1, 2. 1) ¿Imatá ruwananchej tiyan Jehovawan sumajta masichakunapaj? 2) ¿Imaynatá yanapawasun Bibliapi runasmanta qhelqakusqanta ukhunchay?

UJ SALMISTA jinata nerqa: “Noqarí Diosman qayllakusaj. Noqapajqa chaymin aswan sumajqa. Tukuy Atiyniyoj Tata Dios, qanmin pakakunay kanki”, nispa (Sal. 73:28). Chayta nispaqa Jehovapi atienekusqanta rikucherqa. Payqa aswan ñaupajta, sajra runas kusisqa kausasqankuta rikuspa llakiywan jinata nerqa: “Llimphu sonqo kawsakusqayqa yanqhalla, jinallataj makisniyta tukuy sajramanta mayllakusqaypis”, nispa (Sal. 73:2, 3, 13, 21). Chaywanpis, “Diospa wasinman” yaykuspa niña jinatachu yuyarqa, Jehovaj qayllallanpipunitaj karqa (Sal. 73:16-18). ¿Imatá pay chaymanta yachakorqa? Jehovawan sumajta masichakunanpajqa Diospa llajtanpi kanan kasqanta, yuyaychaykunasninman jinataj ruwanan kasqanta (Sal. 73:24).

² Noqanchejpis, Dioswan sumajta masichakuyta munanchej. Chaypajtaj yuyaychaykunasninman jina ruwanapaj kallpachakunanchej tiyan, ajinamanta Jehová allinpaj qhawawasun. Bibliapeqa runasman, llajtasman ima khuyakuyninta rikuchisqanta nin. ¿Imaynamantá? Kʼamiyninta japʼikunankuta suyaspa. Chaytaj “yachachinawanchejpaj qhelqasqa karqa”, “noqanchej yachaqakunanchejpaj ama paykuna jina ruwananchejpaj, kay qhepa pʼunchaypi kawsajkunapaj” (Rom. 15:4; 1 Cor. 10:11). Chaykunata ukhunchaspaqa imaynachus Jehová kasqanta astawan yachasun, makisninpi churakuy imaynatachus yanapawasqanchejtataj reparasun.

3. ¿Imawantaj Isaías 64:8 chantá Jeremías 18:1-6 kikinchan runas Jehovaj makinpi kasqankuta? (Patapi kaj dibujota qhawariy.)

³ Runas, llajtas ima Jehovaj makinpi kasqankurayku, Bibliaqa payta kaywan kikinchan: “Tata Dios, qanmin Tatayku kanki. Noqaykoqa llinkʼi tʼuru jinalla kayku, qantaj manka llutʼaj jina kanki. Chayrayku noqaykoqa tukuyniyku makisniykej ruwasqasnin kayku”, nispa (Isa. 64:8). Manka llutʼaj runaqa tʼurumanta imatachá ruwayta munan chayta ruwan, tʼurutaj saqekullan. Diospis kikillantataj noqanchejwan ruwayta atin. Noqanchejtaj tʼuru jinalla kaspa nillataj imatapis niyta atinchejchu (Jeremías 18:1-6 leey).

4. ¿Munajta mana munajtachu Dios runaswan, llajtaswan ima kasuchikun? Sutʼinchay.

⁴ Ñaupa Israel llajtaqa Jehovaj makinpi tʼuru jina karqa, Jehovataj uj manka llutʼaj jina. Chaywanpis, manka llutʼaj runaqa llinkʼi tʼuruta japʼispa imatachá ruwayta munan chayta ruwan. Jehovatajrí mana munasqanman jinachu runaswan chayri llajtaswan ruwan, nitaj wakinkunata kʼacha chayri sajra runasmanchu tukuchin. Jehovaqa runas kausayninkupi imatapis ajllanankuta saqen. Nitaj atiyniyoj kasqanraykuchu runaswan munajta mana munajta kasuchikun. Chayrayku, Jehová munayninman jina kʼacha runasman tukuchinawanchejpajqa noqanchej llinkʼi tʼuru jina saqekunanchej tiyan (Jeremías 18:7-10 leey).

5. ¿Imatá Jehová ruwan, runas mana makinpi churakuyta munajtinku?

⁵ Chantá, ¿imatá Jehová ruwan mana llinkʼi tʼuru jinachu makinpi kayta munajkunawan? Uj manka llutʼajqa llinkʼi tʼurumanta imatachus munasqanta mana ruwayta atejtin, ichapis waj imata ruwanan kanqa chayri tʼuruta wijchʼupunan kanqa. Chaytaj kanman manka llutʼaj runa mana allinta ruwasqanrayku. Chaywanpis Jehovaqa runas makinpi llinkʼi tʼuru jina churakojtinku ni jaykʼaj pantanchu (Deu. 32:4). Uj runa mana saqekojtenqa paypa juchan. Jehovaqa munajkunata yanapan, mana munajkunatataj mana. Llinkʼi tʼuru jina saqekojkunaqa Jehovapaj may sumaj kanku. Sutʼincharinapaj, ajllasqa cristianosqa Diospa “khuyakuynimpi kajkunaman” tukunku, pikunachus “jatun pʼunchayllapi oqharinapaj” vasos jina kanku. Chaywanpis, Jehovaj makinpi manapuni churakuyta munajkunaqa “wakisqa ka[n]ku wañuypaj” (Rom. 9:19-23).

6, 7. ¿Imatá ruwarqa David Jehová kʼamijtin, Saultajrí imatá ruwarqa?

 ⁶ Jehovaqa runasta cheqanchananpaj wakin kuti yuyaychan chayri kʼamin. Makinpi llinkʼi tʼuru jina churakojkunata imaynatachus cheqanchasqanta yachanapajqa rey Saulmanta, rey Davidmanta ima parlarina. Davidqa Betsabewan khuchichakusqanrayku ñakʼarerqa, wajkunatapis ñakʼaricherqa. David rey kajtinpis, Jehovaqa payta sinchʼimanta kʼamerqa, chaypajtaj profetan Natanta kacharqa (2 Sam 12:1-12). ¿Imatá David ruwarqa? Sonqonta mayta nanachikorqa, sonqomantachataj pesachikorqa chayrayku Diosqa paymanta khuyakorqa (2 Samuel 12:13 leey).

 ⁷ Rey Saultaj Jehovaj kʼamiyninta mana japʼikorqachu. Jehovaqa Saulta profetan Samuelnejta, Amalec llajtapi tiyakojkunata, uywasninkuta ima wañuchinanta kamacherqa. Saultaj mana kasukuspa rey Agagta, sumachaj uywasnintawan mana wañuracherqachu. ¿Imaraykú? May rejsisqa kayta, allinpaj qhawasqa kaytataj munasqanrayku (1 Sam. 15:1-3, 7-9, 12). Samuel yuyayninman churayta munajtintaj Saulqa sonqonta rumiyacherqa, ajinamanta Jehovaj makinpi mana llinkʼi tʼuru jinachu churakusqanta rikucherqa. Astawanpis kʼamisqanta pisipaj qhawarqa, chay uywas Diosman qʼolachinapaj  kasqantarajtaj nerqapis. Chayrayku Jehovaqa Saulta reyta jina qhesacharqa, niñataj allinpajchu qhawarqa (1 Samuel 15:13-15, 20-23 leey).

8. ¿Imatá yachakunchej imatachus Israel llajta ruwasqanmanta?

⁸ Jehovaqa llajtaspis makinpi llinkʼi tʼuru jina churakunankuta munan. Diosqa Israel llajtawan uj tratota ruwarqa, chaytaj karqa Jesús niraj jamushajtin 1513 watapi, Egipto llajtamanta kacharichisqa kasqantawan. Israel llajtaqa ajllakusqan llajta karqa, Jehovataj sumajman tukuchiyta munarqa. Chaywanpis israelitasqa kʼullukuspa, Jehovaj ñaupaqenpi sajra kajta ruwarqanku, chay qayllapi kaj llajtaspa diosesninkuta ima yupaycharqanku. Jehovaqa yuyayninkuman churakunankupaj kutin kutita profetasninta kacharqa, chaywanpis paykunaqa mana uyarerqankuchu (Jer. 35:12-15). Kʼullukusqankuraykutaj may jasutʼisqa karqanku. Israelmanta chunka ayllustaqa asirios chinkacherqanku, Judaj iskay ayllusnintataj egipcios japʼikaporqanku. ¿Imatá chaymanta yachakunchej? Jehová yanapanawanchejpajqa kʼamiyninta japʼikuna kasqanta.

9, 10. ¿Imatá ninivitas ruwarqanku Dios chay llajtata chinkachinanta willajtin?

⁹ Jehovaqa munallarqataj Asiriaj capitalnin Nínive llajtapi tiyakojkunapis, kʼamiyninta japʼikunankuta. Chayrayku  Jonasman nerqa: “Wakichikuspa, puririy Nínive jatun llajtaman, willamuytaj chay llajtata chinkarparichinayta, imaraykuchus noqakama chayamuwan tukuy sajra ruwasqasninku”, nispa. Arí, Nínive llajtaqa chinkachisqa kananpaj jinapuni karqa (Jon. 1:1, 2; 3:1-4).

¹⁰ Chaywanpis Jonás chayta willajtin, “chay llajtapi tiyakojkunaqa Diospi creerqanku. Chantá kamacherqanku tukuy runas ayunota ruwanankuta, llakiy pʼachastataj churakorqanku jatunmanta juchʼuykama”. Reyninkupis “kamachina tiyananmanta sayarerqa, pʼachasninta lluchʼukuspa, llakiy pʼachasta churaykukuytawantaj ushpha patapi tiyakorqa”. Rikunchej jina, ninivitasqa Jehovaj kʼamiyninta japʼikorqanku, pesachikorqankutaj chayrayku Jehová paykunata perdonarqa (Jon. 3:5-10).

11. ¿Imatá yachakunchej Israel chantá Nínive llajtawan imatachus Jehová ruwasqanmanta?

¹¹ Israel llajta ajllakusqan llajta kajtinpis, Jehovaqa jasutʼerqa. Chaywanpis Nínive llajtataqa makinpi llinkʼi tʼuru jina churakusqanrayku khuyarqa, paykunawan mana uj tratota ruwajtinpis. Chaytaj sutʼita rikuchiwanchej Jehovaqa “tukuyta uj rejllata” qhawasqanta (Deu. 10:17).

12, 13. 1) ¿Imaraykutaj Dios ruwayta yuyasqanta niña ruwanchu pillapis makinpi llinkʼi tʼuru jina churakojtin? 2) ¿Imataj niyta munan Saulmanta, Nínive llajtamanta ima Jehová sonqonta nanachikusqan?

¹² Jehovaqa wakin kuti, runas pesachikojtinku imatachus ruwayta yuyasqanta tijrachiyta atin. Sutʼincharinapaj, uj kuteqa Jehová kayta nerqa: “Saulta reyta churasqaymanta sonqoy nanawan”, nispa (1 Sam. 15:11). Jinallataj ninivitas mayta pesachikusqankuta rikuspapis “mana ruwarqachu imatachus ruwayta yuyasqantaqa” (Jon. 3:10).

¹³ Jehovaqa imatachus Saulmanta yuyasqanta tijracherqa, imajtinchus reyta jina ajllaspapis payta qhesacharqa. ¿Pantarqachu payta ajllaspa? Mana, astawanqa Saúl niña Jehovapi atienekorqachu, kʼullu runamantaj tukorqa, chayrayku qhesacharqa. Ninivitaswan imatachus ruwayta munasqanmantapis sonqon nanallarqataj, chayrayku niña ruwarqachu imatachus paykunawan ruwayta yuyasqantaqa. Mayta kusikunchej Jehová kʼacha, khuyakuyniyojtaj kasqanmanta, astawanpis uj juchallikoj runa sonqomantapacha pesachikojtin imatachus paywan ruwayta yuyasqanta, tijrachiyta atisqanmanta.

14. 1) ¿Imaynatataj Jehová cheqanchawanchej? 2) ¿Imatá ruwananchej tiyan Jehová cheqanchayta munawajtinchej?

¹⁴ Jehovaqa Palabrannejta, llajtannejta ima astawanpis cheqanchawanchej (2 Tim. 3:16, 17). Chayrayku, chaykunanejta yuyaychawasqanchejta, kʼamiwasqanchejta ima japʼikunanchej tiyan. Unayña bautizasqa kaspapis chayri llajtanpi ima ruwaykunata japʼispapis, Jehovaj yuyaychaykunasninman jinapuni ruwana, munayninman jina allin runasman tukuchinawanchejtataj saqekuna.

15, 16. 1) ¿Imaynapí rikukusunman kʼamisqa kaspa Diospa llajtanpi ruwayninchejta saqejtinchej? Sutʼinchay. 2) ¿Imataj yanapawasun kʼamisqa kajtinchej mana llakisqallapuni kanapaj?

¹⁵ ¿Imaynatá Jehová kʼamiwanchej? Wakin kuteqa imatachus ruwananchejta yachachiwanchej chayri yuyayninchejta tijrachinapaj yanapawanchej. Chaywanpis,  wakin kuteqa jatun juchapi urmasqanchejrayku ichapis sinchʼimanta kʼaminawanchej kanqa. Chayraykutaj qotuchakuypi ruwanasninchejta saqenanchej kanman. Danielmanta parlarina. * Payqa anciano karqa, chaywanpis qolqerayku uj chʼampaypi rikhurispa jatun juchapi urmarqa, chayraykutaj sapallanpi kʼamisqa karqa. ¿Imaynataj kashanman karqa niña ancianochu kasqanta qotuchakuypi willakushajtin? Pay nin: “Ni imapaj kasqayta yuyakorqani. Kinsa chunka watastaña ashkha ruwaykunata Diospa llajtanpi japʼerqani: precursor regular karqani, Betelpi llankʼarqani, siervo ministerial karqani, chantataj anciano. Chantapis uj jatun tantakuypi chay kutillaraj umalliricherqani. Chaywanpis, jinallamanta ni ima ruwayniyoj qhepakorqani. Chayrayku pʼenqakorqani, astawanpis Diospa llajtanpi niña ni imata ruwayta atisqayta yuyarqani”, nispa.

¹⁶ Danielqa kausayninta tijrachinan karqa. Chaywanpis, ¿imataj yanaparqa niña llakikunanpaj? Bibliata ukhunchananpaj, willayman rinanpaj, tantakuykunaman rinanpaj ima kallpachakorqa. Chantá pay nin: “Hermanos kallpachawasqanku, publicacionespis mayta yanapallawarqataj. Torremanta Qhawaq 15 agosto 2009 revistapi, ‘¿Qutuchakuypi llamkʼanaykita watiqmanta japʼikuyta munawaqchu?’ nisqa yachaqana noqapaj jinapuni karqa, Diospis mañakusqayman kutichishawanman jina. Chay revistapi: ‘Chayrayku, qutuchakuypi ni imapi llamkʼachkankichu chayqa, Dioswan allinpi kanaykipaq kallpachakuy” nisqan, noqapajpuni karqa’”, nispa. ¿Imaynatataj Danielta yanaparqa kʼamisqa kasqan? Watasninman pay nerqa: “Jehová bendeciwasqanrayku watej siervo ministerial kani”, nispa.

17. ¿Imaynatá qotuchakuymanta qharqosqa kay juchallikojta kutinpunanpaj yanapanman? Sutʼinchay.

¹⁷ Qotuchakuymanta qharqosqa kaypis, Jehovaj kʼamiynillantaj. Imajtinchus qotuchakuypi sajra ruwaykuna rikhurinanmanta jarkʼan, juchallikoj kutinpunanpajtaj yanapanman (1 Cor. 5:6, 7, 11). Sutʼincharinapaj, Robertoqa 16 watasta jina qotuchakuymanta qharqosqa karqa. Chay tiempopitaj tatasnin, hermanosnin ima Bibliaj nisqanman jinapuni ruwaspa, mana paywan masichakorqankuchu, nitaj napaykullarqankupischu. Kunanqa qotuchakuyman kutinpusqanmanta ashkha watasña, sumajtataj ñauparishan. ¿Imataj yanaparqa Jehovaman, llajtanman ima chay chhika watasmanta kutinpunanpaj? Familian Bibliaj nisqanman jinapuni ruwasqan. Pay nerqa: “Familiaychus tumpitallatapis parlapawanman karqa chayqa, chayllapaj kayman karqa, nichá paykunawan kayta faltachaymanchu karqa, nitaj Diosman kutinpunaypajpis tanqawanmanchu karqa”, nispa.

18. ¿Imayna tʼuru jinataj Jehovaj makisninpi kananchej tiyan?

¹⁸ Ichapis noqanchejqa mana chay jina kʼamisqapunichu kananchej kanqa. Chaywanpis, ¿imayna tʼuru jinataj Jehovaj makisninpi kasun? ¿Imatá ruwasun kʼamisqa kaspa? ¿David jinachu chayri Saúl jinachu kasun? Tatanchej Jehovaqa Sumaj Manka Llutʼaj jina. Chantapis “Tata Diosqa, pitachus munakun, chayta castigan, uj tataqa wawanta munakuspa jasutʼin, ajinata”. Chayrayku, Jehová cheqanchawasqanchejta ama qhesachanachu, nitaj kʼamiyninwanpis amichikunachu (Pro. 3:11, 12).