¿Yuyarikunkichu?
¿Kay killasmanta Torremanta Qhawaj revistasta leerqankichu? ¿Kay tapuykunaman kutichiyta atiwajchu?
¿Imatá ruwasunman parlayninchejwan mana ninata jina japʼichinapaj?
Sonqonchejpi imachus kasqanta qhawarikuna. Uj hermanota qhawaraymantaqa, imaraykuchus ajinata yuyashasqanchejta tapurikuna. ¿Wajkunata pisipaj qhawachispa aswan patapi kaytachu munashanchej? Wajkunata qhawarayqa mana allinman chayachiwasunman (15/8, página 21).
¿Imastaj Jehovaj pʼunchaynin chayamushajtinña kanqa?
“Tukuy imapis allillan; ni imamanta llakikuna kanchu” nispa nenqanku. Naciones “Jatun Babilonia[man]” sayaykuspa chinkachenqanku. Diospa llajtanpa contranpi sayaykukonqa. Armagedón maqanakuy kanqa. Satanasta, supaykunata ima chinkay ukhuman wijchʼuykukonqa (15/9, página 4).
Maykʼajchus tukukuy chayamunanta mana yachay, ¿imaynatataj yanapawanchej?
Ima pʼunchaychus, ima horachus tukukuy kananta mana yachayqa imachus sonqonchejpi kasqanta rikuchinapaj, Jehovapi astawan atienekunapaj, Palabran nisqanman jinataj kausanapaj yanapawanchej. Chantapis, ñakʼariykunapi kaspa creeyninchejta kallpachanapaj yanapawanchej (15/9, páginas 24, 25).
¿Imaraykutaj Jehová “ujkuna ujkunawan kʼachas” kananchejta mañawanchej manataj rejsisqasllawanchu? (Efesios 4:32.)
Diosqa chay kʼacha kayta rikuchin, Jesús nisqanman jinataj, Diosqa mana payta munakojkunallawanchu kʼacha, manaqa ‘mana yuyarikojkunawanpis’ (Luc. 6:35). Diospa rijchʼayninman jina ruwasqa kasqanchejrayku, kʼacha kayta rikuchiyta atinchej, manataj familiaresnillanchejmanchu manaqa tukuyman (1/10, página 11).
¿Imaraykutaj Rut kʼacha munakuyta rikuchisqanmanta mayta yachakusunman?
Rutqa Noemita mayta munakusqanrayku mana rejsisqa llajtaman paywan riporqa. Chantapis paykunata wañuylla tʼaqananta nerqa. Rutqa Noemij llajtanmanta kananpaj, Moabpi familiaresninta, diosesninta, tukuy imatawan saqenanpaj wakichisqa kasharqa (1/10, página 21).
¿Imaynamantataj Dios, pesachikojkunaj juchankuta perdonaspa qonqayman churan?
Jehovaqa kamachisninman jinata nin: “Manañataj jaykʼajpis juchasninkumanta yuyarikusajchu”, nispa (Jer. 31:34). Diosqa Jesuspa wañuyninnejta juchasninchejta pampachayta atin. Pampachaspataj, manaña yuyarikullanpunichu chay juchamanta castiganawanchejpaj (1/10, página 30).
Apocalipsis 1:16, 20 nisqanman jina, ¿pikunawantaj ninakun Jesuspa “paña makimpi qanchis chʼaskasta” rikukusqan?
Chay chʼaskasqa ajllasqa cristianosmanta ancianoswan, qotuchakuykunamanta tukuy ancianoswan ima ninakun (15/10, página 14).
¿Imaynatataj Jesús, Isaías 50:4, 5 nisqanman jina llampʼu sonqo kasqanta rikucherqa?
Chay versiculospeqa “yachayniyojkunaj parlayninkuta” japʼej, mana “qhepamanpis” kutirisqanta nin. Jesustaj, mayta yachakuyta munaspa llampʼu sonqowan Jehová yachachisqanta uyarerqa. Chantapis, Jehová llampʼu sonqowan juchasapa runasta khuyakusqanmanta, maytachá yachakullarqataj (15/11, página 11).
