1. ¿Imataj wakichisqa kanapaj, chʼampaykunata atipanapaj ima yanapawasun?

BIBLIAJ profeciasnin juntʼakusqanqa, tumpamantawan imaschus kananta rikuchin, chaykunataj kharkatinapaj jina kanqa. ¿Imataj wakichisqa kanapaj yanapawasun? Apóstol Pabloqa yuyaychawarqanchej, mana “rikukoj kajtachu qhawa[nata], manachayqa mana rikukoj kajta”. Chayrayku, janaj pachapi chayri kay Jallpʼapi wiñay kausayta suyakusqanchejta yuyarikunapuni. Pabloqa, cristianosman chayta qhelqarqa, cheqa sonqo runas, ima tʼinkastachus japʼinankupi yuyanankupaj. Chaypi yuyaspaqa chʼampaykunata, qhatiykachasqa kayta ima, muchuyta atinkuman karqa (2 Cor. 4:8, 9, 16-18; 5:6, 7).

2. a) ¿Imatataj suyakusqanchej sinchʼi kananpaj ruwananchej tiyan? b) ¿Imatá kay yachaqanapi, qhepan yachaqanapiwan ukhuncharisun?

² Pabloj yuyaychasqanmantaqa kayta yachakusunman: suyakusqanchej sinchʼi kananpajqa, mana rikusqanchej imasllachu yuyayninchejpi kanan tiyan, manaqa niraj rikusqanchej imaspis (Heb. 11:1; 12:1, 2). Chayrayku kay yachaqanapi, qhepan yachaqanapiwan, chunka imas qhepaman kananmanta ukhuncharisun. Chaykunataj wiñay kausayta suyakusqanchejwan khuskachasqa kashan.

3. a) ¿Ima kananmantataj 1 Tesalonicenses 5:2, 3 parlan? b) ¿Imatataj políticos ruwanqanku, pikunataj ichapis paykunaman ujchaykukonqanku?

³ Pabloqa Tesalonicensesman qhelqasqanpi imaschus kananmanta, ujninmanta parlarqa (1 Tesalonicenses 5:2, 3 leey). Chay cartanpeqa Jehovaj “pʼunchayni[nmanta]” parlarqa. Chaytaj, llulla religionta  chinkachikusqanwan qallarenqa, Armagedón maqanakuypitaj tukukonqa. Jehovaj “pʼunchayni[n]” qallarinanpajña kashajtin, pachantinmanta kamachejkunaqa “tukuy imapis allillan; ni imamanta llakikuna kanchu” nispa nishanqanku. Chaytaqa ichapis uj kutillata chayri kutin kutita nenqanku. Nacionesqa ichapis jatuchaj chʼampaykunata allinchanankupajña kashasqankuta yuyanqanku. ¿Religionta kamachejkunarí imatá ruwanqanku? Kay pachallamantataj kasqankurayku, ichapis politicosman ujchaykukonqanku (Apo. 17:1, 2). Jina kajtenqa, ñaupa tiempo Judamanta llulla profetas jinallataj ruwashanqanku, pikunatachus “tukuy imapis allillan” nispa llullakusqankumanta Jehová juchacharqa (Jer. 6:14; 23:16, 17).

4. Ashkha runasmanta nisqa, ¿imatá entiendenchej?

⁴ “Tukuy imapis allillan; ni imamanta llakikuna kanchu” nispa pikunapis nichunku, chayqa Jehovaj pʼunchaynin qallarinanpajña kashasqanta rikuchenqa. Pablo nerqa: “Qankunarí, hermanos, mana laqhapichu kashankichej, jaqay pʼunchayqa suwa jina taripasunaykichejpaj. Tukuyniykichej kʼanchaypa wawasnin kankichej”, nispa (1 Tes. 5:4, 5). Noqanchejqa, kay tiempopi imaschus kashasqanmanta Biblia imatachus nisqanta entiendenchej, ashkha runastajrí mana entiendenkuchu. Chaywanpis, ¿imaynatapunitaj “tukuy imapis allillan; ni imamanta llakikuna kanchu” nisqa profecía juntʼakonqa? Chaytaqa rikuspachá yachasun. Chayrayku “ama puñuspa qhawana. Chʼaki sonqo runas jina yuyayninchejpi kana” (1 Tes. 5:6; Sof. 3:8).

5. a) ¿Imaynatá “manchay ñakʼariy” tiempo qallarenqa? b) ¿Pi “reinataj” pantasqa kasqanta reparakonqa?

⁵ ¿Imataj chantá kanqa? Pablo nerqa: “Maypachachus runas nishanqanku: Tukuy imapis allillan; ni imamanta llakikuna kanchu, nispa chaypacha, ujllata paykuna tukuchisqa kanqanku”, nispa. Chayqa, “jatun Babilonia[j]” contranpi sayaykukusqanwan qallarenqa, pitachus “phisu” warmi nispa sutichakullantaj. Chay warmeqa, Jallpʼantinpi tukuy llulla religioneswan ninakun (Apo. 17:5, 6, 15). Tukuy llulla religionesta, cristianos nichikojkunatapis chinkachikusqanqa, “manchay ñakʼariy” tiempo qallarisqanta rikuchenqa (Mat. 24:21; 2 Tes. 2:8). Ashkha runasqa, chayta rikuspa mayta tʼukonqanku. ¿Imaraykú? Imaraykuchus phisu warmeqa, chay tiempokama payllapi atienekuspa kanqa. “Noqaqa reina jina tiyasqa kashani” “nitaj waqaytapis rikusajchu” nispa nishanqa. Chaywanpis ujllata pantasqa kasqanta reparakonqa. Payqa “uj  pʼunchayllapi” nisunman usqhayllata chinkachisqa kanqa (Apo. 18:7, 8).

6. ¿Pitaj llulla religionta chinkachenqa?

⁶ ¿Pitaj phisu warmita chinkachenqa? Bibliaqa, “chunka” wajrasniyoj “phiña” animal chinkachinanta nin. Apocalipsis librota ukhunchaspa, chay phiña animalqa Naciones Unidas kasqanta yachanchej. “Chunka wajrasni[ntaj]” kay tiempomanta tukuy atiyniyoj políticos kanku, pikunachus “puka phiña” animalta yanapanku (Apo. 17:3, 5, 11, 12). * Phisu warmeqa, qʼala chinkachisqa kanqa. Naciones Unidasmanta kaj suyusqa, tukuy imanta qhechonqanku, imaynachus kasqanta sutʼiman orqhonqanku, aychantapis mikhukaponqanku, “ninawantaj ruphachenqanku”. Arí, wiñaypaj chinkachisqa kanqa (Apocalipsis 17:16 leey).

7. ¿Pitaj yuyaychanqa “phiña animal” phisu warmita chinkachinanpaj?

⁷ Bibliaj profeciasnenqa, pichus chayta ruwachinanta sutʼinchan. Jehovaqa, imaynallamantapis kamachejkunaj sonqonkuman churanqa “paypa munayninta ruwanankupaj”, nisunman phisu warmita chinkachinankupaj (Apo. 17:17). Religionesqa Jallpʼantinpi maqanakuykuna kananpaj juchayojllapuni kanku. Chayrayku nacionesqa ichá chinkachinanku kasqanta yuyanqanku. Arí, politicosqa paykunallamanta chayta ruwashasqankuta yuyanqanku. Chaywanpis Dios, paykunanejta tukuy llulla religionesta chinkachishanqa. Arí, Satanaspa pachanmanta kajkunallataj llulla religionesta chinkachenqanku, Satanastaj ni imata ruwayta atenqachu (Mat. 12:25, 26).

8. ¿Imatá “Magog jallpʼaman[ta Gog]” ruwanqa?

⁸ Llulla religión chinkasqantawanqa, Diospa kamachisnin “mana perqawan muyuykuchisqa” llajtaspipis, “mana imata manchachikuspa” tiyakushankuman jina kanqa (Eze. 38:11, 14). Paykunaqa Jehovata yupaychashallanqankupuni, mana piniyoj jinataj kanqanku. ¿Imataj paykunawan kanqa? Diospa Palabranqa, “ashkha” naciones contrankupi mayta oqharikunankuta nin. Chaytataj “Magog jallpʼaman[ta Gog]” nisunman Satanás ruwachenqa (Ezequiel 38:1, 2, 15, 16 leey). ¿Chaymanta manchachikunanchejchu tiyan?

9. a) ¿Imamantá cristianos astawan llakikunchej? b) ¿Imatataj kunan ruwanachej tiyan creeyninchejta kallpachanapaj?

⁹ Diospa kamachisnenqa, chay kananmanta mana manchachikunchejchu. Imaraykuchus mana salvasqa kaymantachu  astawan llakikunchej, manaqa Jehovaj kamachiynin jatunchasqa kananmanta, sutintaj llimphuchasqa kananmanta. Jehová kayta nerqa: “Yachankichej noqa Tata Dios kasqayta”, nispa. Chay rimaykuna, chayman rijchʼakoj rimaykuna ima, 60 kutis kurajta rikhurin (Eze. 6:7). Chayrayku, Ezequielpa profeciasnin juntʼakunanta mayta suyashanchej. Chantapis Jehová “cheqan kajman jina kawsajkunata ñakʼariymantapis librayta” yachasqanpi atienekunchej (2 Ped. 2:9). Chaykamataj, creeyninchejta kallpachanapaj tukuy imata ruwana, ajinamanta ima kajtinpis Jehovaman juntʼa sonqo kayta atisun. Chaypaj, ¿imatá ruwananchej tiyan? Diosmanta mañakuna, Palabranta ukhunchana, chaypi tʼukurina, Reinomantataj runasman willamuna. Jinamanta wiñay kausayta suyakusqanchejqa, “ancla nisqa barco sayachina gancho jina” sinchʼi kanqa (Heb. 6:19, 20; Sal. 25:21).

10, 11. ¿Imaynatataj Armagedón maqanakuy qallarenqa? ¿Imataj chay maqanakuypi kanqa?

¹⁰ Diospa llajtanta chinkachiyta munashajtinku, ¿imataj kanqa? Jehovaqa Jesusnejta, janaj pachamanta soldadosnejta ima, llajtanta jarkʼanqa (Apo. 19:11-16). Ajinamanta “Tukuy Atiyniyoj Diospa chay jatun pʼunchayni[n]” nisunman Armagedón maqanakuy qallarenqa (Apo. 16:14, 16).

¹¹ ¿Imataj chay maqanakuypi kanqa? Jehová Ezequielnejta sutʼinchan: “Tukuynin orqosniypi Gogpa contranta wañurachejkunata wajyasaj. Paykunapura wañuchinakonqanku, nispa nin Tukuyta Kamachej Tata Diosqa”. Satanaspa ladonmanta maqanakojkunaqa mayta mancharenqanku, qʼalata pejtukuspataj paykunapura maqanakonqanku. Kuraj Supaypis mana ayqeyta atenqachu, imaraykuchus Jehová nin: “Paypa patanman, soldadosnimpa patankuman, paywan kaj ashkha nacionesmanta kaj runasnimpa patankuman ima [...] larwashaj azufrewan parata parachimusaj” (Eze. 38:21, 22). ¿Imataj Dios chayta ruwajtin kanqa?

12. ¿Imatataj naciones ninanku kanqa?

¹² Nacionesqa, Jehová paykunata chinkachishasqanta reparananku kanqa. Arí, Satanaspa soldadosnenqa, ichapis Egiptomanta soldados jinallataj nenqanku, pikunachus israelitasta Puka qochanejta qhatirishaspa kayta nerqanku: “Tata Diosqa paykunaman sayakuspa, maqanakushan noqanchejpa contranchejta”, nispa (Éxo. 14:25). Arí, nacionespis pichus Jehová kasqanta yachanqanku (Ezequiel 38:23 leey). ¿Unayrajchu chaykuna kananpaj faltan?

13. Lantej chakisninwan, chaki dedosninwan ninakoj gobiernomanta, ¿imatá yachanchej?

¹³ Danielpa uj profecian, ima tiempopichus kashasqanchejta entiendenapaj yanapawanchej. Danielqa, tukuy laya metalesmanta runaman rijchʼakoj jatun lantita rikorqa (Dan. 2:28, 31-33). Chay lanteqa atiyniyoj gobiernos rikhurisqankuwan ninakun, pikunachus, ruwasqankuwan Diospa llajtanta ñakʼaricherqanku chayri yanaparqanku. Ñaupa tiempopeqa Babilonia, Medopersia, Grecia, Roma ima karqanku, kay tiempopitaj qhepa kaj atiyniyoj gobierno kashan. Chay qhepa kaj gobiernotaj, profecía nisqanman jina, lantej chakisninwan, chaki dedosninwan ima ninakun. Ñaupaj kaj guerra mundial kashajtenqa, Gran Bretañawan Estados Unidoswan mayta ujchakorqanku. Chayrayku lantej imasninmanta phishqa kajqa, Gran Bretañawan Estados Unidoswan atiyniyoj gobierno kanku. Lantej imasninmanta qhepa kajqa chakisnin. Chaytaj niña waj atiyniyoj gobierno rikhurinanta rikuchin. Chantapis lantej chakisnin, chaki dedosnin ima, fierrowan tʼuruwan chajrusqa kasqanqa, Gran Bretañawan  Estados Unidoswan mana sinchʼi atiyniyojchu kasqanta rikuchin.

14. Armagedón qallarejtin, ¿mayqen atiyniyoj gobiernotaj kamachishanqa?

¹⁴ Chay profeciallapitaj orqomanta uj rumi urmamusqanta nin. Chay rumeqa, Diospaj Reinonwan ninakun, orqotaj Jehovalla kamachej kasqanwan. Rumeqa 1914 watapi urmamorqa, lantej chakisninmantaj usqhayllata rishan. Armagedonpeqa lantej chakisnin, tukuy imasnintin qʼala phirisqa kanqanku (Daniel 2:44, 45 leey). Chayrayku Armagedón qallarishajtenqa, Gran Bretañawan Estados Unidoswan, atiyniyoj gobierno kashanqa. Chay profecía juntʼakunanta rikoyqa, ¡may kusiy kanqa! * Satanaswanrí, ¿imatá Jehová ruwanqa?

15. ¿Imataj Satanaswan, supaykunasninwan ima Armagedón pasayta kanqa?

¹⁵ Satanasqa ñaupajta, imaynatachus sajra pachan chinkachisqa kasqanta rikunan kanqa. Chantá paypis mana ayqeyta atenqachu. Apóstol Juan imachus kananta niwanchej (Apocalipsis 20:1-3 leey). Jesucristoqa, chinkay chinkay ukhoj “llaventa” japʼej “ángel” jina, Satanasta, supaykunasnintawan, chinkay chinkay ukhuman wijchʼuykonqa, waranqa wataspajtaj chaypi wataykonqa (Luc. 8:30, 31; 1 Juan 3:8). Ajinamanta, katarej uman pʼaltarpasqa kayta qallarenqa (Gén. 3:15). *

16. ¿Imaynapitaj chinkay chinkay “ukhu[pi]” Satanás tarikonqa?

¹⁶ ¿Imataj chinkay chinkay “ukhu”, maymanchus Satanasta, supaykunasninta ima wijchʼuykukun chay? Juanqa Griego parlaypi, ábyssos rimayta oqharerqa, chaytaj “mana tukukoj ukhu juskʼu”, “mana taripay atina ukhu” niyta munan. Chayrayku chay lugartaqa mana pipis taripayta atinmanchu, manaqa Jehovalla, chayri chinkay chinkay ukhoj “llaventa” japʼej angellla. Chaypitaj Satanasqa, wañusqapis kanman jina kanqa, imaraykuchus ni imata ruwayta atenqañachu, niñataj “runasta chʼawkiyan[qachu]”. “Phiña león jina qhaparirispa” purejtaqa siminta wisqʼakonqa (1 Ped. 5:8).

17, 18. a) ¿Imas kanantataj ukhuncharinchejña? b) Chaykuna juntʼakusqantawan, ¿imayna kausaytaj kanqa?

¹⁷ Tumpamantawan imaschus kananqa, kharkatinapaj jina kanqa. “Tukuy imapis allillan; ni imamanta llakikuna kanchu”, nisqa profecía, imaynatachus juntʼakunanta mayta suyashanchej. Chantataj, rikusunchej Jatun Babilonia chinkachisqa kasqanta, Magogmanta Gog Diospa llajtanta chinkachiyta munasqanta, Armagedón maqanakuyta, Satanás supaykunasninwan chinkay chinkay ukhuman wijchʼusqa kasqankuta ima. Tukuy sajra ruwaykuna chinkasqantawan, sumaj kausay qallarenqa. Arí, Cristoj Waranqa Watas Kamachiyninpi “allin” kausaypi, kusisqataj kausakusun (Sal. 37:10, 11).

¹⁸ Kay yachaqanapeqa, “mana chay rikukoj” imasmanta phishqataña ukhuncharinchej, chaykunatataj sumajta qhawananchej tiyan. Qhepan yachaqanapeqa, phishqa imaspiwan aswan qhepaman kananmanta parlarisun.