¡Satanaspa tojllasninpi pajtataj urmawaj!

“Kuraj Supaypa tojlla churasqanmanta lluspʼi[ychej].” (2 TIM. 2:26.)

¿IMATÁ KUTICHIWAJ?

Wajkunata qhawaranchejpuni chay, ¿imastá tapurikunanchej tiyan?

Manchachikuyman, wajkunaj munasqankuman jinataj ruwayman mana urmanapaj, ¿imatá Pilatomanta, Pedromanta ima, yachakunchej?

¿Imatá ruwasunman sonqonchej juchachawasqanchej mana ñatʼuykunawanchejpaj?

1, 2. ¿Satanaspa ima tojllasnintataj kay yachaqanapi ukhuncharisun?

KURAJ SUPAYQA, Jehovaj kamachisninta mayta wateqashan. Chaywanpis, mana kʼita animalesta japʼejkuna jinachu wañuchiytapuni munan. Astawanqa, paykunata kausashajta japʼiyta munan, munayninman jina imatapis ruwachinanpaj (2 Timoteo 2:24-26 leey).

² Kʼita animalesta japʼejqa, kausashajta japʼiyta munaspa, imaymana tojllasta churanman. Sutʼincharinapaj, kʼita animalta juskʼunmanta llojsichispa lazowan japʼirpanman, chayri pakasqa tojllata wakichinman animal tuparpajtin ujllata japʼerqonanpaj. Kuraj Supaypis, kausashajta japʼinawanchejpaj kikin tojllasllatataj churawanchej. Tojllasninman mana urmanapajqa, imaswanchus urmachiyta munawasqanchejta, sumajta qhawakunanchej tiyan. Kay yachaqanapeqa, Satanaspa kinsa tojllasninmanta parlarisun, mayqenkunawanchus wakin cristianosta urmachinña: 1) imallatapis parlarpariymanta, 2) manchachikuymanta, wajkunaj munasqankuman jinataj ruwaymanta, chantá 3) sonqonchej juchachawasqanchejmanta. Qhepan yachaqanapitaj iskay tojllasninmantawan parlarisun.

IMALLATAPIS PARLARPAYQA NINA JINA

3, 4. ¿Imataj kanman imallatapis parlarparejtinchej? Sutʼinchariy.

³ Kʼita animalesta japʼejqa, juskʼunmanta llojsichimunanpaj ninata japʼichin, llojsimojtin japʼerqonanpaj. Kuraj Supaypis, kikillantataj ruwan. Payqa, qotuchakuypi “ninata jina japʼichiyta” munan, qotuchakuymanta llojsipunanchejpaj, makisninmantaj urmananchejpaj. ¿Imaynatá mana reparakuspalla chay tojllanman urmasunman?

⁴ Discípulo Santiagoqa, “qallurí uj nina jina” kasqanta  nerqa (Santiago 3:6-8 leey). Imallatapis parlarparispaqa, qotuchakuypi “ninata jina japʼichisunman”. ¿Imaynamantá? Kaypi tʼukurina: tantakuypi, uj hermana precursora jina llankʼananta willakun. Tantakuy tukukojtintaj, iskay hermanas chaymanta parlarinku. Ujnenqa, mayta kusikusqanta, allin rinanta munasqanta ima nin. Ujnintaj, chay hermana munaynillanta maskʼasqanta, astawanpis hermanoswan allinpaj qhawachikunanraykulla precursora kasqanta nin. ¿Mayqenpa amigantaj kayta munawaj? ¿Mayqentaj qotuchakuypi chʼampayta “ninata jina” japʼichinman? Mayqenchus kasqanqa, sutʼi.

5. ¿Imatataj tapurikunanchej tiyan, parlayninchejwan mana ninata jina japʼichinapaj?

⁵ ¿Imatá ruwasunman mana chay tojllapi urmanapaj? Jesús nerqa: “Sonqopi imachus juntʼa kashan, chaymanta simeqa parlan”, nispa (Mat. 12:34). Chayrayku ñaupajtaqa, sonqonchejpi imachus kasqanta qhawarikuna. Imamantapis ama phiñasqallapuni kanapaj kallpachakuna, mana wajkunamanta sajrata parlanapaj. Sutʼincharinapaj, uj hermano qotuchakuypi uj ruwayta japʼinanpaj mayta kallpachakojtin, ¿Jehovata kusichiyta munasqanrayku ruwashasqantachu yuyanchej? Chayri, ¿munaynillanta maskʼasqantachu? Wajkunamanta mana allin kajtapuni yuyanchej chayqa, Satanaspis, cheqa sonqo Jobmanta kikillantataj yuyasqanta yuyarikuna (Job 1:9-11). Hermanosta qhawaraymantaqa, imaraykuchus ajinata yuyashasqanchejta tapurikuna. ¿Iskayrayananchejpaj jinachu imatapis ruwarqa? Chayri, ¿kay pachamanta rumi sonqo runas jinachu yuyayta qallarishanchej? (2 Tim. 3:1-4.)

6, 7. a) ¿Imastaj wajkunata qhawaranapaj tanqawasunman? b) ¿Imatá ruwananchej tiyan pillapis noqanchejmanta mana allinta parlajtin?

⁶ ¿Imastaj wajkunata qhawarayman tanqallawasunmantaj? Ichapis ruwasqanchejta wajkuna sumajpaj qhawanankuta maskʼashanchej. Chayri wajkunata pisipaj qhawachispa, aswan patapi kayta munashasunman. Chayri mana kallpachakusqanchejrayku, achakista maskʼashasunman. Chayta jatunchakusqanchejrayku, envidiakusqanchejrayku chayri iskayrayasqanchejrayku ruwashanchej chayqa, mana allinman chayasun.

⁷ Wakin kuteqa, uj hermano mana yuyaychakuspalla sonqonchejta nanachinanpaj jina parlanman. Chayraykutaj maychus kajllata parlakushasqanchejta yuyasunman. Chaywanpis, kikinwan kuticheyqa, mana allinchu. Chayqa, ninamanpis llantʼata yapaykushasunman jina kanman. Chantapis mana Diospa munaynintachu ruwashasunman, manaqa Satanaspata (2 Tim. 2:26). Aswan allin kanman Jesús jina ruwananchej. “Runas maldicejtinku, payqa mana maldecillarqatajchu. [...] Astawanqa cheqanta juzgaj Juezpa makisninman churakorqa”  (1 Ped. 2:21-23). Jesusqa, maychus kasqanman jina, tiemponpitaj Jehová allinchananpi atienekorqa. Noqanchejpis kikillantataj ruwana. Kʼachamanta parlaspaqa, qotuchakuypi “allin kawsaypi uj sonqolla” kanapaj yanapanchej (Efesios 4:1-3 leey).

MANCHACHIKUY, WAJKUNAJ MUNASQANKUMAN JINATAJ RUWAYQA LAZO JINA

8, 9. ¿Imaraykutaj Pilato, Jesusta wañuchinankuta kamacherqa?

⁸ Uj animalqa, lazowan japʼichikuytawan manaña ayqeyta atinchu. Runata manchachikojpis, wajkunaj nisqankuman jinalla ruwayman urman (Proverbios 29:25 leey). Iskay runasmanta, parlarina. Paykunaqa manchachikusqankurayku, wajkunaj nisqankuman jina ruwarqanku. ¿Imatá paykunamanta yachakusunman?

⁹ Romata kamachej Poncio Pilatoqa, Jesús mana juchayoj kasqanta yacharqa. Chayrayku nisina ima sajratapis payta ruwayta munarqachu. Astawanpis jinata nerqa: “Mana ima juchampis kanchu wañuchisqa kanampaj jinaqa”, nispa. Jinapis, wañuchinankuta kamacherqa. ¿Imaraykú? Runata manchachikusqanrayku (Luc. 23:15, 21-25). Runasqa jinata qhaparerqanku: “Chay runatachus kacharinki chayqa, mana Cesarman sayasqachu kanki”, nispa (Juan 19:12). Ichapis Pilatoqa, Jesusman sayasqa kajtin, niña kamachej kananta, chayri wañuchinankuta manchachikorqa. Chayrayku, runas nisqankuman jina ruwarqa, jinamanta Kuraj Supaypa munayninta ruwarqa.

10. ¿Imaraykutaj Pedro, Cristota mana rejsisqanta nerqa?

¹⁰ Apóstol Pedroqa, Jesuspa sumaj amigon karqa. Payqa, runaspa ñaupaqenpi mana iskayrayaspa Jesús, Cristopuni kasqanta nerqa (Mat. 16:16). Uj kutitaj, Jesús imatachus nisqanmanta waj discipulosnin saqerpajtinkupis, Pedroqa mana saqerparqachu (Juan 6:66-69). Chantá, Jesusta enemigosnin japʼej rejtinku, espadanwan jarkʼayta munarqa (Juan 18:10, 11). Chaywanpis qhepamanqa, mayta manchachikorqa, Jesusta nipuni rejsisqantataj nerqa. Arí, runata manchikusqanrayku titilla qhepakorqa, nitaj ni imata ruwayta aterqachu (Mat. 26:74, 75).

11. ¿Imasta ruwananchejpajtaj tanqasqa kasunman?

¹¹ Cristianosqa, Diospa chejnisqan ruwaykunaman, imaymanamanta tanqasqa kanchej. Ichapis llankʼaypi patronninchej chayri llankʼaj masinchej, runasta chʼaukiyayman chayri khuchichakuyman tanqawasunman. Yachaywasipitaj, uj compañeronchej examenpi copianata niwasunman, chantapis qʼala runasta qhawayman, cigarro pitayman, drogakuyman, machachej ujyanasta ujyayman chayri khuchichakuyman tanqawasunman. Manchachikuspa runaj munasqanman jinalla ruwayqa, uj lazo jina. ¿Imaynatá chaymanta ayqesunman?

12. ¿Imastá Pilatomanta, Pedromanta ima yachakunchej?

¹² ¿Imastá Pilatomanta, Pedromanta ima yachakunchej? Pilatoqa, Cristota mana sumajtachu rejserqa, jinapis sumaj runa, mana juchayojtaj kasqanta yacharqa. Chaywanpis, mana llampʼu sonqochu karqa, nitaj Diosta munakorqachu. Chayrayku, Kuraj Supaypa tojllanpi urmallarqa. Pedrorí cheqa kajta allinta rejserqa, Diostapis munakorqa. Chaywanpis, wakin kuteqa, maykamallachus atisqanta mana reparakorqachu, runata manchachikuymantaj urmarqa. Sutʼincharinapaj, Jesusta niraj japʼishajtinku, payllapi atienekuspa jinata nerqa: “Tukuyninku saqesojtinkupis, noqaqa manapuni jaykʼajpis saqerparisqaykichu”, nispa (Mar. 14:29). Creeynin pruebaman churasqa kashajtin Salmista jina Diospi atienekunman karqa chayqa, sumaj wakichisqa kanman karqa. Salmista nerqa: “Tata Diosqa noqawan kashan; mana manchachikusajchu. Imanawanqataj  runari?”, nispa (Sal. 118:6). Jesusqa, wañupunan pʼunchay ñaupaj chʼisita Pedrowan, iskay apostolesninwan ima, Getsemaní huertaman rerqa. Apostolestaj rijchʼarisqa kanankumantaqa, kinsantinku puñurparqanku. Jesustaj paykunata rijchʼarichispa nerqa: “Qhawakuychej ama puñuspa. Diosmanta mañakuychej ama juchaman urmanaykichejpaj”, nispa (Mar. 14:38). Jinapis Pedroqa watejmanta puñurparerqa, qhepamantaj runasta manchachikuywan atipachikorqa.

13. ¿Imatá necesitanchej wajkunawan sajra kajman mana tanqachikunapaj?

¹³ ¿Imastawantaj Pilatomanta, Pedromanta ima yachakusunman? Mana wajkunawan sajra kajman tanqachikunapajqa, cheqa kajta rejsina, llampʼu sonqo kana, maykamallachus atisqanchejta reparakuna. Chantapis Jehovata munakuna, runata manchachikunamantaqa payta manchachikuna. Creeyninchej cheqa yachaypi saphichasqa kashan chayqa, imapichus creesqanchejta mana manchachikuspa sutʼinchasun. Ajinamanta, mana runaj munasqanman jinallachu ruwasun, nitaj manchachikusunchu. Chaywanpis, sapallanchejmanta imatapis ruwayta atisqanchejta ama yuyanachu, manaqa llampʼu sonqo kana, Jehovaj yanapayninta necesitasqanchejtataj reparakuna. Chantapis Jehovaj espiritunta mañakuna, payta munakusqanchejtataj astawan wiñachina, chayqa kamachiykunasninta kasunapaj, sutinta jarkʼanapaj ima tanqawasun. Chantá sajra kajman mana urmanapaj ñaupajmantaña wakichikuna. Tataspis wawasninkuwan Diosmanta mañakunanku tiyan, compañerosninku sajra kajman tanqayta munajtinku, imatachus kutichinankupajtaj wakichinanku tiyan (2 Cor. 13:7). *

SONQONCHEJ JUCHACHAWASQANCHEJ ÑATʼUNAWANCHEJTA AMA SAQENACHU

14. ¿Imatá Satanás ñaupajpi juchallikusqanchejmanta yuyachiyta munawanchej?

¹⁴ Wakin kuteqa, kʼita animalta japʼejkuna, animalpa purinanpi uj kʼulluta chayri jatun rumita warkhunku. Uj animal mana reparakuspalla waskhapi miskʼajtintaj, chay kʼullu chayri jatun rumi patanman urmaykuspa ñatʼurpan. Ñaupajpi juchallikusqanchejmanta sonqonchej juchachawasqanchejpis, kikillantataj “ñatʼuwa[sunman], uj llasa qʼepi jina” (Salmo 38:3-5, 8 leey). Satanasqa, Jehová ni jaykʼaj perdonanawanchejta, nitaj kamachiykunasninta juntʼayta atisqanchejta yuyachiyta munawanchej.

15, 16. ¿Imatá sonqoyki mana anchata juchachasunanpaj ruwawaj?

¹⁵ ¿Imatá chay tojllapi mana urmanapaj ruwasunman? Jatun juchapi urmanki chayqa, usqhayllata Jehovawan allinyakuy. Ancianosmantataj yanapata mañakuy (Sant. 5:14-16). Pantasqaykita allinchanaykipaj tukuy atisqaykita ruway (2 Cor. 7:11). Kʼamisojtinkupis, ama anchata llakikuychu, imaraykuchus Jehovaqa pitachá munakun chayta kʼamin (Heb. 12:6). Juchaman imaschus apasusqanta niña ruwanaykipajtaj mayta kallpachakuy. Sonqomantapacha pesachikunkiña, cheqan ñanmantaj kutirinkiña chayqa, Jesucristoj wañuynin tukuy juchasta pampachayta atisqanpi atienekuy (1 Juan 4:9, 14).

¹⁶ Wakintaqa, juchasninku perdonasqaña kajtinpis, sonqonku juchachallanpuni. Ajinapi rikukunki chayqa, Pedrota, waj apostolesta ima Jehová perdonasqanta yuyarikuy. Paykunaqa, munasqa Churinta, necesitashajtinpuni saqerparqanku. Chantapis, uj runa khuchi kausayniyoj kasqanrayku Corinto qotuchakuymanta qharqochikorqa, chaywanpis mayta pesachikojtin Jehová perdonallarqataj (1 Cor. 5:1-5; 2 Cor. 2:6-8). Bibliaqa nin wakin runas, jatun juchaspi urmasqankuta, pesachikojtinkutaj  Jehová perdonasqanta (2 Cró. 33:2, 10-13; 1 Cor. 6:9-11).

17. ¿Imatá Jesuspa wañuynin juchasninchejwan ruwayta atin?

¹⁷ Sonqomantapacha pesachikojtinchej, khuyakunawanchejpi mayta atienekojtinchej ima, Jehovaqa perdonawasun, juchanchejmantataj qonqaponqa. Ni jaykʼaj yuyanachu, Jesuspa wañuynin juchasta mana pichayta atisqantaqa. Jinata yuyaspaqa Satanaspa tojllanpi urmasunman. Jesuspa wañuynenqa, pesachikojkunaj juchasninkuta pichan, Kuraj Supay mana ajinachu kasqanta nejtinpis (Pro. 24:16). Wañuyninwan rantiwasqanchejpi creesqanchejqa, sonqonchej juchachawasqanchejta llasa qʼepita jina apaqawasun. Chantapis Diosta tukuy sonqowan, tukuy yuyayninchejwan, tukuy almanchejwan ima, yupaychanapaj kallpachawasun (Mat. 22:37).

SATANÁS SAJRATA RUWAYTA MUNASQANTA YACHANCHEJ

18. ¿Imatá Kuraj Supaypa tojllasninpi mana urmanapaj ruwananchej tiyan?

¹⁸ Satanasqa, ima tojllallawanpis urmachiytapuni munawanchej. Chaywanpis ima sajratachus ruwayta munasqanta yachanchej, chayrayku jarkʼakuyta atinchej (2 Cor. 2:10, 11). Chantapis, chʼampaykunata atipanapaj Jehovamanta yachayta mañakojtinchejqa, Kuraj Supay mana urmachiyta atiwasunchu. Santiago, kayta yuyaycharqa: “Sichus mayqellampis qankunamanta pisi yachayniyoj kanman chayqa, Diosmanta mañakuchun. Diostaj chay yachayta payman qonqa, imaraykuchus Diosqa tukuyman qon mana michʼakuspa, chay mañakusqanmanta mana rimaspalla” (Sant. 1:5). Jehová uyarinawanchejpajqa, mañakusqanchejman jina ruwananchej tiyan, nisunman Palabranta ukhunchana, yachakusqanchejman jinataj ruwana. Allin kamachi yuyayniyojqa, publicacionesnejta ima tojllastachus Satanás churawasqanchejta, imaynatachus jarkʼakunata ima willawanchej.

19, 20. ¿Imaraykutaj sajra kajta chejninanchej tiyan?

¹⁹ Diosmanta mañakuspa, Bibliamanta yachakuspa imaqa, allin kajta munakuyta yachakunchej, sajra kajtataj chejniyta (Sal. 97:10). Chantapis, aychaj sajra munayninta ruwajtinchej imaschus kananpi tʼukureyqa, chayta qhesachanapaj yanapawasun (Sant. 1:14, 15). Ajinamanta, Satanaspa tojllasnin mana urmanapaj jinachu kanqa, manaqa millachikunapaj jina.

²⁰ Satanaspa tojllasninpi mana urmanapaj, Jehová yanapawasqanchejmanta, mayta agradecekunchej. Diosqa, espiritunnejta, Palabrannejta, llajtannejta ima “sajramanta” jarkʼawanchej (Mat. 6:13). Qhepan yachaqanapeqa, Kuraj Supaypa iskay tojllasninmantawan parlarisun, mayqenkunawanchus Jehovaj kamachisninta kausashajta japʼin.

[Sutʼinchaynin]

[Tapuykuna]

[21 paginapi dibujo/foto]

Imallatapis parlarparispaqa, qotuchakuypi chʼampaykunata “ninata jina” japʼichisunman

[24 paginapi dibujo/foto]

Sonqoyki juchachasusqanta llasa qʼepita jina apaqakuy