Diospa angelesninmanta parlashasqanta nisunman. ¿Imaraykú chayta ninchej?

Génesis 6:2 nin: “Diospa churisnenqa rikorqanku runaspa ususisninku kʼachitas kasqankuta. Chayrayku paykunawan casarakorqanku, munasqankuman jina ajllakuspa”.

Hebreopi Qhelqasqaspeqa “Diospa churisnin”, “Diospa wawasnin” chayri “cielopi kajkunamanta” nisqa rimaykuna, kay textospi rikhurin: Génesis 6:2, 4; Job 1:6; 2:1; 38:6, 7 chantá Salmo 89:6. ¿Imatá chay versículos Diospa wawasninmanta sutʼinchan?

Job 1:6 versiculopi “Diospa wawasnin” nispaqa angelesmanta parlashan, pikunachus Diospa ñaupaqenpi tantasqa kasharqanku. Satanaspis paykunallawantaj kasharqa, pichus Jallpʼa patapi puriykachasqanmanta rerqa (Job 1:7; 2:1, 2). Chantá Job 38:4-7 versiculospi Dios nerqa: “Wawasniy janaj pachapi kusikusharqanku”, nispa. Chaytaj karqa Jehová Jallpʼata ruwashaspa “cimiento esquina jatun rumita” churashajtin. Chayrayku chay wawasnenqa ángeles karqanku, imaraykuchus niraj runataqa ruwarqachu. Salmo 89:6 versiculopis “cielopi kajkunamanta” nispa mana runasmantachu parlashan manaqa angelesmanta, pikunachus janaj pachapi Dioswan khuska tiyakunku.

Chantá Génesis 6:2, 4 versiculospi “Diospa churisnin” nispa, ¿pikunamantá parlashan? Bibliata ukhunchaspaqa Jallpʼaman jamorqanku chay angelesmanta parlashasqanta nisunman.

Wakenqa mana creenkuchu ángeles qhariwarmi jina puñuykuyta munasqankuta. Imajtinchus Jesusqa Mateo 22:30 versiculopi nerqa janaj pachapi mana casarasqankuta, nitaj qhariwarmi jina puñuykusqankuta. Chaywanpis wakin angelesqa aychallikuspa runaswan mikhorqanku, ujyarqanku ima (Gén. 18:1-8; 19:1-3). Arí, angelesqa aychallikuspa warmiswan puñuykuyta aterqanku.

Bibliaqa wakin ángeles chayta ruwasqankuta sutʼinchan. Judas 6, 7 versiculospi, Sodomapi “mana ruwana millay juchamampis qokorqanku” chay runasta, “kamachinapaj atiyniyoj kasqankuta mana waqaycharqankuchu, maypichus tiyakunankutataj saqerqanku” chay angelestawan kikinchan. Chay ángeles, Sodomapi tiyakoj runaspis “khuchichakuyman, mana ruwana millay juchamanpis qokorqanku”. Chantá, 1 Pedro 3:19, 20 versiculospi “Noé arcata ruwashajtin, chaypacha”, mana kasukoj karqanku chay angelesmanta parlan (2 Ped. 2:4, 5). Chayrayku, Noej tiemponmanta mana kasukoj angelespa ruwasqankutaqa Sodomapi, Gomorrapi ima runas juchallikusqankutawan kikinchasunman.

Rikunchej jina Génesis 6:2, 4 versiculospi “Diospa churisnin” nispaqa angelesmanta parlashan, pikunachus aychallikorqanku, warmiswan puñuykuspataj khuchichakorqanku.

Apóstol Pedro chay espiritusmanta parlaspa nerqa: “Mana kasukoj karqanku, maypachachus Diosqa jatun pacienciawan suyasharqa Noé arcata ruwashajtin, chaypacha”, nispa (1 Ped. 3:20). Arí, Pedroqa Satanaspa oqharikuyninman ujchaykukoj espiritusmanta parlasharqa. Judas nillarqataj: “Angelespis kamachinapaj atiyniyoj kasqankuta mana waqaycharqankuchu, maypichus tiyakunankutataj saqerqanku. Chaykunataqa tuti laqhapi wiñay cadenaswan Dios wataykorqa, juchachasqa kanankupaj jatun juicio pʼunchaypi”, nispa (Jud. 6).

¿Imaynamantataj chay espíritus Noej tiemponpi mana kasukorqankuchu? Paykunaqa niraj Jatun Para kashajtin aychallikorqanku, Diostaj mana chaytachu ruwanankuta munarqa (Gén. 6:2, 4). Paykunaqa warmiswan ima puñuykorqanku, chaytaj millay karqa, mana chaypajchu ruwasqa karqanku (Gén. 5:2). Chay mana kasukoj sajra angelesqa juchachasqa kananku tiempo chayamojtin chinkachisqa kanqanku. Chaykamataj Judas nerqa jina “tuti laqhapi” kashanku, nisunman presochasqas jina.

¿Maykʼajtaj chantá imaynamantataj Jesús “presochasqa espiritusman” willamorqa? Apóstol Pedro nisqanman jinaqa Jesús espiritunejta “kawsarichisqa” kasqanmanta qhepaman karqa (1 Ped. 3:18, 19). Chantapis, Jesús willamorqa nisqanqa Pedro niraj ñaupaj kaj cartanta qhelqashajtin willamusqanta rikuchin. Chayrayku, Jesusqa kausarimusqanmanta qhepamanchá chay sajra espiritusman castigasqa kanankuta willanman karqa. Chay willaytaj mana suyakuyniyoj kanankupajchu karqa, manaqa juchachasqa kanankupaj (Jon. 1:1, 2). Jesusqa wañunankama sinchʼi creeyniyoj, cheqa sonqotaj kasqanwan, kausarimusqanwan ima Kuraj Supay paypa contranpi mana imata ruwayta atisqanta rikucherqa. Chayrayku chayta paykunaman willayta aterqa (Juan 14:30; 16:8-11).

Jesusqa tumpamantawan Satanasta, chay sajra angelestawan wataykuspa ukhu pachaman wijchʼuykonqa (Luc. 8:30, 31; Apo. 20:1-3). Chay pʼunchay chayamunankamataj chay mana kasukoj espiritusqa tuti laqhapi jina kashanku, chinkachisqapunitaj kanqanku (Apo. 20:7-10).