1. ¿Imatataj runas wata runa kaymanta yuyanku?

GRECIAMANTA uj runa, 2500 watas ñaupajta jina, kayta qhelqarqa: “Mana pipis munasqanraykuchu wata runaqa”, nispa. Noqanchejpis kikillantatajchá yuyasunman. Imajtinchus, wata runamanta parlajta uyarispaqa ñakʼarichisqa, presochasqataj kasqanpi yuyanchej. Mayta llankʼasqanpis mana paypajchu, manaqa patronninpaj.

2, 3. a) ¿Ima jatun ruwaytataj allin kamachi yuyayniyoj japʼin? b) ¿Ima tapuykunatataj mayordomos jina ruwayniyoj kasqanchejmanta kutichisun?

² Jesusqa yachachisqasnin, llampʼu sonqo kamachis chayri wata runas jina kanankuta nerqa. Chaywanpis, mana pisipajchu qhawachin, nitaj ñakʼarichinchu. Astawanqa sumajpaj qhawasqa, atienekunapaj jinataj kasqankuta rikuchin. Sutʼincharinapaj, Jesusqa wañupunan qayllata “allin kamachi” yuyayniyojmanta parlarqa, pimanchus kapuyninta saqenanta nerqa (Mat. 24:45-47).

³ Lucas libropeqa chay kamachita “mayordomo” nispa sutichakullantaj (Lucas 12:42-44 leey). Kay tiempopeqa, wakin cristianoslla chay kamachiwan ninakoj qotumanta kanku, chaywanpis Diospa tukuy kamachisnin, mayordomos jina ruwayniyoj kanchej. ¿Ima ruwaykunasniyojtaj kanchej? ¿Imaynatá chaykunata qhawananchej tiyan? Chayta yachanapajqa, ñaupa tiempo mayordomos imatachus ruwasqankuta qhawarina.

4, 5. ¿Imastataj ñaupa tiempopi mayordomos ruwaj kanku? Wakinmanta parlariy.

⁴ Ñaupa tiempopi uj mayordomoqa atienekunapaj jina kamachi karqa; pichus patronninpa wasinta chayri negociosninta qhawaj. Mayordomosqa patronninkoj  kapuyninta, qolqenta, kamachi masisninta ima qhawaj kanku. Sutʼincharinapaj, Eliezerqa ajina mayordomo karqa. Imajtinchus, Abrahamqa tukuy kapuyninta qhawananpaj payta churarqa. Chantapis, ichá payta Mesopotamia jallpʼaman kacharqa wawan Isaacpaj warmita maskʼanpunanpaj, chaytaj may jatun ruway karqa (Gén. 13:2; 15:2; 24:2-4).

⁵ Abrahampa allchhinpa wawan Josepis, Potifarpa wasinpi mayordomo karqa (Gén. 39:1, 2, 4). Aswan qhepamantaj, Josepis uj mayordomoyoj karqa, pichus wasinmanta cuentayoj karqa. Uj kutipi chay mayordomonqa kʼachamanta chunka wauqesninta atienderqa. Chantapis, José imatachus qolqe copanwan ruwananta kamachisqanman jina ruwarqa. Rikunchej jina, mayordomospeqa mayta atienekoj kanku (Gén. 43:19-25; 44:1-12).

6. ¿Imatataj ancianos mayordomos jina ruwanku?

⁶ Aswan qhepamantaj, apóstol Pabloqa sapa anciano “Diospa mayordomon jina” kananta nerqa (Tito 1:7). Paykunataqa Dios churarqa “tropata” michinankupaj, chayrayku qotuchakuykunata qhawanku, ruwasqankuwantaj wajkunata yachachinku (1 Ped. 5:1, 2). Chaywanpis, mana tukuychu kikin ruwanasniyoj kanku. Ashkha ancianosqa uj qotuchakuyllata yanapanku, waturejkuna jina llankʼajkunataj, ashkha qotuchakuykunata. Sucursalespi Kamachejkunatajrí, suyuntinpi qotuchakuykunamanta cuentayoj kanku. Chaywanpis tukuyninku, ruwanasninkuta allinta juntʼananku tiyan, imajtinchus Diosman cuentata qonanku kanqa (Heb. 13:17).

7. ¿Imaraykutaj tukuy cristianos mayordomos jina kasqanchejta nisunman?

⁷ ¿Imatá nisunman mana ancianoschu kaj cristianosmanta? Apóstol Pedroqa tukuy cristianosman nerqa: “Sapa ujniykichejman Diosqa ruwanapaj uj atiyta qosorqachej, qankunataj chaywan ujkunata sirviychej. Sumaj mayordomos jina Diospa imaymana kʼacha yanapayninwan wajkunata yanapaychej”, nispa (1 Ped. 1:1; 4:10). Arí, Diosqa kʼacha kasqanrayku, tukuyman imatapis allinta ruwanapaj atiyta qowanchej, chaywantaj hermanosninchejta yanapasunman. Rikunchej jina, Diosta sirvejkunaqa mayordomos jina kanchej. Chaytaj sumajpaj qhawasqa, atienekunapaj jina, nisqanta juntʼaj runas ima kasqanchejta rikuchin.

8. ¿Ima yuyaypitaj mayordomos jina kasqanchejrayku tʼukurinanchej tiyan?

⁸ Kunanqa tukuy cristianos mayordomos jina kasqanchejrayku, kinsa yuyaykunapi tʼukurina. Ñaupaj kaj: tukuyninchej Diospata kanchej, paymantaj cuentata qonanchej kanqa. Pablo nerqa: “Cuerpoykichejmantataj manaña dueñoschu kankichej. Diosqa preciowan rantikusorqachej” nisunman Cristo kausayninta qosqanwan (1 Cor. 6:19, 20). Jehovajta kasqanchejrayku, kamachiykunasninta kasukunanchej tiyan, kamachiykunasnintaj mana llasachu (Rom. 14:8; 1 Juan 5:3). Chantapis, Cristoj kamachisnin kanchej. Ñaupa tiempopi mayordomos jinataj ashkha imasta ruwayta atinchej, chaywanpis mana munasqanchejman jinallachu. Chayrayku, ruwanasninchejta kamachisqa kasqanchejman jina juntʼananchej tiyan. Qotuchakuypi ima ruwayniyoj kaspapis, Diospatawan Cristojtawan kamachisnin kanchej.

9. ¿Imaynatataj Jesús imatachus uj patrón kamachinmanta suyasqanta sutʼincharqa?

⁹ Jesusqa uj rijchʼanachinanpi, imatachus uj patrón kamachinmanta suyasqanta sutʼincharqa. Chay rijchʼanachinapi uj kamachimanta parlaspa, nerqa: “Pitaj qankunamanta kamachin campopi llankʼasqanmanta, kutimojtin [...] niwajchej: Yaykumuy;  mikhunaykipaj tiyaykukuy, nispa? Manachu astawanqa niwajchej: Wakichikuy waykʼunaykipaj, jaywawaytaj mikhunata, ujyanata ima sajsakunaykama; chaymantaraj qanqa mikhunki, ujyankitaj, nispa?” Chantá Jesusqa chay rijchʼanachinata sutʼinchaspa nerqa: “Ajinallatataj qankunapis Diospa kamachisqanta ruwayta tukuytawankama, ninaykichej: Mana walej kamachis kanchej; ruwanallanchejta ruwanchej”, nispa (Luc. 17:7-10).

10. ¿Imataj rikuchin Jehová payta sirvinapaj kallpachakusqanchejta sumajpaj qhawasqanta?

¹⁰ Chaywanpis, Jehovaqa payta sirvinapaj kallpachakusqanchejta may sumajpaj qhawan. Biblia niwanchej: “Diosqa cheqan kaspa, mana qonqaponqachu ruwasqasniykichejmanta, jinallataj Diospa sutinta munakusqaykichejmantapis”, nispa (Heb. 6:10). Jehovaqa atisqallanchejta mañawanchej. Chaytaj allinninchejpajpuni, manataj llasa qʼepi jinachu. Chaywanpis, Jesús rijchʼanachinanpi yachachisqanman jina, uj kamacheqa mana allinnintachu maskʼan, nitaj munaynintachu ñaupajman churan. Noqanchejpis, Diosman qokushajtinchej payta yupaychayta ñaupajman churananchejta nerqanchej.

11, 12. Mayordomos kasqanchejrayku, ¿imaynataj kananchej tiyan chantá imastataj qhesachananchej tiyan?

¹¹ Iskay kaj: mayordomos jina kikin kamachiykunata tukuy juntʼanchej. Wakin ruwaykunata mana tukuychu ruwayta atispapis, ashkha ruwaykunataqa tukuy cristianos ruwayta atinchej. Sutʼincharinapaj, Cristoj yachachisqasnin, Jehovaj testigosnintaj kasqanchejrayku, purajmanta munanakunanchej tiyan. Jesusqa cheqa cristianos kasqanchej munanakusqanchejpi rikukunanta nerqa (Juan 13:35). Mana Diospa llajtanpichu kajkunatapis munakullanchejtaj. Chay munakuytaqa tukuy cristianos rikuchinanchejpuni tiyan.

¹² Chantapis, Jehovaqa llimphu kausayniyoj kananchejta munan. Chayrayku, Palabran juchachasqan ruwaykunata qhesachananchej tiyan. Pablo nerqa: “Soltero kashaspa khuchichakojkuna, lantista yupaychajkuna, casarasqa kashaspa wajwan khuchichakojkuna, qhari kashaspa warmiman tukojkuna, qharipura jinanakojkuna, jinallataj suwaspis, michʼaspis, machajkunapis, maldecejkunapis, chʼawkiyajkunapis manapuni Diospa reinontaqa herenciata jina japʼenqankuchu”, nispa (1 Cor. 6:9, 10). Yachanchej jina, Diospa kamachiykunasninman jina kausanapajqa mayta kallpachakunanchej tiyan. Chaywanpis mana qhasipajchu, astawanqa ashkha bendicionesta japʼinchej. Arí, mana onqonapaj, wajkunawan allinpi kanapaj, Dios allinpaj qhawanawanchepaj ima yanapawanchej (Isaías 48:17, 18 leey).

13, 14. ¿Imatataj tukuy cristianos ruwananku tiyan, imaynatataj chayta qhawananchej tiyan?

¹³ Chantapis, mayordomos jina uj ruwayta juntʼananchej tiyan. Jehovaqa cheqa yachayta qowanchej, chaytataj runa masinchejman willamunanchejta munan (Mat. 28:19, 20). Pablo nerqa: “Ajina ari, Cristoj kamachisninta jina runas qhawawachuyku, imaraykuchus mayordomos kayku, Diospa pakasqa yachayninta sutʼinchanaykupaj”, nispa (1 Cor. 4:1). Pabloqa mayordomos kajkuna, “Diospa pakasqa yachayninta” qhawananku kasqanta nerqa, chantá Jesús kamachisqanman jina wajkunaman yachachinankuta (1 Cor. 9:16).

¹⁴ Wajkunaman chay cheqa yachayta yachachispaqa munakuyninchejta rikuchinchej. Chaywanpis, mana tukuychu kikin kausayniyoj kanchej. Nitaj tukuychu willaypi kikinta ruwayta atinchej, Jehovataj  chayta yachan. Astawanqa, tukuy atisqanchejta sapa uj ruwananchej tiyan. Ajinamanta, mana munaynillanchejtachu maskʼanchej, manaqa Diosta, runa masinchejtapis munakusqanchejta rikuchinchej.

15-17. a) ¿Imaraykutaj uj mayordomo cheqa sonqopuni kanan tiyan? b) ¿Imaynatataj Jesús rikucherqa mana cheqa sonqo kajkuna imapichus rikukunankuta?

¹⁵ Kinsa kaj: cheqa sonqos, atienekunapaj jinataj kananchej tiyan. Uj mayordomoqa kʼacha kaykunasniyoj kanman, sumajtataj imatapis ruwayta yachanman, chaywanpis ruwayninta mana juntʼajtin chayri patronninta wasanchajtin, qhasillapaj chaykunaqa kanman. Chayrayku, ruwayninta allinta juntʼananpajqa cheqa sonqopuni kanan tiyan. Pabloj nisqanta yuyarikuna, pay nerqa: “Kunanqa sapa uj mayordomo jina ruwananta allinta juntʼachun [chayri cheqa sonqo kachun]”, nispa (1 Cor. 4:2).

¹⁶ Cheqa sonqo kajtinchejqa tʼinkasta japʼisunchej. Mana cheqa sonqo kajtinchejtaj, ñakʼarisun. Jesusqa chayta sutʼinchananpaj qolqe talento rijchʼanachinamanta parlarqa. Chaypeqa uj patrón, iskay kamachisninta allinta ruwasqankuta nisqa, tʼinkasqataj; paykuna cheqa sonqo kaspa qolqenta mirachisqankurayku. Chaywanpis, mana kasukoj kamachitaqa “sajra, qhella kamachi”, “ni imapaj allin” kasqanta nisqa; qosqantapis qhechukapusqa, jawaman wijchʼunankutataj kamachisqa (Mateo 25:14-18, 23, 26, 28-30 leey).

¹⁷ Jesusqa mana cheqa sonqo kajtinchej imapichus rikukunanchejta, waj rijchʼanachinawan sutʼincharqa. Chaypi nerqa: “Uj qhapaj patrompata mayordomon kasqa, paytataj chʼataykusqanku patronnimpa kapuyninta usuchisqanmanta. Chayrayku  patronqa wajyaspa, nisqa: Imastataj qanmanta uyariniri? Cuentata qoway mayordomo kasqaykimanta, imaraykuchus manaña mayordomoy kayta atinkichu”, nispa (Luc. 16:1, 2). Chay mayordomoqa patronninpa kapuyninta usuchisqanrayku wijchʼuchikorqa. Chaymanta, ¡mayta yachakusunman! Arí, Jehová imatachus mañawasqanchejtaqa sumajtapuni juntʼana.

18. ¿Imaraykutaj mana wajkunawan kikinchakunachu?

¹⁸ Sapa ujninchej tapurikusunman: “¿Imayna mayordomotaj kani?”, nispa. Wajkunawan kikinchakoyqa mana allinchu. Biblia yuyaychawanchej: “Sapa uj pay kikimpa ruwasqanta allinta qhawakuchun. Ajinaqa paypa ruwasqanmanta sonqo juntʼasqa kanqa, manataj wajpa ruwasqanmantachu”, nispa (Gál. 6:4, 5). Ruwasqanchejta wajkunaj ruwasqankuwan kikinchanamantaqa, imatachus noqanchej ruwayta atisqanchejpi tʼukurina. Chaypi tʼukurispaqa mana jatunchakusunchu, nitaj qʼasa sonqo qhepakusunchu. Chantapis, kausayninchej tijrakusqanta reparananchej tiyan. Ichapis uj onqoyrayku, machuyasqanchejrayku chayri waj ruwaykunarayku niña ñaupajta jinachu ruwayta atinchej. Chayrí, ichapis astawan ruwayta atinchej. Ajina kajtenqa, astawan Jehovapaj llankʼasunman.

19. Ima ruwaytapis mana japʼejtinchej, ¿imaraykutaj mana llakikunachu?

¹⁹ Chantapis, japʼiyta munasqanchej ruwaykunasniyoj kajkunawan nillataj kikinchakunachu. Sutʼincharinapaj, ichapis uj hermano qotuchakuypi anciano kayta chayri jatun tantakuykunapi umallirichiyta munanman. Chaykunata japʼinapaj kallpachakoyqa may allin, chaywanpis suyashajtinchej mana juntʼakojtenqa, mana llakikunachu. Ichapis, ima kasqanrayku mana japʼiyta atisunmanchu, chayta mana entiendeyta atispataj anchata qheparikushasqanta yuyasunman. Moisespis, israelitasta Egiptomanta kacharichinanpaj wakichisqa kasqantachá yuyarqa, chaywanpis 40 watasta suyakunan karqa. Chay tiempopitaj kʼacha kaykunasniyoj kayta yachakorqa, chaytaj mana kasukoj llajtata kamachinanpaj yanaparqa (Hech. 7:22-25, 30-34).

20. ¿Imatá Jonatanmanta yachakunchej?

²⁰ Ichapis wakin ruwaykunataqa ni jaykʼaj japʼisunchu. Jonatanpis ajinapi rikukorqa. Payqa Saulpa churin kasqanrayku, Israelpi kamachinan karqa. Chaywanpis, Diosqa Davidta ajllarqa, pichus Jonatanmanta aswan sullkʼa karqa. ¿Imatá Jonatán ruwarqa? Diospa nisqanman jina ruwarqa, Davidtapis kausayninta wañuy pataman churaspa yanaparqa. Chayrayku nerqa: “Qanqa Israelpa reynin kanayki tiyan, noqataj qampa qhepaykipi kasaj yanapasunaypaj”, nispa (1 Sam. 23:17). Jonatanqa mana phiñakorqachu, nitaj tatan jina envidiakorqachu. ¿Imatá paymanta yachakunchej? Wajkunaj japʼisqanku ruwaykunamanta envidiakunamantaqa, japʼisqanchej ruwaykunata allinta juntʼana. Yachanchej jina, Jehovaqa mosoj pachapi tukuy kamachisninpa munasqankuta juntʼachenqa.

21. ¿Imaynatá Diospa mayordomosnin kasqanchejta qhawananchej tiyan?

²¹ Kayta ama qonqanachu: Diospa mayordomosnenqa mana wata runas jinachu ñakʼarichisqa kanchej. Astawanqa, sumaj ruwayta japʼinchej, imajtinchus kay qhepa pʼunchaykunapi sumaj willaykunata willanapaj kamachisqa kanchej. Chay ruwaytaj niña ujtawan ruwakonqachu. Chantapis, ruwaykunasninchejtaqa tukuy imaymanamanta juntʼayta atinchej. Chayrayku, cheqa sonqo mayordomos kana, Jehovata sirviyta atisqanchejtataj jatunpaj qhawana.