JESUSQA chay templopi “mana uj rumillapis rumi patapi” qhepakunanta nerqa. Nisqantaj, Titoj kamachiyninpi Romamanta soldados Jerusalenta thuñishajtinku 70 watapi juntʼakorqa (Mat. 24:2). Aswan qhepamanqa Romapi kuraj kamachej Juliano chay templota sayarichiyta munarqa.

Constantino I el Grande nisqaj sobrinon Julianoqa Romapi Diosta mana yupaychaj kuraj kamachejkunamanta, qhepa kaj kasqanta nikun. Paytaqa cristiano nichikojkuna yachacherqanku. Chaywanpis, 361 watapi Romapi kuraj kamachej sutichasqa kaytawan, mana cristianoschu kajkunaman kutikunanpaj, cristiano nichikojkunata qhesacharqa. Chayrayku, unay tiempomanta parlaj librospi “Diosta Wasanchaj” nispa sutichakun.

Julianoqa cristiano nichikojkunata mayta chejnerqa, ichapis sojta watitayojllaraj kashajtin tatanta, waj familiaresnintawan wañuchisqankuta rikusqanrayku. Ñaupa tiempomanta yachaj runasqa templota judíos sayarichinankupaj Juliano tanqasqanta ninku, Jesusta llulla profetata jina rikuchinanpaj. *

Julianoqa templota sayarichiytapuni munarqa. Chaywanpis, ¿sayarichiyta qallarerqachu? Mana yachakunchu. Sayarichiyta qallarejtinpis, imaraykuchus saqepusqanta nillataj yachakunchu. Astawanqa niraj iskay watata kamachishajtin wañuporqa, ruwayta munasqanpis kikinpi qhepakaporqa.