Satanaspa tojllasninman sinchʼita sayaykuna

“Kuraj Supay urmachiyta munasojtiykichej, [...] sinchʼita saya[ychej].” (EFE. 6:11.)

¿IMATÁ KUTICHIWAJ?

¿Imatá Jehovaj kamachisnin qolqeta munapayay lazo mana sipiykunanpaj ruwankuman?

¿Imataj casarasqa cristianota yanapanqa qhenchachakuy tʼoqoman mana urmananpaj?

¿Imaynatá qolqeta munapayta, qhenchachakuyta ima qhesachay yanapawanchej?

1, 2. a) ¿Imaraykutaj ajllasqa cristianosta, “waj ovejas[manta]” kajkunata ima Satanás mana khuyakunchu? b) ¿Satanaspa ima tojllasnintataj kay yachaqanapi ukhuncharisun?

SATANASQA, runasta astawanpis Jehovaj kamachisninta mana khuyakunchu. Chayraykutaj Jallpʼapiraj kausaj ajllasqa cristianoswan maqanakushan (Apo. 12:17). Chay cheqa sonqo cristianosqa, kay tiempopi Reinomanta willakunanpaj umachanku, Kuraj Supay kay pachata kamachishasqantataj sutʼinchanku. Satanasqa, “waj ovejas[manta]” kajkunatapis chejnikullantaj, paykunaqa ajllasqa cristianosta yanapanku, chantapis wiñay kausayta suyakunku (Juan 10:16). Satanastaj niña wiñaypaj kausayta atenqachu, chayrayku may phiñasqa kashan. Arí, enemigonchej Satanasqa, janaj pachapi chayri Jallpʼapi kausakuyta suyakojtinchejpis, oqoykuyta munawanchej (1 Ped. 5:8).

² Chaypajtaj imaymana tojllasta churan. Jehovapi mana creejkunataqa yuyayninkuta laqhayachin, chayrayku sumaj willaykunata qhesachanku, nitaj chay tojllata reparankuchu. Diospa Reinonmanta yachakojkunatapis urmachishallantaj (2 Cor. 4:3, 4). Kinsa kaj yachaqanapeqa, Satanaspa kinsa tojllasninta imaynatachus qhesachanamanta yachakorqanchej: 1) imallatapis parlarpariymanta, 2) manchachikuymanta, wajkunaj munasqankuman jinataj ruwaymanta, chantá 3) sonqonchej juchachawasqanchejmanta. Kunantaj iskay tojllasninmantawan parlarisun: qolqeta munapayaymanta, qhenchachakuymanta ima.

QOLQETA MUNAPAYAYQA UJ LAZO JINA SIPIWASUNMAN

3, 4. ¿Imaynatá kay pachaj imasninpi yuyay, qhapajyayta munanapaj tanqawasunman?

³ Jesusqa uj rijchʼanachinanpi khishkarara jallpʼapi,  mujuta tʼakakusqanmanta parlarqa. Sutʼinchasqanman jinataj, chayqa “Palabrata uyarejwan ninakun. Jinapis kay pacha imaspi yuyaykuna, qhapajyayta munapayay ima Diospa Palabranta pʼampaykuspa, mana poqojta saqenkuchu” (Mat. 13:22). Rikunchej jina, Satanasqa qolqeta munapayayta uj tojllata jina churawanchej.

⁴ Rikunchej jina, iskay imas ujchakuspa “Diospa Palabranta pʼampayku[nku]”. Ujqa “kay pacha imaspi yuyaykuna”. Kay qhepa “manchay sajra” pʼunchaykunapeqa ashkha imas, ni puñojtapis saqewasunmanchu (2 Tim. 3:1). Tukuy ima wicharisqanrayku, llankʼay mana kasqanrayku ima, niña qolqe alcanzakunchu. Qhepaman imachus kananpi tʼukurispataj, ichá tapukusunman: “¿Niña llankʼayta atejtiy, kausakunaypaj qolqe kapuwanqachu?”, nispa. Wakinkunaqa, chaymanta llakikuspa qhapajyayta munanku, ajinamanta qolqe mana pisinanta yuyaspa.

5. ¿Imaynatá “qhapajyayta munapayay” chʼaukiyawasunman?

⁵ Jesusqa, “qhapajyayta munapayay[manta]” parlallarqataj. Chaytaj, kay pachaj imasninpi yuyaywan ujchakojtin Palabrata pʼampaykunman. Biblia nisqanman jina, qolqeqa “jarkʼakuna escudo jina” (Ecl. 7:12). Chaywanpis qolqellata maskʼayqa, mana allinchu. Ashkha runasqa, qhapaj kanankupaj astawan llankʼaspa, qolqeta munapayay tojllaman urmasqankuta reparanku. Jinamanta, qolqej wata runanman tukunku (Mat. 6:24).

6, 7. a) ¿Imaynatá llankʼayninchejpi qolqeta munapayayta qallarisunman? b) ¿Imastá tapurikunanchej tiyan astawan llankʼanata niwajtinchej?

⁶ Qolqeta munapayaymanqa, mana reparakuspalla urmasunman. Patronniyki kayta nisusqanpi tʼukuriy: “¡Allin willaykuna tiyan! Empresaqa, uj sumaj contratota ruwan. Chayrayku qhepan killastaqa astawan llankʼana kanqa, astawantaj gananki”, nispa. ¿Imatá ruwawaj? Familiaykipajqa necesitasqanta apanaykipuni tiyan, chaywanpis mana chayllatachu ruwanayki tiyan (1 Tim. 5:8). Waj imaspiwan tʼukurinayki tiyan. Sutʼincharinapaj, ¿mashkha horastawantaj llankʼanayki kanqa? ¿Diosta yupaychaypi ruwanasniykita juntʼayta atinkichu? Tantakuykunaman rinaykipaj, Familiapi Diosta Yupaychana tantakuyta ruwanaykipaj ima, ¿tiempoyki kanqachu?

⁷ ¿Imataj qanpaj aswan valorniyoj? ¿Bancopi ashkha qolqe kapusunanchu chayri Dioswan allinpi kaychu? ¿Qolqeta astawan ganayta munaspachu niña Diosta yupaychayta ñaupajman churanki? ¿Imapitaj tukunman Dioswan masichakusqaykichej?  Ajinapiña rikukunki chay, ¿imatá ruwawaj qolqeta munapayay mana sipiykusunanpaj? (1 Timoteo 6:9, 10 leey.)

8. Biblia nisqanman jina, ¿pikunaj kausayninkutaj kausayninchejta qhawarikunapaj yanapawasunman?

⁸ Qolqeta munapayay mana sipiykusunanpajqa, sapa kuti kausayniykita qhawarikunayki tiyan. Ama Esaú jina kaychu. Payqa Diospa nisqasninta pisipaj qhawarqa (Gén. 25:34; Heb. 12:16). Amallataj Jesuspa tiemponmanta uj qhapaj runa jina kaychu. Payqa kapuykunasninta vendenanmanta, wajchasta yanapananmanta, Cristoj discipulon kananmanta imaqa, “llakisqa riporqa, imaraykuchus may jina qhapaj karqa” (Mat. 19:21, 22). Ashkha kapuyniyoj kasqanqa, watasqata japʼerqa. Chayrayku, may sumajpaj qhawasqa runaj discipulon kayta qhesacharqa. Noqanchejpis mana ajinata ruwayta munanchejchu chayqa, qolqeta munapayaymanta jarkʼakunanchej tiyan.

9, 10. ¿Imatá Biblia yachachin kapuyniyoj kaymanta?

⁹ Kapuyniyoj kaymanta mana anchata llakikuyta munanchejchu chayqa, Jesuspa yuyaychasqanta kasukuna, pay nerqa: “Ama phutikuychejchu: Imatataj mikhusun? Imatataj ujyasun? Chayri imawantaj pʼachallikusun? nispa. Diosta mana rejsej runasqa chay imasllata anchata maskʼanku. Janaj pacha Dios Tataykichejrí yachanña chay tukuy imamanta pisichikusqaykichejta” (Mat. 6:31, 32; Luc. 21:34, 35).

¹⁰ Bibliata qhelqaj Agurqa, qolqe yanapanawanchejpaj kasqanta yacharqa. Chaywanpis qhapajyayta munapayaywan mana chʼaukiyachikorqachu. Chayrayku Jehovamanta kayta mañakorqa: “Ama anchata qhapajyachiwaychu, nitaj anchata wajchayachiwaychu. Imachus mikhunaypaj kajllata ama pisichipuwaychu”, nispa (Pro. 30:8). Noqanchejpis, kikinta yuyanapaj kallpachakuna. Kay pachaj imasninpi yuyay, qhapajyayta munapayay ima, Jehovamanta karunchawasunman. Kapuyniyoj kaymanta anchata phutikusun chayqa, Diospaj llankʼanapaj mana tiemponchej, nitaj kallpanchej kanqachu, qhellakusuntaj. Chayrayku ama saqenachu, Satanás qolqeta munapayay tojllanman urmachinawanchejta (Hebreos 13:5 leey).

QHENCHACHAKUYMAN URMAYQA PAKASQA TʼOQOMAN URMAY JINA

11, 12. ¿Imaynatá uj cristiano qhenchachakuyman llankʼayninpi urmanman?

¹¹ Kʼita animalesta japʼejkunaqa, jatuchaj animalesta japʼinankupaj, purinanpi uj tʼoqota allanku chantá sachʼaj ramasninta patanman churaykunku, jallpʼawantaj tapaykunku. Satanasqa, ajina tojllallawantaj ashkha runasta urmachin: chaytaj khuchichakuy (Pro. 22:14; 23:27). Cristianospis, khuchichakuyman urmanankupaj jina imasta ruwaspa, chay “tʼoqoman” urmallankutaj. Sutʼincharinapaj wakin casarasqa cristianosqa, waj qhariwan chayri waj warmiwan purisqankurayku qhenchachakunku.

¹² ¿Maypitaj mana allinta puriyta qallarinkuman? Llankʼayninkupi. Ashkha warmis qosankuta, chantá may chhika qharis warminkuta llankʼaj masinkuwan wasanchanku. Llankʼayniykipi qharis warmis khuska llankʼanku chay, ¿munanakuyta qallarinaykipaj jinachu llankʼaj masiykiwan apanakunki? Mana imapis rikhurishananpaj, ¿maykamallachus imatapis ruwanaykita yachankichu? Ichapis uj hermana llankʼananmanta uj qhariwan sumajta apanakunman, qhariwarmi kausayninpi chʼampaykunasninmantapis  payman willakunman. Chayri uj hermano, llankʼayninmanta uj warmiwan sumajta apanakuspa ichá ajinata yuyanman: “Payqa imatachus nisqayta may sumajpaj qhawan, sumajtataj uyariwan. ¡Paymá jatunpaj qhawawanqa! Ajinata wasiypi qhawanawankuta munayman”, nispa. Jinapi rikukuspaqa, qhenchachakuyman urmankuman.

13. ¿Imaynatá mana allinta puriy qotuchakuypipis rikhurinman?

¹³ Mana allinta pureyqa, qotuchakuypipis rikhurillanmantaj. Danielwan Sarawanqa, chayta kausayninkupi rikorqanku. * Paykunaqa, qhariwarmi precursores regulares karqanku. Danielqa anciano karqa, qotuchakuypitaj “ima llankʼaytapis japʼikojpacha”. Chantapis phishqa jovenesman Bibliamanta yachachej. Chaykunamanta kinsa bautizakorqanku, chantá yanapata mayta necesitarqanku. Danieltaj qotuchakuypi ruwaykunasninrayku mana tiempoyoj kaj, chayrayku warmin chay jovenesta sapa necesitajtinku yanapaj. Sara yanapata necesitajtintaj, paykuna sonqochaj kanku. Ajinamanta uj tojlla rikhurerqa. ¿Imataj karqa? Daniel sutʼinchan: “Warmeyqa ashkha killasta paykunata yanaparqa. Chaytaj may saykʼusqata saqerqa. Chaywanpis noqaqa mana yanapasharqanichu, chayrayku warmeyqa ujninwan qhenchachakorqa. Noqataj Jehovamanta karunchakushasqanta ni repararqanichu, ruwanasnillaypi yuyasqayrayku”, nispa. ¿Imatá chay jina llakiypi mana rikukunapaj ruwasunman?

14, 15. ¿Imataj casarasqa cristianosta qhenchachakuyman mana urmanankupaj yanapanqa?

¹⁴ Qhenchachakuyman uj tʼoqoman jina mana urmanapajqa, qhariwarmi kausanapaj parlasqanchejta jatunpaj qhawana. Jesús nerqa: “Diospa ujchasqanta ama runaqa tʼaqachunchu”, nispa (Mat. 19:6). Ni jaykʼaj yuyaychu, qotuchakuypi ruwanasniyki warmiykimanta ñaupajpi kasqantaqa. Sapa kuti waj ruwanasrayku mana warmiykiwan khuskachu kanki chayqa, allinta qhawarikuy. Ichapis qhariwarmi kausayniyki mana kallpachasqachu kashan. Chayraykutaj qhenchachakuy juchapi urmawaj.

¹⁵ Anciano kanki chayqa, qotuchakuyta qhawanayki tiyan. Apóstol Pablopis kayta nerqa: “Diosqa qhawanaykichejpaj makiykichejman churarqa, chay tropata michiychej. Sumaj qhawajkuna kaychej, ama tanqasqa jinallachu, manachayqa tukuy sonqo, Dios imaynatachus munasqanman jina. Amataj qolqeta maskʼaspachu paykunata qhawaychej, manachayqa Señorta sirviyta munasqaykichejrayku”, nispa (1 Ped. 5:2). Chayrayku, qotuchakuymanta hermanosta qhawanaykipuni tiyan. Chaywanpis mana sumaj michej kanaykiraykuchu, sumaj qosa kayta saqenki. Mana allinchu kanman, qotuchakuymanta hermanosllata yanapanayki warmiykitataj mana. Daniel nillantaj: “Waj ruwaykunata juntʼanarayku, familiata saqerpayqa mana allinchu”, nispa.

16, 17. a) Casarasqa cristianos mana wajwan puriyta munasqankuta, ¿imaynatá llankʼayninkupi rikuchinkuman? b) Cristianos mana qhenchachakuypi urmanankupaj, ¿ima yanapastataj orqhokun?

¹⁶ Kay Torremanta Qhawaj, chantá ¡Despertad!, revistaspi, uj cristiano qhenchachakuyman mana urmananpaj yanapas tiyan. Sutʼincharinapaj La Atalaya 15 septiembre 2006 revistapeqa, kayta nerqa: “Llankʼayniykipi, waj lugarespi ima kashaspa, waj qhariwan chayri waj warmiwan anchata masichakuymanta jarkʼakuy. Mana llankʼana horaspi waj warmiwan  chayri waj qhariwan llankʼayqa, tojlla jina kanman. Casarasqa jina, parlasqaykiwan, ruwasqaykiwan ima, mana wajwan puriyta munasqaykita sutʼita rikuchiy. Chantapis Diosta yupaychaj runa jina ama coqueteaychu, maychus kajllata pʼachallikuy, allinchakuy ima [...]. Astawanpis warmiykej, wawasniykej fotosninkuta llankʼayniykipi sutʼiman churay. Chaytaj pichus ñaupajpi kasqanta yuyarichisonqa, wajkunapis chayta reparanqanku. Pipis imata ruwaspa sonqoykita suwasunanta, amapuni saqeychu”.

¹⁷ Kay ¡Despertad! abril 2009 revistapi, “¿Qué implica realmente la fidelidad conyugal?”, nisqa yachaqanapi, pichus waj qhariwan chayri waj warmiwan puriyta yuyajqa, qhenchachakuyman urmananpaj jina kashasqanta nerqa (Sant. 1:14, 15). Casarasqa cristianosqa, chay revistasta sapa kuti khuska ukhunchananku kanman. Qhariwarmi kausaytaqa, Jehová rikhuricherqa. ¿Imaynatá casarasqa kajkuna, chayta jatunpaj qhawasqankuta rikuchinkuman? Qhariwarmi kausayninkumanta parlarinankupaj tiempochakuspa (Gén. 2:21-24).

18, 19. a) ¿Ima ñakʼariykunapitaj qhenchachakojkuna rikhurinku? b) ¿Ima bendicionestataj japʼisun warminchejta chayri qosanchejta mana wasanchajtinchej?

¹⁸ Maykʼajllapis wajwan puriyman tanqasqa kawaj chayqa, khuchichakuypi, qhenchachakuypi urmay ima llakiykunatachus apamusqanpi tʼukuriy (Pro. 7:22, 23; Gál. 6:7). Qhenchachakuypi urmajkunaqa, Jehovata phiñachinku, qosanpa chayri warminpa sonqonta nanachinku, paykuna kikintaj ñakʼarinku (Malaquías 2:13, 14 leey). Mana khuchichakuspa kausayrí, ima bendicionestachus apamusqanpi tʼukuriy. Ajinamanta mana wiñaypaj kausayllatachu suyakunki, manaqa kunan kusisqa, sonqo juntʼasqataj kausakunki (Proverbios 3:1, 2 leey).

¹⁹ Uj salmista ajinata Jehovaman takerqa: “Yachachisqasniykita munakojkunaqa sonqo tiyaykusqallapuni kanku, nitaj imapis paykunata miskʼachiyta atinchu”, nispa (Sal. 119:165). Chayrayku cristianosqa cheqa kajta munakunanchej tiyan. Chantapis Bibliapi nin: “Allinta qhawakuychej imaynatachus kawsasqaykichejta; ama kawsaychejchu wampus jinaqa, manachayqa yuyayniyojkuna jina”, nispa (Efe. 5:15, 16). Satanasqa, kay tiempopi imaymana tojllasta, Diospa kamachisninman churawanchej. Chaywanpis Jehovaqa, jarkʼakunapaj tukuy ima necesitasqanchejta qowanchej. Ajinamanta “sinchʼita” sayanapaj, chantapis “Kuraj Supaypa tukuynin larwashaj flechasninta” thasnunapaj (Efe. 6:11, 16).

[Sutʼinchaynin]

[Tapuykuna]

[26 paginapi dibujo/foto]

Qolqeta munapayayqa Diosmanta karunchasunkiman. Ama saqekuychu

[29 paginapi dibujo/foto]

Ama coqueteaychu nitaj turiyasunankuta saqeychu, qhenchachakuypitaj urmawaj