APÓSTOL Pablo nerqa: “Diospa Palabranqa kawsayniyoj, atiyniyojtaj”, nispa (Heb. 4:12). Chayta nispaqa Biblia runaspa sonqonkuman chayayta, kausayninkutataj tijrachiyta atisqanta nisharqa.

Chaywanpis, chay yuyayqa apóstoles wañupusqankumanta qhepaman qʼewisqa karqa. Imaraykuchus, Diospa contranpi oqharikojkuna, cristianospa yachachiyninkuta chʼichicharqanku (2 Ped. 2:1-3). Tiempowantaj religionta kamachejkuna, tʼukuna imasta ruwanapaj Biblia atiyniyoj kasqanta yachacherqanku. Bibliaj textosninmanta parlaspa, profesor Harry Y. Gamble nisqanman jina, Orígenes sutiyoj runa pichus Iglesiata Jatarichejkunamanta ujnin karqa, jinata nisqa: “Bibliaj rimaykunasninta oqharikusqallan pitapis yanapan. Yatiri rimaykuna atiyniyoj kajtin, Diospa yuyaychasqan rimaykunaqa aswan atiyniyojrajchá”, nispa. Juan Crisóstomo sutiyoj runapis, pichus 400 wata chaynejpi kausarqa, wakin runas Evangeliosmanta textosta kunkankupi warkhuykukusqankuta nisqa, sajra manchachinapis kanman jina. Chantapis kayta qhelqasqa: “Uj wasipi Biblia kajtin, Supayqa chaymanta ayqekun”, nispa. Agustín de Hipona sutiyoj católico runapis, “cabecera uraman Bibliata churaspa puñuy, uma nanaypaj jampi” kasqanta nisqa. Rikunchej jina, runaqa tʼukuna imasta ruwanapaj Biblia atiyniyoj kasqanta yuyaj. Chaywanpis, Biblia sajrata manchachinapaj chayri jarkʼanawanchejpaj kasqanta yuyayqa, llulla cuentoslla.

Kay tiempopi runaspis, uj llulla cuentopi creellankutaj. Bibliata kichariytawan mayqen versiculollatapis leesqankupi yanapata tarinankuta yuyanku. Sutʼincharinapaj, profesor Harry nisqanman jina, Agustín de Hipona sutiyoj runaqa, uj kutipi uj yoqallitu qhaparisqanta uyarisqa, waj wasimantataj qhaparimusqa: “Oqhariytawan leeypacha, oqhariytawan leeypacha”, nispa. Paytaj, Bibliata kicharispa mayqen capitulollatapis leenanpaj Dios kamachishasqanta yuyasqa.

Runasqa uj chʼampaypi rikukuspa Diosmanta mañakunku, chantataj Bibliata japʼiytawan kicharinku, ima versiculollatapis leesqanku yanapananta yuyaspa, ichá qanpis chayta uyarerqanki. Runas, chayta ruwaspa Bibliapi yanapata maskʼasqankuta nejtinkupis, mana ajinamantachu maskʼana.

Jesusqa yachachisqasninman yanapaj espíritu santota kachamunanta nishaspa, nerqa: “Tukuy imata yachachisonqachej, yuyarichisonqachejtaj tukuy ima nisqayta”, nispa (Juan 14:26). Chaywanpis, Bibliaj yanapayninta tarinapajqa yachakunanchej tiyan, mana Bibliata ima cheqatapis kicharispallachu yanapata tarisun.

Ashkha runasqa layqa ruwaykunapaj chayri jarkʼachikunankupaj Bibliata apaykachanku. Chaywanpis, Diospa Palabranqa ama adivino kanata, nitaj qhepaman imachus kananmantapis yachajman tukunata nin (Lev. 19:26; Deu. 18:9-12; Hech. 19:19). “Diospa Palabranqa kawsayniyoj, atiyniyojtaj”, chaywanpis maychus kajta apaykachayta yachananchej tiyan. Runastaqa Bibliapi yachakusqanku yanapan. Arí, Bibliaj yachachiynenqa, allin runas kanankupaj, sajra ruwaykunata saqenankupaj, familiankupi aswan ujchasqa kanankupaj, Bibliaj Yuyaychajninwan masichakunankupaj ima yanapan.