1, 2. ¿Imaraykutaj chʼampaykuna kasqanmanta mana Jehovata juchachanachu? Sutʼinchay.

KAYPI tʼukuriy: ashkha watastaña warmiykiwan kʼachata kausakunki. Chaywanpis uj pʼunchay llankʼayniykimanta wasiykiman chayaspa, tukuy imata qʼala tʼustisqata taripanki, vasospis, platospis qʼala pʼakirasqa kashanku. Wasiykita ajinata taripaspaqa nichá “¿imajtintaj warmiy kayta ruwanri?” nispachu niwaj, astawanqa “¿pitaj kayta ruwanri?” nispachá niwaj. ¿Imaraykutaj chayta niwaj? Imaraykuchus warmiyki ni jaykʼaj chay jinata ruwananta yachanki.

² Kay tiempopipis Jallpʼanchejqa chay tʼustisqa wasi jina kashan. Imajtinchus jallpʼa, aire, yaku ima chʼichichasqa kashanku, chantapis sajra ruwaykunawan, khuchichakuykunawan ima juntʼa kashan. Noqanchejtaj Bibliamanta yachakusqanchejrayku, mana Jehovachu chaykunamanta juchayoj kasqanta yachanchej. Payqa Jallpʼata ruwarqa uj paraíso kananpaj (Gén. 2:8, 15). Chantapis Jehová Diosqa munakuymin (1 Juan 4:8). Ashkha chʼampaykunamantaqa Kuraj Supay juchayoj kasqanta yachanchej, imajtinchus pay “kay pachata kamachejqa” (Juan 14:30; 2 Cor. 4:4).

3. ¿Imaynamantá yuyayninchejta qʼewisunman?

³ Chaywanpis mana tukuy chʼampaykunasninchejmantachu Satanasta juchachasunman. Imajtinchus wakin kuteqa noqallanchejtaj juchayoj kasunman (Deuteronomio 32:4-6 leey). Ajinapuni kasqanta reparajtinchejpis, juchasapa kasqanchejrayku yuyayninchejta qʼewisunman, chaytaj mana allinman chayachiwasunman (Pro. 14:12). ¿Imaynamantá? Noqanchej juchayoj kasqanchejta reparakunamanta chayri Satanasta juchachanamantaqa Jehovata juchachayta qallarisunman. Astawanpis, “Tata Diosta juchachaspa”, sonqonchejpi mayta phiñakusunman (Pro. 19:3).

4, 5. ¿Imaynatataj uj runa Jehovapaj phiñakunman?

⁴ ¿Cheqamantachu “Tata Diosta juchachaspa”, sonqonchejpi  mayta phiñakusunman? Arí, chaywanpis qhasilla kanman (Isa. 41:11). ¿Imatá tarisunman Jehovapaj phiñakuspa? Uj takiykunata qhelqaj runa nerqa: “Makisninchejqa may juchʼuysitus Dioswan maqanakunapajqa”, nispa. Ni pi Jehovaj contranta oqharikuyta munasunmanchu. Jinapis Proverbios 19:3 nin: “Runaj wampu kaynenqa ñanninta qʼewin; chaywampis Tata Diosta juchachaspa, sonqompi mayta phiñakun”, nispa. Arí, uj runaqa Jehovapaj sonqonpi phiñakunman, chaytaj mana reparaylla kanman. Chayraykutaj imaynallamantapis Jehovapaj phiñakunman, qotuchakuyta saqepunman chayri mana tukuy sonqochu imatapis ruwanman.

⁵ ¿Imaraykutaj “Tata Diosta juchachaspa” sonqonchejpi phiñakusunman? ¿Imataj yanapawasunman chay tojllapi mana urmanapaj? Chay tapuykunaman kutichina, imajtinchus Jehovawan sumajta masichakunanchejqa chaymanta kashan.

6, 7. ¿Imaraykutaj Moisespa tiemponmanta israelitas Jehovapaj rimayta qallarerqanku?

⁶ ¿Imaraykutaj uj cheqa sonqo cristiano “Tata Diosta juchachaspa” sonqonpi phiñakunman? Chayta yachanapajqa phishqa imasmanta parlarina. Biblia parlasqan runasmantataj yachakuna, pikunachus chay tojllapi urmarqanku (1 Cor. 10:11, 12).

⁷ Wajkuna mana allinta parlasqanku urmachiwasunman (Deuteronomio 1:26-28 leey). Israelitasqa Egiptopi wata runa kasqankumanta kacharichisqa karqanku. Chaypajqa Jehová chunka ñakʼariykunata Egiptoman kachaykorqa, faraontawan soldadosnintawantaj Puka Qochapi wañuracherqa (Éxo. 12:29-32, 51; 14:29-31; Sal. 136:15). Israelitasta Sumaj Jallpʼaman yaykuchinanpajña kashajtintaj, paykunaqa Jehovapaj rimayta qallarerqanku. ¿Imaraykú? Kachasqanku wateqajkuna yaqha tukuyninku mana allin willaykunata apamusqankurayku (Núm.14:1-4). Chay jawataj, chay mita runasmanta ni mayqen “sumaj jallpʼata” rikunanpaj kausarqachu (Deu. 1:34, 35). Kunanpis, wajkuna mana allinta parlasqankoqa creeyninchejta llauchʼiyachinman, Jehovapaj sajrata rimanapajtaj tanqawasunman.

8. ¿Imaraykutaj Isaiaspa tiemponpi israelitas Jehovata juchachayta qallarerqanku?

⁸ Llakiykuna, chʼampaykuna ima sonqo pʼakisqata saqewasunman (Isaías 8:21, 22 leey). Isaiaspa tiemponpeqa Judá llajta llakiypi rikukusharqa. Imajtinchus enemigosninkuwan muyurisqa kasharqanku, mikhunapis pisiyasharqa, ashkhastaj yarqhaymanta wañusharqanku. Chaywanpis aswan llakiy karqa Jehovata mana uyarisqankurayku paymanta karunchakushasqanku (Amós 8:11). Jehovaj yanapayninta maskʼanankumantaqa mayta phiñakuspa reyninkuta, Diosninkutapis “maldeciyta” qallarerqanku. Arí, paykunaqa chʼampaykunapi rikukusqankumanta Jehovata juchacharqanku. Noqanchejpis, llakiykunapi, chʼampaykunapi ima rikukuspa Jehovata juchachayta qallarisunman, sonqonchejpitaj nisunman: “¿Maypitaj Jehová kasharqa mana yanapanawanpajri?”, nispa.

9. ¿Imaraykutaj Ezequielpa tiemponmanta israelitas yuyayninkuta qʼewerqanku?

⁹ Mana tukuy imatachu sutʼita yachanchej. Ezequielpa tiemponmanta israelitasqa mana tukuy imatachu sutʼita yachaspa, “Tata Diospa ruwasqanqa mana cheqanchu”, nispa nerqanku (Eze. 18:29). Chayta nispaqa imachus cheqan kasqanta yuyasqankuman jinalla, pisita yachasqankuman jinallataj Diosta juzgasharqanku. Noqanchejpis, wakin kutipeqa Bibliapi leesqanchejmanta chayri kausayninchejpi imaspichus rikukushasqanchejmanta, mana tukuy imatachu entiendeyta atisunman.  Chayraykutaj, ichapis sonqonchejpi nisunman: “Tata Diospa ruwasqanqa mana cheqanchu”, nispa (Job 35:2).

10. ¿Imaynatataj Adán jina pantasunman?

¹⁰ Juchanchejmanta, pantasqanchejmanta Diosta tumpanchej. Adanqa juchallikusqanmanta Jehovata tumparqa (Gén. 3:12). Adanqa yachashaspa juchallikorqa, imapichus rikukunantapis yacharqa, jinapis Diosta tumparqa, paypis mana allin warmita qonman jina. Chaymantapachataj Adán jinallataj, ashkha runas pantayninkumanta Diosta tumpanku. Chayrayku kayta tapurikuna kanman: “¿Pantasqaymanta sonqo pʼakisqa kashajtiy, Jehovaj kamachiykunasnin mana juntʼay atina kasqantachu yuyani?”, nispa.

11. ¿Imaynatataj Jonás jina pantasunman?

¹¹ Noqallanchejpi yuyasunman. Profeta Jonasqa Jehová ninivitasmanta khuyakojtin phiñakorqa (Jonás 4:1-3). ¿Imaraykú? Ichapis Nínive llajta thuñisqa kananta nisqan mana juntʼakojtin, llulla profeta ninankuta manchachikusqanrayku. Jonasqa payllapi yuyarqa, nitaj ninivitas pesachikusqankumanta tumpitallatapis khuyakorqachu. Noqanchejpis Jonás jinallataj, noqallanchejpi yuyaspa Jehová manaraj kay pachaj tukukuyninta apamusqanmanta paypaj phiñakusunman. Unaytaña Jehovaj pʼunchaynin qayllitapiña kasqanta willashanchej chayqa, runas chaymanta sajrata parlajtinku ichá manaña Jehovawan pacienciakuyta atisunmanchu (2 Ped. 3:3, 4, 9).

12, 13. ¿Imatá ruwasunman Jehová imatapis ruwasqan chayri imapis kananta saqesqan mana allinchu rijchʼawajtinchej?

¹² ¿Imatá ruwasunman Jehová imatapis ruwajtin chayri imapis kananta saqesqan mana allinchu rijchʼawajtinchej? Ajinata yuyay mana allinchu kasqanta yuyarikuna. Proverbios 19:3 nin: “Runaj wampu kaynenqa ñanninta chinkachin, chaymantaqa Señorpa contranta sonqompi phiñakun”, nispa (Qheshwa Biblia, QB). Kunanqa phishqa imasmanta parlarina, chaykunataj ima llakiypi rikukojtinchejpis mana Jehovata juchachanapaj yanapawasun.

 ¹³ Jehovawan astawan masichakuna. Jehovawan sumajta masichakusun chayqa mana paypaj phiñakusunchu (Proverbios 3:5, 6 leey). Jehovapeqa tukuy sonqonchejwan atienekunanchej tiyan. Chantapis, ama ancha yachayniyoj kasqanchejtaqa yuyakunachu, nitaj noqallanchejpi yuyanachu (Pro. 3:7; Ecl. 7:16). Ajinamanta, ima phutiypi rikukuspapis mana Jehovata juchachasunchu.

14, 15. ¿Imatá ruwasunman wajkuna mana allinta parlasqanku mana pantachinawanchejpaj?

¹⁴ Mana saqenachu wajkuna mana allinta parlasqanku pantachinawanchejta. Moisespa tiemponmanta israelitasqa Jehová Sumaj Jallpʼaman pusaykunanpi atienekuyta atinkuman karqa (Sal. 78:43-53). Chaywanpis, kachasqanku wateqajkunamanta chunka mana allin willaykunata apamusqankurayku, “Dios atiyninwan enemigosninkumanta salvasqanta” mana yuyarikorqankuchu (Sal. 78:42). Jehová noqanchejrayku imastachus ruwasqanpi tʼukurisun chayqa paywan astawan masichakusun. Ajinamanta, wajkuna mana allinta parlajtinkupis mana Jehovamanta karunchakusunchu (Sal. 77:11, 12).

¹⁵ ¿Imataj Jehovamanta karunchallawasunmantaj? Hermanosmanta pantasqata yuyasqanchej (1 Juan 4:20). Aarón kuraj kaj sacerdote kananpaj churasqa kashajtin israelitasqa contranta rimarqanku, Jehovataj paypaj rimashasqankuta nerqa (Núm. 17:10). Kunanpis, Jallpʼapi Diospa llajtanta ñaupajman apajkunaj contranpi rimayta qallarisunman chayqa Jehovaj contranta rimashasunman (Heb. 13:7, 17).

16, 17. ¿Imatá yuyarikunanchej tiyan llakiykunapi rikukuspa?

¹⁶ Mana Jehovachu llakiykunasninchejmanta juchayoj kasqanta yuyarikuna. Jehovaqa Isaiaspa tiemponmanta israelitas paymanta karunchakojtinkupis, yanapayta munallarqapuni (Isa. 1:16-19). Kunanpis, Jehovaqa ima chʼampaypi rikukojtinchejpis noqanchejmanta llakikun, yanapaytataj munawanchej, chayta yachaytaj mayta sonqochawanchej (1 Ped. 5:7). Astawanpis, Jehovaqa payman cheqa sonqo kanapaj yanapanawanchejta niwanchej (1 Cor. 10:13).

¹⁷ Job jina llakiykunapi rikukuspaqa mana Jehovachu juchayoj kasqanta yuyarikunanchej tiyan. Jehovaqa sajra ruwaykunata chejnikun, cheqan kajtataj munakun (Sal. 33:5). Chayrayku Jobpa amigon Eliú jina yuyana, pay nerqa: “Ama yuyallaychejpischu Tukuy Atiyniyoj Diosqa ima sajratapis ruwasqanta, chayri ima mana cheqan kajtapis”, nispa (Job 34:10). Jehovaqa llakiykunasninchejmanta mana juchayojchu, astawanqa “tukuy ima allin kaj, kʼacha kaj imaqa patamanta qosqa kashan” (Sant. 1:13, 17).

18, 19. ¿Imaraykutaj mana Jehovamanta sajrata yuyananchejchu tiyan? Sutʼinchay.

¹⁸ Jehovamanta ni jaykʼaj sajrata yuyanachu. Diosqa cheqan kajtapuni ruwan, yuyasqasnintaj yuyasqasninchejmanta aswan patapi kashanku (Isa. 55:8, 9). Chayrayku, mana tukuy imatachu entiendeyta atisqanchejta llampʼu sonqowan reparakuna (Rom. 9:20). Runasqa wakin kutilla imamantapis tukuy imata sutʼita yachanchej. Biblia kay jinata nisqanqa cheqapuni: “Juiciopi ñaupaj kaj palabrasqa allinman rijchʼakun; enemigon chayamojtintaj tukuy mana kikintachu nin”, nispa (Pro. 18:17, QB).

¹⁹ Sutʼincharinapaj, uj amigonchej imatachus ruwasqanta mana entiendespa chayri mana allinchu rijchʼawajtinchej, ¿usqhayllatachu yuyasunman mana cheqantachu ruwasqanta? Mana. Astawanqa mana tukuy imatachu yachasqanchejtachá yuyasunman, astawanraj unaytaña payta rejsinchej chayqa. Amigonchejmanta pantaj runa kajtinpis chayta yuyanchej chayqa, astawanrajchá Tatanchej Jehovapi atienekusunman. Imajtinchus Paypa ñannenqa  ñanninchejmanta aswan patapi kashan, jinallataj yuyasqasninpis yuyasqasninchejmantaqa.

20, 21. ¿Imaraykutaj pichus juchayojta juchachana?

²⁰ Pichus juchayojta juchachana. ¿Imaraykú chayta ruwananchej tiyan? Imaraykuchus wakin chʼampaykunapi rikukusqanchejmantaqa noqallanchejtaj juchayoj kasunman. Jina kajtenqa reparakunapuni (Gál. 6:7). Ama Jehovataqa juchachanachu. ¿Imaraykutaj chayta ruwaspa pantashasunman? Kaywan kikincharina: uj autoqa ichá usqhayta purinanpaj ruwasqa kanman. Chaywanpis uj chofer chay autota ancha usqhaytañataj purichisqanrayku ñanta muyuykushaspa ujllata chʼallparparikojtin, ¿nisunmanchu chay autota ruwaj juchayoj kasqanta? Mana. Jehovapis kausayninchejpi imatapis ajllayta atinapaj jina ruwawarqanchej, allinta ajllanapajtaj yuyaychawanchej. Chayrayku, Ruwawajninchejta pantasqanchejmanta juchachaspaqa pantashasunman.

²¹ Chaywanpis, mana tukuy chʼampaykunasninchejchu pantasqanchejrayku kanman. Wakin kuteqa “tiempo chayamojtin, wakimpaj allin imas tiyan, wakimpajtaj mana” (Ecl. 9:11). Chantapis, ashkha chʼampaykunamantaqa Satanás juchayoj (1 Juan 5:19; Apo. 12:9). Paymá enemigonchejqa, mana Jehovachu (1 Ped. 5:8).

22, 23. ¿Imatá yuyarikunanchej tiyan chʼampaykunapi rikukuspa?

²² Chʼampaykunapi chayri llakiykunapi rikukuspaqa Josuemantawan, Calebmantawan yuyarikuna. Paykunaqa Sumaj Jallpʼata wateqaj rispa, chunka wateqajkunamanta nisqaqa allin willaykunata apamorqanku (Núm. 14:6-9). Iskayninku Jehovapi atienekusqankuta rikuchejtinkupis, chʼin pampapi israelitaswan khuska tawa chunka watasta karqanku. Chaywanpis, mana chayrayku llakikorqankuchu, nitaj Jehovaj contranpipis thutorqankuchu. Astawanqa Jehovapi atienekorqanku, Jehovataj paykunata bendicerqa, imajtinchus mita masisninku chʼin pampapi wañojtinkupis, iskayninku Sumaj Jallpʼaman yaykorqanku (Núm. 14:30). Noqanchejpis “ama saykʼunachu allin kajta ruwaspa”, ajinamanta Jehovaj bendicionninta japʼisunchej (Gál. 6:9; Heb. 6:10).

²³ Chʼampaykuna, juchasninchej, wajkuna pantasqanku ima mana llauchʼiyachinawanchejpaj, ¿imatá ruwasunman? Jehová may jina kʼacha kasqanpi tʼukurina, mosoj pachapipis kashasunman jinaña yuyana, tapurikunataj: “¿Maypitaj kashayman karqa mana Jehovata rejsispari?” nispa. Astawanpis, Jehovaj qayllallanpipuni kana, amataj payta juchachaspa sonqonchejpi phiñakunachu.