qanrí, ¿Jehovaj llajtamanta yachakuyta, wajkunaman willariyta ima maytachu munanki? Jehovaj llajtanmanta, imaynatachus pay yanapasqanmanta ima astawan yachajtiykeqa, Diospa Reinon kasqan  aswan sutʼi qanpaj kanqa. Chantapis, chay Reinomanta sumaj willaykunata astawan willayta munanki (Jer. 9:24; Luc. 4:43).

6. ¿Imaraykutaj Jehová leyesninta, yuyaychaykunasninta ima, rejsinanchejta, kasukunanchejta ima munasqan maychus kajlla?

⁶ Leyesta rejsina. Gobiernosqa, kamachiyninpi kajkuna, suyunkoj leyesninta rejsinankuta, kasukunankuta ima munanku. Jehovapis leyesninta, yuyaychaykunasninta ima, rejsinanchejta, kasukunanchejta ima munan (Isa. 2:3; Juan 15:10; 1 Juan 5:3). Runaspa wakin leyesninkoqa, mana allinchu, nitaj cheqanchu. Chaywanpis “Tata Diospa yachachisqanqa [nisunman leynenqa] mana pantayniyoj” (Sal. 19:7). Qanrí, ¿Diospa leyninwan miskʼichikunkichu? ¿Sapa pʼunchaychu Palabranta leenki? (Sal. 1:1, 2.) Diospa leyninta rejsinapajqa, sapa uj ukhunchananchej tiyan. Mana pipis noqanchejpaj yachapuwasunmanchu.

REINOJ KAMACHIYNINPI KAJKUNA DIOSPA LEYESNINTA MUNAKUNKU

7. ¿Imaraykutaj Reinoj kamachiyninpi kajkuna Diospa leyninta kasukunchej?

⁷ Reinoj kamachiynillanpipuni kanapajqa, Diospa kamachiykunasninta rejsinanchej, munakunanchej ima tiyan. Kay pachapeqa, ashkha runas suyunkoj leyesninta kasukusqankuta ninku. Chaywanpis mana allinninkupaj kajtin, ni pi qhawashajtin ima Leyta pʼakinku. Arí, runasqa imatapis “allimpaj qhawasqa kana[lla]nkupaj ruwanku” (Col. 3:22). Reinoj kamachiyninpi kajkunataj, mana jinatachu ruwanchej. Ni pi rikushawajtinchejpis, Diospa leyninta kasukunchejpuni. ¿Imaraykú? Jehovata munakusqanchejrayku (Isa. 33:22; Lucas 10:27 leey).

8, 9. ¿Imaynatá Jehovaj leyesninta cheqamanta munakusqaykita yachawaj?

⁸ ¿Imaynatá Jehovaj leyesninta cheqamanta munakusqaykita yachawaj? Yuyaychasojtinku imaynatachus kutichisqaykipi tʼukurispa. Sutʼincharinapaj, ichapis pʼachallikusqaykimanta chayri kʼachanchakusqaykimanta yuyaychasunkuman. Manaraj Diosmanta cheqa kajta yachashaspaqa, ichá imayna pʼachallisqapis purillaj kanki. Chaywanpis Diosta munakusqaykiman jina, sutinta jatunchanapaj jina pʼachallikuyta qallarerqanki (1 Tim. 2:9, 10; 1 Ped. 3:3, 4). Kunantaj maychus kajllata pʼachallikushasqaykita yuyanki. Chaywanpis uj anciano qotuchakuypi hermanosta miskʼachinapaj jina pʼachallikushasqaykita nisojtin, ¿imatá ruwawaj? ¿Allillanta pʼachallikushasqaykitachu niwaj? ¿Phiñarikuwajchu chayri kʼullukuwajchu? Reinoj kamachiyninpi kajkunaqa, Cristo jina ruwananku tiyan (1 Ped. 2:21). Apóstol Pablo jinata nerqa: “Sapa ujninchej runa masinchejta kusichina, imatapis paypa allinnimpaj ruwaspa, ajinamanta creeypi wiñachisqa kanampaj. Cristopis mana paypa allinnillantachu maskʼarqa”, nispa (Rom. 15:2, 3). Creeypi sumaj sayasqa cristianoqa, qotuchakuy allin kananpaj, mana paypa allinnillantachu maskʼan, manaqa wajkunaj allinninkuta (Rom. 14:19-21).

⁹ Iskay imasmantawan parlarina. Qhariwarmi jina puñuykuyta, casarasqa kausayta ima, imaynatachus qhawasqanchejmanta. Mana Reinoj kamachiyninpi kajkunaqa, ichapis qharipura chayri warmipura jinanakuyta allillanpaj qhawanku. Qʼala runasta qhaway sonqota kusichinapaj allillan kasqantataj ninku. Chantapis qhenchachakuyta, divorciakuyta ima, sapa uj ajllanan kasqanta yuyanku. Chaywanpis Reinoj kamachiyninpi kajkunaqa, ima ñakʼariykunachus kananpi tʼukurinku, nitaj paykunallapichu yuyanku. Ashkha hermanosqa, niraj cristianos kashaspa millay kausayniyoj karqanku,  kunantaj qhariwarmi jina puñuykuy, casarasqa kausay ima, Diospa regalon kasqanta yachanku. Chantapis Diospa kamachiykunasninta jatunpaj qhawanku, khuchichakuspa kausajkuna mana Reinoj kamachiyninpi kayta atisqankutataj sutʼita yachanku (1 Cor. 6:9-11). Chaywanpis sonqo chʼauka kasqanta yachallankutaj (Jer. 17:9). Chayrayku, llimphu kausayniyoj kanankupaj yuyaychaykunata japʼisqankumanta, mayta agradecekunku.

KAMACHIYKUNATA JATUNPAJ QHAWANKU

10, 11. ¿Ima yuyaychaykunatataj Diospa Reinon qowanchej, imatataj qan chaymanta yuyanki?

¹⁰ Gobiernosqa, ima mikhunapis, ima jampipis mana allin kasqanta yachaspa, willachinkupacha. Yachanchej jina mana tukuy mikhunaschu, nitaj tukuy jampischu mana allin. Chaywanpis, chaykunamanta mayqellanpis runasta wañuy pataman churajtin, gobiernosqa chaykunamanta runas jarkʼakunankupaj willachinku. Mana willachispaqa, paykuna juchayoj kankuman. Ajinallatataj Diospa Reinonqa, Diosmanta karunchachinawanchejpaj jina ruwaykunamanta, jarkʼakunapaj willachiwanchej. Sutʼincharinapaj, allin kamachi yuyayniyojqa, Internetnejta qʼala runasta qhaway, cristianospaj mana allinchu kasqanta watastaña niwanchej. Tukuy chay willaykunamanta, mayta agradecekunchej.

¹¹ Internetpeqa kunallanraj redes sociales nisqa rikhurin, tukuynejmanñataj chayashan. Chaykunataj allinta apaykachajtinchejqa, yanapawasunman. Mana allinta apaykachajtinchejrí, ñakʼarichiwasunman. Imaraykuchus, sajra runaswan masichachiwasunman (1 Cor. 15:33). Chayraykuchá Jehovaj llajtanqa, chaykunamanta jarkʼakunapaj ashkha yuyaychaykunata orqhon. Allin kamachi yuyayniyoj, redes sociales nisqamanta publicacionesta orqhosqanta, ¿tukuynintañachu leenki? Chaykunata mana leespalla redes sociales nisqata apaykachayqa, uj jampita imapajchus kasqanta mana yachaspalla ujyaykuy jina kanman. *

12. ¿Imaraykutaj yuyaychaykunata mana kasukuspa wampus kasunman?

¹² Allin kamachejpa yuyaychaykunasninta mana kasukojkunaqa, paykunallataj ñakʼarinku, chantapis familiankuta, amigosninkuta ima ñakʼarichinku. Qʼala runasta qhawayman yachaykukojkuna chayri khuchichakuypi urmajkunaqa, Jehová mana rikushasqanta yuyaspa chʼaukiyakunku. ¡Ama wampu jinaqa yuyanachu!, Jehovaqa tukuy imata rikushan (Pro. 15:3; Hebreos 4:13 leey). Gobiernosqa, leyta pʼakejkunata suyunkumanta wijchʼuyta atinku, ajinallatataj Jehovapis kamachiyninta pʼakejkunata, nitaj pesachikojkunata, mana Reinoj kamachiyninpi kanankuta saqenqachu (1 Cor. 5:11-13). * Chaywanpis may khuyakuyniyoj kasqanrayku, chay runasta ancianosnejta yanapan (Gál. 6:1). Arí, pesachikojkunata, sajra ruwaykunasninkuta saqejkunata ima, Dios watejmanta allinpaj qhawan, Reinoj kamachiynillanpipunitaj kanku (2 Cor. 2:5-8). Chay jina munakuyniyoj Reyta sirveyqa, ¡may sumaj!

 YACHACHISQA KAYTA SUMAJPAJ QHAWANKU

13. ¿Imaynatá Reinoj kamachiyninpi kajkuna, yachachiykunata sumajpaj qhawasqankuta rikuchinku?

¹³ Ashkha gobiernosqa, suyunkupi tiyakoj runasta yachachinankupaj kallpachakunku. Runas leeyta, qhelqayta ima yachakunankupaj, oficioyoj kanankupaj ima, escuelasta ruwachinku. Cristianostaj chay yanapata sumajpaj qhawanku. Chayrayku leeyta, qhelqayta, llankʼayta ima kʼuchi kʼuchilla yachakunku. Chaywanpis, Dios llajtannejta yachachisqanta aswan sumajpaj qhawanku. Jehovaqa, qotuchakuynejta sumaj leejkuna kanankupaj yanapan. Tatastapis juchʼuy wawitasninkupaj leepunankuta yuyaychan. Chantapis allin kamachi yuyayniyojqa, sapa killa Bibliamanta publicacionesta orqhon. Sapa pʼunchay iskay paginasta jina leespaqa, Jehová yachachiwasqanchejwan mayta yanapachikunki.

14. a) ¿Ima yanapastataj yachakunapaj japʼinchej? b) Familiapi Diosta Yupaychanapaj tantakuyta, ¿mayqen yuyaychayman jinataj ruwashanki?

¹⁴ Reinoj kamachiyninpi kajkunataqa, sapa semana tantakuykunapi yachachikun. Sutʼincharinapaj, Diosmanta Parlayta Yachaqanapaj tantakuytaqa, 60 watas kurajña ruwakushan. Chaypeqa yachakojkunata Diospa Palabranmanta sumaj yachachejkuna kanankupaj yanapakun. ¿Chaypi qhelqachikunkiñachu? Chantapis kay qhepa wataspi allin kamachi yuyayniyojqa, Familiapi Diosta Yupaychanapaj tantakuyta ruwanata kutin kutita niwanchej. Chay tantakuyta ruwayqa, familiasta mayta ujchan. Publicacionesninchejpi imaynatachus ruwaymanta yuyaychakusqanman jina, ¿ruwankiñachu? *

15. ¿Imata ruwaytaj ni imawan kikinchakunchu?

¹⁵ Gobiernospa kamachiyninpi kajkunaqa, ima partidotapis yanapankupuni, wakin kutitaj wasimanta wasi, votosta mañaspa purinku. Reinoj kamachiyninpi kajkunaqa, Diospa gobiernonta astawanraj yanapanku, callespi, wasimanta wasi ima willaspa. Ñaupaj yachaqanapi rikorqanchej jina, Torremanta Qhawaj revistaqa, Diospa Reinonmanta willanapaj, ni mayqen revista jina Jallpʼantinpi orqhokushan. Chay Reinomanta willayqa, ni imawan kikinchakunchu. Qanrí, ¿sonqo kʼajaywanchu willashanki? (Mat. 28:19, 20.)

16. ¿Imaynatataj Reinoj kamachiyninpi, sumaj runas kasqanchejta rikuchisunman?

¹⁶ Tumpamantawanqa, Diospa gobiernollan Jallpʼantinpi kamachenqa. Tukuy imapitaj yanapawasun. Chay tiempopi, ¿sumaj runaschu kasun? Kunanmantapacha, sumaj runas kasqanchejta rikuchinanchej tiyan. Chayrayku, sapa pʼunchay imatapis ajllashaspa Jehovata jatunchanapaj jina ruwana. Chantapis Reinoj kamachiyninpi kajkuna jina kausasqanchejta sutʼita rikuchina (1 Cor. 10:31).

[Sutʼinchaykunasnin]

[Tapuykuna]

[14 paginapi sutʼinchaynin]

Internetmanta publicacionespi yuyaychakusqanta, ¿kasukunkichu?

[12 paginapi dibujo/foto]

¿Corejpa wawasnin jinachu cheqa yupaychayta, imaynatachus qallarisqanta ima, may sumajpaj qhawanki?

[15 paginapi dibujo/foto]

Familiapi Diosta Yupaychanapaj tantakoyqa, qanta familiaykita ima, Reinoj kamachiyninpi sumaj runas kanaykichejpaj yanapasonqachej