1. ¿Imatataj ashkha cheqa sonqo cristianos tapukunku?

ASHKHA chʼampaykunapi rikukuspapis Jehovata watastaña sirvej hermana, llampʼu sonqowan jinata tapukorqa: “¿Tukukuy pʼunchay chayamunankama kausaymanrajchu?”, nispa. Ashkha hermanosqa, watastaña Jehovata sirvispa, kikillantataj tapukunku. Jehovaj pʼunchaynin chayamunantaqa tukuy munanchej, ajinamanta “tukuy imata” mosojyachinanpaj, tukuy chʼampaykunatataj chinkachinanpaj (Apo. 21:5). Kay sajra pachaj tukukuynin kaysitupiña kasqanta tukuy ima rikuchejtinpis, pacienciakoyqa mana atikullanchu.

2. ¿Ima tapuykunamantaj kay yachaqanapi kutichisun?

² Bibliaqa pacienciayoj kananchejta nin. Arí, Jehovaj nisqasnin juntʼakusqanta rikunapajqa, sinchʼi creeyniyoj, pacienciayoj ima kananchej tiyan, ñaupa tiempomanta Diospa kamachisnin jina (Hebreos 6:11, 12 leey). Jehovapis mayta pacienciakun. Payqa kay sajra pachata unayña chinkachiyta atinman karqa, chaywanpis maychus tiemponpi chayta ruwananpaj suyashan (Rom. 9:20-24). ¿Imaraykutaj chay jina pacienciayoj? ¿Imaynatá Jesús Tatan jina pacienciayoj karqa? ¿Imaraykutaj noqanchejpis pacienciayoj kananchej tiyan? Chay tapuykunaj kutichiykunasninta ukhunchareyqa, creeyninchej wiñananpaj, pacienciayoj kanapaj ima yanapawasun, Jehová munayninta juntʼananpaj qheparikusqanman rijchʼawajtinchejpis.

3, 4. a) ¿Imaraykutaj Jehová pacienciakun? b) ¿Imatataj Jehová Edén huertapi oqharikuy rikhurisqantawan ruwarqa?

³ Jehová tukuyta kamachej kajtinpis, ¿imaraykutaj pacienciakun? Imaraykuchus Edén huertapi oqharikuy rikhurisqanqa, jatuchaj tapuykunata rikhuricherqa,  Jehovataj chay tapuykunaman sumajta kutichinanpaj tiempo pasanan kasqanta yacharqa. Jehovaqa runas, ángeles ima imaynachus kasqankuta, yuyasqankuta ima sumajta rejsisqanrayku, allinninchejpajpuni imatapis ruwan (Heb. 4:13).

⁴ Jehovaqa, Adanwan Evawan Jallpʼaman mirayninkuta juntʼachinankuta munarqa. Diospa munaynintaj Satanás Evata chʼaukiyajtin, Adán juchallikojtin ima, mana tijrakorqachu. Dios phiñarikuspa runata saqerpananmantaqa, runaspaj, Jallpʼapaj ima, munayninta juntʼananpaj imatachus ruwananta nerqapacha (Isa. 55:11). Jehovaqa, chayta juntʼananpaj, paylla kamachej kasqanta rikuchinanpaj ima, pacienciakuspa may chhika watasta suyashan. Ajinamanta, munayninmanta wakin imas, maychus kasqanman jina juntʼakunanpaj.

5. ¿Imaraykutaj Jehová pacienciakushan?

⁵ Chantapis Jehová pacienciakusqanrayku, ashkha runaspiwan wiñay kausayta tarenqanku. Kunanpis, “may chhika runasta” salvananpaj tukuy imata ruwashan (Apo. 7:9, 14; 14:6). Jehovaqa, willasqanchejnejta, runasta wajyarishan, cheqan kamachiykunasninmanta, Reinon imatachus ruwananmanta ima yachakunankupaj. Arí, Reinomanta “evangelio[qa]” runaspaj sumaj willaykuna (Mat. 24:14). Jehová pusamusqan runasqa, llajtanman yaykunku, cheqan kajtataj munakunku (Juan 6:44-47). Kʼacha kasqanraykutaj Diosninchejqa, ñaupaqenpi allinpaj qhawasqa kanankupaj yanapan. Chantapis wakin runasta, janaj pachamanta kamachimunankupaj ajllan. Paykunaqa, janaj pachapi ruwayninkuta ruwashaspa, kasukoj runasta mana juchayoj runasman tukunankupaj, wiñay kausayta japʼinankupaj ima yanapanqanku. Chayrayku Jehovaqa, tiemponpi ruwananpaj pacienciawan suyashajtinpis, ruwayta munasqanta juntʼananpaj mayta llankʼashan. Chaytaj allinninchejpaj kanqa.

6. a) ¿Imaynamantataj Jehová, Noej tiemponpi paciencianta rikucherqa? b) ¿Imaynatataj Jehová kay tiempopi paciencianta rikuchishan?

⁶ Jehovaqa, runas uma patakama phiñachejtinkupis, pacienciakun. Chaytaj niraj Jatun Para kashajtin sutʼi rikukorqa. Chay tiempopeqa, khuchi kausay, sajra kausay ima Jallpʼapi mayta aywirisharqa, Jehovataj chay jina sajraman runas tukusqankurayku “mayta sonqonta nanachik[orqa]” (Gén. 6:2-8). Chaywanpis, mana wiñaypajchu chayta saqenman karqa, chayrayku sajra runasta chinkachinanpaj mayta parachimunanta nerqa. “Diosqa jatun pacienciawan” Noej tiemponpi suyaspapis, Noeta, familianta ima salvananpaj tukuy imata wakicherqa (1 Ped. 3:20). Maychus tiemponpitaj imatachus Pay ruwananta Noeman willarqa, uj arcata ruwanantataj kamacherqa (Gén. 6:14-22). Chantapis Noeqa, “cheqan kajta willaj” karqa, chayrayku imachus qayllamushasqanmanta runa masisninman willarqa (2 Ped. 2:5). Jesusqa, tiemponchej Noej tiemponman rijchʼakunanta nerqa. Jehovarí, maykʼajchus kay sajra pachata chinkachinanta ninña, chaywanpis “ima pʼunchaychus, ima horachus” kananta ni pi runa yachanchu (Mat. 24:36). Kay tiempopitaj Diosqa, runasman chaymanta willananchejta, imaynatachus salvakunankuta ninanchejta ima kamachiwanchej.

7. Dios munayninta juntʼananpaj, ¿anchatachu qheparikushan? Sutʼinchay.

⁷ Jehová pacienciakushasqan, ¿tiempo pasanallanta saqesqantachu ninayan? Mana. Pacienciakoyqa, imapis kananta qhawallaywan mana kikinchu. Chaywanpis, machuyasqanchejrayku chayri kay sajra pachapi ñakʼarisqanchejrayku, chayta yuyarikuyta mana atillasunmanchu.  Chayrayku, ichapis llauchʼiyapusunman chayri Dios munayninta juntʼananpaj anchata qheparikushasqanta yuyasunman (Heb. 10:36). Chaywanpis, ni jaykʼaj qonqanachu Dios imaraykuchus pacienciakushasqanta, chay tiempopitaj cheqa sonqo kamachisninta yanapashasqanta (2 Ped. 2:3; 3:9). Kunanqa, imaynatachus Jesús Tatan jina pacienciakusqanta qhawarina.

8. ¿Imaspi rikukuspataj Jesús pacienciayoj kasqanta rikucherqa?

⁸ Jesusqa may chhika unaymantaña Diospa munayninta, tukuy sonqo ruwashan. Jehovaqa, contranpi Satanás oqharikusqantawan, kʼata Churin Jallpʼaman jamuspa Mesiasman tukunanta nerqa. Jesustaj chay tiempo chayamunankama, may chhika unayta pacienciakuspa suyakorqa (Gálatas 4:4 leey). Chaywanpis mana uyan japʼirisqachu suyarqa, manaqa imatachus Jehová kamachisqanta ruwasharqa. Jallpʼaman jamuspañataj ñaupajmantaña willakusqanman jina, Satanaspa makinpi wañunanta yacharqa (Gén. 3:15; Mat. 16:21). Jesusqa mayta ñakʼarispapis, pacienciakuspa Jehovaj munayninta ruwarqa. Ajinamanta ni pi jina cheqa sonqo kasqanta rikucherqa. Payqa Diospa Churin kaspapis mana payllapichu yuyarqa. ¡Mayta paymanta yachakusunman! (Heb. 5:8, 9.)

9, 10. a) ¿Imatá Jesús ruwashan Jehová tiemponpi nisqanta juntʼanankama? b) ¿Imaynatá Jesús jina kasunman?

⁹ Jesusqa kausarimuspa, janaj pachapi, kay pachapi ima tukuy atiyta japʼerqa (Mat. 28:18). Chay atiyninwantaj Jehovaj munayninta juntʼan, Tatan maykʼajchus juntʼakunanta nisqanman jina. Diospa Churenqa pacienciawan suyakorqa Tatanpaj paña ladonpi 1914 watakama, maypachachus enemigosninta “chakisni[n] uraman” churakorqa (Sal. 110:1, 2; Heb. 10:12-14). Jesusqa, tumpamantawan Satanaspa pachanta chinkachenqa, chaykamataj runaswan pacienciakushan, “kawsaj yaku juturisninmantaj” pusashan (Apo. 7:17).

¹⁰ ¿Imaynatá Jesús jina kasunman? Payqa maykʼajchus Jehová imatapis ruwananta yacharqa. Chayrayku, Tatanpa munayninta tukuy sonqo ruwayta munaspapis, maykʼajchus ruwakunan tiempo chayamunantaraj suyarqa. Noqanchejpis Satanaspa sajra pachanpa tukukuynin chayamunankama, pacienciawan suyakunanchej tiyan. Ajinamanta Diospa nisqasninman jinapuni ruwasun, nitaj saykʼusunchu. Chayrayku, ¿imaynatá pacienciayoj kayta atisunman?

11. a) ¿Imaynamantá creeywan, pacienciawan khuskachasqa kashan? b) ¿Imaraykutaj creeyninchej aswan sinchʼi kanan tiyan?

¹¹ ¿Juchasapa kaspapis mana saykʼuspa pacienciakuyta atisunmanchu? Arí, imaraykuchus Jesús niraj Jallpʼaman jamushajtin, profetas, Diospa waj kamachisnin ima, chayta ruwarqanku. Creeyninkoqa, pacienciankuwan khuskachasqa kasharqa (Santiago 5:10, 11 leey). Jehovaj nisqanpi mana creenkumanchu karqa chay, ¿nisqasnin juntʼakunanta pacienciawan suyakunkumanchu karqa? Mana. Paykunaqa Dios nisqasninta juntʼananpipuni atienekusqankurayku, chʼampaykunata, llakiykunata ima, muchorqanku (Heb. 11:13, 35-40). Creeyninchejqa aswan sinchʼi kanan tiyan, imaraykuchus Jesús, “creesqanchejta wiñachin juntʼasqa kanankama” (Heb. 12:2). Arí, Jesusqa profeciasta juntʼaspa, Diospa munayninta rejsichispa ima, Jehovapi astawan atienekunapaj yanapawanchej.

12. ¿Imatá ruwananchej tiyan creeyninchejta sinchʼiyachinapaj?

 ¹² ¿Imastataj ruwasunman creeyninchejta sinchʼiyachinapaj, pacienciayoj kanapaj ima? Jehovaj yuyaychaykunasninman jina ruwananchej tiyan. Sutʼincharinapaj, Diospa Reinonta imaraykuchus kausayninchejpi ñaupajman churana kasqanpi tʼukurina. Mateo 6:33 nisqanman jina ruwanapaj, ¿astawan kallpachakusunmanchu? Chaypajqa, ichapis runasman willamunapaj astawan tiempochakuna kanqa, chayri kausayninchejta tijrachina kanqa. Jehová payta sirvinapaj kallpachakusqanchejmanta bendeciwasqanchejta ama qonqanachu. Ichapis uj runallamanpis Bibliamanta yachachinapaj yanapawarqanchej chayri “mana unanchay atina sonqo tiyaykuyninta” qowarqanchej (Filipenses 4:7 leey). Kasukusqanchejrayku bendicionesta japʼisqanchejpi yuyaspaqa, pacienciayoj kayqa, sumaj kasqanta reparasun (Sal. 34:8).

13. ¿Imaynatataj creeyta, pacienciata ima wiñachikun? Sutʼinchay.

¹³ Chaytaqa tarpuywan, poqochiywan, cosechaywan ima kikinchasunman. Tarpoj runaqa, tarpusqan sumajta poqojtin, mana iskayrayaspa watejmanta tarpun. Chantá cosecha tiempo chayamunankama pacienciawan suyakunanta yachaspapis, poqonanta yachan. Chayraykutaj, qhepan watapaj waj jallpʼaspiwan tarpun. Jehovaj yuyaychaykunasninwanpis kikillantaj. Chaykunata yachakunchej, chayman jina kausakunchej, bendicionestataj poqoyta jina oqharinchej chayqa, Jehovapi astawan atienekunchej. Ima bendicioneschus qhepaman kanantapis pacienciawan suyakullanchej, juntʼakunanta yachasqanchejrayku (Santiago 5:7, 8 leey).

14, 15. ¿Pi jinataj runa ñakʼarisqanta qhawananchej tiyan?

¹⁴ Chantapis pacienciayoj kanapajqa,  kausayninchejta, kay pachata ima, Jehová jina qhawananchej tiyan. Sutʼincharinapaj, Jehová may chhika unaytaña runa ñakʼarisqanta rikuspa sonqonta nanachikojtinpis, mana llakiywan atipachikunchu. Chaywanpis jinalla qhepakunanmantaqa, kʼata Churinta kachamorqa “Kuraj Supaypa ruwasqasninta phirinampaj”, tukuy sajra imasta allinchananpaj ima (1 Juan 3:8). Tukuy chay ñakʼareyqa tukukaponqa, Dios chaykunamanta samarichiwasqanchejtaj wiñaypaj kanqa. Chayrayku Satanaspa pachan may sajra kasqanmanta mayta llakikunamantaqa chayri chinkachisqallaña kananta munanamantaqa, mana rikukoj imaspi creena, imaraykuchus chaykunaqa wiñaypaj kanqa. Jehovaqa, kay pacha maykʼajchus tukukunanta ninña, chaytataj tiemponpi juntʼanqa (Isa. 46:13; Nah. 1:9).

¹⁵ Kay pachaj tukukuyninpeqa, ichapis creeyninchejta llauchʼiyachinanpaj jina llakiykunapi rikukusunman. Chʼajwas, maqanakuykuna ima kasqanrayku ñakʼarinchej chayri familianchejta ñakʼarejta rikunchej chayqa, ama phiñakunachu. Juchasapa runas kasqanchejrayku, ichá phiñakusunman. Chaywanpis Jehovapi atienekunapaj kallpachakuna, Jesús jinataj kana, pimantachus Mateo 26:39 (leey) versiculopi parlan.

16. ¿Imatataj kay tiempopi mana ruwananchejchu tiyan?

¹⁶ Jehová jina pacienciayoj kayta munanchej chayqa, nisqanmanta mana iskayrayanachu. ¿Imataj chay niyta munan? Tukukuy pʼunchay niraj qayllitapichu kasqanta yuyaj runaqa, waj imastaraj ruwayta munanman, mana Jehovaj nisqan jinachu imapis kananta yuyaspa. Sutʼincharinapaj, ichapis Diospa Reinonta ñaupajman churananmantaqa, kay pachapi may rejsisqa kayta, qhapaj kayta ima munanman. Chayri sumaj kausayta maskʼaspa universidadman yaykunman. Chaywanpis chayta ruwajqa, mana creeyniyoj kasqanta rikuchin. Chayrayku Pablo niwarqanchej jina “creespa, pacienciawan” suyakusqankurayku Jehovaj nisqasninta juntʼakojta rikojkuna jina kana (Heb. 6:12). Jehovaqa, munayninta juntʼananpaj, mana kay pachaj tukukuyninta qheparichenqachu (Hab. 2:3). Chaykamataj, Jehovata mana tanqasqa jinallachu sirvina, astawanqa rijchʼarisqa kana, sumaj willaykunatataj sonqo kʼajaywan runasman willana. Chayta ruwayqa, kay tiempopipis sonqo juntʼasqa kanapaj yanapawasun (Luc. 21:36).

17, 18. a) ¿Imatataj Jehová pacienciakusqanrayku ruwayta atinchej? b) ¿Ima bendicionestataj kay tiempopi pacienciayoj kasqanchej apamuwasun?

¹⁷ Jehovata kay killasllaraj chayri watasña rejsispapis, tukuyninchej wiñaypaj sirviyta munanchej. Kay sajra pacha tukukunanpaj mashkha tiempopis faltachun, pacienciayoj kayqa salvakunanchejkama muchunapaj yanapawasun. Jehovaqa nisqanpi tukuy sonqo atienekusqanchejta rikuchinapaj tiempota qoshawanchej, sutinrayku ñakʼarinanchej kajtinpis (1 Ped. 4:13, 14). Chantapis pacienciayoj kanapaj wakichishawanchej, chaytaj salvakunapaj yanapawasun (1 Ped. 5:10).

¹⁸ Jesusqa janaj pachapi, Jallpʼapi ima tukuy atiyta japʼin. Chayrayku mana pipis paymanta karunchayta atiwasunmanchu, manaqa noqanchej kikillan karunchakusunman (Juan 10:28, 29). Imachus qhepaman kananmantaqa, wañuymanta ima mana manchachikunachu. Tukukuykama pacienciawan muchojkunaqa, salvasqa kanqanku. Chayrayku ama saqenachu, kay pacha chʼaukiyanawanchejta, nitaj Jehovapi atienekusqanchejta llauchʼiyachinanta. Astawanqa, Jehová pacienciakushajtin, creeyninchejta astawan sinchʼiyachina (Mat. 24:13; 2 Pedro 3:17, 18 leey).